Darbii Landan: Arsenaal galchii Ebereche Eezzee sadii fi Tiroosaadiin 4-1 Tootenhaamiin mo'ate

Haguuggii Tamsaasa Kallattii

Zelalem Tadesse Duressa

1. 23 Sadaasa 2025Tamsaasa kallattii har'aa asirratti xumurreerra

   Hordoftoota keenya tamsaasa kallattii Piriimer Liigii Ingiliz irratti xiyyeeffate asirratti xumurreerra.

   Boru ammoo yaadota dorgommii torbanii irratti kennaman kan isiniif dhiyeessinu taha.

   Waan nu waliin turtaniif guddaa galatoomaa.

2. 23 Sadaasa 2025Arsenaal olaantummaa guddaan galchii 4-1 Tootenhaam mo'ate

   Arsenaal Cheelsii kan sadarkaa lammaffaa irra jiru qabxii jahaan caaluun qabxii 29'n gabatee Piriimer Liigii dursaa jira.

   Maanchister Siitiin Niwkaasiliin. Liiverpuul ammoo Nootingihaam Foorestiin mo'amuun isaanii Arsenaal akka garaagarummaa qabxii isaa guddifatu gargaareera.

   Injifannoon har'a Tootenhaam irratti argatan Arsenaal barana waancaa injifacuuf humna hundaa qabaachuu agarsiisa.

   Bor Maanchister Yuunaayitid Everteen waliin morkata. Aston Viilaanis har'a Liidsi Yuunaayitid mo'achuun sadarkaa arfaffaa qabateera.

3. 23 Sadaasa 2025Arsenaal 4-1 Tootenhaam

   Ebereche Ezzee galchii sadii lakkoofsisuun Arsenaal 4-1 dursaa jira.

   Arsenaaliif tapha salphaadha. Tootenhaam inumaa waan mufannaa qaban fakkaatu.

   Mo'achuuf ykn ittisuuf haamilee homtuu irraa hin mul'atu. Toomas Firaankiif taphattoonni isaanii hagam akka waliigaltee qaban gaaffii kaasa.

4. 23 Sadaasa 2025Arsenaal 3- 1 Tootenhaam- 56'

   Riicharlisan fageenyarraa kubbi rukute Deevid Raayaa darbuun gale.

   Raayaan sarara isaa irraa bahuu arguun kan rukute Riichaarlisan galchii bareedduu lakkoofsise

5. 23 Sadaasa 2025Arsenaaliif tapha salphaa, Arteettaan akkuma jedhe godhe

   Tootenhaam kubba tokko illee kan kallattii isaa eeggates tahe hin eeggatiin karra Arsenaal irratti osoo hin yaaliin boqonnaa bahan.

   Kun kufaatii guddaa Tootenhaam Darbii Landan irratti agarsiisedha.

   Sarara ittisaa haga fuula duraatti bakkatti hin caalamne hin qaban.

   Tootenhaam kubbi harkaa badeera. Dhaabbatanii taphattoota Arsenaal ilaaluu malee akka gareetti homaa taphataa hin turre.

   Darbiin haalaan eegame kun deeggartootaaf miira morkii eegame kan kennu hin fakkaatu

6. 23 Sadaasa 2025Arsenaal 3-0 Tootenhaam

   Akkuma boqonnaa irrraa deebi'aniin Ezzee galchii sadaffaa lakkoofsise.

   Tootenhaam tapha Darbii waan taphataa jiru hin fakkaatu.

   Arsenaal kileba barana waancaa injifatu fakkaata. Imalli isaanis kanuma agarsiisa

7. 23 Sadaasa 2025GOOOL: Arsenaal 2-0 Tootenhaam

   Ezzee galchii lammaffaa lakkoofsise. Toomaas Firaank waan haaraa yaaluuf dirree seenan.

   Ittisa sadiin galan. Deebisanii jifachuu [ Counter attack] yaadan hin milkoofne.

   Taphattoonni isaanii dirree keessaa hin mul'atan. Arsenaal darbii Landan Kaabaa olaantummaan dursaa jira.

   Garaagarummaa qabxii Cheelsii waliin qabu jahatti guddisuu isaati.

   Maanchister Siitii irraa qabxii torbaan Liiverpuul irraa qabxii 11 fagaata.

8. 23 Sadaasa 2025GOOOOOOL: Arsenaal galchii Tiroosaadiin dursa qabate

   Kubba Mikeel Meerinoo dabarse Tiroosaad rukutuun taphataa Tootenhaamitti bu'uun kallattii jijjiire gale.

