ကုန်စျေးနှုန်းမြင့်တက်နေချိန် အခြေခံစားကုန်တွေကို အာဟာရဖြစ်အောင် ဘယ်လိုစားမလဲ

စစ်တပ်က အာဏာသိမ်းပြီးနောက် ဆင်းရဲ ကျပ်တည်းမှု အမျိုးမျိုး ကြုံတွေ့လာရတဲ့ ပြည်သူတွေမှာ တနေ့တခြား မကြုံစဖူးအောင် တက်လာတဲ့ ကုန်စျေးနှုန်းတွေကြောင့် ရတဲ့ ဝင်ငွေနဲ့ လောက်ငအောင် သုံးပြီး အာဟာရပြည့်ဝအောင် စားသောက်ဖို့ ဆိုတာဟာ မိသားစုတိုင်းအတွက် စိန်ခေါ်မှု ဖြစ်ပါတယ်။

သာမန် မြန်မာ ပြည်သူတွေဟာ အခုလို ကျပ်တည်းချိန် မတိုင်ခင်ကတည်းက အာဟာရညီညွတ်အောင် စားသုံးတတ်သူ ရှားတယ်လို့ မြန်မာနိုင်ငံက အထူးကု ဆရာဝန်ကြီး အတော်များများက ပြောကြပါတယ်။

ဒီအခြေအနေမှာ စျေးသက်သက်သာသာနဲ့ အာဟာရမျှတအောင် နေထိုင်စားသုံးတတ်ဖို့က အဓိက လိုအပ်လာပြီလို့ ဆိုရပါမယ်။

ကျန်းမာရေးနဲ့ ညီညွတ်ပြီး အာဟာရဖြစ်အောင် စျေးသက်သက်သာသာနဲ့ စားနိုင်တဲ့ နည်းတွေက အများကြီး ရှိတယ်လို့ အာဟာရနဲ့ ကျန်းမာရေး ဆိုင်ရာ ကျွမ်းကျင်သူတွေက ပြောပါတယ်။ 

စျေးကြီးပေးဝယ်ရတဲ့ ဆီဦးထောပတ်တွေချည်း စားနေတိုင်း ကျန်းမာရေးနဲ့ ညီညွတ်တာ မဟုတ်သလို စျေးပေါပေါနဲ့ ဝယ်စားရတဲ့ စားစရာတွေ ကလည်း အာဟာရ မရှိတာ မဟုတ်ဘူးလို့ အာဟာရဆိုင်ရာ ဆရာဝန်ကြီးတွေက ပြောပါတယ်။ ဒီတော့ ခန္ဓာကိုယ်မှာ နေ့စဉ် အာဟာရအတွက် လိုအပ်တာက ဘာတွေလဲ၊ ဘယ်လို ရနိုင်သလဲ ဆိုတာ ကျွမ်းကျင်သူတွေ ပြောပြတာကို ကြည့်ကြပါမယ်။

နေ့စဉ် အာဟာရအတွက် အဓိက ဘာလိုအပ်လဲ

အကြမ်းအားဖြင့် ပြောမယ် ဆိုရင် လူတစ်ယောက်မှာ နေ့စဉ် ကစီဓာတ်၊ အသားနဲ့ အဆီဓာတ် ဆိုတဲ့ ခန္ဓာကိုယ်ကို အားအင်ဖြစ်စေတဲ့ အစားအစာတွေကို မျှတအောင် စားဖို့ လိုအပ်တယ်လို့ ကျန်းမာရေးဆိုင်ရာ ကျွမ်းကျင်သူတွေက ပြောကြပါတယ်။ 

ကစီဓာတ်ကို ဆန်၊ ဂျုံ၊ ပြောင်းနဲ့ အာလူးလို စားစရာတွေက ရပါတယ်။

အသားဓာတ်က တော့ အသား၊ ငါး၊ ပဲ၊ အစေ့အဆန်၊ နို့နဲ့ နို့ထွက်ပစ္စည်းတွေ ကနေ ရနိုင်ပါတယ်။

