Libaanos haleellaa hospitaala Beeruti biraatti raawwatameen hedduun ajjeeffaman jette

Haguuggii Tamsaasa Kallattii

1. 22 Onkololeessa 2024Amma nu gahe, Namoota ajjeeffaman afur keessaa tokko daa'ima- Ministeera fayyaa Libaanos

   Haleellaa Israa’el galgala kana kibba Beerut dhihoo hospitaala tokkotti raawwatteen namoota afran ajjeefaman keessaa daa’imni tokko akka jiru ministeerri fayyaa Libaanos.

   Ministeerri fayyaas namoonni 24 madaa’uu hima.

   Miidiyaaleen mootummaa Libaanos akka gabaasanitti, naannoo kibba magaalaa Beerutiitti haleellaa 13n rukutame.

   Israa’el hanga ammaatti taatee kanarratti yaada hin kennine, haata'u malee kana dura akeekkachiisa baqachuu hedduu kutaalee naannoo kibba Beerut keessaa bahaa jechuun, Hezbollaa irratti akka xiyyeeffattuu himtee turte.

2. 22 Onkololeessa 2024Amma nu gahe, Libaanoos haleellaa dhiheenya hospitaala Beeruutiitti raawwatamen namoonni ajjeeffamu himte

   Ministeerri fayyaa Libaanoos haleellaa galgala kana israa'el dhiheenya hospitaala Beerutiitti raawwatteen yoo xinnaate namoonni afur ajjeeffamu hime.

   Ministeerichi akka jedheetti haleellaan qilleensaa Isaa'el dhiheenya kana raawwattees kibba Beeruti hospitaala Yunivarsitii Raafiik Haariiritti bakka dhihoo ta'eerratti raawwatameeniidha.

   Haleellaan qilleensaa galgala kanaatiin magaalaa guddoo Libaanos Beerut keessa, bakkeewwan waraanni Israa’el Hezbollaa waliin hidhata qaba jedhe hedduu irratti xiyyeeffateera.

   Bakkeen tokko naannoo hospitaala mootummaa guddaa tokkotti argama.

   Akka sa’aatii biyyatiitti sa’aatii 22:00 booda ture dubbi himaan Israa’el akeekkachiisa haleellaa qilleensaa bakkeewwan kibba Beerut keessaa irratti akka raawwatamuufi jiraattonni nageenyasaaniif gamoo irraa akka fagaatan kan gaafate.

   Akeekkachiisni jalqabaa erga kennamee gara daqiiqaa 15 booda Israa’el naannoolee kibba Beerut lamarratti haleellaa xiyyaaraa walitti fufiinsaan raawwachuu jalqabde.

   Haleellaan xiyyaaraa hospitaala mootummaa guddichaan alatti haleele, kanaanis sagalee cimaan tokko akka namoonni damaqanii lubbuuf dahoo barbaacha fiigan taasisuu kanneen ijaan argan dubbatan.

3. 21 Onkololeessa 2024Naannoo kibba Beerut irratti haleellaa raawwatameen aarri ni samiitti ol ka'e mul'ata

   Suuraalee haaraa galgala kana magaalaa guddoo Libaanos Beerut irraa argaa muraasni kunooti.

   Haleellaa Israa'el booda aarri naannoo kibba magaalattii irratti ka'ee mulatu kunoo suuraan mul'ataa jira.

4. 21 Onkololeessa 2024Hospitaalli Beerut erga Israa'el qabeenyaan Hezbollaa jalatti dhokfameera jetteen booda gadiisuun bahe

   Raayyaan Ittisaa Israa’el akka, baankiin Hezbollaa hospitaala Beerut jala jiru keessaa maallaqa callaa doolaara miliyoona dhibbaan lakkaa’amuu fi warqee of keessaa qaba jedhe.

   Viidiyoo gabaabaa toora interneetii irratti maxxanfameen dubbi himaan IDF Daani’eel Hagarii, galgala edaa bu’uuraalee faayinaansii Hezbollaa waliin hidhata qaban irratti haleellaa raawwatameen, mana kuusaa lafa jalaa kan biraa, kan inni gamoo mana jireenyaa jala ture jedhu irratti xiyyeeffatameera jedhe.

   Haata'u malee, Hagariin akka jedhutti, IDF baankii Hasan Nasrallaa, kan hogganaa Hezbollaa ture fi ji’a darbe keessa Israa’eliin ajjeefame, ta'e jedhee hin haleellee jedhe.

   Baankii kanadha kan amma Hagarii Beeruti keessatti hospitaala Saahel jalatti argama jechuun, maallaqaa fi warqee baay'eedhaan guutameera jedhan.

