Shane yn amheuaeth
 15 Medi 2005 Gall asgellwr Y Gweilch, Shane Williams, fethu gemau prawf Cymru yn yr hydref oherwydd anaf i'w goes. Mae Williams yn disgwyl canlyniadau sgan ar yr anaf, sydd wedi achosi trafferth iddo wrth baratoi ar gyfer y tymor newydd. "Ein gobaith yw y bydd Shane yn holliach ar gyfer y Cwpan Heineken ac yna i Gymru ar gyfer gemau prawf yr hydref," meddai hyfforddwr y Gweilch, Sean Holley. "Ond tan ein bod yn dadansoddi canlyniadau'r sgan, 'da ni ddim yn gwybod y ffeithiau yn iawn." Mae un arall o'i gyd chwaraewyr Gavin Henson yn amheuaeth ar gyfer gemau Cymru ym mis Tachwedd. Ac yn ogystal mae Ceri Sweeney yn dioddef o anaf a bydd yn methu'r gêm yn erbyn Leinster yn y Gynghrair Geltaidd nos Wener. Ond maent yn disgwyl y bydd yn dychwelyd i wynebu Ulster y penwythnos ganlynol.
|