   Arsenaal dirree isaa irratti taphas caalee galchiidhaanis dursaa jira

9. 23 Sadaasa 2025Piriimer Liigii keessaa taphattoonni 29 miindaa Bukaayoo Saakaa caalaa argatu

   Bukaayoo Saakaa torbaniin paawondii 150,000 argata. Arsenaal keessaa Kaayi Haavert warra miindaa gddaa argatan keessaati.

   Piriimer Liigii keessaa miindaa tokkoffaa kan argatu Erliingi Haalaand yoo tahu 525,000 argata.

   Mohaammad Saalaa lammaffaa yoo tahu kuma 400 argata.

   Kana nama dhibu Raahem Isteerliing kuma 325 argachuun sadarkaa shanaffaa irra jira.

   Kaazemiiroon kuma 350, argachuun sadarkaa arfaffaa qabata. Omaar Maarmush erga gara Maan Siitii dhufee torbeedhaan kuma 295 argata.

   Saakaan miindaa isaa osoo hin guddatiin kontiraata haaraa mallatteessaa?

   Miindaa taphattoota Arsenaal guutuu maal fakkaata?

10. 23 Sadaasa 2025Arsenaal guutummaan tapha caaleera

    Daqiiqota jalqabaa 10 Arsenaal guutummaan caalmaa taphaa fudhateera. Taphattoonni Tootenhaam waan sodaatan fakkaatu.

    Sarara hunda irratti kubba argataa hin jiran.

    Odoogiin ittisa irraa Bukaayoo Saakaa eeguu malee kubba taphataa hin jiru. Yeroo Saakaan kubba dhabu Eezzee fi Tiroosaad fuulduratti bahuun carraa galchii uumuuf yaalaa jiru.

11. 23 Sadaasa 2025Toomaas Firaank tapha jalqabaa Piriimer Liigiin Arsenaal mo'ate.

    Leenjisaan Tootenhaam jalqaba yeroo gara Piriimer Liigii dhufee leenjisaa Bireentifoord tahu tapha jalqabaa isaan Arsenaal mo'ate. Ergasii garuu tapha tokkoyyuu hin mo'anne.

    Lama qixa bahee shan mo'ameera. Toomaas Firaank BBC Radio 5 Live'tti akka himetti tapha waan hundaan guutuu tahe argitu jedhe.

    Waggaa keessaa tapha baay'ee guddaa lama akka qabnu hubadheera. Miirri deeggartoota kileboota lamaaniis kanuma sitti hima.

    Tokko isa ammaa kanadha. Garuu taphni kun diraamaan kan guute taha. Anaaf Mikeel tapha of eeggannoo qabu filanna. Garuu maraatuu mana lixe akka tahu nan hubadha.

    Gonkumaa 0-0 xumuruuf hin taphannu. Tapha diraamaan guute argitu jedheen eega jedhe.

12. 23 Sadaasa 2025Hinkaappeen jalqaba irratti gale; Kaan eenyufaatu Arsenaaliif hiriire?

    Arsenaal: Raayaa, Tiimber, Saalibaa, Hinkaappee, Kaalafiyoorii, Zuubimandii, Raayis, Eezzee, Saakaa, Tiroosaadii fi Meerinoo

    Miidhamarra kan turan Maduweekee, Maartineelii deebi'uun taa'umsa jijjiirraa irra jiru.

    Tootenhaam: Vikaariyoo, Ispeensi, Roomeroo, Daansoo, Vaan de Veen, Udoogii, Paalhinaa, Beentaakor, Riicharlisan. Odebartii fi Kuddus jalqabarra hiriiran.

    Peedroo Pooroo, Paappee matar Shaarii fi Zhaavii Siimons taa'umsa jijjiirraa irra jiru.

    Tootenhaam taphoota dirree isaan ala gaggeesse irratti rikardii gaarii qaba. Afur mo'ee lama qixa baheera.

    Kiriis saatan Arsenaal 3-0 Tootenhaam jechuun tilmaame

13. 23 Sadaasa 2025Maatiyaas Kuunaa miidhama akkamii mudate? Tapha Everteeniif hin gahuu?

    Taphataan maanchister Yuunaayitid Maatiyaas Kuunaa sagantaa Ayyaana Qillee dursuun gaggeeffamu irratti kaleessa osoo hin argamuiin hafe.

    Kuunaan sababa yaala medikaalaaf saganticha irratti hin argamne jedhame. Yeroo Beenjaamiin Sheeskoo miidhamarra jiru kana irratti Kuunaa dhabuun Yuunaayitidiif rakkoo guddaa taha.

