ဆော်ဒီသတင်းသမား ဟာရှော့ဂျီနဲ့ ပတ်သက်တဲ့ ဖြစ်စဉ်အသေးစိတ်
ဓာတ်ပုံ ရင်းမြစ်, Getty Images
- ရေးသားသူ, ကိုသိမ်းမြတ်
- ရာထူးတာဝန်, ဘီဘီစီမြန်မာပိုင်း
ဆော်ဒီသတင်းသမား ဂျမား ဟာရှော့ဂျီ ဟာ အောက်တိုဘာလ ၂ ရက်နေ့က တူရကီနိုင်ငံ အီစတန်ဘူလ် မြို့မှာရှိတဲ့ ဆော်ဒီအာရေးဗျကောင်စစ်ဝန်ရုံးထဲကို ဝင်သွားခဲ့ပါတယ်။ ဒါပေမယ့် ကောက်ရိုးပုံထဲ အပ်ကျသွားသလို ဟာရှော့ဂျီဟာ တခါတည်း ပျောက်ခြင်းမလှ ပျောက်သွားတော့တာပါပဲ။
ဆော်ဒီသတင်းသမား၊ ဝေဖန်ရေးဆရာ၊ စာရေးဆရာ ဂျမားဟာရှော့ဂျီဟာ ဆော်ဒီကောင်စစ်ဝန်ရုံးအတွင်းထဲမှာ တင်ကူးကြံစည်သတ်ဖြတ်တာကို ခံခဲ့ရတယ်လို့ တူရကီသတင်းဇာစ်မြစ်တွေကို ကိုးကားပြီး သတင်းမီဒီယာတွေက ရေးသားထုတ်လွှင့် ကြပါတယ်။ ဟာရှော့ဂျီကို ဆော်ဒီအာရေဗျ ထောက်လှမ်းရေးက လုပ်ကြံသတ်ဖြတ်လိုက်ကြောင်း သက်သေထူနိုင်မယ့် အထောက်အထားတွေ သူတို့မှာ လက်ဆုပ်လက်ကိုင် ရှိတယ်လို့လည်း တူရကီအာဏာပိုင်တွေက ဆိုကြပါတယ်။
ဆော်ဒီအစိုးရအရာရှိတွေကတော့ ငြင်းပါတယ်။ ဟာရှော့ဂျီဟာ ကောင်စစ်ဝန်ရုံးထဲက ပြန်ထွက်သွားပြီးမှ ပျောက်ခဲ့တာပါလို့ သူတို့က ဆိုနေကြပါတယ်။
ဓာတ်ပုံ ရင်းမြစ်, Getty Images
ဟာရှော့ဂျီက ဘယ်သူလဲ
ဟာရှော့ဂျီဟာ ထင်ရှားကျော်ကြားတဲ့ ဆော်ဒီအာရေဗျ သတင်းသမားတယောက်ပါ။ ဆိုဗီယက်-အာဖဂန်စစ်ပွဲမှာ ဆော်ဒီအာရေဗျ ပါဝင်ပတ်သက်မှု၊ အိုစမာဘင်လာနဲ့ ဆော်ဒီအာရေဗျ ပတ်သက်မှု အပါအဝင် နာမည်ကြီး သတင်းဆောင်းပါးတွေကို ဆော်ဒီအာရေဗျ သတင်းဌာန အသီးသီးမှာ တင်ပြခဲ့သူ ဖြစ်ပါတယ်။
တချိန်က သူဟာ ဆော်ဒီအစိုးရရဲ့ ထိပ်တန်းအကြံပေးအရာရှိလည်း ဖြစ်ခဲ့ဖူးရဲ့။ ဒါပေမယ့် မကြာလှပါဘူး။ သူဟာ အစိုးရနဲ့ ခွာပြဲခဲ့ပါတယ်။
