ယူကရိန်းငြိမ်းချမ်းရေးဆွေးနွေးပွဲထင်သာတဲ့ တိုးတက်မှုရရှိတယ်လို့ အမေရိကန်ပြော

ရုရှား-ယူကရိန်းစစ်ပွဲအဆုံးသတ်‌ရေး အတွက် အမေရိကန်ကြားဝင်ဦးဆောင်တဲ့ ငြိမ်းချမ်းရေးအစီအစဉ်ရဲ့ အပြီးသတ်ဆွေးနွေးမှုတွေမှာ "ကြီးမားထင်ရှားတဲ့ တိုးတက်မှု" တွေ ရရှိထားပြီလို့ အမေရိကန်နိုင်ငံခြားရေးဝန်ကြီး မာကို ရူဘီယို က ပြောကြားလာပါတယ်။

ဒါပေမယ့် " တချို့ ကိစ္စရပ်တွေ ပြီးမြောက်ဖို့ ကျန်ပါသေးတယ်" လို့ ဆွစ်ဇာလန်နိုင်ငံ၊ ဂျနီဗာမြို့မှာ ယူကရိန်း၊ ဥရောပစေ့စပ်ညှိနှိုင်းသူတွေနဲ့ တွေ့ဆုံမှုအပြီးမှာ ရူဘီယိုက ပြောပါတယ်။

ယူကရိန်းငြိမ်းချမ်းရေးဆွေးနွေးပွဲအပြီးမှာ ယူကရိန်းသမ္မတ ဗိုလိုဒီမီယာ ဇလန်စကီး က " သမ္မတ ဒေါ်နယ်ထရမ့်ရဲ့ အဖွဲ့က ကျွန်တော်တို့ အသံတွေကို နားထောင်ပေးတဲ့ အရိပ်အယောင်တွေ" တွေ့ခဲ့ရတယ်လို့ ပြောပါတယ်။

ယူကရိန်းနဲ့ ဥရောပ မဟာမိတ်နိုင်ငံတွေကတော့ ပေါက်ကြားခဲ့တဲ့ အမေရိကန်ရဲ့ ငြိမ်းချမ်းရေးအဆိုပြုချက်တွေ အပေါ် စိုးရိမ်ကြောင်း ပြောထားပါတယ်။

အဆိုပြုချက်တွေဟာ ရုရှားနိုင်ငံ အတွက် အလေးသာ အကျိုးဖြစ်ထွန်းစေပြီး ဒါကို ရုရှားသမ္မတ ဗလာဒီမီယာ ပူတင် ကလည်း လက်ခံကြိုဆိုထားပါတယ်။

သမ္မတ ဇလန်စကီးကတော့ " ဒါဟာ ခက်ခဲတဲ့ ရွေးချယ်မှု ဖြစ်ပါလိမ့်မယ်။ ဂုဏ်သိက္ခာကို စွန့်လွှတ်မလား၊ မိတ်ဖက်တစ်ယောက်ကို စွန့်လွှတ်မလား ဆုံးဖြတ်ရမယ့် အနေအထားပါ " လို့ ပြောထားပါတယ်။

အမေရိကန် နိုင်ငံခြားရေးဝန်ကြီး ရူဘီယိုက ဂျနီဗာမြို့ မှာ‌ရောက်နေတဲ့ ညှိနှိုင်းရေးအဖွဲ့ တွေ ဟာ "အလွန်ကောင်းမွန်တဲ့နေ့တစ်နေ့ကို ပိုင်ဆိုင်ခဲ့တယ်'' လို့ တနင်္ဂနွေနေ့ ညပိုင်းက သတင်းထောက်တွေကို ပြောခဲ့ပါတယ်။

ငြိမ်းချမ်းရေးအစီအစဉ် ၂၈ ချက်ထဲက " မပြီးမြောက်သေးတဲ့ အချက်တွေ" ကို အရင်လုပ်ဆောင်ဖို့ က အဓိက ရည်မှန်းချက် တစ်ခုဖြစ်ခဲ့ပြီး ဒါကို ပါဝင်သူတွေအားလုံးကလည်း ပြီးမြောက်အောင် လုပ်ဆောင်ခဲ့ကြတယ်လို့ နိုင်ငံခြားရေးဝန်ကြီး ရူဘီယိုက ပြောပါတယ်။

