Kan argaa jirtan oduu barreeffamaan qofa marsaritii keenya daataa xiqqaan hojjetudha. Fuula isa guutuu suuraaleefi viidiyoowwan qabate banadhaa.
Gara fuula marsariitii guutuutti na geessi
Filannoo daataa qusatu fayyadamu kanarratti hubannoo dabalataaf
Donaald Tiraamp erga godaantonni magaalaa Loos Anjalas keessatti poolisii waliin walitti bu’an booda hookkara ka'e to’achuuf Eegdota Biyyaalessaa bobbaasaiiru. Bulchaan bulchiinsa Kaaliforniyaa, Geevin Niwisom, oppireeshinii adeemaa jiru ''gara jabummaa'' jechuun ibsani.
Galgala har'aa Porchugaaliifi Ispeen Waancaa Neeshins Liig irratti wal morkatu.
Taphataan waggaa 40 Ronaaldoofi Taphataan ganna 17 Laamin Yamaal immoo addatti namni ijarra buufateera.
Taphattoonni lamaan tokko waa'ee isa kaanii dubbataniiru.
Ministirri Muummee Itoophiyaa Abiy Ahmad Komishiniin Mirgoota Namoomaa biyyattii waggoota darban gabaasa waldhahu baasaa ture jechuun qeeqan.
Gabaasa guutuu: MM Abiy Ahimad maal jedhan?
Leenjisaan garee biyyaalessaa US Maawurisiyoo Pocheettiinoo kilaba duraan leenjisaa turan, Tootanhaamitti waanan deebi'u miti jedhan.
Tootanhaam torban lama dura erga Waancaa Yuroppaa Liigii injifate booda Jimaata dheengaddaa leenjisaa isaa Angee Postekogluu gaggeesseera.
Waancaan kuni waancaa waggoota 17 keessatti kilabichi argatedha.
Eega leenjisaan Tootanhaam gaggeeffaman booda eenyutu isaan bakka bu'uu mala kan jedhan keessaa leenjisaa duraanii ta'uu malu kan jedhan jiru.
Waggoota shaniif Tootanhaam kan leenjisan Pochattiinoon garuu lakkii jedhan.
Bakkan amma jiruun gammachuun qaba jechuun miidiyaatti dubbatani.
Bu'aawwan qorannoo jalqabaa akka agarsiisanitti dawaan kun baakteeriyaawwan hamoo dawaa dandamachuu danda'an garaa keessaa qulqulleessuun baakteeriyaawwan naga-qabeessa ta'aniin bakka buusu.
Pirezidantiin Ameerikaa Donaald Tiraamp magaalaa guddoo Ameerikaa lammaffaa kan taate Loos Anjalasitti Eegduuwwan Biyyaalessaa 2,000 bobbaasaa jiru.
Bulchaan bulchiinsa Kaaliforniyaa Geevin Niwisom oppireeshinii adeemaa jiru ''gara jabummaa'' jechuun ibsani.
Gabaasa guutuu: Sababni kanaa maali?
Taateen kuni magaalaa guddoo Kolombiyaa, Bogootaa keessatti mudate.
Namni siyaasaa ganna 39 Migeel Uribee osoo duula na filadhaarra jiranii si’a sadii itti dhukaafame.
Kanaanis, si’a lama mataa isaanii keessa rukutamuutu gabaafame.
Akka miidiyaaleen biyya keessaa gabaasanitti, poolisiin shakkamaa umrii waggaa 15 to’annoo jala oolcheera.
Haati warraa nama siyaasaa kanaa abbaan warraa isaanii akka lubbuun oolan ummanni kadhaan akka isaan bira dhaabbatu gaafataniiru.
Paartiin Uriibee, Paartii Dimookiraatikii Sentiroo jedhamu haleellaa kana balaaleeffateera.
Haleellaa loltoonni Israa'el giddugala gargaarsaa kibba Gaazaatti argamurratti raawwataniin Filisxeemonni ja'a ajjeefaman, hedduun miidhaman jedhe Ejansiin Ittisa Siivilii Hamaasiin durfamu.
Sambata wayita dhukaasa eegalamu namoonni gargaarsa fudhachuuf giddugala kanatti walitti qabamaa turan jedhe ejensiin kun.
Gabaasonni namoota ijaan argan wabeeffachuun ba'an akka agarsiisanitti loltoonni Israa'el wayita namoonni giddugala kanatti imaluu eegalan dhukaasa irratti banan.
