Nick Hawton Korrespondent i BBC-së

	Ka komente se bisedimet përmes Troikës mund të jenë shansi i fundit

Emisarët nga Shtetet e Bashkuara, Bashkimi Evropian dhe Rusia janë në Beograd për bisedime me udhëheqësit politikë.

Në Beograd, trojka ka zhvilluar bisedime me udhëheqësit politikë, përfshirë presidentin e Serbisë dhe kryeministrin.

Përfaqësuesi i BE-së në Trojkë, diplomati gjerman Wolfgang Ischinger, tha se sot patëm një seancë të parë të mirë dhe patëm mundësinë të shpjegonim detajet e qëllimin, shkallën dhe mandatin e misionit. "Ky është fillimi i një procesi që do të na çojë ne drejt dhjetorit," tha ai, duke iu referuar afatit përfundimtar 10 dhjetorit.

Më herët zoti Ishinger pati thënë se gjatë takimeve të tyre në Beograd e Prishtinë, ata nuk do të bënin propozime të reja, por do të shikonin nëse palët shqiptare dhe serbe kishin ndonjë shans për të arritur një marrëveshje lidhur me statusin afatgjatë të Kosovës.

Shqiptarët duan që Kosova të jetë e pavarur, kurse serbët kërkojnë që ajo të mbetet pjesë e Serbisë.

Propozimi i Kombeve të Bashkuara që siguron një formë pavarësie të mbikqyrur për Kosovën, u bllokua muajin e kaluar nga Rusia, e cila është aleate e ngushtë e Serbisë.

Raundi aktual i bisedimeve pritet të përfundojë në fund të dhjetorit, por Serbia dhe Rusia kanë thënë se nuk duhet të ketë kufizim në kohë.

Ndërkaq zyrtarët ndërkombëtarë në Kosovë kanë shprehur shqetësimin se nëse çështja nuk zgjidhet në të ardhmen e afërt, situata e sigurisë mund të përkeqësohet.

Shumë vetë besojnë se bisedimet e drejtuara nga Trojka mund të jenë mundësia e fundit për palët që të arrijnë një marrëveshje.