Koalicioni ka pasur mosmarrëveshje për qasjen ndaj Kosovës

Të premten, kryeministri Vojisllav Koshtunica tha se qeveria që i drejtonte nuk mund të funksiononte për shkak të dallimeve brenda saj lidhur me qasjen ndaj pavarësisë së Kosovës.

"Qeveria e Serbisë nuk ka më një politikë të vetme lidhur me një çështje susbstanciale dhe thelbësore për të ardhmen e vendit, që Kosova të mbetet brenda Serbisë. Një qeveri që nuk ka një politikë të vetme, padyshim, që nuk mund të funksionojë si duhet dhe asaj i ka ardhur fundi. Kjo do të thotë se ne duhet t'ia kthejmë popullit mandatin", tha zoti Koshtunica.

Ai tha se zgjedhjet e parakohshme mund të mbahen më 11 maj.

Zoti Koshtunica e pranoi se qeveria e tij ishte duke kaluar një prej krizave më të mëdha dhe tha se ai nuk u besonte më partnerëve të tij të koalicionit.

Qeveria Koshtunica ka qënë në krizë prej kohësh për shkak të dallimeve në qëndrimin ndaj Bashkimit Evropian pas shpalljes së pavarësisë së Kosovës.

Zoti Koshtunica, një nacionalist i moderuar, e përshkroi si të paligjshëm vendimin e vendeve të BE-së për ta njohur pavarësinë e Kosovës.

Presidenti Tadiq thotë se Beogradi do të jetë në gjendje të njohë të drejtën e saj për Kosovën, vetëm nëse anëtarësohet në Bashkimin Evropian.