ယူကရိန်းမှာ ရုရှားတို့ အောင်ပွဲ ရမယ်ဆိုတဲ့ ပူတင့် အိပ်မက် တစစ ပြိုကျလာနေ

ဆာရာ ရိန်းစ်ဖို့တ်

ဘီဘီစီ အရှေ့ ဥရောပ သတင်းထောက်

“အမှန်တရားက တို့ဘက်မှာ၊ အမှန်တရားက ခွန်အား” လို့ ရင်ပြင်နီမှာ ပြီးခဲ့တဲ့ သီတင်းပတ်အတွင်းက ကျင်းပတဲ့ အထူး အခမ်းအနားမှာ ဗလာဒီမီယာ ပူတင်က ဟစ်ကြွေး ခဲ့ပါတယ်။ ယူကရိန်းက နယ်မြေကြီး ၄ ခုဟာ ရုရှားရဲ့ အစိတ်အပိုင်း ဖြစ်ရမယ် လို့လည်း သူ ကြေညာခဲ့ပါတယ်။

 “ငါတို့ အောင်ပွဲရမှာ။”

ဒါပေမယ့် တကယ့်မြေပြင်မှာတော့ အခြေအနေတွေက သိပ်ကို ခြားနားပါတယ်။

ကရင်မလင်မှာ ရုရှားသမ္မတက သူ့ရဲ့ တရားမဝင် ကျူးကျော်သိမ်းပိုက် ထားတာတွေ ကို အတည်ပြုစာချုပ်လက်မှတ်ထိုးလိုက်ပေမယ့် သူသိမ်းပိုက်ထားတဲ့ အဲဒီနယ်မြေ တွေထဲကို ယူကရိန်းတပ်တွေက ထိုးဝင်နေပါတယ်။

ပိုကျယ်ပြန့်လာမယ့် စစ်မှာ ဝင်တိုက်ဖို့ စစ်သား စုဆောင်းယူတာကို ခံမယ့်အစား သိန်းနဲ့ချီတဲ့ လူတွေဟာ ရုရှားကနေ ထွက်ခွာ ပြေးနေကြပါတယ်။

မစ္စတာပူတင်နဲ့ သူ့အပေါ် သစ္စာရှိသူတွေက အရင်တုန်းကတော့ ယူကရိန်းမှာ “နာဇီ တွေကို တိုက်ဖျက်ဖို့”၊ ရုရှားစကားပြောသူတွေကို အကာအကွယ်ပေးဖို့ စသဖြင့် ဆိုခဲ့ကြပြီး အခုတော့ အနောက်ရဲ့ “စုပေါင်း” တိုက်ခိုက်မှုကို ကာကွယ်ဖို့ ဆိုပြီး ပြောင်း‌ပြောလာနေတဲ့ စစ်ပွဲရဲ့ လက်တွေ့မြေပြင်မှာ ရုရှားတပ်တွေ အခြေအနေက သိပ်ကိုဆိုး လာနေပါတယ်။

ဒါက ဖြစ်နေတဲ့ အမှန်တရားပါ။

သူ့စနစ်နဲ့ပဲ ပြန်ဒုက္ခရောက်နေတဲ့သူ

“သူက ဘာမှမမြင်ရတဲ့ ဇုန်ထဲမှာရောက်နေတာ။ ဘာဖြစ်နေတယ်ဆိုတာကို သူ တကယ်တမ်းမှာ မြင်ရပုံမရဘူး” လို့ Riddle Russia မီဒီယာရဲ့ အယ်ဒီတာ အန်တွန် ဘာဘက်ရှ်ရှင်က ရုရှားသမ္မတ အပေါ် အမြင်ကို ပြောပါတယ်။

တခြားနိုင်ငံရေး သုံးသပ်သူအများအပြားလိုပဲ သူက မစ္စတာ ပူတင်ဟာ ကိယက်ဗ်ကို အနောက်အုပ်စုက ခိုင်ခိုင်မာမာ ထောက်ခံမယ်ဆိုတာ၊ သိမ်းပိုက်မှုကို ယူကရိန်း ကိုယ်တိုင်က အပြင်းအထန် ဆန့်ကျင်ခု ခံမယ်ဆိုတာတွေကို လုံးဝမှန်းထားခဲ့ပုံ မရဘူး လို့ မှတ်ယူထားပါတယ်။

