Neville Southall - The Binman Chronicles
Gyda Neville Southall yn cyhoeddi ei lyfr newydd - 'The Binman Chronicles', daw atgofion am yr amser yr oeddwn yn cydweithio fel hyfforddwr gyda Neville ar ei ysgolion peldroed (Neville Southall Soccer Schools) yng Ngogledd Cymru.
Cynhaliwyd y cyrsiau yma am rhyw dridiau yn ystod gwyliau ysgol, a gan amlaf yn ardaloedd Llandudno a Bae Colwyn - gyda Neville yn sicrhau ei fod yn cyrraedd yno ar ol ymarfer yn y bore gydag Everton.
Ym mhob un o'r cyrsiau hyfforddi yma, roedd Neville yn sicrhau fod rhai o enwogion y byd peldroed yn bresenol, a rhoddodd hyn brofiad gwerthfawr i chwaraewyr ifanc y Gogledd o gyfarfod rhai o enwogion y byd peldroed.
Daeth y blaenwr Peter Beardsley draw i Landudno, a hefyd rheolwr Everton ar y pryd, Mike Walker i Landrillo, a chafwyd ymweliad gan sawl aelod o dîm Everton mewn canolfannau eraill.
Roedd Neville yn awyddus iawn i roi profiad bythgofiadwy i'r peldroedwyr ifanc, ac ar un adeg fe gynhaliodd gwrs undydd er mwyn casglu arian at elusen i helpu plant a salwch difrifol.
Dyna'r math o berson ydi Neville Southall. Un sydd yn barod ei gymwynas i helpu eraill ac i gyfoethogi eu bywydau.
Tydi'n ddim syndod o wybod ei fod erbyn heddiw yn cynnal gweithgareddau sydd yn helpu eraill i gyfoethogi eu bywydau.
Roedd profiad y Neville Southall Soccer Schools' wedi bod yn sylfaen gadarn.
Pob hwyl iddo yn ei fenter addysgiadol presennol ac i'r llyfr newydd.
Trin a thrafod y byd pêl-droed yn ffordd unigryw criw 