Waraanni Israa'el humnoota haala sodaachisaa ta'een gara isaaniitti socho'aa turan jedhee shakku irratti dhukaasa akeekkachiisaa dhukaasuu ibse.
Torban kana qofa Filisxeemonni gargaarsa fudhachuuf osoo giddugala kanatti imalanii ajjeefaman kurnaan lakkaa'amu.
Dhibbaan kan lakkaa'aman ammoo haleellaa giddugala kanarratti banameen madaa'aniiru.
Giddugala kana kan bulchu, jaarmiyaan Ameerikaa fi Israa'eliin deeggaramu- Faawundeeshiniin Gargaarsa namoomaa Gaazaa, muddamaa fi dhiphina dandamachuu fi nageenyummaa giddugalichaa hanga tokko fooyyessuuf jecha hojii dhaabuu ibseera.
Namoonni giddugala iddoo loltoonni Israa'el socho'anitti dhihaatee jiru bira ga'uuf loltoota kunneen keessa darbuu qabu.
Yeroo garasitti imalan rakkoon isaan mudata.
Humni Ittisaa Israa'el ibsa baaseen naannawaan kun bakka waraanni itti gaggeeffamu ta'uu jiraattota Gaazaa akeekkachiisuu hime.
Faawundeeshiniin Gargaarsa namoomaa Gaazaa doorsisa Hamaas sodaachuun Sambata kaleessaa gargaarsa raabsuu dhaabeera.
Hamaas garuu himata irratti dhihaate kana haaleera.
Yukireen xiyyaara waraanaa Raashiyaa Su-35 kan "kallattii Kursk" jedhamee ibsame Raashiyaa keessatti kufiisuu himte.
Kun lola qilleensa irraa jeettiiwwan Yukireen hirmaachise haa ta'uu ykn hojii sirna ittisa qilleensaa lafa irratti hundaa'e kan akka iddoowwan misaa'ela lafa irraa gara qilleensaatti ykn meeshaa waraanaa farra xiyyaaraa haa ta'uu, hanga ammaatti kan jedhame hin jiru.
Barreeffamni Humni Qilleensaa Yukireen baase akkas jedha: "Har'a ganama, Waxabajjii 7, 2025, bu'aa hojii humna qilleensaa milkaa'aa kallattii Kurskiin taasifameen, xiyyaarri waraanaa Raashiyaa Su-35 rukutame kufeera!"
Jeettiin Su-35 jeettii sadarkaa olaanaa fi bifa fooyyaa Su-27 durii yoo ta'u, adda durummaan akka xiyyaara waraanaa olaantummaa qilleensaa ta'etti fayyada. Inniis jeettii Ameerikaatti F-15 baayyee ammayyaa ta'en kan wal gitudha.
Su-35 Raashiyaan fooyyeffamee boombii glide, boombii 'dumb' kan meeshaalee qajeelfamaa qaban kanneen baha Yukireen irratti badiinsa bal'aa geessisaa turan bobbaasuun ishee ni yaadatama. Xiyyaarota biroo irratti samii sakatta'uufis kan ooludha.
Ganama har'aa Humni Qilleensaa Yukireenis viidiyoo jeettii lafarratti gubataa jiru agarsiisu maxxanseera. Waraabbii viidiyoo kun meeshaalee qabeenya qilleensarraa - kan akka diroonii ykn xiyyaara biraatiin kan waraabame fakkaata.
Jeettiin jedhame kun kufiifamii ilaalchisee madda walabaa irraa hin mirkanoofne. Akkasumas hanga ammaatti Ministeera Ittisaa Raashiyaa omaa hin jenne.
Poolisiin Ameerikaa namticha Waashingitaniitti torban tokkoon dura ijoolleesaa durbaa xixiqqoo sadi ajjeesuun shakkame ammalleen barbaadaa jira.
namni maqaansaa Tiraavis Deekar jedhamuun adda baafameefi kan umuriinsaa waggaa 32, ijoolleesaa durbaa kanneen umuriin isaanii sagal, saddeet fi shan ta'an ajjeesuun himannaa nama butuu fi ajjeechaa sadarkaa tokkoffaatiin barbaadamaa akka jiru Kutaan Poolisii Wenaatchee bulchiinsa Waashingitan ibseera.