မနှစ်ကတော့ သူဟာ အမေရိကန်ကို ထွက်ခွာသွားခဲ့ပါတယ်။ မီဒီယာစကားနဲ့ဆိုရင် ကိုယ့်သဘောနဲ့ကိုယ် ပြည်နှင်ဒဏ်ကျခံမှု self-imposed exile ဆိုတာမျိုးပါ။ အဲဒီနောက်တော့ သူဟာ ဝါရှင်တန်ပို့စ် သတင်းစာကြီးထဲမှာ လစဉ် ဆောင်းပါးတွေ ရေးပါတယ်။ ဆောင်းပါးတော်တော်များများက ဆော်ဒီအိမ်ရှေ့မင်းသား မိုဟာမက်ဘင်ဆော်လမန်ရဲ့ မူဝါဒတွေကို ဝေဖန်ရေးသားချက်တွေပါ။
ဝါရှင်တန်ပို့စ်အတွက် သူ့ရဲ့ ပထမဆုံးဆောင်းပါးမှာ စိတ်ဝင်စားစရာတချို့ ပါပါတယ်။ ဆော်ဒီဘုရင် ဆော်လမန်ရဲ့ အရိုက်အရာကို ပထမဆုံးဆက်ခံမယ့် အိမ်ရှေ့မင်းသားအဖြစ် မိုဟာမက်ဘင်ဆော်လမန်ကို ရွေးချယ်ကြေညာပြီးနောက်မှာ သူကိုယ်တိုင် ဦးစီးကြီးကြပ်တဲ့ အတိုက်အခံနိုင်ငံရေး နှိမ်နင်းဖြိုခွဲမှု ပြုလုပ်ခဲ့တယ်လို့ ရေးသားထားပါတယ်။ အဲဒီဖြိုခွဲနှိမ်နင်းမှုမှာ သူ့ကိုဖမ်းတော့မှာပဲလို့ စိုးရိမ်ပူပန်မိခဲ့ကြောင်း ဟာရှော့ဂျီက ရေးထားပါတယ်။
အဲဒီတုန်းက အဖမ်းခံရသူတွေဟာ သက်သက်အတိုက်အခံလုပ် ဆန့်ကျင်နေတာ မဟုတ်ပါဘူး၊ လွတ်လပ်တဲ့အမြင်ရှိသူတွေပါလို့ ဟာရှော့ဂျီက ဘီဘီစီကို ပြောခဲ့ပါတယ်။ ဘီဘီစီကို အဲသလိုပြောပြီး နောက် ၃ ရက်အကြာမှာ သူပျောက်ဆုံးသွားလိမ့်မယ်လို့ ထင်မထားခဲ့ကြပါဘူး။
ဓာတ်ပုံ ရင်းမြစ်, AFP
ကောင်စစ်ဝန်ရုံးကို ဘာလုပ်ဖို့လာသလဲ
သူက အိမ်ထောင်သစ်ထူထောင်ချင်လို့ သူ့ဇနီးဟောင်းနဲ့ ကွာရှင်းပြတ်စဲထားကြောင်း ထောက်ခံချက်ယူဖို့ သွားခဲ့တာပါ။ ထောက်ခံချက် စာရွက်စာတမ်းရဖို့ စက်တင်ဘာလ ၂၈ ရက်နေ့မှာ သူဟာအီစတန်ဘူလ်မြို့က ဆော်ဒီကောင်စစ်ဝန်ရုံးကို ပထမအကြိမ် သွားခဲ့ပါတယ်။ ကောင်စစ်ဝန်ရုံးက နောက်တခေါက်ပြန်လာဖို့ ချိန်းလိုက်ပါတယ်။
မစ္စတာဟာရှော့ဂျီကို အောက်တိုဘာလ ၂ ရက်နေ့ မွန်းလွဲ ၁ နာရီခွဲမှာလာဖို့ ချိန်းလိုက်ပါတယ်။ ၁ နာရီ ၁၅ မိနစ်မှာ သူရောက်လာပါတယ်။