အဆီဓာတ်က တိရိစ္ဆာန်က ရနိုင်သလို သဘာဝ အသီးအနှံတွေက လည်း ရနိုင်ပါတယ်။

ဆန်

 မြန်မာတွေ အတွက်က လိုအပ်တဲ့ ကာဘိုဟိုက်ဒြိတ် ခေါ် ကစီဓာတ်ကို အဓိက စားသုံးတဲ့ ဆန် ကနေ ရပါတယ်။ ဘယ်လို ဆန်မျိုး စားဖို့ သင့်သလဲ ဆိုတာက လူတစ်ယောက်ချင်းစီရဲ့ ကျန်းမာရေး အခြေအနေတွေအပေါ် မူတည်ပြီး ကွဲပြားနိုင်ပါတယ်။

မြန်မာ နိုင်ငံမှာ အခု လတ်တလော ကုန်စျေးနှုန်းတွေ မြင့်တက်ပြီး ဆန်စျေးတွေက ထိုးတက် သွားတဲ့အတွက် ရွှေဘိုပေါ်ဆန်းလို ထိပ်စ ဆန်ချော တစ်အိတ်ကို ကျပ် ၁ သိန်း ကျော်နေပြီလို့ အိမ်ရှင်မတွေက ပြောပါတယ်။

စားနေကျ ဆန်ချောမှ စားနိုင်တယ် ဆိုသူတွေက ရွှေဘိုပေါ်ဆန်း အစား တစ်အိတ်ကို ခြောက်သောင်းခွဲလောက် ပေးရတဲ့ ဖျာပုံ ပေါ်ဆန်း ဆန် ဝယ်စားရင် သက်သာတယ်လို့ ပြောကြပါတယ်။ ပေါ်ဆန်း ဘေးကြား၊ ငကျွဲ စတဲ့ ဆန်ချောအမျိုးအစားထဲ ပါတဲ့ အလယ်အလတ်တန်း ဆန်မျိုးတွေ လည်း ရှိပါတယ်။ 

အခြေခံနဲ့ အလုပ်သမား လူတန်းစားတွေ အဓိက စားကြတဲ့ ဧည့်မထဆန်က တစ်အိတ်ကို လေးသောင်းကျော်၊ တစ်ပြည်ကို သုံးထောင်အောက်မှာ ရှိပါတယ်။ သူ့ထက် စျေးနိမ့်တဲ့ ဇီယာဆန်နဲ့ ငစိန်ဆန်လို ဆန်ကြမ်း အမျိုးအစားတွေလည်း ရှိပါသေးတယ်။ 

ဆန်ကြမ်းက ချက်လိုက်ရင် ဆန်ချောလို အမြင်မလှပေမဲ့ ပုံမှန် အာဟာရဓာတ် ရတာက တော့ အတူတူပဲလို့ အာဟာရ ပညာရှင်တွေက ပြောပါတယ်။ 

ဆိုလိုတာက ကိုယ်တတ်နိုင်တဲ့ အတိုင်းအတာနဲ့ ဘယ်လို ဆန်မျိုးပဲ စားစား ခန္ဓာကိုယ်အတွက် လိုအပ်တဲ့ ကစီဓာတ် ရနိုင်ပါတယ်။ တချို့ ပြောကြသလို ဆန်ချော စားမှ အဆင်ပြေတယ်၊ ဆန်ကြမ်း စားရင် ရင်ပြည့်တယ် ဆိုတာမျိုးတွေက နည်းနည်းစားပြီး ဗိုက်ပြည့်သွားတာဖြစ်တယ်၊ ဆန်ကြမ်းဆိုတော့ စျေးသက်သက်သာသာနဲ့ စားနိုင်တယ်လို့ အာဟာရဆိုင်ရာ ဆရာဝန် တစ်ယောက်က ပြောပါတယ်။

ဆန်ကြမ်းစားလို့ ကျန်းမာရေးနဲ့ မညီညွတ်တာမျိုး မရှိနိုင်ဘူး၊ ကစီဓာတ် များများစားဖို့ မသင့်တဲ့ ဆီးချိုရောဂါရှိသူတွေဆိုရင် ဆန်ချော အစား ဆန်ကြမ်း စားဖို့တောင် ဆရာဝန်တွေက တိုက်တွန်းတယ်လို့ သူက ပြောပါတယ်။ 