    Qindeessitoonni sagantaa ‘’shaakala irratti miidhaa isa mudateen’’ Maatiyaas Kuunaa sagantaa irratti hin argamu jechuun beeksisan.

    Amoorim miidhama taphataa kanaa ibsa miiidyaaleef kennan irratti hin ibsine. Garuu tapha Everteen waliin qaban dursee miidhamuun yaaddoo uumeera.

    Wiixata boruu kan taphatu Maanchister Yuunaayitid yoo Everteen mo’ate sadarkaa arfaffaa galuu danda’a.

    Miidhamni Kuunaa salphaa tahuu kan eerame tapha kanaafis dhaqabuu mala.

    Bakka isaa Amoorim Mason Maawont fayyadamuu danda’a. Garuu Kuunaan bakka Sheeskoon hin jirretti sarara duraa Yuunaayitid dursaa ture.

14. 23 Sadaasa 2025'Anumatu hin dandeenye,Kufaatiikooti' Arnee Isloot

    Leenjisaan Liiverpuul Arnee Isloot erga dirree isaanii irratti Nootingihaamiin 3-0 mo’amanii akka baay’ee gaddan dubbatan.

    Kana gurrumakoofuu dhagahuun natti ulfaata kan jedhe Isloot, taphattoota ciccimoo qabna. Dandeenttii isaanii akka baasanii kennan haala mijataa uumuun hojiikooti.

    Isa kana ammo har’a gochuu hin dandeenye. Yaaleen ture. Waan bara darbe naaf hojjete tapha kana irratti na dide. Itti gaafatamummaan isaa kan kooti jechuun ibse.

    Taphoota Piriimer Liigii torba keessaa jaha mo’amaniiru. Kun haga kana dura taphoota 53 irratti mo’aman waliin wal qixa.

    Paawondii miliyoona 450 kan baase Liiverpuul inumaayyuu morkattoota isaanii akka Maanchister Siitii fi Arsenaal irra akka malee jabaachuuf turan.

    Garuu ammatti hin taane. Liiverpuul meeqaffaan xumura jettu?

15. 23 Sadaasa 2025Arteettaan Darbii Landan Kaabaa irratti yaada kenneera.

    • Arteettaan tapha har’a Tootenhaam waliin qabu dursee waa’ee garee isaa qabxiilee kanneend ubbateera.
    • Viiktar Giyookeres miidhama isa mudateen hin taphatu. Maartineelii, Maduweekee fi Odeegaard akkasuma miidhamarra jiru. Garuu yoom deebi’u kan jedhu irratti hin dubbanne.
    • Yeroo boqonnaatti ogeessota fayyaa wlaiin tahuun akka isaan dafanii debei’aniif waan dandeenyu hundaa gochaa turre jedhe.
    • Tarii har’a isaan keessaa kan deebi’u jiraachuu akka malu akeekeera.
    • Kaayi Haavertis akkasuma deebi’uutti akak dhiyaate dubbatee ture.
    • Darbii Landan Kaabaa irratti: Magaala guddaadha. Garuu addatti isaan [Tootenhaam] morkattoota keenya jaboodha. Yeroo dhiyoo as isaan irratti caalmaa guddaa qabna ture. Dirree keenya irratti taphachuun waan gaariidha.
    • Deeggartoota isaaniifis tahe keenyaaf hiika akkamii akka qabu ni hubanna jedhe. Sadarkaa Tootenhaam irra jiru ilaalachiisee isa dagachuu wayya. Liigii kana keessatti eenyullee qabxii barbaaddu akka argattu siif hin eeyyamu. Morkattoota keenya jaboodha jedhe.
    • Tapha kana injifachuuf dursanii akka aka xumuranis dubbateera.

16. 23 Sadaasa 2025Ashamaa! Tamsaasa kallattii keenyatti deebineerra.

    Yaada keessan karaa Feesbuukii fi Whatts App chaanalii BBC Afaan Oromoo nuuf barreessaa.

    Turtii gaarii!

17. 22 Sadaasa 2025Liiverpuulii fi Maanchister Siitiin mo’aman

    Liiverpuul durree isaa irratti mo’ame. Maanchieter Siitiin carraa Arsenaalitti dhiyaachuu balleesse.

    Niwkaasiliin 2-1 mo’ame. Cheelsiin Barnilee mo’atee lammaffaa gale.

    Bor Arsenaal Tootenhaamiin yoo mo’ate garaagarummaa Maan Sitii irraa qabu toorbatti guddisa.

    Tamsaasa keenya har’aa asumarratti goolabna. Waan nu waliin buutaniif guddaa galatoomaa.