စိတ်ပူနေကြတဲ့ သူ့မိတ်ဆွေတွေကို သူက နှစ်သိမ့်ခဲ့လိုက်ပါသေးရဲ့။ ပထမတခေါက် သူသွားတော့ လှိုက်လှိုက်လှဲလှဲဆက်ဆံကြတာမို့ ဘာမှ ပြဿနာကြုံမှာ မဟုတ်ပါဘူးတဲ့။
ဒါပေမယ့် စိတ်တုံးတုံးချ ယုံကြည်ထားတာတော့ ဟုတ်ပုံမရဘူး။ သူ့ဇနီးလောင်း တူရကီလူမျိုး ဟာတီးဂျား ဂျန်းဂစ်ဇ်ကို မှာထားခဲ့တာပဲကြည့်ပါလေ။ တကယ်လို့များ သူပြန်ထွက်မလာခဲ့ရင် တူရကီသမ္မတ ရီဂျက်တာရစ်အာဒိုဝမ်ရဲ့ အကြံပေးပုဂ္ဂိုလ်ဆီ ဖုန်းဆက်ပါတဲ့။
သူ့ဇနီးလောင်း ဂျန်းဂစ်ဇ်က အစွမ်းကုန်စောင့်ခဲ့ပါတယ်။ ကောင်စစ်ဝန်ရုံးရှေ့မှာ ဆယ်နာရီကြာအောင် စောင့်ခဲ့တဲ့ အပြင် နောက်တနေ့ ဗုဒ္ဓဟူးနေ့မနက်ခင်းမှာလည်း ပြန်သွားပြီး ရှာခဲ့ပါသေးတယ်။ ဒါပေမယ့် ဟာရှော့ဂျီ ခုထိ ပြန်မလာပါဘူး။
တူရကီဘာပြောလဲ
ကောင်စစ်ဝန်ရုံးအတွင်းမှာပဲ ဟာရှော့ဂျီကို ဆော်ဒီထောက်လှမ်းရေးအဖွဲ့တဖွဲ့က ညှင်းပမ်းသတ်ဖြတ်ပြီးမှ သူ့အလောင်းကို တခြားရွှေ့ခဲ့တယ်လို့ တူရကီ အစိုးရ အရာရှိပိုင်းက ပြောကြပါတယ်။
သူတို့ပြောဆိုချက်ကို သက်သေထူနိုင်မယ့် အသံဖိုင်၊ ဗွီဒီယိုဖိုင်တွေ သူတို့လက်ထဲ မှာရှိတယ်လို့ တူရကီလုံခြုံရေးတွေက ဘီဘီစီကို ပြောပါတယ်။
အာရပ်ဘာသာစကားနဲ့ ပြောတဲ့သူ့အသံကို အဲဒီအသံဖိုင်မှာ နားထောင်နိုင်ပါတယ်။ သူ့ကိုဘယ်လိုစစ်ဆေးခဲ့၊ ဘယ်လိုညှင်းပမ်းခဲ့၊ ဘယ်လိုသတ်ဖြတ်ခဲ့တယ်ဆိုတာ အဲဒီအသံဖိုင်ထဲမှာ ကြားနိုင်ပါတယ်။
အသံဖိုင်ထဲမှာ ဘာတွေပါတယ်ဆိုတဲ့ တူရကီအစိုးရသတင်းစာ ယန်နီရှတ်ဖက်က အသေးစိတ် ထုတ်ရေးခဲ့ပါတယ်။ အဲဒီအထဲမှာ ဟာရှော့ဂျီကို ဘယ်လိုညှဉ်းပန်း နှိပ်စက်ခဲ့တယ်ဆိုတာကိုပါ ဖော်ပြထားပါတယ်။
