Roedd yn fraint i'r plant gael mwynhau'r profiad gwerthfawr yma.

Dyma'r cerddi a gyfansoddwyd yn ystod y bore:

Castell Dolforwyn

Does dim cod post i'w roi
Yn y Tom Tom,
Sgrin lwyd fel niwl o flaen y car.

Sbageti o ffyrdd bach cefn gwlad
A dim arwyddion ond enwau ffermydd.

Parcio a dringo'r llethr sgïo i fyny'r bryn.
Coeden ar draws y llwybr,
Bwldog yn cysgu ag un llygad ar agor.

Sut storm oedd honno pan ddaeth y môr a llyncu tir Llywelyn,
Pan syrthiodd y sêr,
Pan aeth hiraeth yn yfory,
Ar hynt y gwynt a'r glaw?

Ar ben y bryn,
Mae darnau o hyd ar goll
O'r jig-so cerrig,
Ond mae'r gyfrinach i'w gweld
Ac mae'r ffynnon yn llawn.

Haul tanbaid Mawrth y cyntaf
Uwch canol Maldwyn, calon Cymru
Ac yn Ysgol Dafydd Llwyd
Mae castell coch Cymraeg.

Gan ddisgyblion Blwyddyn 5 a 6

Cennin Pedr Cymru

Milwyr y gwanwyn
Yn herio'r gaeaf gyda'u cefnau'n syth.
Corn aur ein cerddoriaeth, yn llawn o hen ganeuon,
'Chydig o hwyl, 'chydig o hiraeth.
Llyw crwn yn mynd â ni ar daith i ddathlu iaith a thir,
Hen siwrne i Gymru newydd.
Haul ein dydd, seren ein nos
Yn dân yn ein calonnau ar hyd y flwyddyn.

Gan ddisgyblion Blwyddyn 3 a 4.