   Israa'el erga himannaa kana dhiyeessiteen booda hospitaalichi keessaa kan bahame yoo ta'u daarektarri hospitaalichaas baankiin akkasii jiraachuu isaa haaluudhaan, waraanni Libaanos bakka sana akka daawwatuuf waamicha dhiyeessaa akka jiru dhaabbanni oduu Rooyitarsiif himeera.

   Israa'el mooraa kana hordofaa jirti garuu hospitaalicha akka hin rukunne ibsuun, aanga'oonni Libaanos Hezbollaan ''maallaqa kana shororkeessummaaf akka fayyadamu'' akka hin hayyamne gaafatteetti.

5. 21 Onkololeessa 2024IDF Damaasqoo keessatti itti gaafatamaa damee faayinaansii Hezbollaa ajjeesuu hima

   Raayyaan Ittisa Israa'el (IDF) haleellaa har’a magaalaa guddoo Sooriyaa Damaasqoo keessatti raawwatameef itti gaafatamummaa fudhatee ture.

   Haleellichaanis ittigaafatamaa damee maallaqaa Hezbollaa ajjeeseera jedhan.

   Dura ammoo, ministeerri ittisa Sooriyaa ibsa baaseen, haleellaa Israa’el raawwateen namoonni nagaa lama du’uu fi kan biraa sadii ammoo madaa’uu ibseera.

   Ibsi Raayyaan Ittisa Israa'el (IDF) galgala kana baaseen, “Sooriyaa fi bakka hundatti Hezbollaa irratti tarkaanfii fudhachuu itti fufna” jedha.

6. 21 Onkololeessa 2024'Hezboollaa fi Israa'el lola dhaabuuf qophii miti' - Ergamaa addaa Ameerikaa

   Torbanoota dura Israa'el duula waraanaa guutuu Hezboollaa irratti banuu dura ergamaan addaa Ameerikaa Amoos Hoositeen dhaabsiisuu hin dandeenye ture.

   Amma Libaanos kan jiran ergamaan kuni haleellaa qilleensaa balaafamaa fi mancaatii torbee afur tureen booda nagaaf iddoon jira jedhanii yaadanii ture.

   "Haalli amma jiru jijjiiramuu qaba," jedhan dubbii himaa paarlaamaa Libaanos arguun booda, haalli nagaaf jiru gaarii hin fakkaatu jedheera.

   Eda galgala Israa'el baankiiwwan Hamaas Beeruut keessaafi iddoo kaan jiran barbadeessuu amma yeroon yerootti faayinaansii dhaabicha dhabamiisan tahuu himte.

   Hezboollaan iddoowwan Libaanoos garagaraatti waan jiruuf iddoo mootummaan hn qaqqabne deeggarsa maallaqaafi hawaasaa uummtaaf kenna.

   Israa'el sochiin Hezboollaa hawaasa Libaanos keessaa qabu akkaan akka hir'atu barbaaddi.

   Gamni lamaanuu ammallee lola dhaabuuf qophii miti.

7. 21 Onkololeessa 2024Dhaabbanni Fayyaa Addunyaa dubartootaafi daa'imman Filisxeemii 1,000 Gaazaatii baasuuf

   Dhaabbanni Fayyaa Addunyaa ijooleefi dubartota Filisxeem 1000 tahan kara Israa'el baasuun gara biyyoota Awurooppaa garagaraa wal'aansaaf geessuuf haala mijeessaa jira.

   Sagantaan kuni qaama namoota baraaruun biyyya sadaffaatti wal'aansa lubbuu oolchuu akka argatan gochuu dha

   Ibsi Dhaabbata Fayyaa Addunyaa waajira Awurooppaa jirurraa saganta kanatti Israa'el waliigalteettii jedha.

   ''Hospitaala biyyoota Awurooppaa keessatti iddoo argachuuf eegaa jirra,'' kana yeroon dhimma murteessaa tahe tahuu himuuni,'' jedhe.

   ''Fayyaan ala nagaan hin jiraatu, nagaan alas fayyaan hin jiru. Dhaabbanni Fayyaa Addunyaa dhukaasni akka dhaabbatu, warreen butaman akka gadhiifamaniifi deeggarsi namoomaa dhorkaa malee akka qaqqabu yeroo dheeraaf

8. 21 Onkololeessa 2024Kooriyaan Kibbaa loltoonni Kooriyaa Kaabaa Raashiyaatii hatattamaan akka bahan gaafatte

   Kooriyaa Kibbaa ambaasaaddara Raashiyaa waamuun ''loltooonni Kooriyaa Kaabaa Yukireen loluuf leenji'aa jiran atattamaan akka bahan,'' jechuun gaafatte.