အဲဒီအသံဖိုင်ထဲမှာ ဆော်ဒီကောင်စစ်ဝန် ဗိုလ်ချုပ်ကြီး မိုဟာမက်အယ်လ်အော်တေးဘီးရဲ့ အသံလည်းပါပါသတဲ့။ ကောင်စစ်ဝန်က (သူတို့အဆို) ဆော်ဒီထောက်လှမ်းရေး ဆိုတဲ့သူတွေကို ပြောတဲ့အသံက "မင်းတို့ အပြင်ထွက် လုပ်ကြကွ။ မင်းတို့လုပ်တာနဲ့ ငါပါဒုက္ခရောက်လိမ့်မယ်" လို့ပြောကြောင်း သတင်းစာက ရေးသားပါတယ်။ "ဆော်ဒီပြန်ရောက်ချိန်မှာ အသက်မသေချင်ရင် ခင်ဗျားပါးစပ်ပိတ်ထား" လို့လူတယောက်က ကောင်စစ်ဝန်ကို ပြောတဲ့အသံကိုတော့ နောက်ထပ်အသံဖိုင်တခုထဲမှာ ကြားရတယ်လို့လည်း သတင်းစာက ရေးသားပါတယ်။
ဟာရှော့ဂျီကို နှစ်နာရီအတွင်း သတ်ဖြတ်ပြီး ကိုယ်ခန္ဓာကို အပိုင်းပိုင်းဖြတ်တောက် ပစ်ခဲ့တယ်လို့ အမည်မဖော်သူအရာရှိတယောက်က နယူးယောက်တိုင်းသတင်းဌာန ကိုပြောပါတယ်။
ဟာရှော့ဂျီပျောက်ဆုံးတဲ့ နေ့မှာ တူရကီနိုင်ငံထဲကို လေယာဉ်နဲ့ ဝင်လာပြီး အဲဒီနေ့မှာပဲ ပြန်ထွက်သွားကြတဲ့ ဆော်ဒီအာရေဗျထောက်လှမ်းရေးအဖွဲ့လို့ သံသယရှိသူ ၁၅ ယောက်ကိုလည်း သူတို့ရှာဖွေ သိရှိခဲ့တယ်လို့ တူရကီသတင်းစာတွေက ဖော်ပြကြပါတယ်။ အဲဒီ ၁၅ ယောက်ထဲက တယောက်ဟာ ဆော်ဒီထောက်လှမ်းရေးအဖွဲ့ရဲ့ ဗိုလ်မှူးကြီးအဆင့်ရှိ မဟာမူထရက်လို့ခေါ်ပြီး လန်ဒန်ရှိ ဆော်ဒီသံရုံးအခြေစိုက်လို့ ဘီဘီစီက သိရပါတယ်။ အဲဒီအထဲက ၄ ယောက်ဟာ ဆော်ဒီအိမ်ရှေ့မင်းသားနဲ့ ချိတ်ဆက်ရှိပြီး နောက်ထပ်တယောက်က ဆော်ဒီပြည်ထဲရေးဝန်ကြီးဌာနရဲ့ အဆင့်မြင့် အရာရှိတယောက်လို့ နယူးယောက်တိုင်းကဆိုပါတယ်။
သူတို့အဖွဲ့ဟာ အရိုးဖြတ်လွှတချောင်းကို တူရကီနိုင်ငံထဲ သယ်လာတယ်၊ သူတို့ထဲက တယောက်ဟာ လူသေခွဲစိတ်ပါရဂူ ဆရာဝန်တယောက်ဖြစ်တယ်လို့ တူရကီအစိုးရ အရာရှိတွေက ပြောပါတယ်။
ထောက်လှမ်းရေးအဖွဲ့ထဲက ၉ ယောက်ဟာ ဆော်ဒီမြို့တော် ရီယဒ် ကနေ ကိုယ်ပိုင်ဂျက်လေယာဉ်နဲ့ တိုက်ရိုက် ရောက်လာခဲ့တယ်လို့ဆိုပါတယ်။ ရောက်ချိန်က အောက်တိုဘာ ၂ ရက်နေ့ မနက် ၃ နာရီ ၁၅ မိနစ် ပတ်ဝန်းကျင်၊ ဟာရှော့ဂျီ ကောင်စစ်ဝန်ရုံးထဲ ရောက်လာမယ့်နေ့။
