የናይጄሪያ የባህር ላይ ወንበዴዎች የስዊዘርላንድ መርከበኞችን አገቱ

በእቃ ጫኝ መርከብ ውስጥ ይሰሩ የነበሩ 12 የስዊዘርላንድ የመርከብ ድርጅት ሰራተኞች በናይጄሪያ የውሃ ክልል ውስጥ በባህር ወንበዴዎች ታግተዋል።

ማሶኢል የተባለው መርከብ ድርጅት እንዳስታወቀው ''ኤም ቪ ግላረስ'' የተባለው እቃ ጫኝ መርከብ ስንዴ ጭኖ ''ከሌጎስ'' ወደብ በመነሳት ወደ ''ሃርኮርት'' በመጓዝ ላይ እያለ ነበር ቅዳሜ ዕለት በወንበዴዎቹ ጥቃት የደረሰበት።

የወንበዴው ቡድን አባላት ረጃጅም መሰላሎችን በመጠቀም ወደ መርከቡ እንደገቡና አብዛኛውን የመገናኛ መስመሮችን ከጥቅም ውጪ እንዳደረጉ ድርጅቱ 'ለኤኤፍፒ ገልጿል።

• ለ10 ሰዓታት ባህር ውስጥ የቆየችው ሴት

• የከፍተኛ ትምህርት ተቋማት ተማሪዎችና ወላጆቻቸው ስጋት

• ታላቁ ዲፕሎማት ኮፊ አናን ሲታወሱ

45 ደቂቃ በፈጀው የወንበዴዎቹ ጥቃት ከ19 የመርከቡ ሰራተኞች መካከልም 12ቱን አግተዋል።

ከታገቱት መርከበኞች መካከል ሰባቱ ከፊሊፒንስ ሲሆኑ የተቀሩት ደግሞ ከስሎቬኒያ፣ ዩክሬይን፣ ሮማኒያ፣ ክሮሺያ እና ቦስኒያ መሆናቸውን ሮይተርስ የናይጄሪያ የባህር ጉዳዮች መስሪያ ቤትን እንደ ምንጭ ጠቅሶ ዘግቧል።

የታጋቾቹ ቤተሰቦች ስለሁኔታው እንደተነገራቸውና ጉዳዩንም በቅርበት እየተከታተሉት እንደሆነ የመርከብ ድርጅቱ ቃል አቀባይ ገልጸዋል። በጉዳዩ የዓመታት ልምድ ያካበቱ የተባሉ ባለሙያዎች ታጋቾቹን ለማስለቀቅ እየጣሩ መሆናቸውንም ቃል አቀባዩ ጨምረው ተናግረዋል።

የስዊዘርላንድ የውጭ ጉዳይ ሚኒስትር ለጋዜጠኞች በሰጡት መግለጫ ከታጋቾቹ መካከል አንድም የስዊዘርላንድ ዜግነት ያለው ሰው አለመኖሩን ተናግዋል።

በናይጄሪያ የውጪ ዜግነት ያላቸውን ሰዎች እንዲሁም ታዋቂ ናይጄሪያውንን አግቶ ማስለቀቂኣ ገንዘብ መጠየቅ የተለመደ ነው።