အာဏာကို အနှစ် ၂၀ ကျော် ချုပ်ကိုင်လာပြီး သောကြာနေ့က အသက် ၇၀ ပြည့်တဲ့ ရုရှား ခေါင်းဆောင်ဟာ သူထူထောင်ခဲ့တဲ့ စနစ်ကြောင့်ပဲ ဒုက္ခကြုံရသူ ပြန်ဖြစ်လာပါတယ်။ သူ့သြဇာသာ လွှမ်းထားခဲ့တဲ့အုပ်ချုပ်မှု ပုံစံကြောင့် ခိုင်မာတဲ့ ထောက်လှမ်းရေး သတင်း အချက်အလက်တွေ သူရဖို့ ခက်လာပါတယ်။

“သူ တွေးမြင်ယူဆထားတာတွေကို ဘယ်သူမှ ပြန်လှန် မေးခွန်းထုတ်လို့ မရဘူးလေ” လို့ R.Politik လို့ အမည်ပေးထားတဲ့ နိုင်ငံရေးသုံးသပ်လေ့လာသူအဖွဲ့ က တက်ယာနာ စတန် နိုဗာရာက ပြောပါတယ်။

“ပူတင်နဲ့ အလုပ်လုပ်နေတဲ့သူတိုင်းက ပူတင်က ကမ္ဘာကို ဘယ်လိုမြင်ထားတာ၊ ယူကရိန်းကို ဘယ်လိုမြင်ထားတာ စတာတွေကို သိတယ်၊ သူ့ရဲ့ မှန်းဆချက် တွေကိုလည်း သိတယ်။ အဲဒီသူ့အမြင်တွေနဲ့ ဆန့်ကျင်ဘက်ဖြစ်တဲ့ အချက်အလက်တွေကို သူတို့က သူ့ဆီကို မပို့ရဲဘူးလေ။ အဲဒီလိုဖြစ်နေတာ။”

ကရင်မလင်နန်းတော်အတွင်း ခမ်းနားလှပတဲ့ မီးပန်းဆိုင်းကြီးတွေ အောက်မှာ သမ္မတ ပူတင်က မိန့်ခွန်းပေးခဲ့ပြီး အဲဒီထဲမှာ သူမြင်ထား ခံယူထားတဲ့ ကမ္ဘာသစ် ဖြစ်စဉ်ကို ထပ်မံပြောကြားသွားပါတယ်။

သူ့မိန့်ခွန်းထဲမှာ ရုရှားရဲ့ ခွန်အားကြီးတာတွေ၊ သူရဲဘောကြောင်တဲ့ အနောက် ကမ္ဘာဟာ သူတို့ကို လေးစားလာဖို့အတွက် သင်ခန်းစာ ပေးရမယ်ဆိုတာတွေ၊ ကိယက်ဗ်ကို မော်စကိုက တကျော့ပြန်စိုးမိုးနိုင်တော့မယ် ဆိုတာတွေ ပါဝင်ပါတယ်။

ဒါတွေ အောင်မြင်ဖို့အတွက် ယူကရိန်းဟာ မစ္စတာ ပူတင်ရွေးချယ်လိုက်တဲ့ စစ်မြေပြင် ပါ။

“အနောက်အုပ်စုရဲ့ ဗိုလ်ကျလွှမ်းမိုးမှု ဆက်ဆက်ပြီး ကျရှုံးနေတာဟာ ပြန်ကယ်ဆယ် ပြုပြင်လို့ ရတော့မှာမဟုတ်ဘူး၊ ရှေ့မှာ အခုထက်ပို ကျရှုံးဦးမှာ။ ကျွန်တော်တို့ ရည်မှန်းချက်နဲ့ ကျွန်တော်တို့ရဲ့ ရာဇဝင်တွေက ကျွန်တော်တို့ကို သွားပါလို့ ညွှန်ပြနေတဲ့ စစ်မြေပြင်က ကျွန်တော်တို့ ပြည်သူအားလုံးအတွက် စစ်မြေပြင်ပဲ။”

