တိုက်ရိုက်ထုတ်လွှင့်မှု, တောင်ကြီးမြို့ ပုဂ္ဂလိကကျောင်းက အဆောင်နေကျောင်းသူတစ်ဦးအဓမ္မပြုကျင့်ခံရမှုက စွပ်စွဲခံထားရသူ လူငယ်ဖမ်းဆီးခံရ

တိုက်ရိုက် ထုတ်လွှင့်ချက်

1. လွန်ခဲ့သော ၂ နာရီ ကမန္တလေး၊ငါန်းဇွန်က ကြားဖြတ်တိုက်ခိုက်ခဲ့မှုမှာ စစ်ကော်မရှင်တပ်ဖွဲ့ဝင် ၁၀ ဦးခန့်သေဆုံးတယ်လို့ STF ပြော

   မန္တလေးတိုင်းထဲက ရွေးကောက်ပွဲ အပိုင်း ၃ ထဲမှာ ပါဝင်တဲ့ ငါန်းဇွန်မြို့နယ်ထဲက မြို့သာရဲစခန်းကို အင်အားဖြည့်ဖို့ထွက်လာတဲ့ စစ်တပ်စစ်ကြောင်းကို မနေ့ ဇန်နဝါရီ ၁၉ ရက်မှာ မိုင်းဆွဲတိုက်ခိုက်ခဲ့တယ်လို့ ငါန်းဇွန်အထူးတပ်ဖွဲ့(S.T.F)က ပြောပါတယ်။

   စစ်ကြောင်းသွားရာလမ်းပိုင်းဖြစ်တဲ့ စက်မှုဇုန် မြို့သာလမ်းမကြီးပေါ် မြို့သာနဲ့ ကျွဲဇိမ်ရွာကြားမှာ တိုက်ခိုက်ခဲ့တာလို့ ငါန်းဇွန်အထူးတပ်ဖွဲ့ခေါင်းဆောင် ကိုငြိမ်းချမ်းက ပြောပါတယ်။

   မိုင်းဆွဲတိုက်ခိုက်မှုကြောင့် စစ်တပ်ဘက်က “ခန့်မှန်း ၁၀ ဦး‌ကျော်လောက် သေဆုံးနိုင်တယ်” လို့ သူကဆိုပါတယ်။

   သေဆုံးတဲ့ ရုပ်အလောင်းတွေကိုတော့ စစ်ကော်မရှင်တပ်က ကားပေါ်သယ်တင်ပြီး မြို့သာရဲစခန်းကို ဆက်မောင်းသွားတယ်လို့ S.T.F ရဲ့ ထုတ်ပြန်ချက်ကဆိုပါတယ်။

   သေဆုံးမှုတွေနဲ့ပတ်သက်လို့ ဘီဘီစီက သီးခြားအတည်မပြုနိုင်သေးပါဘူး။

   စစ်ကြောင်းမှာ စစ်ကား ၆ စီးပါပြီး စစ်ကားစုစုပေါင်းမှာ တပ်ဖွဲ့ဝင်အင်အား ၁၅၀ ဝန်းကျင်လောက်ပါတယ်လို့ မြေပြင်သတင်းရင်းမြစ်တစ်ဦးက ပြောပါတယ်။

   စစ်ကြောင်းတိုက်ခိုက်ခံရပြီးနောက် ဇန်နဝါရီ ၁၉ ရက်မှာပဲ စစ်တပ်နဲ့ ငါန်းဇွန်အထူးတပ်ဖွဲ့တို့ကြား အပြန်အလှန်ပစ်ခတ်မှုလည်းရှိခဲ့တယ်လို့ ကိုငြိမ်းချမ်းက ပြောပါတယ်။

   ပစ်ခတ်မှုအပြီး တစ်ရက်တည်းမှာပဲ စစ်တပ်ရဲ့ တိုက်လေယာဉ်တချို့ ဝဲပျံပြီး ကင်းထောက်တာတွေ လုပ်ခဲ့တယ်လို့ မြေပြင်အခြေအနေသိသူတစ်ဦးက ဆိုပါတယ်။