ကျန်တဲ့သူတွေက အဲဒီနေ့ပဲ နောက်ပိုင်းမှ ရောက်လာခဲ့ကြတယ်။ ဒုတိယ ကိုယ်ပိုင်ဂျက်လေယာဉ်တစင်းသို့မဟုတ် ခရီးသည်တင်လေယာဉ်တစင်းနဲ့။ သူတို့အုပ်စုဟာ ကောင်စစ်ဝန်ရုံးနားက ဟိုတယ်နှစ်ခုမှာ လူခွဲပြီး တည်းခိုခဲ့ကြတယ်လို့ ဆိုပါတယ်။
ဆော်ဒီလူမျိုးအုပ်စုတွေ တူရကီနိုင်ငံ အီစတန်ဘူ လေဆိပ်ထဲဝင်လာပုံ၊ ဟိုတယ်မှာ စာရင်းသွင်းကြပုံ၊ စီစီတီဗွီလုံခြုံရေးကင်မရာကပုံတွေကို တူရကီ ရုပ်မြင်သံကြားက ထုတ်လွှင့်ပြသခဲ့ပါတယ်။
ဟာရှော့ဂျီမရောက်ခင် တနာရီ အလိုလောက်မှာ ကောင်စစ်ဝန်ရုံးဆီဝင်လာကြတဲ့ ကားတွေကိုလည်း ရုပ်မြင်သံကြားမှာ ပြသခဲ့ပါတယ်။ အဲဒီထဲမှာ အနက်ရောင်ဗင်ကားတစီလည်း ပါလေရဲ့။ အဲဒီကားဟာ စုံစမ်းထောက်လှမ်းမှုရဲ့ ဗဟိုချက်ပါပဲ။
ဗင်ကားတွေထဲက တစီးကကောင်စစ်ဝန်ရုံးထဲကနေ လူတချို့ တင်ဆောင်လာပြီး အနီးနားက ဆော်ဒီကောင်စစ်ဝန်ရဲ့ အိမ်ကိုမောင်းသွားခဲ့တယ်လို့ ဆိုပါတယ်။ အဲဒီအချိန်ကတော့ ဟာရှော့ဂျီရောက်လာပြီးနောက် ၂ နာရီ အကြာ။
အဲဒီနောက် သူတို့လူစုဟာ ကိုယ်ပိုင်ဂျက်လေယာဉ်တွေနဲ့ ရီယဒ်ကိုထွက်ခွာသွားခဲ့ ကြတယ်လို့ တူရကီစုံစမ်းရေး အရာရှိတွေက ပြောကြပါတယ်။
ဆော်ဒီကောင်စစ်ဝန်ရဲ့အိမ်မှာ အလုပ်လုပ်တဲ့ တူရကီဝန်ထမ်းတွေကိုလည်း ချက်ချင်း ထွက်သွားကြဖို့ အောက်တိုဘာ ၂ ရက်နေ့မှာ ပြောခဲ့တယ်လို့ တူရကီ သတင်းစာ ဆာဘားကဖော်ပြပါတယ်။
ဟာရှော့ဂျီကို ဖမ်းဆီးဖို့ ဆော်ဒီအရာရှိတွေ ဆက်သွယ်ပြောကြားကြတာကို အမေရိကန် ထောက်လှမ်းရေးက ကြားဖြတ်ဖမ်းယူနားထောင်ခဲ့ရတယ်လို့လည်း ဝါရှင်တန်ပို့စ် သတင်းစာက သတင်းထုတ်ပြန်ပါတယ်။
အသံဖိုင်ကို ဘယ်လိုရသလဲ
အသံဖိုင်၊ ဗွီဒီယိုဖိုင် သက်သေအထောက်အထားတွေ သူတို့လက်ထဲမှာရှိပါတယ်လို့ တူရကီထောက်လှမ်းရေးက ပြောနေကြတယ်။ ဒါဆို အဲဒီအသံဖိုင်၊ ဗွီဒီယိုဖိုင်တွေက ဘယ်လိုရလာတာလဲ။