သူ့ရဲ့ ရည်မှန်းချက်တွေက ရေရာ ခိုင်မာမှု မရှိပေမယ့်လည်း သူက နောက်ဆုတ်သွား မယ့်ပုံ မတွေ့ရပါဘူး။

“ကရင်မလင်က လုပ်တဲ့ တွက်ချက်မှုတွေထဲက အများကြီးပဲ၊ ဘာအောင်မြင်မှုမှ မရခဲ့ဘူး၊ ပူတင့်ဆီမှာ ဒီအစီအစဥ် အလုပ်မဖြစ်ရင် နောက်အစားထိုးလုပ်မယ့် ဒုတိယ အစီအစဥ် ဆိုတာလည်း ရှိပုံမရဘူး။ ရှေ့တန်းကို လူတွေ ထပ်တိုးပြီး ပို့လိုက်ရင် ယူကရိန်းတွေ ရှေ့ဆက်တိုးနိုင်မှာ မဟုတ်‌တော့ဘူးလောက်ပဲ တွေးနေတာ” လို့ အန်တွန် ဘာဘက်ရှ်ရှင်က ဆိုပါတယ်။

ပြဿနာတက်နေတဲ့ စစ်သားစုဆောင်းမှု

“လူတွေ ရှေ့တန်းကို သွားဖို့ တွန်းနေရာမှာ” ပြဿနာတွေ အများကြီး ဖြစ်နေပါတယ်။

သူ့ ကျူးကျော်စစ်ဟာ ရည်မှန်းချက်‌ဘောင်ကျဉ်းကျဥ်းနဲ့အတူ သိပ်မကြာခင်ပဲ အောင်မြင်ပြီးဆုံးသွားမယ့်ပုံသွင် ဖော်ကျူးလိုတဲ့အတွက် “အထူး စစ်ဆင်ရေး” လို့ အမည်တပ်ပေးခဲ့တဲ့ ဗလာဒီမီယာ ပူတင်ဟာ အခုလည်း အဲဒီ အမည်ကို ဆက်သုံးဆဲပါ။

ရုရှားပြည်သူ အများအပြားအနေနဲ့ စစ်ပွဲက သူတို့ကို တိုက်ရိုက်မထိခိုက်သေးတဲ့ အချိန်မှာ ဒီစစ်ပွဲကို လက်ခံရုံမျှမက ထောက်ခံတောင် ထောက်ခံနိုင်ကြပါသေးတယ်။ ဒါပေမယ့် အရန်တပ်ဖွဲ့ဝင်တွေကို စစ်ထဲပါဝင်ကြဖို့ ခေါ်ယူကြတဲ့ အချိန်မှာတော့ တချိန်က ကိုယ်နဲ့ သိပ်မဆိုင်ဘဲ အဝေးမှာရှိနေတဲ့ အန္တရာယ်က ကိုယ့်နားကို သိပ် နီးကပ် လာပါတော့တယ်။

ဒေသဆိုင်ရာ နိုင်ငံရေးသမားတွေဟာ အရင် ဆိုဗီယက်ခေတ်တုန်းကလိုပဲ သူတို့ စုဆောင်းပေးရမယ့် လူအရေအတွက် ပြည့်ဖို့ ကြိုးစားနေရကာ ရနိုင်သမျှ လူတွေကို စစ်ထဲလိုက်ဖို့ ဆင့်ခေါ်နေရပါတယ်။

“ဒါက အပြောင်းအလဲဖြစ်လာတဲ့ အချိန်ပါ။ ရုရှားတွေ အများအပြားအဖို့ စစ်ပွဲ ဆိုတာကို လွန်ခဲ့တဲ့ ၂ ပတ် ၃ ပတ်လောက်ကစပြီး သဘောပေါက်လာကြတာလေ” လို့ အန်တွန် ဘာဘက်ရှ်ရှင်က ပြောပါတယ်။

