Y dyddiad gwreiddiol ar gyfer y frwydr yn erbyn y pencampwr Juergen Braehmer oedd 2 Ebrill. Bydd yr ornest yn cael ei chynnal yn O2 Arena yn Llundain. Mae Cleverly wedi bod yn paratoi i ymladd ers canol mis Ionawr ar ôl i Braehmer, sy'n 32 mlwydd oed, gael gorchymyn gan y WBO i drefnu'r ornest. Tynnodd Braehmer allan o ornest yn erbyn y pencampwr WBA Beibut Shumenov ar 8 Ionawr oherwydd salwch. Nid yw'r Almaenwr wedi ymladd ers mis Mawrth y llynedd, ac mae ei ddyfodol yn y sgwâr wedi bod mewn amheuaeth ar ôl iddo gael ei ddedfrydu i 16 mis o garchar am ymosodiad treisgar. Mae Braehmer yn apelio yn erbyn y penderfyniad yna, ac wedi cael caniatâd i barhau i ymladd wrth ddisgwyl am y broses gyfreithiol i gymryd ei chwrs. Roedd Cleverly yn gobeithio cael ymladd enillydd yr ornest rhwng Braehmer a Shumenov yn hwyrach yn y flwyddyn, ond mae ei gyfle i wireddu ei freuddwyd o ennill coron byd wedi cyrraedd yn gynt na'r disgwyl. Mae'r gŵr o Gefn Fforest wedi ennill pob un o'i 21 gornest ac yn gyn-bencampwr Ewrop, y Gymanwlad a Phrydain.
 | 