   Akka dhabbanni basaasaa See'ul jedhutti humna addaa dabalatee loltoonni Kooriyaa Kaabaa 1,500 Raashiyaa galaniiru.

   Wal gahii ambaasaaddar Joorjii Zinooviiv waliin taasisaniin ministarri ittaanaa Kooriyaa Kibbaa Kiim Hoong-kiyuun tarkaanfii Kooriyaa Kaabaa balaaleffachuun Sewuul ''tarkaanfii barbaachisu hundumaan deebii kennitii,'' jedhan.

   Zinooviiv yaaddoo jiru akka hubatan himuun, qindoominnii Moskoo fi Piyoongyaang gidduu garuu ''seera idil-addunyaa kan eege dha,'' jedhan.

9. 21 Onkololeessa 2024Lammiin Ertiraa Kaaba Ayarlaanditti haleellaa raawwachuun adabamte

   Lammiin Eritiraa Kaaba Ayarlaand keessa godaantummaan jiraattu tokko hojjettuu dhiimma hawaasummaa irra deddeebiin meeshaa qara qabuun waraanuun, hordofee adabbii hidhaa fi biyyaa arii'amuun irratti murtaa'e.

   Lammiin Eritiraa kan ganna 25 fi maqaanshee Fiyyoorii Kassata jedhamtu, miidhaa qaqabsiifteen booda mana murtiitti dhiyaattes gochaa raawwatte amanteetti.

   Himatamtuun kun haleellaa kana kan raawwatte akeekkachiisa osoo hin keenniin akka tasaa irree fi mataa miidhamtuu keessa dhahuu sheetu himame.

   Gochaa kanas waggaa lama dura kan raawwatte yoo tahu, kanas wiirtuu jireenyaa godaantotaa keessaa baddee erga turteen booda poolisiin qabamtee deebi'uun booda haleellaa kana raawwatte.

   Manni murtii dhimma kana ilaalee ture duraan hidhaa waggaa jahaa kan itti mure yoo tahu, booda garuu Fiyyooriin nama ''balaa baattudha'' jechuun yeroon hidhaa akka dheeratu godheera.

   Boodarras manni murtii ''warreen nama daddabarsaniin dhufte,'' waan jedhu adabbii salphisaaf hin fudhatiin hafeera.

   Inumaayyuu erga mana hidhaa galtee amalli agarsiiftu kan lolaa fi aarii guutame waan taheef, yeroo hidhaashee erga xumurteen booda biyyaa akka arii'amtu abbaan murtii murteessaniiru.

10. 21 Onkololeessa 2024Kibba Libaanos keessatti waraanni itti fufeera

    Dhaabbanni Oduu Biyyaalessaa Libaanos kan mootummaan bulchu (NNA) akka gabaasetti, waraanni Israa’el ollaa kibba Libaanos Aita al-Shaab jedhamtu, kan daangaa Israa’el waliinii keessatti “manneen haleellaman” jedha.

    Akkasumas NNAn, "xiyyaaronni waraanaa diinaa'' naannoo Habuush fi Araabsaalim kan gara kaabaatti fagootti argamu haleelaniiru jedhe.

    Raayyaan Ittisaa Israa'el (IDF) kibba Libaanos keessatti sakatta'iinsa ''daangeffame, kan naannoo muraasa irratti xiyyeeffate'' gaggeessee jira jedha.

    Itti dabalunis duulichi ''dirooniiwwan misaa'eloota dhukaasan'' kan buufataalee ajajaa Hezbollaa haleellan jedheen kan hirmaachise ta'us hime.

    Akkasumas xiyyaarri qilleensaa Israa'el ''dhaabbilee kuusaa meeshaa waraanaa'' naannicha keessaa, dirree miisaa'eloota Israa'el irratti dhukaasuuf itti fayyadamu jedheen haleeluus himeera.

11. 21 Onkololeessa 2024Ergamaan Ameerikaa Baha Giddu Galeessaa marii dhukaasa dhaabuutiif Beerut seenan

    Ergamaan Pirezidaantii Ameerikaa Joo Baayiden kan Baha Giddu Galeessaa, Amos Hochstiin waraana Hezbollaa fi Israa’el gidduutti yaalii furmaata karaa marii taasisuuf Beerut galan.

    Israa’el torban afur dura duula waraanaa Hezbollaa irratti geggeessitu erga cimsiteen booda Hochstiin Libaanos yoo daawwatan kun isa jalqabaati.