ဆီးချိုရောဂါရှိသူတွေ ဆိုရင် လုံးတီးဆန်၊ ဒါမှ မဟုတ် ဆန်ကြမ်း စားဖို့ အကြံပြုတယ်လို့ ရှမ်းပြည်နယ်က ဆရာဝန်တစ်ယောက်ဖြစ်တဲ့ ဒေါက်တာအောင်က ပြောပါတယ်။ 

ကာဘိုဟိုက်ဒြိတ် ရဖို့ အနောက်နိုင်ငံတွေမှာ စားသုံးကြတဲ့ အာလူးကတော့ ဆန်ထက် စျေးကြီးသလို မြန်မာပြည်သူတွေ နေ့စဉ် အဓိက စားနေကျ မဟုတ်လို့ လက်တွေ့ မကျပါဘူး။

အသားဓာတ်

အသားဓာတ်က ကြက်၊ ဝက်၊ ဘဲ၊ အမဲသား၊ ဆိတ်သား စတဲ့ အသားအမျိုးမျိုးနဲ့ ငါးအမျိုးမျိုးက ရနိုင်ပါတယ်။ ဒါ့အပြင် နို့နဲ့ နို့ထွက် ပစ္စည်းတွေ၊ ကြက်ဥနဲ့ ပဲအမျိုးမျိုး ကနေလည်း ရပါတယ်။

ဒီအစားအစာတွေကနေ ဇင့်နဲ့ ကယ်လ်ဆီယံလို သတ္တုဓာတ်တွေ ရနိုင်ပါတယ်။

အခု စားသောက်ကုန်စျေးတွေ တက်လို့ အသားငါးထဲမှာ ဆိတ်သားက စျေးအကြီးဆုံးလို ဖြစ်နေပြီး တစ်ပိဿာကို ၃ သောင်း နီးပါးလောက် ရှိနေတာကြောင့် သူ့ထက် စျေးသက်သာတဲ့ အသားကို စားလည်း အသားဓာတ် ရတာချင်း အတူတူပဲလို့ အာဟာရ ပညာရှင်တွေက ပြောပါတယ်။

ငါးအမျိုးမျိုးကို စားတဲ့နေရာမှာလည်း ငါး ခုတ်သားလို စျေးကြီးတဲ့ ငါးမျိုးကို စားမယ့် အစား စျေးသက်သာပြီး အာဟာရနဲ့ ပြည့်စုံတဲ့ ငါးဘဲဖြူ၊ ငါးသလဲထိုးနဲ့ ငါးဇင်ရိုင်းလို ငါးသေးလေးတွေ၊ အရိုးပါ စားနိုင်တဲ့ငါးလေးတွေကို စားခြင်းအားဖြင့် ငွေကုန်သက်သာပြီး လိုအပ်တဲ့ အာဟာရနဲ့ သတ္တုဓာတ်တွေ ရနိုင်တယ်လို့ ဒေါက်တာ အောင်က အကြံပြုပါတယ်။

အခြေခံ လူတန်းစားတွေ အတွက်က အသား၊ ငါး ပုံမှန် စားနိုင်ဖို့ ခက်ခဲတယ်လို့ ပြောကြပါတယ်။ ဒီတော့ ဒီလို အသား ငါးတွေ မစားနိုင်ရင်လည်း မြန်မာနိုင်ငံမှာ ထွက်တဲ့ ပဲ အမျိုးမျိုး ကို စားလို့ ရတယ်လို့ ရန်ကုန်က အထူးကု ဆရာဝန်ကြီး တစ်ယောက်က ပြောပါတယ်။

အဲဒီပဲတွေထဲမှာလည်း ပို စျေးသက်သာတဲ့ ပဲမျိုးကို ဝယ်စားမယ် ဆိုရင် အာဟာရဓာတ်က အတူတူ ရနိုင်ပြီး အကုန်အကျ သက်သာနိုင်မယ်လို့ ဆို ပါတယ်။

ဆီ

အဆီဓာတ် ဆိုတာကလည်း ခန္ဒာကိုယ်မှာ အဓိက လိုအပ်တဲ့ ဓာတ်တစ်မျိုး ဖြစ်ပါတယ်။

တိရစ္ဆာန်ကရတဲ့ အဆီနဲ့ သီးနှံတွေက ရတဲ့ ဆီ ဆိုပြီး နှစ်မျိုးရှိရာမှာ ဝက်ဆီ၊ ဘဲဆီတို့လို အသားက ရတဲ့ အဆီက ကျန်းမာရေးအတွက် သိပ် မသင့်တော်လှ ပါဘူး။

