Stephen Gibbs BBC, Havanë

	Presidenti i Kubës Castro nuk është parë në publik që prej 6 muajsh

Duke folur gjatë samitit të udhëheqësve latino-amerikanë në Rio de Zhaneiro, zoti Çavez, një aleat i ngushtë i presidentit Kastro, tha se kishte folur me udhëheqësin 80-vjeçar për gjysëm ore, në fillim të javës.

Presidenti Kastro nuk është parë në publik që kur njoftoi rreth 6 muaj më parë, se po dorëzonte përkohësisht pushtetin tek i vëllai, Raul.

Nëse dikush e di gjendjen e vërtetë të presidentit Fidel Kastro, ky ka mundësi që të jetë aleati i tij i vjetër, Hugo Çavez.

Zoti Çavez tha se miku i tij ishte duke luftuar për të mbetur gjallë, një përpjekje si ajo që i riu Kastro bëri si revolucionar guerrilas 50 vjet më parë në malet e Kubës.

Komentet e zotit Çavez nuk janë pasqyruar në median kubaneze që kontrollohet nga shteti, e cila përgjatë pesë muajve e gjysëm nuk ka nxjerrë asnjë njoftim lidhur me shëndetin e presidentit.

Kjo çështje trajtohet në Kubë si sekret.

Disa kubanezë janë të vetëdijshëm për njoftimin nga Spanja të ditëve të fundit, sipas të cilit presidenti është shumë i sëmurë pas tre operacioneve në organet e tretjes.

Por në rrugët e Havanës, nuk ka asnjë shenjë për rritjen e sigurisë.

Patrullat shtesë u dukën gushtin e kaluar, disa ditë pas njoftimit se zoti Castro po tërhiqej përkohësisht nga pushteti.