    Imala isaanii kanaan duraatiin Hochstiin waraana namootaafi bu’uuraalee misoomaa Libaanos irraan miidhaa guddaa geessise kana ittisuuf yaaliin taasisan illeen hin milkoofne ture.

    Beerut kan ga’an ergamaan kun, Libaanos waldhabdee naannoo waliin walitti hidhachuun egeeree Libaanos akka hin taane akeekkachiisaniiru.

    Haata'u malee kun Hezboollaan Iraan waliin walitti dhufeenya cimaa qabaachuu fi kan murtee inni Hamaas kan lola Israa’el waliin walolaa jiru deeggaruuf murteesse agarsiisudha jedhan.

    Akkasumas, gara haala dur kan turee, bakka waraanni Libaanos humna UNtiin deeggaramee, nagaa daangaa Israa’el waliin jiru eeguuf tureetti deebi’uun gahaa akka hin taane dubbatan.

12. 21 Onkololeessa 2024Biliinken yeroo 11ffaaf gara Baha Gidduugalaa imalaa jiru

    Baha Giddugalaatti ergamaan addaa Baayidan yeroo ammaa Beeruut jiru. Ameerikaan marii dhukaasa dhaabuu deebisuuf tattaaffii dippiloomaasii jabeessaa jirti.

    Dippiloomaatiin Ameerikaa hangafti Antoonii Biliinken har'a gara Baha Gidduugalaa kan imalan bara darbe erga waraanni jalqabee yeroo 11ffaaf tahuusaati.

    Waraana Gaazaa dhaabuun murtessaa tahuu, kanneen butaman akka gadhiifamaniifi gadadoo uummata Filiisxeem hambisuu irratti marii'achuuf.

    Biliinkean yeroo waraanaan booda jiru irratti illee marii'achuuf tahuu ibsi Ministeerri Hajaa Alaa Ameerikaa agarsiisa.

13. 21 Onkololeessa 2024Saaraa Netaaniyaahuun haleellaa dirooniin Dilbata darbe mana MM irratti raawwatamerratti yaada kennite

    Torban darbe keessaa Hezbollaan mana Ministira Mummee Israa'el Beeniyaamin Netaaniyaahuu dirooniin haleeluuf yaale jedhamee gabaafamee ture.

    Minstirri Mummee Netaaniyaahuun yaalii ajjeechaa isaa fi haadha warraasaanii irratti raawwatame jedhan.

    Amma haati warraa Netaaniyaahuu Saaraan yeroo jalqabaaf ifatti dhimmacharratti dubbatte.

    Namoota Israa'elii fi addunyaa guutuurraa deeggarsa nuuf taasisan galatteeffachuun, "Yaaliin anaa fi Ministira Mummee Israa'el ajjeesuuf godhames yaaliin dhuunfaa qofa hin turre. Haleellaa hunda keenya irratti, ummata Israa'el irratti, kan dudhaafi daandii ummata keenyaarratti aga'amameedha," jetti.

    "Qalbiin keenya loltoota keenyaa fi gootota keenya, kanneen boqonnaa tokko malee of kennuu fi ija jabina gita hin qabneen biyya ittisan waliin jira," jetti.

14. 21 Onkololeessa 2024Haleellaan Israa'el baankiiwwan Hezboollaa irratti raawwatte 'barbaachisaafi simatamaadha' - dursaa paartii mormitu

    Ministirri kaabinee waraanaa Israa'el duraanii fi dursaan paartii mormituu, Been Gaantzi, haleellaan Libaanos keessatti bakkeewwan garaa garaa keessatti raawwataman ''barbaachisaafi kan simatamuudha'' jedhan.

    Gaantzi ibsa karaa toora X isaaniitiin barreessaniin, dhiheenya keessa Iraan Hezboollaadhaaf waggaatti doolaara biliyoona wallakkaadhaan ol gootiif jedhan. Kunis ''biyya akka Libaanos rakkoo dinagdee keessa jirtu keessatti maallaqa baayyee olaanaadha'' jedhan.

    Itti dabalunis, "Bu'aan isaatiis loltoonni waraana Libaanos keessa jiran [yeroo hunda] hanqina nyaataatiin osoo rakkachaa jiranii, shororkeessaan humna Hezbollaa irraa dhufe tokko ofii isaatiifi maatiiisaaf nyaata ho'aa argataaa jira," jedhan.

    Gaantz kaayyoon Israa'el "sirna Iraan" kan jedhee waamu diiguudhaaf qabdu irra deebi'ee kan ibsu yoo ta'u, itti dabaluudhaanis: "Ergaan isaa ifaadha: bakka kamittuu, karaa kamiinuu isin naaffeessuudha."