နောက်ဆုံး သဘောတူညီချက် ကို ရုရှားဆီ မပို့ခင် ယူကရိန်းနဲ့ အမေရိကန်သမ္မတ က အရင်ဆုံး သဘောတူညီမှု ယူရမှာ ဖြစ်တယ်လို့ အမေရိကန် ထိပ်တန်း သံတမန်တစ်ဦးက ပြောပါတယ်။

ဒါပေမယ့်လည်းဆက်ပြီး လုပ်ဆောင်ရမယ့် ကိစ္စရပ်တွေလည်း ရှိသေးတယ်လို့ သူက ပြောပါတယ်။

တနင်္ဂနွေနေ့က ကြေညာလာတဲ့ ယူကရိန်း နဲ့ အမေရိကန် ပူးတွဲကြေညာချက်မှာတော့ " မွမ်းမံ ပြင်ဆင်ပြီးသား ငြိမ်းချမ်းရေး မူဘောင်" ကို နှစ်နိုင်ငံလုံးက သဘောတူထားပြီလို့ ဖော်ပြထားပါတယ်။

ပြီးတော့ နှစ်နိုင်ငံလုံးဟာ " လာမယ့်ရက်တွေအတွင်း ပူးတွဲ အဆိုပြုချက်တွေကို အကြိတ်အနယ် လုပ်ဆောင်ဖို့" သဘောတူညီလိုက်တယ်လို့ ဆိုပါတယ်။

ကီယက်ဗ် ရဲ့ ဥရောပ မဟာမိတ်တွေဖြစ်တဲ့ ဗြိတိန်၊ ပြင်သစ် နဲ့ ဂျာမနီတို့မှာတော့ တခြားမတူညီတဲ့ အစီအစဉ်တစ်ခုပါတဲ့ အချက်အလက်ပါ စာရွက်စာတမ်းတချို့ကို သတင်းဌာနတွေ တော်တော်များများက ဖော်ပြကြပါတယ်။

ဘီဘီစီက အဲဒီ စာရွက်စာတမ်းတွေကို မတွေ့ရှိရသေးသလို ရူဘီယို ကလည်း အဲဒီလိုတခြားတခုရှိတယ်ဆိုတာမဟုတ်ကြောင်း ငြင်းဆိုထားပါတယ်။

တနင်္ဂနွေအစောပိုင်းက ထရမ့်က ယူကရိန်းခေါင်းဆောင်တွေဟာ ရုရှား-ယူကရိန်းစစ်ပွဲအဆုံးသတ်ဖို့ အတွက် အမေရိကန်ရဲ့ ကြိုးပမ်းအားထုတ်မှုအပေါ် "ကျေးဇူးတင်ကြောင်းလုံးဝမပြောဘူး" လို့ စွပ်စွဲကာ သူ့ရဲ့ Truth မီဒီယာမှာရေးပါတယ်။

ကိယက်ဗ်ရဲ့ မဟာမိတ် '' ဥရောပကလည်း ရုရှားဆီက ရေနံဆက်ဝယ်နေတယ်" လို့ ထရမ့်ပ်က ရေးသားခဲ့တာပါ။

ထရမ့်ရဲ့ ပြောဆိုချက်အပြီးမှာ ဇလန်းစကီးက "Javelin ဒုံးကျည်တွေကစလို့ ပေးအပ်ခဲ့တဲ့ အကူအညီတိုင်းဟာ ယူကရိန်းပြည်သူတွေရဲ့ အသက်တွေကို ကယ်တင်ပေးနိုင်ခဲ့ပါတယ်" လို့ သူ့ရဲ့ X လူမှုကွန်ရက်မှာ ပြန်လည်ရေးသားလာပါတယ်။

အမေရိကန်ပြည်ထောင်စု၊ အမေရိကန်ပြည်သူတစ်ဦးချင်းနဲ့ အထူးသဖြင့် သမ္မတ ထရမ့်ကို ယူကရိန်းအနေနဲ့ ကျေးဇူးတင်ပါတယ်လို့လည်း ဇလန်းစကီးက ထည့်ပြောထားပါတယ်။