   တိုက်ပွဲဖြစ်တဲ့ မြို့သာရွာရဲ့ တောင်ဘက်ခြမ်းမှာ စစ်တပ်နဲ့ တော်လှန်ရေးတပ်တွေကြား စစ်ရေးတင်းမာနေတဲ့ မြင်းခြံနဲ့နွားထိုးကြီးမြို့နယ်တွေရှိပါတယ်။

   မြို့သာရဲ့ မြောက်ဘက်မှာတော့ စစ်ကော်မရှင်လေတပ်ရှိတဲ့ တံတားဦးမြို့ရှိပါတယ်။

   စစ်ကော်မရှင်ကတော့ မြို့သာရဲစခန်းကိုသွားတဲ့ စစ်တပ်စစ်ကြောင်း မိုင်းခွဲတိုက်ခိုက်ခံရတာနဲ့ပတ်သက်ပြီး သတင်းမထုတ်ပြန်သေးပါဘူး။

2. လွန်ခဲ့သော ၄ နာရီ ကမြန်မာရွေးကောက်ပွဲကို အသိအမှတ်မပြုဘူးလို့ မလေးရှားပြော

   မြန်မာမှာ စစ်တပ်က အပိုင်း ၃ ပိုင်းနဲ့ ကျင်းပနေတဲ့ ‌ရွေးကောက်ပွဲကို အာဆီယံက အသိအမှတ်မပြုဘူးလို့ မလေးရှားနိုင်ငံခြားရေးဝန်ကြီး မစ္စတာ မိုဟာမက် ဟာဆန်က ဒီနေ့ မှာ ပြောလိုက်ပါတယ်။

   စစ်တပ်ရဲ့ ရွေးကောက်ပွဲ နောက်ဆုံးအပိုင်း ၃ မကျင်းပမီ ၅ ရက်အလိုမှာပဲ မလေးရှားနိုင်ငံခြားရေးဝန်ကြီးက လွှတ်တော်မိန့်ခွန်းပြောရာမှာ မြန်မာမှာလုပ်နေတဲ့ရွေးကောက်ပွဲကို အာဆီယံအနေနဲ့ အသိအမှတ်မပြုဘူးလို့ ထပ်ပြောလိုက်တာဖြစ်ပါတယ်။

   ရွေးကောက်ပွဲကို ထောက်ခံမှာမဟုတ်သလို စောင့်ကြည့်လေ့လာသူတွေလည်း စေလွှတ်မှာမဟုတ်ဘူးလို့ မလေးရှားနိုင်ငံခြားရေးဝန်ကြီးက ပြောပါတယ်။

   မနှစ်က မလေးရှားနိုင်ငံ၊ ကွာလာလမ်ပူမှာကျင်းပခဲ့တဲ့ အာဆီယံခေါင်းဆောင်တွေရဲ့ ထိပ်သီးအစည်းအဝေးမှာလည်း ရွေးကောက်ပွဲစောင့်ကြည့်လေ့လာသူတွေစေလွှတ်ဖို့ စစ်ကော်မရှင်ရဲ့ တောင်းဆိုချက်ကို အာဆီယံက ပယ်ချခဲ့တယ်လို့ ဒီနေ့ လွှတ်တော်အစည်းအဝေးမှာ မလေးရှားနိုင်ငံခြားရေးဝန်ကြီးက ထည့်ပြောခဲ့ပါတယ်။

   “အာဆီယံက စောင့်ကြည့်သူတွေ မလွှတ်ဘူးလို့ ပြောခဲ့ပြီးပါပြီ။ ဒါကြောင့် ရွေးကောက်ပွဲကိုလည်း အသိအမှတ်ပြုမှာမဟုတ်ပါဘူး” လို့ မစ္စတာ မိုဟာမက် ဟာဆန်က ပြောခဲ့တာပါ။

   ရွေးကောက်ပွဲစောင့်ကြည့်သူများ စေလွှတ်ပေးဖို့ မြန်မာရဲ့ တောင်းဆိုချက်ကို အဲဒီအချိန်က အာဆီယံအလှည့်ကျ ဥက္ကဋ္ဌဖြစ်တဲ့ မလေးရှားနိုင်ငံက ငြင်းပယ်ခဲ့ပေမဲ့ အဖွဲ့ဝင်နိုင်ငံအချို့က သူတို့သဘောနဲ့ သူတို့လုပ်ဆောင်ဖို့ ဆုံးဖြတ်ခဲ့ကြတယ်လို့လည်း သူက ထည့်သွင်းပြောကြားပါတယ်။

