Həcc izdihamı: ən azı 717 nəfər ölüb
Şəklin mənbəyi, Saudi Civil Defence Directorate
Həcc ziyarəti zamanı Məkkə yaxınlığında çaxnaşma nəticəsində ən azı 717 nəfər həyatını itirib, Səudiyyə rəsmiləri bildirib.
Səudiyyə rəsmilərinin məlumatına görə, bundan əlavə hadisədə azı 863 nəfər xəsarət alıb.
Həyatını itirmiş şəxslər arasında azərbaycanlı zəvvarların olub-olmaması araşdırılır, Azərbaycan Xarici İşlər Nazirliyi bildirib. APA isə "hazırda ərazidə olan" Qafqaz Müsəlmanları İdarəsinin nümayəndəsinə istinadən bildirir ki, ölənlərin arasında "azərbaycanlı yoxdur".
Hadisə Minada zəvvarların şeytanı təmsil edən sütuna daş atma mərasimində baş verib.
Çaxnaşma Qurban bayramının birinci günü baş verib. Bir milyondan çox adam Həcc ziyarətinin əsas sayılan qaydasını həyata keçirirdi.
Bu ayın əvvəlində Məkkə şəhərindəki Böyük Məscidin üzərinə kran aşması nəticəsində 109 nəfər ölüb, 400 nəfər yaralanıb.
2006-cı ildə, şeytanı daşlama ayini zamanı baş verən çaxnaşma 364 ziyarətçinin ölümü ilə nəticələnmişdi.
Şəklin mənbəyi, AP
Səudiyyə mülku müdafiə müdirliyi Twitter vasitəsilə bildirib ki, hadisə yerinə 220 nəfərdən çox təcili yardım və xilasetmə qüvvələri göndərilib.
Xəsarət alanlar ərazidəki dörd hospitala aparılır.
Şəklin mənbəyi, AFP
Çaxnaşmaya dəqiq nəyin səbəb olması aydın deyil, lakin bu, Həcc ziyarəti zamanı ilk belə hal deyil.
Həcc: ölümcül hadisələr
1987: Səudi rəsmilərinin iranpərəst etirazçılarla qarşıdurması nəticəsində 400 nəfər ölüb
1990: müqəddəs yerlərə aparan tuneldə 1426 nəfər həyatını itirib
1994: çaxnaşma nəticəsində 270 nəfər ölüb
1997: yanğın zamanı 343 ziyarətçi həlak olub və 1500 nəfər yaralanıb
2006: şeytana daş atma mərasimidə basırıq nəticəsində 364 zəvvar ölüb
2006-cı ildə daş atma mərasimində 364 nəfərin həyatını itirməsinin ardından, Səudiyyə rəsmiləri ərazidəki nəqliyyat və digər infrastrukturu yaxşılaşdırmaqla bu cür hadisələrin qarşısını almağa çalışır.
Müsəlmanlar üçün Həcc ziyarəti İslam dininin sütunlarından biri sayılır.