“ဦးဆုံး အစောပိုင်းလတွေမှာ သေကြရတဲ့သူတွေက နိုင်ငံရဲ့ အစွန်အ‌ဖျားနဲ့ မြို့ငယ်‌ လေးတွေ ကလေ။ ဒါပေမယ့် စစ်သားစုဆောင်းတာက တဖြည်းဖြည်း ပြောင်းလာတာနဲ့ အတူ လူသေအခေါင်းတွေ ပြန်ရောက်လာမယ့်နေရာက မော်စကိုတို့၊ စိန့်ပီတာ စဘတ်တို့ ဖြစ်လာတော့မှာ။”

‘သိပ်ကို ဆိုးတဲ့’ အခြေအနေတွေ

အရန်တပ်ဖွဲ့ဝင်တွေ စစ်ထဲလိုက်ဖို့ ခေါ်ယူမယ်ဆိုတဲ့ ကြေညာချက် ထုတ်ပြီး နောက်ပိုင်း နယ်စပ်ကို ထွက်မပြေးကြဘဲ စစ်သားသစ် ဖြစ်သွားကြတဲ့သူတွေရဲ့ ဇနီးသည်တွေ အပြန်အလှန်ဖလှယ်ကြတဲ့ စကားတွေက လူမှုမီဒီယာမှာ အလျင် အမြန် ပျံ့နှံ့သွားပါတယ်။

သူတို့တင်တဲ့ တချို့ သတင်းစကားတွေ (အဲဒီမှာ တချို့ဆိုရင် သူတို့ ခင်ပွန်း စစ်သား တွေ ကိုယ်တိုင် ရိုက်ထားတဲ့ ဗီဒီယိုတွေပါ ပါဝင်ပါတယ်)ဟာ အခြေအနေ တွေက ဆိုးတယ်ဆိုတာကို ဖော်ညွှန်းနေပါတယ်။ ညံ့ဖျင်းတဲ့ အစားအစာတွေ၊ ဟောင်းနွမ်း နေတဲ့ လက်နက်တွေ၊ အခြေခံလိုအပ်တဲ့ ဆေးဝါး၊ ကျန်းမာရေးဆိုင်ရာ အထောက် အကူပစ္စည်း မပြည့်စုံတာတွေကို သူတို့ပြောနေကြပါတယ်။ သူ့တို့ ခင်ပွန်းတွေ စစ်ဖိနပ် ပေါက်နေတာကို ဖာဖို့၊ ဒဏ်ရာရရင် ပတ်စည်းဖို့ အမျိုးသမီး တွေက သူတို့ လစဉ် ကျန်းမာရေးသုံး ပစ္စည်းတွေကို ပို့ပေးရင် ကောင်းမလား ဆိုပြီး ဆွေးနွေးနေကြပါတယ်။

ကပ်စ် ဒေသဆိုင်ရာ အုပ်ချုပ်ရေးမှူးက တပ်ဌာနတွေဟာ ‘သိပ်ကိုဆိုးတဲ့’ အခြေအနေ ကို ကြုံနေကြရတာလို့ ဆိုပြီး ယူနီဖောင်းတောင် မလုံလောက်တဲ့ အကြောင်းလည်း ပြောပါတယ်။

အုပ်ချုပ်ရေးမှူး ရိုမန်စတာရိုဗော့က “ကာကွယ်ရေးဝန်ကြီးဌာနရဲ့ လေ့ကျင့်ရေး ဌာနက ဘယ်လို လုပ်ပြီး ဒီအခြေကို ဆိုက်သွားသလဲ ဆိုတာ တွေးတောင် မတွေး တတ်တော့ဘူး၊ ထမင်းစားခန်းက ပျက်စီးနေတယ်၊ ရေချိုးတဲ့နေရာက သံချေးတွေ ကိုက်လို့၊ အိပ်ယာတွေ ကုတင်တွေက ကျိုးလို့။”