   ဒီဇင်ဘာ ၂၈ ရက်က ပြုလုပ်တဲ့ ‌ရွေးကောက်ပွဲအပိုင်း ၁ မှာ‌တော့ ထိုင်း၊ အိန္ဒိယ၊ ရုရှား၊ ဘယ်လာရုစ်၊ ဖိလစ်ပိုင်၊ လာအို၊ နီဂွာဂါရာ၊ နီပေါနဲ့ ပါကစ္စတန် နိုင်ငံတွေက လေ့လာစောင့်ကြည့်ရေးအဖွဲ့တွေ စေလွှတ်ခဲ့ပါတယ်။

   ရွေးကောက်ပွဲအပိုင်း ၂ က အပိုင်း ၁ ထက် တိုက်ခိုက်မှုပိုလာ

   သမ္မတရွေးပွဲမှာ ဘယ်လိုအားပြိုင်မှုတွေရှိလာနိုင်မလဲ

3. လွန်ခဲ့သော ၄ နာရီ ကဝိုင်းမော်၊ လမြန်ရွာမှာ တိုက်ပွဲပြင်းထန်နေ, ဗန်းမော်မှာလည်း နှစ်ဖက်ပစ်ခတ်မှုဆက်ရှိ

   ကချင်ပြည်နယ်၊ ဝိုင်းမော်မြို့နယ်ထဲက KIA ထိန်းချုပ်ထားတဲ့ လမြန်ရွာမှာ စစ်တပ်နဲ့ ကချင်လွတ်လပ်‌ရေးတပ်(KIA)၊ ပြည်သူ့ကာကွယ်ရေး(PDF) ပူးပေါင်းတပ်တွေကြား တိုက်ပွဲပြင်းထန်နေတယ်လို့ မြေပြင်သတင်းရင်းမြစ်တချို့က ပြောပါတယ်။

   KIA ရဲ့ ပြောရေးဆိုခွင့်ရှိသူ ဗိုလ်မှူးကြီးနော်ဘူကတော့ လမြန်ရွာမှာ ပစ်ခတ်သံတွေ စကြားရတယ်လို့ မြေပြင်ကနေ သိရတဲ့အကြောင်း ဘီဘီစီကို ဒီနေ့နေ့လယ်ပိုင်းမှာ အတည်ပြုပါတယ်။

   “စစ်ရေးအခြေအနေ နောက်ဆက်တွဲကိုတော့ မသိရသေးဘူး” လို့ သူက ဖြည့်ပြောပါတယ်။

   ‌မြေပြင်စစ်ရေးသတင်းရင်းမြစ်ကတော့ ဒီနေ့ မနက်ပိုင်းမှာ စစ်တပ်နဲ့ KIA ပူးပေါင်းတပ်တွေကြား နာရီနဲ့ချီ တိုက်ပွဲ ဖြစ်ပွားခဲ့ပြီးနောက် စစ်တပ်ရဲ့ ‌မြောက်ပိုင်းတိုင်းစစ်ဌာနချုပ်(မပခ)ထဲကနေ လမြန်ရွာဘက်ကို လက်နက်ကြီးတွေနဲ့ ပစ်ခတ်နေတာလို့ ပြောပါတယ်။

   လမြန်ရွာဟာ မြစ်ကြီးနားမြို့ရဲ့ အရှေ့ဘက်ခြမ်း၊ ဧရာဝတီမြစ်တစ်ဖက်ကမ်းမှာရှိပြီး ၁၅ မိုင်ဝန်းကျင်သာ ကွာဝေးပါတယ်။

   တစ်ဖက် ကချင်ပြည်နယ်ထဲက ဗန်းမော်မှာလည်း စစ်တပ်နဲ့ KIA ပူးပေါင်းတပ်တွေကြား လက်နက်ကြီးတွေ ဒရုန်းတွေနဲ့ အပြန်အလှန် ပစ်ခတ်မှုတွေ ဆက်ရှိနေတယ်လို့ ရှေ့တန်းသတင်းရင်းမြစ်တစ်ဦးက ပြောပါတယ်။