Qondaaltonnis, shakkamaan kun, nama ala jiraatu fi haaluma qaama leenjii waraanaa isaaniitti mana barumsaa gaara lubbuu oolchuu dhaquun kutaa bulchiinsa fagoo gaarreenii fi bosona qabu kanaa keessa dhokatee jiraachuun barbaachi isa rakkisaa taasiseera jechuun amanu.
''Yoo itti dhiyaatames balaa guddaa qaqabsiisuu danda'as'' jedhameera. Poolisiinis kaka'umsa silaa ta'uu qabu hin taaisune.
Ijoolleen dubaraa kunneen kan maqaansaanii Paayitiin, Eveliin fi Oliviyaa jedhaman, jalqaba torban kanaa bakka buufata fagoo tokkotti haala akka waan ukkaamfaman fakkaatuun du'uusaanii poolisiin beeksiseera.
Haatisaanii Caamsaa 30 erga Aab Deekar daawwannaan booda ijoollee durbaa kanneen isheef deebisuu didee booda akka badan gabaastee turte. Haati yeroo bilbiltuufittis bilbila jalaa kaasuu dide.
Guyyoota muraasa booda, gaafa Waxabajjii 2, poolisiin reeffa shamarran kanaa naannoo buufataatti arge.
ballina odeessa kanaatiif asiin galuun argachu dandeessu.
Halkan edaa irraa hanga ganama har'aatti, guyyaa lammaffa Iid al-Adhattis haleellaan boombii Gaazaarraa hin dhaabbanne. Haleellaa knaanis lammiileen Filisxeem gargaarsa eeggataa jiran hedduun ajjeefamniiru. Kan madaa'anis heddudha.
UN akka jedhutti, uggurri gaazexeessitoonni idil-addunyaa gara naannawa sanaa akka hin seenne taasisu ''dhugaa gabaasuu dhorkuudha'' jedhe.
Kanaaf ,ammalee Gaazaa keessaatti waanti raawwatamaa jiru hedduun ifa hin ba'in jira.
Haleellaa Israa'el ganama kana bakka buufata buqaattota lammilee Gaazaa irratti raawwatteen yoo xiqqaate namoota 13 ajjeesuu fi 40 ol madeessera.
Namoota ajjeefaman keessaa abbaa, haadha fi ijoollee lama waliin turan keessatti argamu.
Haleellaa xiyyaaraa Israa’el biraa dhiha Gaazaa naannawa Al-Shifaa jedhamutti manneen jireenyaa irratti rawwatameenis miseensotni maatii 7 ajjeefamaniiru.
Akkasumas, dhukaasa waraana Israa’el naannoo wiirtuu gargaarsaa Rafah irraa gara dhihaatti argamutti dhukaasa banameen namootni 5 biroo kan ajjeefaman yoo ta’u, kaan ammoo madaa’aniiru.
Baatii darbe rraa eegalee lakkoofsi lammiilee Filisxeem nyaata barbaaddachuuf osoo yaalanii ajjeefamanii 115 kan ga’e yoo ta’u, 580 ol kan madaa’uu fi 9 kan ta'an ammoo achi buuteen isaanii dhabameera
Pirezidaantiin Ameerikaa Donaald Tiruump waldhabdee dhimma daldalaa irratti Ameerikaa fi Chaayinaa giddutti uumame furuuf qondaaltootni olaanoon Ameerikaa sadii Wixata dhufu gara Landanitti kan imalan ta'uu himan.
Akka Pirezidaantichi jedhanitti,Ministirri Maallaqaa Ameerikaa Iskoot Beessent, Ministirri Daldalaa Howard Lutnik fi bakka bu’aan daldalaa Jamison Gireer marii kana irratti Waashingitan bakka bu’uun kan hirmaatan ta’uu eeran.
''Mariin kun baayyee gaarii ta'ee deemuu qaba,'' jechuun Tiraamp barreessaniiru. Kun Taarifa Tiraamp biyyota irra kaa'an hordofee waldhabdee biyyota lamaan giddutti hammataa deeme karaa mariin sirreessuuf tarkaanfii taasifamu akka ta'ellee himameera.
Marii kana boodallee Tiraamp pirezidaantii Chaayinaa Shii Jinping waliin wal arguun akka mari'ataniif haala kan miijessuudha jedhame.
