ရိုဟင်ဂျာအရေး အိုင်စီဂျေမှာ မော်လ်ဒိုက် တရားဝင် ပူးပေါင်း၊ အမားလ် ကလူနီကို ရှေ့နေငှား

ရိုဟင်ဂျာ အရေး ကုလသမဂ္ဂ အမြင့်ဆုံးတရားရုံး ICJ မှာ မြန်မာကို ဂမ်ဘီယာက တရားစွဲဆိုထားတာကို မော်လ်ဒိုက်နိုင်ငံက တရားဝင် ပူးပေါင်းပါဝင်မယ်လို့ ဖေဖော်ဝါရီ ၂၆ ရက်မှာ ကြေညာလိုက်ပါတယ်။

ဒါ့အတွက် ထင်ရှားတဲ့ လူ့အခွင့်အရေး ရှေ့နေ အမားလ် ကလူနီကို ငှားရမ်းထားတယ်လို့လည်း ပြောပါတယ်။

အိန္ဒိယသမုဒ္ဒရာထဲက တောင်အာရှကျွန်းနိုင်ငံ မော်လ်ဒိုက်ဟာ ကမ္ဘာလှည့် ခရီးသွားတွေ စိတ်ဝင်စားတဲ့နိုင်ငံ တစ်နိုင်ငံဖြစ်ပါတယ်။

မြန်မာနိုင်ငံက လူမျိုးတုံး သတ်ဖြတ်မှု တားဆီးရေး ဂျီနိုဆိုက် သဘောတူညီချက်ကို ချိုးဖောက်တယ်ဆိုပြီး ဂမ်ဘီယာနိုင်ငံက တရားစွဲဆိုပြီး ကြားဖြတ်အစီအမံချမှတ်ပေးဖို့ ICJ မှာတောင်းဆိုခဲ့ပါတယ်။

ဒီလိုတောင်းဆိုထားတာကို ICJ က အခုနှစ် ဇန်နဝါရီ ၂၃ ရက်မှာ ရိုဟင်ဂျာတွေကို လူမျိုးတုံး သတ်ဖြတ်မှု အကာအကွယ်ပေးရေး အပါအဝင် ကြားဖြတ် အစီအမံ လေးချက်ကို ချမှတ်ခဲ့ပါတယ်။

မြန်မာအစိုးရဘက်ကတော့ ဒီလို ချမှတ်ထားတာတွေကို မှတ်သားထားမယ်လို့ တုံ့ပြန်ထားပါတယ်။

ဒါကြောင့် အခုက လူမျိုးတုံးသတ်ဖြတ်မှု ရှိမရှိ စွပ်စွဲထားတဲ့ အမှုကြီးကို တရားရုံးမှာ ဆက်လက် ရင်ဆိုင်ရမယ့် အဆင့်ကို ရောက်ရှိနေပါပြီ။

အဲဒီလို အခြေအနေမှာ မော်လ်ဒိုက်နိုင်ငံက အခုလို ပူးပေါင်းပါဝင်လာတာဖြစ်ပါတယ်။ ဂမ်ဘီယာလိုပဲ မော်လ်ဒိုက်နိုင်ငံဟာ အစ္စလာမ္မစ်နိုင်ငံများပူးပေါင်းဆောင်ရွက်ရေး OIC အဖွဲ့ဝင်နိုင်ငံဖြစ်ပါတယ်။

မော်လ်ဒိုက်က ငှားရမ်းထားတဲ့ ရှေ့နေ အမားလ် ကလူနီဟာ ဟောလိဝုဒ် သရုပ်ဆောင် ဂျော့်ချ် ကလူနီရဲ့ဇနီးဖြစ်ပြီး သူဟာ မော်လ်ဒိုက် သမ္မတဟောင်းအတွက် ကုလသမဂ္ဂမှာ အောင်အောင်မြင်မြင် ရှေ့နေလိုက်ပေးခဲ့ဖူးသူ ဖြစ်ပါတယ်။