   ဗိုလ်မှူးကြီးနော်ဘူကတော့ စစ်တပ်ဘက်က ဗန်းမော်ဒေသထဲမှာ ပစ်ခတ်မှုလုပ်နေတာတွေကို တန်ပြန်တဲ့အနေနဲ့ တန်ပြန်ပစ်ခတ်မှုတွေလုပ်နေတယ်လို့ ပြောပါတယ်။

   “စစ်တပ်က လေကြောင်းတိုက်ခိုက်တာမရှိပေမဲ့ လက်နက်ရိက္ခာထုတ်တွေတော့ လေကြောင်းကနေ နေ့တိုင်းပို့နေတယ်” လို့ သူက ရှင်းပြပါတယ်။

   စစ်ကော်မရှင်ကတော့ ကချင်ပြည်နယ်ထဲက စစ်ရေးအခြေအနေတွေနဲ့ပတ်သက်လို့ သတင်းမထုတ်ပြန်သေးပါဘူး။

   ကန်ပိုက်တီ(ကံပိုင်တည်) - KIA ထိန်းချုပ်လာတဲ့တရုတ်နယ်စပ်ကုန်သွယ်ရေးစခန်းလမ်းပိုင်း

   ကေအိုင်အေရဲ့ ဗန်းမော်ထိုးစစ် လနဲ့ချီကြာလာတာ ဘာကြောင့်လဲ

4. လွန်ခဲ့သော ၆ နာရီ ကမြဝတီ၊ တကျော့ပြန် ဖလူးတိုက်ပွဲ စစ်တပ်က ဒရုန်းနဲ့ ဗုံးကြဲတိုက်ခိုက်

   ထိုင်း-မြန်မာနယ်စပ် ကရင်ပြည်နယ်၊ မြဝတီမြို့တောင်ဘက်က ဖလူး ဘက်မှာ စစ်တပ်နဲ့ ကရင်အမျိုးသားအစည်းအရုံး KNU လက်အောက် KNLA/PDF ပူးပေါင်းတပ်တွေကြား မနေ့ဇန်နဝါရီ ၁၉ ရက်ကစပြီး ဒီနေ့ မနက်ပိုင်းအထိ နှစ်ဖက်တိုက်ပွဲပြန်ဖြစ်နေတယ်လို့ မြေပြင်သတင်းရင်းမြစ်တချို့က ပြောပါတယ်။

   စစ်တပ်က တိုက်ပွဲဖြစ်တဲ့နေရာကို “ဒရုန်းနဲ့ ဗုံးတွေကြဲနေတယ်။ လက်နက်ကြီးနဲ့လည်း ပစ်တယ်”လို့ သူကဆိုပါတယ်။

   ဖလူးဒေသထဲ စစ်ကြောင်းထိုးလာတဲ့ စစ်တပ်ရဲ့ စစ်ကြောင်းကို KNLA/ PDF ပူးပေါင်းတပ်တွေက တိုက်ခိုက်ခဲ့ရာကနေ တိုက်ပွဲဖြစ်တာဖြစ်ပြီး ဒီနေ့ ဇန်နဝါရီ ၂၀ ရက်မနက်ပိုင်းအထိ ပစ်ခတ်သံတွေကြားနေရတယ်လို့ ဖလူးဒေသခံတစ်ဦးက ပြောပါတယ်။

   KNLA ထိန်းချုပ်ထားတဲ့ ဖလူးတပ်စခန်းအပြင် မြဝတီ-ဝေါလေလမ်းပိုင်းနဲ့ မင်းလက်ပံဒေသတကြောကို စစ်တပ်ကပြန်ထိန်းချုပ်နိုင်ဖို့ ၂၀၂၅ အောက်တိုဘာကတည်းက စစ်တပ်က စစ်ကြောင်းတွေထိုးပြီး ထိုးစစ်ဆင်နေတာဖြစ်ပါတယ်။

   နိုဝင်ဘာနဲ့ ဒီဇင်ဘာမှာ တိုက်ပွဲ‌တွေပိုပြင်းထန်ခဲ့ပြီး‌နောက် ငြိမ်ခဲ့ပေမဲ့ အခု ၂၀၂၆ ဇန်နဝါရီမှာ တကျော့ပြန် တိုက်ပွဲပြန်ဖြစ်လာတာပါ။