မော်စကိုဟာ ယူကရိန်းစစ်ပွဲအတွက် ဘဏ္ဍာငွေဆက်လက်ရရှိဖို့ သူ့ရဲ့ ရေနံနှင့် သဘာဝဓာတ်ငွေ့ တင်ပို့မှုအပေါ် ကြီးကြီးမားမား မှီခိုနေရတာဖြစ်ပါတယ်။

ငြိမ်းချမ်းရေးမူ ၂၈ ချက်နဲ့ ပတ်သက်ပြီး ဂျနီဗာမှာ အမေရိကန်၊ ဥရောပနဲ့ ယူကရိန်းကိုယ်စားလှယ်တွေ ဆွေးနွေးနေတဲ့အချိန်မှာ ထရမ့်က သူ့ရဲ့ Truth Social မီဒီယာကနေ အဲဒီလို တုံ့ပြန်ခဲ့တာဖြစ်ပါတယ်။

အမေရိကန် ၂၈ ချက်အပေါ် ယူကရိန်းနဲ့ ဂျနီဗာမှာ ပြန်လည်ညှိနှိုင်းချက်တွေကိုတိတိကျကျသိရတာမရှိပါဘူး။

ဂျီနီဗာက ယူကရိန်းအရေး ဆွေးနွေးပွဲကို အမေရိကန်နိုင်ငံခြားရေးဝန်ကြီး မာကို ရူဘီရို၊ အထူးသံတမန် စတိဗ်ဝစ်ကော့ဖ်နဲ့ ဗြိတိန်နိုင်ငံအမျိုးသားလုံခြုံရေးအကြံပေး ဂျွန်နသန်ပိုဝဲလ်တို့ တက်ရောက်ခဲ့တာဖြစ်ပါတယ်။

မာကိုရူဘီရိုကတော့ သိပ်မကြာခင်မှာပဲ ရလဒ်ကောင်းတခုထွက်ပေါ်လာလိမ့်မယ်လို့ အကောင်းမြင်ထားပြီး အဲဒါက လာမယ့် ကြာသပတေး ဒါမှမဟုတ် နောက်အပတ် တနင်္လာနေ့မှာ အဖြေထွက်လာနိုင်မယ်လို့ သူက သတင်းထောက်တွေကို ပြောပါတယ်။

ထရမ့်က ယူကရိန်းကို အချက် ၂၈ ချက်ပါ အစီအစဉ်ကိုလက်ခံဖို့ နိုဝင်ဘာ ၂၇ ရက်အထိ အချိန်ပေးထားပါတယ်။ ရုရှားသမ္မတ ဗလာဒီမီယာပူတင်ကတော့ ဒါက စစ်ပွဲအဆုံးသတ်ပြေလည်မှုရဖို့အတွက် အခြေခံအဆင့် ဖြစ်နိုင်တယ်လို့ ပြောထားပါတယ်။

သမ္မတထရမ့်ကတော့ လက်ရှိ သူ့ရဲ့ ၂၈ ချက်ပါ မူကြမ်းအစီအစဉ်ဟာ ယူကရိန်းအတွက် သူ့ရဲ့ "နောက်ဆုံးကမ်းလှမ်းမှုမဟုတ်ဘူး" လို့ အိမ်ဖြူတော်မှာ သတင်းထောက်တွေကို ပြောပါတယ်။

"တစ်နည်းမဟုတ် တစ်နည်း (စစ်ပွဲ) ပြီးသွားအောင် လုပ်ရမှာပါ။ အဲဒါကို ကျွန်တော်တို့ လုပ်ဆောင်နေပါတယ်" လို့ ထရမ့်က သတင်းထောက်တွေကို ပြောပါတယ်။

