Dwi’n siwr fod nifer yn cofio’r bar siocled enwog o’dd ar un adeg yn cael ei hysbysebu fel ‘That Friday feeling’ ond yn anffodus dyw’r teimlad hwnnw ddim yn berthnasol i Gymru dros y blynyddoedd diwethaf.
Y gêm yn erbyn Ffrainc yr wythnos hon fydd y bedwaredd i Gymru chware ar nos Wener a hyd yma y record yw chware tair, colli tair, a dwy o’r rheiny yn erbyn y Ffrancwyr.Nid yw rygbi nos wener a thîm Cymru hyd yn hyn beth bynnag wedi cyd rhedeg yn esmwyth.
A beth am nos Wener ar gyfer gemau pencampwriaeth y Chwe Gwlad? Dechreuodd yr arbrawf nôl yn 2009 ac o dan y llifoleuadau yn Stade de France dyma breuddwyd y Cymry o gipio ail gamp law o’r bron yn cael ei chwalu’n deilchion.
Wedi dau dymor ma’ pwyllgor y Chwe Gwlad wedi ail gydio yn yr ‘arbrawf’ a blwyddyn nesa Cymru eto fydd yn chware ar nos Wener yn erbyn Lloegr ar benwythnos agoriadol y gystadleuaeth.
Er gwaetha’r ffaith bod cefnogwyr rygbi yng Nghymru wedi bod yn gyfarwydd â rygbi ar y diwrnod yma ers blynyddoedd lawer, ma’r 6 Gwlad yn unigryw a ma’ na rhyw deimlad rhyfedd ar ddydd Sadwrn pan ma’r cyfan eisoes ar ben!
Digon yn y fantol i dîm Gatland
Deuddeg mis yn ôl ym Mharis, buddugoliaeth allweddol mewn gêm glos wnaeth danio ymgyrch y Cymry, prin fydde unrhyw un wedi meddwl ar y pryd y byddai’r fuddugoliaeth honno wedi arwain at ennill y bencampwriaeth, a dyw’r sefyllfa ddim yn annhebyg i dîm Warren Gatland eleni.
Er bod ennill y bencampwriaeth o ystyried y gwahaniaeth pwyntiau yn ymddangos yn dalcen caled, maetaro nôl yn hollbwysig. Colli ac yna gallai’r ymgyrch ddod oddi ar y cledrau yn gyfangwbl. Digon felly yn y fantol.
Record cant y cant i’r tîm ifanc?
Pedair awr ar hugain wedi i‘r tîm cynta’ berfformio yn Stadiwm y Mileniwm mi fyddai wedi gwneud y daith lan i Fae Colwyn gan obeithio gweld y tîm dan ugain yn cadw’i record cant y cant yn erbyn eu cyfoedion o Ffrainc.
Wedi buddugoliaeth hynod ar yr ynys werdd ma’r tîm o dan arweiniad Steffan Hughes yn gobeithio cymryd cam sylweddol yn y ras at y bencampwriaeth ar Barc Eirias, fydd unwaith eto o dan ei sang.
Ma’ Bae Colwyn wedi dod yn gartre’ i’r ieuenctid bellach a’r garfan yn gwerthfawrogi’r gefnogaeth gre’ yno dro ar ôl tro. Y gobaith yw welai’r dwbl y penwythnos hwn a mai’r ceiliog fydd yn clochdar yn y De ac yn y Gogledd.