5. လွန်ခဲ့သော ၇ နာရီ ကတရားမဝင်ခိုးမှုနဲ့ ဖမ်းဆီးခံလိုက်ရတဲ့ မြန်မာတွေက ထိုင်းရဲ မွေးနေ့ကို သီချင်းဆိုဆု‌တောင်းပေးခဲ့

   ထိုင်းနိုင်ငံ၊ အန်သွန်ပြည်နယ် ချိုင်အိုခရိုင်ထဲက အာရှလမ်းမကြီးပေါ်မှာ မနေ့ ဇန်နဝါရီ ၁၉ ရက်မှာ ပစ်ကပ်ထရပ်ကား ၂ စီးနဲ့ တရားမဝင် ခိုးဝင်လာတဲ့ မြန်မာ ၂၂ ဦးကို ဖမ်းဆီးခဲ့တယ်လို့ ထိုင်းအာဏာပိုင်တွေက ကြေညာပါတယ်။

   ဖမ်းဆီးအမှုဖွင့်တဲ့ ကိစ္စတွေဆောင်ရွက်နေချိန်အတွင်း ရဲအရာရှိတွေက သူတို့ တပ်ကြပ်ကြီးရဲ့ မွေးနေ့အတွက် ကိတ်မုန့်နဲ့ မွေးနေ့ဆုတောင်းပေးချိန် ဖမ်းဆီးခံထားရတဲ့ မြန်မာ ၂၂ ဦးကလည်း မွေးနေ့သီချင်းသီဆိုပေးပြီး ဆုတောင်းပေးခဲ့ကြတယ်လို့ ရဲအရာရှိတချို့က ထိုင်းမီဒီယာတွေကို ဖြေကြားပါတယ်။

   မြန်မာတွေ ခိုးဝင်မှုနဲ့ပတ်သက်လို့ လူကုန်ကူးမှုနဲ့ သံသယရှိပြီး လွတ်မြောက်နေတဲ့ နောက်ထပ်လူ ၃ ဦးကိုလည်း စွဲချက်တင်ထားတယ်လို့ သိရပါတယ်။

   အရှိန်ပြင်းပြင်းနဲ့မောင်းလာတဲ့ ကား ၂ စီးဟာ ရုတ်တရပ်လမ်းကြောင်းပြောင်းလိုက်တာကြောင့် ရဲတပ်ဖွဲ့က သံသယရှိပြီး စစ်ဆေးရင်းကနေ ကားအနောက်ဘက် ကုန်တင်ခန်းတွေမှာလည်း လူတွေကို ဝှက်ပြီးသယ်ဆောင်လာတာကို တွေ့ရှိခဲ့တာလို့ ဆိုပါတယ်။

   ဖမ်းဆီးခံရသူတွေဟာ မြန်မာကနေ လှေနဲ့ ဖြတ်ကူးလာသူတွေဖြစ်ပြီး ချင်းရိုင်ခရိုင် မယ်ဆိုင်ခရိုင်ကတဆင့် ဘန်ကောက်မှာ အလုပ်လုပ်ဖို့တက်လာရင်း ဖမ်းဆီးခံလိုက်ရတာဖြစ်ပါတယ်။

   ဖမ်းဆီးခံရသူတွေမှာ နိုင်ငံကူးလက်မှတ်နဲ့ ခရီးသွားဆိုင်ရာ အထောက်အထားစာရွက်တွေ ကိုင်‌‌ဆောင်ထားတာမရှိဘူးလို့ ထိုင်းအာဏာပိုင်တွေကဆိုပါတယ်။

   ဖမ်းဆီးခံရသူတွေဟာ ထိုင်းနိုင်ငံထဲ တရားမဝင်လမ်းကြောင်းကနေလာဖို့ အကျိုးဆောင်ကို ပွဲစားခ ဘတ် ၁၃,၀၀၀ ခန့်ပေးဆောင်ခဲ့ရတယ်လို့လည်း စကားပြန်ကတဆင့် သိရတဲ့အကြောင်း ထိုင်းအာဏာပိုင်တွေက ဆိုပါတယ်။