ကျယ်ကျယ်ပြန့်ပြန့် ပေါက်ကြားနေတဲ့ အဆိုပြုချက် ၂၈ ချက်ထဲမှာတော့ ယူကရိန်းဟာ နိုင်ငံအရှေ့ပိုင်း ဒွန်းညက်စ် ဒေသမှာ သူတို့လောလောဆယ် ထိန်းချုပ်ထားနိုင်တဲ့အပိုင်းတွေကနေ ဆုတ်ခွာပေးရပြီး၊ ဒွန်းညက်စ်၊ သူနဲ့ ကပ်ရက်က လူဟန့်စ်ခ်နဲ့ ၂၀၁၄ ခုနှစ်မှာ ရုရှားတို့သိမ်းထားတဲ့ ခရိုင်းမီးယားတို့ကို ရုရှားတွေ ထိန်းချုပ်ခွင့်ပြုရမယ် ဆိုတာမျိုးတွေ ပါရှိနေပါတယ်။

ဒါအပြင် လက်ရှိတိုက်ပွဲဖြစ်နေတဲ့ ယူကရိန်းတောင်ပိုင်း ခါဆွန်ဒေသနဲ့ ဇာပိုရီရှားဒေသတွေက နယ်စပ်တွေကို လက်ရှိ ရောက်နေတဲ့အနေအထားအတိုင်းထားဖို့ အချက်တွေလည်းပါဝင်ပါတယ်။ အဲဒီ ဒေသနှစ်ခုလုံးကို လက်ရှိမှာ ရုရှားက တစ်စိတ်တစ်ပိုင်း သိမ်းပိုက်ထားတာဖြစ်ပါတယ်။

အမေရိကန်ရဲ့ အဆိုပြုချက်မူကြမ်းမှာ ယူကရိန်းရဲ့ စစ်အင်အားကို တပ်ဖွဲ့ဝင် ၆ သိန်း အထိပဲ ထားရှိဖို့ ကန့်သတ်ထားပြီး ဥရောပတိုက်လေယာဉ်တွေကို ယူကရိန်း အိမ်နီးချင်း ပိုလန်မှာပဲ ချထားဖို့ ပါဝင်ပါတယ်။

အပြန်အလှန်အဖြစ် ယူကရိန်းအတွက် "ယုံကြည်စိတ်ချရတဲ့ လုံခြုံရေး အာမခံချက်တွေ" ရရှိမယ်လို့ မူကြမ်းအဆိုပြုချက်ထဲ ပါပေမယ့် အသေးစိတ်ကိုတော့ ဖော်ပြမထားပါဘူး။ ရုရှားက သူ့ရဲ့ အိမ်နီးချင်းနိုင်ငံတွေကို မကျူးကျော်ဘူးလို့ "မျှော်လင့်ရတယ်" လို့ပါဝင်ပြီး နေတိုးကလည်း အင်အားကို ထပ်မံချဲ့ထွင်မှာမဟုတ်ကြောင်းလည်း အဲဒီအချက်တွေထဲပါရှိပါတယ်။

အစီအစဥ်ထဲမှာ ရုရှားအပေါ် ပိတ်ဆို့အရေးယူမှုတွေရုပ်သိမ်းပြီး "ကမ္ဘာ့စီးပွားရေးအင်အားထဲကို ရုရှားလည်း ပြန်လည်ပေါင်းစည်းပါဝင်နိုင်မယ်" ဆိုတဲ့အချက်နဲ့ ကမ္ဘာ့အင်အားကြီးနိုင်ငံတွေပါဝင်တဲ့ G7 (စက်မှုထိပ်သီး ၇ နိုင်ငံ) အဖွဲ့ထဲ ရုရှားပြန်လည်ဝင်ရောက်နိုင်ပြီး G8 ပြန်ဖြစ်လာရေးတို့ကိုလည်း အကြံပြုထားပါတယ်။

မော်စကိုဘက်ကတော့ အမေရိကန်ရဲ့ အစီအစဉ်ကို လက်ခံရရှိထားကြောင်း သောကြာနေ့က သမ္မတ ပူတင်က အတည်ပြုထားပေမဲ့ အမေရိကန်နဲ့ အသေးစိတ် မဆွေးနွေးရသေးကြောင်း ပြောပါတယ်။

မော်စကိုအနေနဲ့ "ပြောင်းလွယ်ပြင်လွယ် အခြေအနေကို" ပြသဖို့ ဆန္ဒရှိသလို တဖက်မှာလည်း ဆက်တိုက်သွားဖို့အတွက် အသင့်ပဲလို့ ပူတင်ကထည့်ပြောထားပါတယ်။