ဒီလို ထုတ်ဖော်ပြောချက်တွေက ဗလာဒီမီယာ ပူတင် ဂုဏ်တင်ပြောကြားခဲ့တဲ့ စကားတွေထဲ တခုကို ထိခိုက်နေပါတော့တယ်။ သူက တိုင်းချစ်ပြည်ချစ် ပြည်သူတွေ တာဝန်ထမ်းဆောင်လိုကြမယ့် ပရော်ဖက်ရှင်နယ် တိုက်ခိုက်ရေး အင်အားစု ဖြစ်အောင် ရုရှား စစ်တပ်ကို ပြန်တည်ဆောက်မယ်လို့ ကြုံးဝါးထားတာပါ။

ဒါပေမယ့် အခုအချိန်မှာတော့ စစ်သားသစ်တွေရဲ့ ဇနီးသည်တွေက သူတို့ခင်ပွန်းတွေ အတွက် ထောက်ပံ့ဖို့ စီစဉ်နေရပါတယ်။

“ရုရှားလူမှုအသိုင်းအဝိုင်းထဲမှာ ‘ယူကရိန်းမှာ နေတိုးကို တိုက်ခိုက်နေတဲ့ ငါတို့ရဲ့ အင်အားကြီး ရုရှားနိုင်ငံတော်’ လို့ အများက ခံယူနေကြတဲ့ အချိန်မှာပဲ ငါတို့ဟာ ပြည်ချစ်စိတ်ဓာတ်ကို ပြသဖို့ အတွက် အမျိုးသမီး လစဥ် ကျန်းမာရေးသုံး ဂွမ်းထုပ်တွေ၊ ခြေအိတ်တွေ၊ သွားပွတ်တံတွေ ရှေ့တန်းကို ပို့ပေးနေရတဲ့ အခြေ အနေကို ရောက်နေတယ်” လို့ အန်တွန် ဘာဘက်ရှ်ရှင်က ဒီသီတင်းပတ် အတွင်းမှာ တွိဒ်လုပ်ပါတယ်။

ဆင်ဆာဖြတ်မှု ပြိုလဲသွား

စစ်ထဲဝင်တိုက်ကြဖို့ ဆင့်ခေါ်တဲ့ ကိစ္စ ကသောင်းကနင်းဖြစ်နေတာတွေ၊ ရုရှား စစ်တပ် အရှက်ရစရာ ဖြစ်နေတာတွေနဲ့အတူ နိုင်ငံက အထင်ကရ ပုဂ္ဂိုလ်တွေက လူသိရှင်ကြား ထွက်‌ပြောလာတာတွေ ပိုများလာပါတယ်။

လစ်ဘရယ်ဝါဒီတွေက ယူကရိန်းကျူးကျော်မှုကို ရှုတ်ချကြတဲ့အခါ အဖမ်းခံကြ ရပါတယ်၊ အများအပြား အခုထိ အကျဉ်းထောင်ထဲမှာပါ။

ဒီစစ်ပွဲ တရားမဝင်ဘူးလို့ သူတို့က ပြောနေတာပါ။

ကရင်မလင်ကို ထောက်ခံတဲ့ အသိုင်းအဝိုင်းမှာလည်း အဲဒီစကားကို လူတကာက ပြောလာနေပါပြီ၊ ရုရှားစစ်တပ် ဌာနချုပ်ကိုလည်း အပြင်းအထန်ဝေဖန်တာတွေ ပေါ်ထွက်လာနေပါတယ်။

ဒီလိုဝေဖန်နေကြသူတွေထဲ နောက်ဆုံးတိုးလာတာကတော့ လွှတ်တော် အမတ် အင်ဒရေ ကာတာပိုလော့ဗ်ပါ။ ရုရှားရဲ့ အခက်အခဲတွေကိုပြောနေတဲ့ နေရာမှာ ကာကွယ်ရေး ဝန်ကြီးဌာနအနေနဲ့ “လိမ်ပြောနေတာတွေ ရပ်တော့” လို့ သူက ဒီသီတင်းပတ်အတွင်းမှာ တိုက်တွန်းခဲ့ပြီး၊ “တို့ပြည်သူတွေက ခပ်တုံးတုံးမဟုတ်ဘူး” လို့လည်း ပြောလိုက်ပါတယ်။