Biyyoonni kunneen waraana daldalaa jalqaban furuuf, Caamsaa 12 Jenevaatti waliigaltee guyyoota 90 raawwachuun isaanii kan yaadtamuudha.
Raashiyaan haleellaa guyyoota muraasa dura Yukireen daangaashee seenuun raawwatteef deebii haaloo bahu kennuun magaalaa Yukireen lamaffaa taate rukkutte.
Haleellaan Raashiyaa akkaan guddaa ta’e hallkan magaalaa Karaakiiv irratti gaggeessite kun yoo xiqqaate namoota ja’a ajjeesee 80 madeesseera.
Raashiyaan haleellaa gaggeessite kanaan buufatawwan waraanaarratti xiyyeeffachuu himuun, kun deebii “gocha shororkeessummaa bulchiinsa Kiiv” jette.
Tarkaanfiin Raashiyaan amma fudhatte kun haleellaa diroonii cimaa Yukireen gaggeessitee xiyyaarota waraanaa buufataaleen waraanaa afur keessa jiran barbadeessite hordofeeti.
Halleellaa Yukireen gaggeessite Kanaan yoo xiqqaate xiyyaaronni waraanaa Raashiyaa 40 ta’an barbadaa’aniiru.
Haleellaa Yukireen raawwatte Kanaan booda Pirezidantiin Raashiyaa Vilaadmiir Puutin tarkaanfii haaloo bahu akka fudhate Donaald Tiraamp himee ture.
Akkam jirtu hordoftoota BBC Afaan Oromoo? Oduu toora tamsaasa kallattiin isin biraan geenyu jalqabneerra.
Oduu wayitaawaa karaa filannoo keessanii Marsariitii BBC News Afaan Oromoo, Karaa BBC News Afaan Oromoo Whatsapp Channel fi Karaa BBC News Afaan Oromoo Facebook tiin filattanii nu hordofuu dandeessu:
Bakka Nagaa Oolaa!!
Miidiyaa michuu BBC Ameerikaa kan ta'e CBS akka gabaasett,i Af-yaa'iin mana maree Ameerikaa, Maayik Joonsan, Tiraampii fi Maaskii yoo araaraman arguu akka barbaadan dubbatan. ''Yoo wanti hundi milkaa'e paartiichaa fi biyyattiif waan gaarii ta'a'' jedhaniiru.
Maaskiin qeequmsi kan isaan mudate Aab Joonsan, deeggarsa pirezidanti Doonaald Tiraamiif qaban ifatti ibsaniiru.
"Hin shakkinaa akkasumas tilmaama hin deegarinaa. Gonkumaa pirezidaantii Ameerikaa Doonaald Tiraampiin hin morminaa" jedha. ""Innis nama siyaasaa dhaloota kanaa fi tarii bara ammayyaa kana keessatti bu'aa guddaa qaban yoo ta'an, ummataafis hojii gaarii hojjetaa jiru," jedhaniiru.
Leenjisaan Totenhaam Hotispeer Anji Poostekoogluu turtiisaa waggaa lammaffaarratti waancaa Awurooppaa liigii injifatuus leenjisummaarraa gaggeeffameera.
Torban lama dura Totenhaam 1-0n Maanchister Yunaayitidiin injifachuun waggaa 17 booda waancaa kaase.
Kanaanis Piriimiyeer Liigicha sadarkaa 17ffaan xumurus Shaampiyoonsi Liigii Awurooppaa bara dhufuuf hiree argate.
Ammoo taphoota Piriimiyeer Liigii 38 keessaa 22 mo'amuun bara bada jedhamu dabarseera.
Posteekoogluun injifannoo Awurooppaa Liig booda barri isaanii inni sadaffaan kana caala gaarii akka ta'u abri qabu ibsee ture.
Waggaa lama dura Seeltikirraa gara Kaaba Landan kan dhufe lammiin Awustiraaliyaa kun seenaa Ispeers keessatti leenjisaa sadaffaa waancaa Awuroppaa mo'ateedha.
Injifannoon Bilbaawootti argate xumura turtiisaa waggaa lamaafi bu'aa dhaamaatiifi abjuu qabaachuu akka ta'e leenjisaan kun dhaamsa nagaatti jechuuf qopheesseen himeera.
Turtiinsaa bu'aa bayii hedduun kan guute akka ture garuummoo kilabichi injifannoo waancaaf bara torba eeguu akka hin qabne bu'uura kaahuu hime.