18. 22 Sadaasa 2025Niwkaasil 2-1 Manchister Siitii

    Diraamaa. Nikaasil galchii Harvii Barnesiin dursa qabate. Osoo hin turiin Ruuben Diyaaz Maan Siitii wal qixxeesse.

    Daqiiqaan booda Niwkaasil galchii lammaffaa lakkoofsisan. Maanchuster Siitiin amma durfamaa jira.

19. 22 Sadaasa 2025Arnee isloot erga mo’amanii waa’ee isaanii fi taphattoota isaanii dubbatan

    Arnee isloot erga Nootingihaamiin 3-0 mo’amanii akkas jedhan.

    "Daqiiqota jalqabaa 30 taphattoonni koo waanuman irraa eegaa ture hojjetaniiru.

    Humna guddaan taphatanii carraa dursanii galchii lakkoofsisuu uumanii ture. Galchiin Nootingihaam Foorest jalqabaa haalicha guutummaan jijjiire. Haala taphichaa jijjiiruuf yaaleen ture.

    Taphattootas jijjiiree yaaleera. Garuu naaf hin milkoofne. Yeroo hundumaa kun itti gaafatamummaakooti jedhan Arne Isloot.

    Ofitti amanamummaan kee gadi bu’aa jiraa jedhamanii yoo gaafataman: ‘’Miirri kun natti hin dhagahamu. Erga 1-0 nu dursanii booda baay’ee rakkanne.

    Boqonnaan booda haala gaariin akka jalqabnuuf odeeffannoo barbaachisaa kenneefiin ture.

    Akkuma dirree galleen 2-0 nu dursuu jalqaban. Taphattoonni waan danda’an hundaa yaalaniiru.

    Isaaniin hin komadhu. Kubba gara galchiitti yaalle hundaa ofirraa qolachaa turan.

    Furmaanni isaa waan fagoo jiru miti. Carraa baay’ee uumneerra. Waanuma carraa kudhan fa’aa isaaniif kennine miti.

    Garuu amma yerootti of ilaaluu qabnuufi fuulduratti maal gochuu qabna jennee madaalludha. Yeroo galchii nurratti dursee lakkaa’amu maal gochuu qabna kan jedhu irratti hojjenna.

    Tapha lama irratti walitti aansinee galchii hin lakkoofsifne jedhan.

    Miirri taphattoota isaanii amma gadi aanaa tahuu kan himan Isloot taphni Shaampiyoonsi Liigii dhufaa waan jiruuf of haaromsuun qophaa’uu qabu jedhan.

    Waan addaa yeroo baay’ee tapha akka kanaa Aanfiildi irratti 3-0 mo’amnee hin beeknu kan jedhan Isloot deeggartoonni isin faarsaa turan jedhee isaan jajjabeessera jedhan. Deeggartoonni hedduu garuu osoo taphni hin dhumiin dirree keessaa bahan.

20. 22 Sadaasa 2025Maanchister Yuunaayitid amma karuma hundaa dorgomaa taheera- Amoorim

    "Ruuben Amoorim waa’ee turtii isaanii ji’oota 12 Maan Yuunaayitid keessaa irraa eegaluun dubbatan.‘’Jalqaba irratti haalli hunduu adda natti tahe. Liigii addunyaa irraa ulfaataa tahedha. Kilebni kunis [Maan Yuunaayitid] kileba addunyaa irraa isa guddaa tahe keessaati,’’ jedhe.

    Dhiyeenya ammo taphoota shan keessaa sadii mo’achuun lama qixa bahaniiru. Amoorim ‘’ taphoota darban irratti hammamiyyuu gaarii taane amma murteessaan isa miti.

    Yaadachuu qabna yeroo meeqa akka balaa keessa turre. Isaanumaaniyyuu rakkoo keessa gallee akka tapha waancaa isa dhumaa taheetti taphannee mo’anne.

    Waan gaariin tokko taphoota darban irratti kubbaanis akka gareetti taphachuunis caalmaa guddaa qabna ture. Karuma hundaanuu dorgomaa cimaa taaneerra. Waan gaariin isadha jedhe.

    Miidhama taphattootaa ilaalchisee Lisaandiroo maartinez shaakala hojjechaa jiraachuu himan.

    Maartinez yeroo deebi’u sarara gidduu taphachiisuu jedhamanii yoo gaafataman, ‘’amma isaaf of eeggachuu qabna.

    Amma haala gaarii irra jira. Sararri gidduu garuu bakka isaa miti. Garuu yeroo rakkoo taphachuu danda’a jedhan.