Sut rydym yn cyflogi

Crynodeb

Rydym yn canolbwyntio ar bwrpas. Fel un o’r brandiau cyfryngau mwyaf dibynadwy yn y byd, rydym yn cynnig creadigrwydd o’r radd flaenaf a chynnwys arloesol i hysbysu, addysgu a diddanu ein cynulleidfaoedd.

Mae meddylfryd yn bwysig. Rydym yn chwilio am bobl gadarnhaol sy’n dilyn ein gwerthoedd ac yn sicrhau bod ein diwylliant yn parhau i fod yn gynhwysol ac yn llawn cyfleoedd.

Rydym yn gwerthfawrogi gwahaniaeth. Pobl sy’n hunanymwybodol, yn frwdfrydig ac sy’n darparu cynnwys o’r radd flaenaf a rhagoriaeth weithredol.

Rydym yn chwilio am botensial yn hytrach na pherffeithrwydd, a byddwn yn rhoi cyfle i chi roi eich profiad a’ch cryfderau trosglwyddadwy ar waith mewn gwahanol ffyrdd.

Beth allwch chi ei ddisgwyl

Cam 1 - Gwneud cais

Ar ôl i chi ddarllen yr hysbyseb swydd yn llawn, cliciwch ‘Gwneud cais nawr’. Efallai y bydd rhai cwestiynau sgrinio fel rhan o’r cais – mae’r rhain wedi’u cynllunio i roi gwell syniad i ni a ydych chi’n bodloni meini prawf allweddol y swydd ac i chi benderfynu a yw’r swydd yn addas i chi.

Cam 2 - Sgrinio

Rydym yn defnyddio dulliau sgrinio amrywiol i sicrhau ein bod yn dod o hyd i’r dalent orau un ar gyfer y swydd. Bydd aelod o’r tîm Caffael Talent yn adolygu eich cais yn erbyn meini prawf allweddol ac yn cefnogi’r rheolwr sy’n penodi i lunio rhestr fer. Gall y broses gynnwys asesiadau, fel profion sgrinio ar-lein neu i brofion crebwyll, i werthuso a ydych chi’n bodloni’r meini prawf allweddol ac i’ch helpu chi i benderfynu a yw’r swydd yn addas i chi.

Cam 3 - Cyfweliad

Byddwn yn awyddus i ddod i’ch adnabod chi a’ch sgiliau, eich gwybodaeth, eich profiad a’ch cryfderau. Rydym hefyd yn awyddus i glywed pam rydych chi’n meddwl y byddech chi’n rhagori yn y swydd a pham fod gennych chi ddiddordeb yn y BBC. Byddwch yn cael rhagor o fanylion am beth i’w ddisgwyl.

Cam 4 - Asesiadau

Yn dibynnu ar y swydd, efallai y bydd camau asesu ychwanegol. Gallai hyn fod yn dasg neu’n ymarfer sy’n benodol i’r swydd er mwyn rhoi’r cyfle gorau i chi ddangos i ni beth rydych chi’n gallu ei wneud.

Cam 5 - Cynnig a chynefino

Os aiff popeth yn iawn, byddwch yn cael swydd - rydym yn edrych ymlaen at eich croesawu i’r BBC!

Addasiadau rhesymol

Cymorth gyda’ch cais

Rydym yn falch o fod yn Gyflogwr Hyderus o ran Anabledd Lefel 2. Os oes angen unrhyw addasiadau rhesymol arnoch chi i wneud cais am swydd neu i gael cyfweliad am swydd gyda’r BBC, cysylltwch â ni drwy anfon e-bost at reasonable.adjustments@bbc.co.uk gan nodi cyfeirnod y swydd yn y llinell pwnc. Rydym yn fwy na pharod i gael sgwrs gyfrinachol i drafod sut gallwn eich cefnogi drwy’r broses. Mae sawl ffordd y gallwn dderbyn ceisiadau ac addasu ein prosesau dethol i ddiwallu eich anghenion. P’un a fydd eich proses ddethol yn digwydd ar-lein neu wyneb yn wyneb, gallwn wneud addasiadau fel darparu isdeitlau ar Teams, rhoi mwy o amser i chi, neu addasu ein cwestiynau i sicrhau eich bod yn cael y profiad gorau posib.

Defnyddio deallusrwydd artiffisial yn y broses recriwtio

Yn y BBC, rydyn ni’n gwybod bod adnoddau fel deallusrwydd artiffisial yn gallu eich helpu i baratoi, rhoi trefn ar eich meddyliau a theimlo’n fwy hyderus wrth wneud cais am swydd. Ond chi sydd o ddiddordeb mawr i ni.

Rydyn ni eisiau clywed am eich profiadau, eich sgiliau a’r hyn sy’n eich cymell. Y ceisiadau cryfaf yw’r rhai sy’n adlewyrchu eich meddwl, eich cyflawniadau a’ch persbectif eich hun. Felly, er bod croeso i chi ddefnyddio deallusrwydd artiffisial i gael cymorth, rydyn ni’n eich annog i wneud yn siŵr bod eich cais yn adlewyrchu eich llais eich hun ac yn adrodd eich stori.

Pryd y gall AI helpu eich cais:

• Gall adnoddau deallusrwydd artiffisial fod yn ddefnyddiol pan gânt eu defnyddio’n foesegol ac yn dryloyw. Er enghraifft;
• Prawfddarllen a gwirio gramadeg - Sicrhau bod yr hyn rydych chi'n ei ysgrifennu yn glir ac yn broffesiynol
• Fformatio eich CV neu lythyr eglurhaol - Helpu gyda chynllun, strwythur neu ddarllenadwyedd
• Ymarfer cwestiynau cyfweliad - Defnyddio deallusrwydd artiffisial i ymarfer cwestiynau cyffredin neu fagu hyder
• Egluro disgrifiadau swydd - Gofyn i AI esbonio termau anghyfarwydd neu ddisgwyliadau

Mae'r rhain yn eich helpu i gyflwyno eich hun ar eich gorau, nid fersiwn rhywun arall ohonoch.

Pryd na ddylid defnyddio deallusrwydd artiffisial:

• Gofynnwn i chi osgoi defnyddio deallusrwydd artiffisial mewn ffyrdd sy’n cuddio eich gwir lais neu’n camliwio eich galluoedd;
• Llunio llythyrau eglurhaol neu ddatganiadau personol
• Cyflwyno ymatebion wedi eu hysgrifennu gan ddeallusrwydd artiffisial i gwestiynau cais nad ydynt yn adlewyrchu eich profiad eich hun
• Defnyddio deallusrwydd artiffisial i ddynwared eich llais mewn cyfweliadau fideo neu sain
• Dibynnu ar ddeallusrwydd artiffisial i ffugio cyflawniadau, sgiliau neu gymwysterau

Os ydyn ni’n amau bod deallusrwydd artiffisial wedi cael ei ddefnyddio i gynhyrchu cynnwys, gall effeithio ar sut mae eich cais yn cael ei asesu

Beth rydyn ni’n ei werthfawrogi fwyaf:

Rydyn ni’n chwilio am bobl sy’n dod â chwilfrydedd, gonestrwydd a gwreiddioldeb i’w gwaith. Mae hynny'n dechrau gyda sut rydych chi'n gwneud cais. Defnyddiwch ddeallusrwydd artiffisial i roi sglein, nid i esgus bod yn rhywun arall. Gadewch i'ch llais go iawn ddisgleirio, oherwydd dyna pwy rydyn ni eisiau gweithio gyda nhw.