Tajaajilli ekisteenshinii qonnaa, kan mootummaan fayyadamtootaaf bilisaan kennaa ture kaffaltiin akka kennamuu fi qooda fudhattoonni damee dhuunfaa akka irratti hirmaatan gochuuf wixineen labsii qophaaye Mana Maree Bakka Bu’oota Uummataaf dhiyaate.
Torban darbe, Kibxata, ALI Caamsaa 19, 2017 wixineen "Tajaajilaa fi Bulchiinsa Ekisteenshinii Qonnaa abbaa qooda fudhattoota hedduu" Mana Maree Bakka Bu'oota Ummataaf dhiyaateera.
Wixineen labsii kun kutaa jahaa fi keewwata afurtamaan kan qophaa’edha.
Wixineen labsichaa 'tajaajila ekisteenshinii qonnaa' jechuun "guddina, babal'ina, gorsa misooma daldalaa, kenniinsa odeeffannoo fi tajaajila leenjii teeknooloojii qonnaa" jechuun hiika kenna.
"Qorannoowwan biyya keenyatti gaggeeffaman tokko tokko qonnaan bultoonni tajaajila dinagdee isaanii fooyyessuuf kaffaltii kaffaluuf fedhii akka qaban agarsiisu" jedha wixineen qophaaye.
Ammoo tajaajila kana mootummaan kophaasaa bakka maratti dhiyeessuun waan ulfaatuuf qooda fudhattootni dhuunfaa hojii kanarratti akka hirmaatan yaadamuu ibseera.
Wixineen kun naanno tokkoo ol keessatti tajaajila kennuu qaamni barbaadu kamiyyuu Abbaa Taayitaa Qonnaa Itiyoophiyaatti galmaa’ee ragaa gahumsaa argachuu akka qabu eera.
Haata'u malee, tajaajilli mootummaan kennamu bilisa ta'ee akka itti fufu garuummoo lakkoofsi hojjettootaa akka hir'atu wixineen labsichaa ni eera.
Waldhabdee jechaa kaleessa Tiraamp fi Maask gidduu tureen, Elon Maaski ragaa malee, faayiloota mootummaa akka ifa hin taane godhaman kanneen yakkamaa saalqunnamtii daa'imanniin, biliyeenara du'aan boqote Jeefirii Epsteen waliin walqabatan keessatti Tiraamp jiraachu hime.
Har'as Demokraatonni himannaa kanaaf deebii kennuudhaan dhimmicharratti ibsi akka kennamuuf gaafachaa jiru.
Miseensi sadarkaa olaanaa Roobart Gaarsiyaa fi miseensi sadarkaa itti aanaa Isteefan Liinch, ibsa kennaniin, himannaan kun akka isaan yaaddesse kaasuun dhugaa ta'uu fi dhiisuu isaarratti ibsi akka kennamuuf gaafachaa jiru.
"Yaaliin Pirezidanticha dhugaa fi itti gaafatamummaa irraa haguuguuf jecha galmeewwan Epsteen sirnaan akka gadi hin dhiifamne dhorkuuf godhamu kamiyyuu, Kongireesii fi Ministeera Haqaatiin qorannoo cimaa barbaada," jedha ibsi isaanii kun.
Waayit Hawuus ammoo himannaa Maaskiif deebii kennuudhaan, ''kun
Himata Maaskiif deebii kenneen Waayit Haawus gamasaatiin, ''kun kutaa diraamaa gaddisiisaa Elon irraa dhufedha'' jedheera.
Maddi haala kanakeessa beeku BBC'tti akka himetti, himannaan Maaskiin kun waan haaraa miti.
Ministirri Muummee Israa'el Beeniyaamin Netaaniyaahuun Israa'el gosoota Gaazaa keessatti Hamaas mormu jedhan hidhachiisaa akka jirtu mirkaneessan.
Yaadni Netaaniyaahun kun kan dhagahame erga miidiyaaleen Israa'el maddoota ittisaa wabeeffachuun ministirri mummichaa garee kibba Gaazaa keessatti argamu tokkoof meeshaa waraanaa akka kennamuuf hayyaman jechuun gabaasaniin boodadha.
Namoonni siyaasaa Israa'el hedduun garuu nageenya Israa'el balaadhaaf saaxilu jechuun Netaaniyaahuun himataniiru.
