Seland Newydd 38-19 Y Llewod
09 Gorffennaf 2005
Llwyddodd Seland Newydd i gwblhau chwalfa'r Llewod â buddugoliaeth yn y Prawf olaf yn Auckland. Sgoriodd y Crysau Duon bum cais wrth i Conrad Smith, Ali Williams, Tana Umaga (2) a Rico Gear groesi a chiciodd Luke McAlister 13 pwynt. Roedd y Llewod ar ei hôl 24-12 ar yr egwyl er eu perfformiad grymus yn y sgrym ac er bod Umaga wedi ymweld â'r gell callio. Ond sgoriodd y capten ei ail gais yn yr ail hanner a sgoriodd Gear yn yr eiliadau olaf wedi cais gysur Lewis Moody. Gorffennodd tîm Sir Clive Woodward eu taith â saith buddugoliaeth mewn 11 gêm ond collwyd y gemau â'r Maori yn ogystal âr tair gêm Brawf.Cafwyd colled 21-3 yn Christchurch a chwalfa 48-18 yn Wellington wrth i'r Crysau Duon sgorio 107 pwynt yn y gyfres, record yn erbyn Y Llewod.
Nid yw Seland Newydd wedi colli ar Barc Eden ers i Ffrainc eu trechu yno ym 1994.
Wedi munud o dawelwch i gofio am y ffrwydriadau yn Llundain, Y Llewod gafodd y pwyntiau cyntaf wrth i Stephen Jones drosi cic gosb.
Ac fe ddylent fod wedi cipio cais wedi saith munud wrth i Josh Lewsey garlamu i lawr yr asgell chwith, a llwyddodd Gethin Jenkins i sefydlu safle gwych ond methodd y clo, Donncha O'Callaghan, â defnyddio'r dynion oedd tu allan iddo.
Cafodd y Llewod driphwynt hawdd wrth i Umaga gael ei ddanfon i'r gell callio am orwedd ar y bêl.
Ond tarodd y Crysau Duon yn ôl yn syth wrth i'r wythwr, Sione Lauaki, fwydo Smith i guro Geordan Murphy a Mark Cueto a charlamu o dan y pyst.
A thra'n parhau i chwarae â 14 dyn, cipiodd y Crysau Duon gais arall wrth i'r mewnwr, Dwayne Peel, fethu dal ei afael ar gic isel McAlister a neidiodd y clo, Williams, ar y bêl rhydd.
Trosodd Jones am driphwynt arall i'r Llewod ond cafodd y dyfarnwr, Jonathan Kaplan, lond bol ar gwyno'r Llewod rhai munudau'n ddiweddarach gan symud cic gosb yn ei blaen 10 llath oedd yn caniatâu'r Crysau Duon i'w drosi.
Trosodd y Cymro, Jones, gic gosb arall wedi 23 munud cyn iddi ddechrau bwrw hen wragedd â ffyn ym Mharc Eden.
Wrth i'r Llewod geisio lledu'r chwarae, manteisiodd y tîm cartref a phan fethodd Lewsey â chasglu cic McAlister dros yr amddiffyn, sgoriodd Umaga gais gwych o dan y pyst yn dilyn gwaith da gan y maswr a'r mewnwr i lawr yr ochr dde.
Wedi'r egwyl croesodd Umaga am y pedwerydd cais ond wedi cyfnod hir yn hanner y Crysau Duon, daeth cais gysur i'r Llewod wrth i Moody cael ei yrru drosodd yn dilyn sgarmes.
Ond wrth i'r gêm gyrraedd ei therfyn llwyddodd Gear i sgorio'r cas olaf un wrth gicio drwodd a disgyn ar y bêl.
Seland Newydd: Muliaina; Gear, Smith, Umaga (capt), Sivivatu; McAlister, Kelleher; Lauaki, So'oialo, Collins; Williams, Jack; Somerville, Mealamu, Woodcock.
Eilyddion: Witcombe, Johnstone, Ryan, Holah, Marshall, Evans, Howlett.
Y Llewod: Murphy; Cueto, Greenwood, Thomas (capt), Lewsey; Jones, Peel; Jenkins, Byrne, White; O'Callaghan, O'Connell; Easterby, Moody, Jones.
Eilyddion: Bulloch, Rowntree, Corry, Williams, Dawson, O'Gara, Horgan.