ဒါကလည်း ဝတ္ထုဆန်ပါတယ်။
ဂျမားဟာရှော့ဂျီ ကောင်စစ်ဝန်ရုံးထဲဝင်လာတာ၊ အခုယူဆနေကြသလို အသတ်ခံရတာတွေ အားလုံးကို ဟာရှော့ဂျီရဲ့ လက်မှာ ပတ်ထားတဲ့ ပန်းသီးတံဆိပ် လက်ပတ်နာရီ (Apple Watch) နဲ့ မှတ်တမ်းတင်ထားနိုင်ခဲ့တယ်လို့ တော်တော်များများက ပြောဆိုနေကြပါတယ်။
အဲဒီ ပန်းသီးနာရီဇာတ်လမ်းကိုတော့ တူရကီသတင်းစာ ဆာဘားက စပြီး သတင်းရေးသားခဲ့တာပါ။ နောက်တော့ တခြားသတင်းဌာနတွေကလည်း ဆာဘားကို ကိုးကားပြီး ထပ်ရေးကြ၊ အသံလွှင့်ခဲ့ကြပါတယ်။
ဟာရှော့ဂျီဟာ ကောင်စစ်ဝန်ရုံးထဲမဝင်ခင်ကတည်းက ပန်းသီးနာရီရဲ့ အသံဖမ်းခလုတ် သို့မဟုတ် ဗွီဒီယိုမှတ်တမ်းခလုတ်ကို နှိပ်ပြီးမှ ဝင်သွားခဲ့တယ်လို့ ဆိုပါတယ်။ အဲဒီနောက် သူ့ကို စစ်ကြောရေးလုပ်တာတွေ၊ ညှဉ်းပန်းနှိပ်စက်တာတွေ၊ သတ်ဖြတ်တာတွေကို ပန်းသီးနာရီက မှတ်တမ်းတင်ပြီး ပန်းသီမိုဘိုင်းဖုန်း (Apple iPhone)၊ ပန်းသီးအိုင်ကလောက် (Apple iCloud) တို့ဆီကိုပို့ခဲ့တတယ်လို့ ဆိုပါတယ်။
နောက်ပိုင်းမှာ ဟာရှော့ဂျီကို တိုက်ခိုက်သူတွေက သတိထားမိသွားပြီး အသံဖိုင်၊ ဗွီဒီယိုဖိုင်တချို့ကို ဝင်ဖျက်သွားပေမယ့် အကုန်လုံးကိုတော့ မဖျက်နိုင်ခဲ့ဘူးလို့ ဆိုပါတယ်။
ဒီဇာတ်လမ်းမှာ ဖြစ်နိုင်မဖြစ်နိုင် စဉ်းစားစရာတွေ တော်တော်ရှိပါတယ်။
ဓာတ်ပုံ ရင်းမြစ်, AFP
------------------------------------------------------------------------------------
ဟာရှော့ဂျီဖြစ်စဉ်ရက်စွဲ
အောက်တိုဘာလ ၂ ရက်
မနက် ၃ နာရီ ၂၈ မိနစ် : ဆော်ဒီ ထောက်လှမ်းရေးလို့ ယူဆသူတွေကို တင်လာတဲ့ ပထမကိုယ်ပိုင်ဂျက်လေယာဉ် အီစတန်ဘူလေဆိပ်ကိုဆိုက်ရောက်။
မနက် ၅ နာရီ ၅ မိနစ် : ထောက်လှမ်းရေးလို့ ယူဆရသူအုပ်စု ဆော်ဒီကောင်စစ်ဝန်ရုံးအနီးဟိုတယ်မှာ စာရင်းသွင်း။
