Croft yn arwyddo
20 Medi 2005
Mae capten Morgannwg, Robert Croft, wedi arwyddo cytundeb fyddai'n ei gadw ar Erddi Soffia hyd at 2008. Disgynnodd y sir Gymreig o Adran Gyntaf Pencampwriaeth y Siroedd wedi colli 14 o'u 16 gêm, ond mae Croft yn benderfynol o newid pethau. Dywedodd y troellwr 35-mlwydd-oed: "Mae fy nghalon ym Morgannwg a bydd yno am y tair blynedd nesaf. "Mae gennym her i ddatblygu'r genhedlaeth nesaf o chwaraewyr a rwy'n edrych ymlaen at hynny." Ychwanegodd Croft: "Mae wedi bod yn flwyddyn anodd ond rwy'n dal i fwynhau chwarae. "Petawn yn gallu cyrraedd 1,000 wiced ac efallai 12,500 rhediad byddai'n dda gan fod ceisio am nod o'r fath yn eich helpu allan o'r gwely yn y bore.
"Ond mae yr un mor bwysig sicrhau llwyddiant i Forgannwg eto."
Cadarnhaodd Croft fod Morgannwg eisoes wedi siarad ag ambell i chwaraewr gyda'r gobaith o'u harwyddo ar gyfer y tymor newydd.
Dywedodd: "Mae Matt Elliott eisoes wedi arwyddo a byddwn yn trafod â Mike Kasprowicz cyn bo hir.
"Rydym hefyd wedi bod yn siarad â chwaraewyr Prydeinig.
"Ni fyddai'n deg rhoi enwau ar hyn o bryd - ni fyddai'n deg gan nad wyf wedi siarad â gweddill y tîm eto. Nhw fydd y cyntaf i gael gwybod."
Daeth tymor siomedig Morgannwg i ben â cholled o 75 rhediad yn erbyn Hampshire sydd yn golygu fod y sir wedi colli bob gêm ar Erddi Soffia am y tro cyntaf yn eu hanes.