Netaaniyaahuun viidiyoo gabaabaa tiwiitara isaanii irratti baasaniin "Kana raawwachuun rakkoo maalii qaba?" dubbatan. "Lubbuu loltoota Israa'el kan baraarudha" jechuun, itti fufanii, " beeksisuun isaa ammoo Hamaas qofa gargaara" jedhan.
MM Israa'elis kana kan dubbatan, gabaasa Israa'el hayyama isaatiin gosa Gaazaa keessa jiruuf kan nama maqaansaa Yaasiir Abuu Shaabaab jedhamuun durfamuuf meeshaa waraanaa dhiyeessaa turte jedhu eeruudhaan.
Garee namoonni muraasni akka milishaa ykn garee yakkamtootaatti ilaalan kun akka humna mormituu Hamaasitti of dhiheessee jira.
Kaayyoon isaa konkolaattota fe'umsaa gargaarsa gara Gaazaatti fidan eeguu akka ta'e kan dubbatu yoo ta'u, qeeqxonni garuu faallaa kanaa hojjechachuun saamaa jira jedhu.
Yaadni kun Beeniyaamin Netaaniyaahuun kan tuffatame ta'uu danda'a, garuu gara salphina siyaasaa haaraa hamaa ta'etti guddachuu danda'a.
Maddeen ittisaa Israa'el, himannaan kanaan dura nama siyaasaa mormituu Israa'el, Avigdor Liibermaan dhiheessanii ture sirrii ta'uusaa gaazexeessitoota biyya keessaaf mirkaneessaniiru.
Dursaan paartii mormiituu, Yisraa'el Beetee'inuu jedhamu kunis kanaan dura midiyaa motummaa Kaan jedhamuutti akka himaniitti, Neetaaniyaahun qofaasaa meeshaaleen waraanaa gosa Abuu Shaabaab jedhamuuf akka dabarfamu mirkaneessaniiru jedhanii ture.
''Mootummaan Israa'el garee yakkamtootaafi saamtootaa kanneen garee Islaamummaa waliin adda baafamaniif meeshaa waraanaa kennaa jira,'' jedhan Liiberman.
"Akka ani beekutti, kun kaabineedhaan akka raggaasifamuuf adeemsa keessa hin darbine," jechuun dabalanii dubbatan.
Itti aansuudhaan, maddeen ittisaa Israa'el qawwee Kalaashnikov kanneen Hamaas irraa hiikchiifame dabalatee gosa Abu Shaabaab hidhachiisaa akka turte mirkaneessan.
Gosti kunis naannoo Raafaa kan to'annoo waraana Israa'el jala jiru keessa socho'aa kan tureera.
Haata'u malee, Yaasir Abu Shaabaab ammoo, Israa'el gareesaaf meeshaa waraanaa dhiyeessite jedhamu "cimsee waakkachuun" toora interneetii irratti maxxanse.
"Meeshaan waraanaa keenya salphaa, yeroonisaa ka irra darbee fi kan deeggarsa ummata keenyaatiin argameedha," jedhan.
Dhiheenya kana keessa hariiroon pirezidantii Ameerikaa Doonaald Tiraampii fi soorreessa addunyaa kanaa Elon Maaski jidduu jiru badaa jiraachu Elan Maask ifatti dubbatee jira.
Tiraamp ammoo erga Maask waliin waldhabuunsaanii ifa ta'een booda konkolaataa Taslaaa isaa gurguruuf yaadaa jiraachuu akkasumas isatti dubbachuu akka hin barbaadne himame.
Gargaartota Waayit Haawusiin Maaskii fi Tiraamp gidduutti araarri akka bu'uuf har'a yaaliin taasifamaa akka jiru gabaafameera.
Haata'u malee, Waayit Haawus pirezidantichi har'a Maaski waliin haasa'uuf akka hin yaadne BBC'tti himeera.
Kana malees Doonaald Tiraamp konkolaataa isaanii Taslaa gurguruudhaaf barbaadaa akka jiran michuun BBC Ameerikaa CBS qondaala olaanaa Waayiti Hawuus eeruudhaan gabaaseera.
Konkolaataa diimtuun yeroo inni Elon Maask akka dhaabbannis jajjabaatuuf gargaaruu bituudhaan torbanootaaf Waayit Hawuus keessa dhaabbatee akka jirtu gabaaseera.