စတာလင်က “သူရဲဘောကြောင်တဲ့” “အရည်အချင်းမပြည့်တဲ့” ဗိုလ်ချုပ်တွေကို သုတ်သင်ခဲ့ဖူးကြောင်း RT ရုပ်မြင်သံကြား ဌာနက အယ်ဒီတာ မာဂရီတာ ဆီမွန်ယန် က ကိုးကားပြောခဲ့ပါတယ်။ ဒါပေမယ့် ကျူးကျော်တဲ့ ကိစ္စကိုတော့ လူသိရှင်ကြား ဘာမေးခွန်းမှ ပြန်မထုတ်ကြပါဘူး။

ပူတင်ကို “ခေါင်းဆောင်ကြီး” လို့ မာဂရီတာ ဆီမွန်ယန်က သုံးနှုန်းခဲ့ကာ ယူကရိန်း သိမ်းပိုက်မှုကို သမိုင်းဝင် အောင်ပွဲလို့ ရွှန်းရွှန်းဝေ ပြောသွားပါတယ်။

နိုင်ငံရေးအရ ဖိနှိပ်ထားတဲ့ ဝန်းကျင်မှာ “စစ်ကိုဆန့်ကျင်တဲ့ နိုင်ငံရေး လှုပ်ရှားမှု မရှိဘူး” တက်ယာနာ စတန် နိုဗာရာက ထောက်ပြပါတယ်။

 “စစ်သားတွေ ကောက်ယူတာကို ဆန့်ကျင်တဲ့ သူတွေတောင် လွတ်မြောက်အောင် ပြေးဖို့ ပဲလုပ်ကြပါတယ်။ တချို့က နိုင်ငံကနေ ထွက်ပြေးချင်ကြတယ်၊ တချို့က ပုန်းအောင်း နေကြပါတယ်။ ဒါပေမယ့် နိုင်ငံရေးအရ ဆန့်ကျင်ဖို့ ကြိုးစားကြတာမျိုး ကျွန်မတို့ မတွေ့ရပါဘူး။”

တကယ်လို့ ရုရှားဖက်က ဆက်ရှုံးနေပြီး တပ်တွေ ထပ်လွှတ်ရဦးမယ်ဆိုရင်တော့ အခုအခြေအနေတွေက ပြောင်းတော့ ပြောင်းသွားနိုင်ပါတယ်လို့ သူက ဆိုပါတယ်။

“ပူတင်က အောင်ပွဲတစုံတရာ ရအောင်တော့ ယူပြရလိမ့်မယ်။”

အနောက်ကို ဆန့်ကျင် တိုက်ခိုက်တဲ့ ‘မြင့်မြတ်သော’ စစ်ပွဲ

ဝင်ရောက်သိမ်းပိုက်ထားတဲ့ ဒေသတွေက အခြေအနေတွေဟာ “ထိန်းချုပ်ထားရ ခက်တဲ့” အနေအထားလို့ ဆိုပြီး ပြဿနာတွေ ရှိနေသေးတယ်ဆိုတာကို သမ္မတ ကိုယ်တိုင် ဒီသီတင်းပတ်ထဲမှာ အရိပ်အယောင်ပြ ပြောခဲ့ပါတယ်။

ဒါ‌‌ပေမယ့် “စုပေါင်းထားတဲ့” အနောက်နိုင်ငံတွေက ယူကရိန်းကို နောက်ခံရပ် ပေးထားတဲ့ အတွက် ရုရှားက အကန့်အသတ်တွေနဲ့ ကြုံနေရတာလို့ အပြစ်ပုံ နေကြပါတယ်။

ယူကရိန်းက နယ်မြေတွေကို သိမ်းတာဟာ သိပ်ကို ကောင်းမွန်ပြီး နောက်ထပ် ကြီးမားတဲ့ တိုက်ပွဲအတွက် အကျိုးဖြစ်စေတယ်လို့ နိုင်ငံပိုင် မီဒီယာ တင်ဆက်သူတွေက ‌ပြောပါတယ်။