ဟင်းချက်ရာမှာ စားအုံးဆီ၊ နေကြာဆီ၊ ပဲဆီ၊ နှမ်းဆီ တို့ကို သုံးကြလေ့ ရှိကြရာမှာ စားအုန်းဆီမှာက ကျန်းမာရေးနဲ့ မညီညွတ်တာတွေ ပါနေတဲ့ အတွက် အများကြီးစားဖို့ မသင့်ဘူးလို့ ဒေါက်တာ အောင်က ပြောပါတယ်။

ဟင်းရွက်ဆီ၊ နေကြာဆီ အများစုတို့က ကိုယ့်နိုင်ငံက မထွက်ဘဲ နိုင်ငံခြားကနေ ဒေါ်လာနဲ့ ဝယ်ယူ တင်သွင်းရတာ ဖြစ်လို့ အခုလို ဒေါ်လာစျေးတွေ တက်နေတဲ့ အချိန် စျေးကြီးနေတဲ့အတက် ကိုယ့်နိုင်ငံထွက် ပဲဆီနဲ့ နှမ်းဆီကို စားဖို့ သင့်တယ်လို့ သူက ဆိုပါတယ်။

ဒါပေမဲ့ စားအုန်းဆီနဲ့ ပဲဆီ နှမ်းဆီစျေးက ကွာခြားလို့ အခြေခံလူတန်းစားတွေ နေ့စဉ် သုံးနိုင်ဖို့ ခက်ခဲနိုင်တယ်လို့လည်း ဒေါက်တာအောင်က ပြောပါတယ်။

ဒါ့အပြင် ပဲဆီမှာ စားအုန်းဆီ အရောအနှောတွေ ရှိတတ်တယ်ဆိုတဲ့ စိုးရိမ်မှုတွေကလည်း ရှိတဲ့အတွက် ပြည်ပက ဟင်းရွက်ဆီကို စားသုံးသူတွေလည်း ရှိနေပါတယ်။

ဒါကြောင့် ပုံမှန်အားဖြင့် စားအုန်းဆီ စားတဲ့ ပမာဏထက် တဝက် လျှော့ချသုံးပြီး ပဲဆီနဲ့ နှမ်းဆီကို ပြောင်းလဲစားသုံးတာမျိုးဆိုရင် ကျန်းမာရေးနဲ့ ပိုညီညွတ်မယ်လို့ သူက ပြောပါတယ်။ 

မြန်မာ နိုင်ငံမှာ အများအားဖြင့် ဆီပြန်ဟင်းတွေ ပုံမှန် အစားများပြီး ရောဂါတွေ ဖိတ်ခေါ်နေသလို ဖြစ်တယ်လို့ ဒေါက်တာအောင်က ပြောပါတယ်။

ကျန်းမာရေးနဲ့ ညီညွတ်အောင် ဆိုရင် ဆီကို အနည်းဆုံး ပမာဏပဲ စားသင့်တယ်၊ ဒါဆိုရင် ကျန်းမာရေးနဲ့ ညီညွတ်တဲ့ ဆီကိုလည်း စားလို့ ရမယ်၊ ကိုယ့်အတွက်လည်း ကုန်ကျစရိတ်က ကာမိမယ်လို့ သူက ဆိုပါတယ်။ 

ငွေကုန်သက်သာပြီး ကျန်းမာရေးနဲ့ ညီညွတ်အောင် ဆီပြန်ဟင်း အစား ဆီပါတယ် ဆိုရုံလောက်ပဲ သုံးပြီး ချက်တဲ့ တိုင်းရင်းသားဟင်းချက်နည်း ပုံစံတွေကို ချက်ပြုတ် စားသောက်ဖို့လည်း ဒေါက်တာအောင်က အကြံပေး ပါတယ်။

ဟင်းသီးဟင်းရွက်နဲ့ အသီးအနှံတွေထဲမှာလည်း ရေဓာတ်၊ သတ္တုဓာတ်နဲ့ ဗီတာမင်တွေ ရနိုင်ပါတယ်။