   ရွှေ့ပြောင်းနေထိုင်သူများကို ခွင့်ပြုချက်မရှိဘဲ ဝင်ရောက်နေထိုင်မှုနဲ့ တရားစွဲဆိုထားတယ်လို့ သိရပါတယ်။

6. လွန်ခဲ့သော ၉ နာရီ ကတောင်ကြီးမြို့ ပုဂ္ဂလိကကျောင်းက ကျောင်းသူတစ်ဦးကို အဓမ္မပြုကျင့်မှုနဲ့ အမှုဖွင့်ခံရတဲ့ လူငယ်ဖမ်းဆီးခံရ, ရဲဘက်က နစ်နာသူမိန်းကလေးရဲ့ ဆေးစစ်ချက်တွေရထားပြီလို့ဆို

   ရှမ်းပြည်နယ်တောင်ပိုင်း၊ တောင်ကြီးမြို့က အောင်မြေသစ်ကိုယ်ပိုင်အထက်တန်းကျောင်းမှာဖြစ်ခဲ့တဲ့ အဆောင်နေ ကျောင်းသူတစ်ဦး အဓမ္မပြုကျင့်ခံရတယ်ဆိုတဲ့ဖြစ်စဥ်မှာ ကျူးလွန်သူအဖြစ်စွပ်စွဲခံထားရသူ လူငယ်ကို ရဲတပ်ဖွဲ့က ဖမ်းဆီးလိုက်ပြီလို့ အမှုဖြစ်စဥ်ကိုသိထားတဲ့ မြို့ခံတချို့ကပြောပါတယ်။

   ကနဦးအချက်အလက်တွေအရ တောင်ကြီးမြို့၊ သစ်တောရပ်ကွက်မှာရှိတဲ့ အောင်မြေသစ်ကိုယ်ပိုင်အထက်တန်းကျောင်းမှာ အဆောင်နေပြီး ပညာသင်ကြားနေတဲ့ Grade-12 ကျောင်းသူတစ်ဦးကို ကျောင်းပိုင်ရှင်ရဲ့ သားဖြစ်သူ လူငယ်က အဓမ္မပြုကျင့်ခဲ့တယ်ဆိုတဲ့ အမှုဖွင့် တိုင်ကြားချက်ကြောင့် ဇန်နဝါရီ ၁၈ ရက်မှာ ဖမ်းဆီးခံခဲ့ရတာလို့ ဆိုပါတယ်။

   ''အဲဒီလူငယ်ကို သစ်တောရပ်ကွက်၊ အရှေ့မြို့ပတ်လမ်းပေါ်မှာရှိတဲ့ ‌ဟိုတယ်တစ်ခုအနီးမှာ ဖမ်းဆီးရမိခဲ့တာ'' လို့ မြို့ခံတစ်ဦးက ပြောပါတယ်။ လက်ရှိမှာစွပ်စွဲခံထားရသူကို တောင်ကြီးမြို့မရဲစခန်းမှာ ဖမ်းဆီးထိန်းသိမ်းထားပြီး ရာဇသတ်ကြီးပုဒ်မ ၃၇၆ (မုဒိန်းမှု)နဲ့ နစ်နာတဲ့သူဘက်က အမှုဖွင့်ထားတယ်လို့ သိရပါတယ်။

   ဖြစ်စဥ်အရ ဇန်နဝါရီ ၁၅ ရက် နေ့လယ်ပိုင်းမှာ နစ်နာသူ မိန်းကလေးဟာ နေမကောင်းတာကြောင့် စာသင်ခန်းကနေ အဆောင်မှာပြန်နားနေချိန်မှာပဲ စွပ်စွဲခံထားရသူ လူငယ်ရောက်လာပြီး အဓမ္မပြုကျင့်ခဲ့တာလို့ ဒေသတွင်းသတင်းတွေမှာ ဖော်ပြပါတယ်။