“ဆေတန် နတ်ဆိုးဝါဒီတွေကို မီးကုန်ယမ်းကုန် သုံးပြီး တိုက်နေရတဲ့ စစ်ဖြစ်တယ်” ဒီထက် လျော့တဲ့ စစ်မဟုတ်ဘူးလို့ ပရိသတ်တွေကို ဒီသီတင်းပတ်အတွင်းမှာ တင်ဆက်သူ ဗလာဒီမီယာ ဆိုလော့ဗ်ရော့ဗ်က ပြောနေပါတယ်။

 “ဒါ ယူကရိန်း အတွက်သာပဲ မဟုတ်ဘူး။ အနောက်ရဲ့ ရည်ရွယ်ချက်က ရှင်းတယ်။ အုပ်ချုပ်သူကို ပြောင်းပစ်မှာ၊ ရုရှားကို အပိုင်းပိုင်းခွဲပစ်ကြမှာ၊ ဆိုတော့ ရုရှားဆိုတာ နောက်ဆိုရင် ရှိမှာမဟုတ်တော့ဘူး” လို့ အော်ဟစ်ပြောပါတယ်။

အဲဒီလိုအမြင်ကို ဗလာဒီမီယာ ပူတင်က “အမှန်တရား” အဖြစ် ယုံကြည်ထားတာ ဖြစ်ပြီး၊ ရုရှားအတွက် ရည်မှန်းချက်ထားတာ အားပျော့သွားမယ်ဆိုရင် ရုရှားဟာ အန္တရာယ်ကြုံရတော့မှာလို့ မြင်ထားတာပါ။

“ဒီစစ်ပွဲဟာ ရုရှားရဲ့ ဖြစ်တည်မှုအတွက် ဖြစ်သလို၊ ပူတင် ဖြစ်တည်ဖို့ အတွက်လည်း ဖြစ်တယ်၊ အောင်ပွဲက ဖြစ်အောင်လုပ်ရမယ့်ပုံရှိတယ်” လို့ တက်ယာနာ စတန် နိုဗာရာက ငြင်းချက်ထုတ်ပါတယ်။

နောက်ပြီး “သူ့မှာ နျူကလီးယား လက်နက်တွေ ရှိတယ်” လို့ တုံးတိတိပဲ သူက ဆက်ပြောပါတယ်။

“ကျွန်မအထင် သူက နျူကလီးယား ပြိုင်ဆိုင်မှုတွေ တစုံတရာ အဆင့်ထိ မြင့်တက် လာမယ်ဆိုရင် ယူကရိန်းအရေးကနေ အနောက်က နောက်ဆုတ်သွားမယ် လို့ မှန်းဆ ထားတယ်။”

မစ္စတာ ပူတင်က သဘောထား ပြတ်သားတင်းမာသူလို့ ထောက်ပြတာ သူ တယောက်တည်း မဟုတ်ပါဘူး။

 “သူက ဒါဟာ ရုရှားအင်ပါယာအတွက် နောက်ဆုံး ခံစစ်ကုန်းလို့ ယုံကြည်ထားပုံရပြီး အနောက်ကို အင်ကုန်အားကုန် တိုက်ရမယ့် စစ်ပွဲလို့ ခံယူထားတဲ့ပုံပဲ” လို့ အန်တွန် ဘာဘက်ရှ်ရှင်က ဆိုပါတယ်။

 “ရုရှားက လုပ်တော့မလား၊ မလုပ်ဘူးလား ဆိုတဲ့ နောက်ဆုံး ဆုံးဖြတ်ချက်ချ ချိန်နားမှာ ကျွန်တော်တို့ ရောက်နေကြတာ။”

တကယ်ပါပဲ၊ ဒါကို အနောက်ကနေ ယုံကြည်လက်ခံဖို့ အခုအချိန်မှာ ပူတင်က လိုချင်နေတယ် ဆိုတာကလည်း “အမှန်တရား” တခုပါပဲ။