ပန်ဒေါင်းကျေးရွာကို ရွာသားတွေ စွန့်ခွာပြေးတာ အခုဆို ၇ နှစ်ရှိပါပြီ

အစိုးရတပ်မတော်နဲ့ ကချင်လွတ်လပ်ရေးတပ်မတော် (KIA) တို့အကြား တကျော့ပြန် တိုက်ပွဲတွေကြောင့် စွန့်ခွာခဲ့ရတဲ့ ပန်ဒေါင်းကျေးရွာ (Ban Dawng ) မြင်ကွင်းပါ။

ရွာသားတွေ စွန့်ခွာပြေးရတဲ့ ဒီပန်ဒေါင်း ကျေးရွာဟာ ဝိုင်းမော်မြို့နယ်ထဲမှာ တည်ရှိပြီး အိမ်ခြေ (၇၀၀) လောက်ရှိခဲ့တယ်လို့ ပန်ဒေါင်းကျေးရွာရဲ့ နှစ်ခြင်းခရစ်ယာန်ကျောင်း ဆရာတော် Jang Maw Tang Ji က ဘီဘီစီကို ပြောပါတယ်။

ရွာသားတွေဟာ စစ်ပွဲတွေ ပြန်စတဲ့ ၂၀၁၁ ခုနှစ် သြဂုတ်လလောက်ကတည်းက ထွက်ပြေး တိမ်းရှောင်နေရတာဖြစ်ပြီးတော့ ရွာကို ပြန်မရောက်တာ အခုဆိုရင် ခုနှစ်နှစ်ကျော်ရှိနေပြီဖြစ်တာကြောင့် ပြန်လာချင်ကြတယ်လို့ ဆရာတော်က ပြောပြပါတယ်။

သူက "ကိုယ့်အရပ်ဒေသကို ပြန်လာချင်တာကတော့ ပြောမပြတတ်အောင်ပါပဲ ပြန်ချင်ကြတာပေါ့ ။ ဒီစစ်ရှောင်စခန်းတွေက အခန်းလည်းကျဉ်းတယ် နေရထိုင်ရ စားရသောက်ရတာလည်း အဆင်မပြေဘူး။" လို့ ရင်ဖွင့်ခဲ့ပါတယ်။

ရွာသားတွေဟာ အခုချိန်မှာတော့ KIO ထိန်းချုပ်နယ်မြေ လိုင်ဇာဘက်က စစ်ရှောင်စခန်းတွေမှာ သွားရောက်နေထိုင်နေရပြီး ၊ ရွာနားမှာတော့ အစိုးရတပ်မတော်က တပ်တခု တပ်စွဲထားတာကြောင့် မပြန်ရဲဘူးလို့ ဆရာတော်က ဆိုပါတယ်။

ရွာသားတချို့ကတော့ နန်ဆန်ချောင်းဘေး နှစ်ဖာလုံလောက်မှာ နေထိုင်ရင်း တရုတ်က လာလုပ်တဲ့ ငှက်ပျောခြံတွေမှာ အလုပ်လုပ်ကိုင်နေရတာတွေလည်း ရှိတယ်လို့ သူက ပြောပြပါတယ်။

၂၀၁၁ ခုနှစ် ဇွန်လ (၉)ရက်နေ့က စတင်ခဲ့တဲ့ တကျော့ပြန် တိုက်ပွဲတွေကြောင့် စစ်ပြေးဒုက္ခသည် ၁၂၀,၀၀၀ ကျော် ၊ စစ်ပွဲအတွင်း ကျေးရွာပေါင်း (၃၆၇)ရွာ၊ လူနေအိမ်ခြေ (၁၅,၀၀၀) နီးပါးနဲ့ ဘာသာရေး အဆောက်အဦးတွေ အပါအ၀င် ခရစ်ယာန် ဘုရားရှိခိုးကျောင်း (၂၇၂) ကျောင်း ပျက်စီးခဲ့ရတယ်လို့ ကချင်နှစ်ခြင်းခရစ်ယာန်အသင်းချုပ် (KBC) ရဲ့ စာရင်းအရ သိရပါတယ်။