Am yr ail waith yn olynol fe loriwyd Calzaghe yn y rownd gyntaf wrth i law dde Jones ffrwydro yn wyneb ei wrthynebydd.

Ond fe gododd y Calzaghe yn ôl ar ei draed ac ar ddiwedd yr ornest roedd ymhell ar y blaen ym marn pob un o'r beirniaid.

Fe ddioddefodd Jones doriad cas uwchben ei lygad dde yn y seithfed rownd wrth i Calzaghe fwynhau meistrolaeth lwyr dros y gŵr sydd yn cael ei gyfri yn un o gewri'r sgwâr focsio.

John Ifans a Wynford Jones yn canu clodydd y Cymro

Mari Morgan yn wreiddiol o'r Ffwrnais ger Llanelli gafodd y fraint o arwain y miloedd o Gymru yn y dorf o dros 14,000 i gyd-ganu Hen Wlad Fy Nhadau cyn yr ornest yn un o leoliadau mwyaf eiconig y gamp.

Er iddo ddechrau'n bwyllog gan lanio ergydion cyson gyda'i law dde, lloriwyd y Cymro gan law dde Jones gyda 39 eiliad o'r rownd yn weddill gan orfodi Calzaghe i dderbyn cyfrif o wyth a bu'n rhaid iddo ddioddef eiliadau pryderus cyn cael dianc i ddiogelwch ei gornel.

Cafwyd ymateb egniol gan Calzaghe yn yr ail rownd, ond er ei holl ymdrechion ni thrafferthwyd ei wrthwynebydd yn ormodol, ac roedd y dde ar draws yn peri problemau i'r gŵr o Drecelyn wrth i'r Americanwr ymestyn ei fantais o drwch blewyn.

Gwelwyd perfformiad llawer mwy awdurdodol gan y Cymro wrth i iddo ennill y drydedd a'r bedwaredd rownd ac fe ddechreuodd gwatwar ymdrechion ei wrthwynebydd.

Gyda Jones yn cael ei gornelu yn gyson, cynyddu gwnaeth hyder Calzaghe ac er bod llaw dde Jones yn fygythiad parhaol roedd y momentwm yn troi i gyfeiriad y Cymro wrth i'r ornest gyrraedd hanner ford.

Ac yntau o dan bwysau cynyddol fe ddioddefodd Jones doriad cas uwchben ei lygad dde wrth i'r Cymro ddechrau rheoli a dim ond ei dueddiad i edrych yn orhyderus oedd yn mynd i'w atal rhag hawlio ei 46 buddugoliaeth o'r bron.

Drwy gydol gweddill yr ornest roedd y gwaed yn pistyllio o lygad Jones ac roedd Calzaghe yn ddidrugaredd wrth iddo hawlio buddugoliaeth feistrolgar o 118-109.

Ar ddiwedd yr ornest dywedodd Calzaghe, 36, nad oedd o eto wedi gwneud unrhyw benderfyniad ynglŷn â'i ymddeoliad.