Otago 19-30 Y Llewod
18 Mehefin 2005
Llwyddodd y Llewod i sicrhau hwb i'w hyder â buddugoliaeth yn Dunedin wythnos cyn y Prawf cyntaf. Roedd cais gan Will Greenwood wedi dod â'r ymwelwyr yn gyfartal 13-13 ar yr egwyl wedi cais Danny Lee roi'r tîm cartref ar y blaen. Daeth cais gan Ryan Jones, oedd yn disgleirio yn ei gêm gyntaf ers ymuno â'r daith, i roi'r Llewod ar y blaen cyn i drydydd cais gan Shane Williams selio'r fuddugoliaeth. Ychwanegodd Charlie Hodgson 15 pwynt, wrth i Nick Evans gicio gweddill pwyntiau Otago. Llwyddodd Jones i ddenu sylw'r dewiswyr a chodi ei obeithion o sicrhau lle yn y tîm Prawf â pherfformiad penigamp gyda blaenasgellwr Iwerddon a'r Scarlets, Simon Easterby, hefyd yn profi ei fod â'r gallu i frwydro am le yn y 22 ar gyfer Sadwrn nesaf.Dechreuodd Otago ar dan gyda Evans yn trosi cic gosb gynnar cyn taro'r postyn ag ail gic wedi Martyn Williams cael ei gosbi am gamsefyll.
Ond llwyddodd Evans i ddyblu'r fantais wedi Jones daclo'r maswr yn uchel.
Ond dechreuodd Y Llewod ganfod eu traed gyda Geordan Murphy, Denis Hickie a Williams yn cael cyfle i redeg at Otago.
Trosodd Hodgson ddwy gic gosb i ddod â'r Llewod yn gyfartal ond bu rhaid talu'n ddrud am daclo gwan wrth i Otago groesi chwe munud cyn yr egwyl yn dilyn cic sâl gan Shane Williams.
Carlamodd y canolwr, Neil Brew, trwy dacl Hickie gan fwydo Lee wrth i Hodgson geisio'i daclo a throsodd Evans i roi Otago 13-6 ar y blaen.
Ond llwyddodd y Llewod i ddod yn gyfartal diolch i chwarae cyfrwys gan Hodgson.
Ffugiodd y maswr ei fod am gicio cic gosb i'r gornel chwith cyn ei gicio i'r gornel dde lle casglodd Greenwood y bêl i sgorio o dan y pyst.
Trosodd Hodgson y cais ond wedi'r egwyl aeth Otago ar y blaen unwaith eto â chic gosb arall gan Evans.
Ond wedi 52 munud tarodd y Llewod yn ôl wrth i Shane Williams gasglu'r bêl yn safle'r maswr a bwydo ei gyd-Gymro, Jones, i garlamu drosodd, gyda Hodgson yn trosi i'w rhoi 20-16 ar y blaen.
Gwrthododd Otago ag ildio gyda cic gosb arall gan Evans yn dod â'r tîm cartref o fewn pwynt i'r Llewod.
Ond seliwyd y fuddugoliaeth wrth i Jones gymryd cic gosb sydyn ac wedi'r bêl symud yn sydyn trwy'r olwyr, croesodd Williams am gais wedi ochrgamu'r amddiffynnwr olaf yn hyfryd.
Otago: Horton; Pedersen, Brew, Mapusua, Saunders; Evans, Lee; Dunlea, MacDonald, Hoeft; Donnelly, Levi; Webb, Blackie, Newby (capt).
Eilyddion: Vercoe, Aldworth, McClintock, Soakai, Smylie, Bambry, Shoemark.
Y Llewod: Murphy; Hickie, Greenwood, D'Arcy, Williams; Hodgson, Cusiter; Stevens, Bulloch (capt), Rowntree; O'Callaghan, Shaw; Jones, Williams, Easterby.
Eilyddion: Thompson, Sheridan, Grewcock, Owen, Dawson, Smith, O'Gara.
