Troika SHBA-BE-Rusi do të vizitojë Beogradin e Prishtinën

Para fillimit të bisedimeve të Grupit të Kontaktit në Londër, përfaqësuesi i Bashkimit Europian në Trojkë, Wolfgang Ischinger që është edhe ambasador i Gjermanisë në Londër i tha BBC-së se bisedimet mes Beogradit e Prishtinës mund të jenë mundësia e tyre e fundit për të gjetur një zgjidhje të negocijueshme për të ardhmen e Kosovës.

BBC: Zoti ambasador, sa të përkushtuar janë shqiptarët për pavarësi, duke qenë se kjo është pika ku ato këmbëngulin?

Wolfgang Ischinger: Po, sigurisht. Gjithë ato përpjekje e negocijata nga Presidenti Ahtissari dhe ekipi i tij nuk kanë çuar drejt një zgjidhjeje për shkak të dallimeve të vazhdueshme që ekzistojnë në lidhje me çështjen e statusit. Statusi shtrohet në mënyre të tillë: Pavarësi - Po ose Jo! Prandaj edhe formati i Trojkës, në të cilin unë bëj pjesë si përfaqësues i Bashkimit Europian dhe pjesëtarët e Grupit të Kontraktit do të bëjnë një përpjekje të re.

BBC: Ju përmendet emrin e të dërguarit të Kombeve të Bashkuara, Martti Ahtisaari, i cili hartoi një plan të bazuar në propozimet e tij për një pavarësi të mbikqyrur. Rusia thotë se kundërshton çfarëdo plani që do të ishte i papranueshëm për Beogradin dhe ka hedhur poshtë çdo projekt të paraqitur deri më tani. A mendoni se mund t'i bindni rusët të ndryshojnë mendje?

Wolfgang Ischinger: Kjo do të ishte gjë e mirë, apo jo? Dëgjoni, ne jemi marrë vesh që çfarëdo rezultati në diskutimet mes Beogradit dhe Prishtinës do të ishte i pranueshëm për ne.

Me fjalë të tjera, kjo është një mundësi për ta. Ne, Trojka, si përfaqësues të komunitetit ndërkombëtar po i ofrojmë Beogradit dhe Prishtinës një mundësi tjetër, ndoshta mundësinë e fundit për të gjetur një zgjidhje të negocijueshme. Nëse kjo përpjekje del me sukses, suksesi do të jetë i tyre. Nëse procesi dështon, edhe dështimi do të jetë i tyre.

BBC: Ju thoni se kjo është mundësia e tyre e fundit. Kjo tingëllon mjaft e rëndë?

Wolfgang Ischinger: Në rajon ka shumë presion, jo vetëm në Kosovë dhe nje prej arsyeve që ne po e nisim këtë përpjekje lidhet me shqetësimin që ekziston në lidhje me vonesën e procesit që do të çonte në zgjidhjen e së ardhmes së Kosoves. Pra presioni ekziston dhe ne do të punojmë në këtë drejtim me shumë vendosmëri. Personalisht, unë jam i vendosur të mos lë gur pa lëvizur në këtë proces para se të kthehemi për të raportuar, përmes Grupit të Kontaktit, tek Sekretari i Përgjithshëm i Kombeve të Bashkuara para Krishtlindjeve, më datë 10 dhjetor.