   ဒါအပြင် အဓမ္မပြုကျင့်ချိန်မှာ နစ်နာသူမိန်းကလေးကို မဖွယ်မရာဓာတ်ပုံတွေရိုက်ယူခဲ့ပြီး ကျပ်သိန်း ၂၀ ငွေညှစ်ခဲ့တယ်လို့လည်း ဖော်ပြထားကြပါတယ်။ ဒီအချက်အလက်အပါအဝင် အမှုဖြစ်စဥ်နဲ့ ပတ်သက်ပြီး သီးခြားအတည်ပြုနိုင်ဖို့နဲ့ အသေးစိတ်သိရဖို့ ဘီဘီစီက ‌တောင်ကြီးမြို့မရဲစခန်းကို ဆက်သွယ်နေပေမဲ့ ဖုန်းမကိုင်သေးတာကြောင့် မေးမြန်းလို့မရသေးပါဘူး။

   ဒါအပြင် ဖမ်းဆီးခံထားရသူဟာ ကျောင်းပိုင်ရှင်ရဲ့သားဖြစ်တယ်ဆိုတဲ့အချက်ကိုလည်း သီးခြားအတည်ပြုနိုင်ဖို့ မေးမြန်းနေပါတယ်။ လက်ရှိ အောင်မြေသစ်ကျောင်းဟာ ဖွင့်ထားဆဲဖြစ်ပေမယ့် မြို့ခံ ကျောင်းသူ၊ ကျောင်းသားမိဘ တော်တော်များများကတော့ ကျောင်းသားတွေကို ကျောင်းအဆောင်မှာမထားတော့ဘဲ အိမ်ပြန်ခေါ်နေကြတယ်လို့ မြို့ခံတစ်ဦးက အတည်ပြုပါတယ်။

   “နယ်ဝေးကနေလာတဲ့ ကျောင်းသားတွေတော့ ကျန်နေတာပေါ့” လို့ သူကဆိုပါတယ်။ အောင်မြေသစ်ကျောင်းမှာ တက်ရောက်နေတဲ့ ကျောင်းသူတစ်ဦး မဖွယ်မရာကျူးလွန်ခံရမှုနဲ့ပတ်သက်လို့ ဘီဘီစီက ကျောင်းကို ဆက်သွယ်မေးမြန်းခဲ့ရာ ကျောင်းဘက်က ဖုန်းကိုင်ဖြေဆိုပေမဲ့ မေးခွန်းတွေမေးမြန်းချိန်မှာတော့ တစ်စုံတစ်ရာတုံ့ပြန်ဖြေကြားတာမရှိဘဲ ဖုန်းချသွားပါတယ်။

   ထပ်မံဖြည့်စွက်ချက် - တောင်ကြီးမြို့က ရဲစခန်းသတင်းရင်းမြစ်နဲ့ ထပ်မံဆက်သွယ်မေးမြန်းချက်အရ နစ်နာသူ အမျိုးသမီးငယ်ကို ဆေးရုံမှာ ဆေးစစ်ခဲ့ပြီး ဆေးစစ်ချက်လည်း ရဲဘက်က ရရှိထားပြီလို့ သိရှိရပါတယ်။ ကျူးလွန်သူအဖြစ် အမှုဖွင့်ခံထားရသူဟာ ကျောင်းအုပ်ရဲ့ သားဖြစ်ကြောင်းလည်း ရဲစခန်းသတင်းရင်းမြစ်က အတည်ပြုပါတယ်။

   ''ဟုတ်ပါတယ်။ ကျောင်းပိုင်ရှင်ရဲ့ သားပါ။ သူက ထိုင်းကနေ ပြန်လာတာ သိပ်မကြာသေးပါဘူး။'' လို့ ရဲစခန်းနဲ့ နီးစပ်သူတစ်ဦးက ပြောပါတယ်။

   လက်ရှိမှာ အမှုကို တရားရုံးတင်သွားမှာဖြစ်ပေမဲ့ ကျူးလွန်သူအဖြစ်တိုင်ကြားခံရသူဘက်ကနေ အမှုလိုက်ပေးမယ့်သူမရှိတဲ့အထိဖြစ်လာတယ်လို့ တောင်ကြီးရဲစခန်းရဲ့ သတင်းရင်းမြစ်ကပြောပါတယ်။

7. လွန်ခဲ့သော ၉ နာရီ က

   မင်္ဂလာပါ။ ဇန်နဝါရီ ၂၀ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။