မွန်းလွဲ ၁၂ နာရီ ၁၃ မိနစ် : သံရုံးကားတွေဝင်ရောက်လာ။ အဲဒီကားတွေထဲမှာ ဆော်ဒီထောက်လှမ်းရေးတွေခေါ်ဆောင်လာဟုဆို။
မွန်းလွဲ ၁ နာရီ ၁၄ မိနစ် : ကောင်စစ်ဝန်ရုံးကို ဟာရှော့ဂျီရောက်လာ။
မွန်းလွဲ ၃ နာရီ ၈ မိနစ် : သံရုံးကားတွေ ကောင်စစ်ဝန်ရုံးထဲက ထွက်ခွာပြီး အနီးနားက ကောင်စစ်ဝန်ရဲ့အိမ်ဆီသွား။
ညနေ ၅ နာရီ ၁၅ မိနစ် : ဆော်ဒီအရာရှိတွေ ပါလာတယ်ဆိုတဲ့ ဒုတိယကိုယ်ပိုင်ဂျက်လေယာဉ် အစ္စတန်ဘူ လေဆိပ်ကိုရောက်။
ညနေ ၅ နာရီ ၃၃ မိနစ် : ဟာရှော့ဂျီဇနီးလောင်း ဟာတီးဂျား ဂျန်းဂစ်ဇ်ကို ကောင်စစ်ဝန်ရုံးအပြင်ဘက် လုံခြုံရေး ကင်မရာပေါ်မှာတွေ့ရ။
ညနေ ၆ နာရီ ၂၀ မိနစ် : ပထမ ကိုယ်ပိုင်ဂျက်လေယာဉ် အစ္စတန်ဘူက ထွက်ခွာ။
ည ၉ နာရီ : ဒုတိယဂျက်လေယာဉ်ထွက်ခွာ။
အောက်တိုဘာလ ၃ ရက်
မစ္စတာဟာရှော့ဂျီပျောက်ဆုံးနေကြောင်း၊ ကောင်စစ်ဝန်ရုံးထဲမှာရှိနေနိုင်ကြောင်း တူရကီအစိုးရကြေညာ။
အောက်တိုဘာလ ၄ ရက်
ဟာရှော့ဂျီသံရုံးက ထွက်သွားပြီလို့ ဆော်ဒီအာရေဗျအစိုးရကပြော။
အောက်တိုဘာလ ၇ ရက်
မစ္စတာဟာရှော့ဂျီ ကောင်စစ်ဝန်ရုံးထဲမှာ အသတ်ခံခဲ့ရပြီလို့ယူဆကြောင်း တူရကီ အရာရှိတွေကပြော။ (နောက်ပိုင်းမှာ ဆော်ဒီအာရေဗျအစိုးရက ပြင်းပြင်းထန်ထန် ငြင်းဆန်ပါတယ်။)
အောက်တိုဘာလ ၁၃ ရက်
သူတို့လက်ထဲမှာ သတ်ဖြတ်မှုအထောက်အထား အသံဖိုင်၊ ဗွီဒီယိုဖိုင် သက်သေတွေ လက်ဝယ်ရှိကြောင်း တူရကီအရာရှိတွေက ဘီဘီစီ အာရပ်သတင်းဌာနကိုပြော။ (အသံဖိုင်ရှိတယ်ဆိုတဲ့ သတင်းကို တူရကီသတင်းစာတွေကတော့ စောစောပိုင်းက တည်းက သတင်းထုတ်ခဲ့။)
အောက်တိုဘာလ ၁၅၊ ၁၇၊ ၁၈
မှုခင်းသက်သေရှာဖွေရေးအဖွဲ့က ကောင်စစ်ဝန်ရုံးအတွင်းရှာဖွေ။
အောက်တိုဘာလ ၁၉
အနီးနားတောအုပ်နဲ့ လယ်ကွင်းတွေထဲမှာ နေရာတိုးချဲ့ရှာဖွေ။