15. 21 Onkololeessa 2024Addi Bilisa Baasaa Biyyaalessaa Ogaadeen marii biyyaalessaa keessaa of baasuu ibse

    Adi Bilisa Baasaa Biyyaalessaa Ogaadeen (ONLF) marii biyyaalessaa Itoophiyaan gaggeessuuf jettu keessaa of baasuu ibse.

    MM Abiy Ahimed bara 2018 aangoo qabachuu hordofee gara biyyaatti kan gale ONLF, fuula X [Tiwiiterii] irratti ibsa maxxanseen, marii Biyyalessaa Itoophiyaan gaggeesuuf jettu iftoomina hin qabu jedhe.

    ''Jalqabarratti marichi iftoomina akka qabaatuu fi hundumaa kan hammatu tahuuf waadaa galamee ture.

    ''Paartiin biyya bulchaa jiru dhiyeenya naannoo Somaalee keessaa ofuma isaatiin namoota maricha irratti hirmaataan filaa ture.

    Kana gochuun waliigaltee paartilee waliin taasise cabsuun sagalee uummata bal’aa bakka bu’u moggaatti dhiiseera,’’ jechuun sababa maricha keessaa itti bahuuf jedhu ibse.

    Kun kaayyoo Marii Biyyaalessaa kan faallessudha kan jedhe ONLF, Sababoota wal dhabdee biyyicha keessaa hundeerraa furuudhaaf qaamoleen dhimmichi isaan ilaallatu hundinuu hammatamuu qabu ture jedhe.

    Dabalataan qaamoleen siyaasaa murteessoo tahan naannoo Oromiyaa, Amaaraa fi Tigiraay irraa hin hammatamne jedhe, naannolee kanneen keessatti ammayyuu wal dhabdeen akka jiru eeruun.

    Mariin amma yaadame [Mariin Biyyaalessaa] gar-tokkee fi kaayyoo nagaa buusuu yaadame kan galmaan ga’u miti jedhe.

    ONLF ammas marii iftoomina qabuu fi hunda hamate irratti hirmaachuuf qophii akka tahe ibsuun, hanga kun hin taaneetti garuu maricha keessaa of baasuu ibse.

    Itoophiyaan wal dhabdee biyyicha keessatti walitti fufinsaan mudatu furuudhaaf Marii Biyyaalessaa qopheessuu erga jalqabdee bubbuleera. Garuu ammayyuu mariichi qabatamaadhaan hin eegaliin jira.

    ONLF qofa osoo hin taanes, dhaabbileen siyaasaa Oromiyaa keessa socho’an ABO fi KFOnis maricha keessaa of baasaniiru.

    Qaamoleen hidhatanii naannoo Oromiyaa fi Amaaraa keessa socho’anis marii kana keessatti hin hammatamne.

16. 21 Onkololeessa 2024Sirni farra misaa'elii Ameerikaa amma Israa'el qaqabe

    Ministirri Raayyaa Ittisa Ameerikaa Looyd Oostiin sirni farra misaa’elii Ameerikaan gara Israa’elitti ergite amma qaqabeera jedhan.

    Oostiin sirni kun hojiirra oolfamuusaa hin dubbatu, haata'u malee imalasaa gara Yukireeniitti taasisaniin, "hojiirra oolchuudhaaf dandeettii baayyee saffiisaa qabna, haaluma eenguunis tarkaanfataa jirra'' jedhan.

    Qondaaltonni Sirni Ittisa Naannoo Olka’iinsa Tarminaala Guddaa THAAD jedhamuun beekamu ittisa qilleensaa Israa’el ni jabeessa jedhu.

    Kunis loltoota Ameerikaa gara 100 bobbaasuu of keessatti hammata. Waa'ee sirna THAAD dabalataan asiin dubbifadhaa: Thaad, Iran Dome fi meeshaalee ittisa miisaa'elii Israa'el kaan maalidha?

17. 21 Onkololeessa 2024Suuraalee gamoowwan haleellaa Israa'eliin Beerut keessatti barbadaa'anii

    Haleellaa halkan darbe gamoowwan damee baankii Hezboollaa waliin hidhata qaba jedhameerratti raawwatameen samiin Beeruti ifaan guutamee akka ture gabaafame.

    Miidhaan haleellaa qilleensaa Israa’el dhiheenya kana raawwatteen qaqqabes suuraawwan al-Shiyaah giddugala Beerut irraa kaafaman kana irratti ifatti mul'ata.

18. 21 Onkololeessa 2024Beerut ibiddaan gubatte jedhu ministirri dhimma alaa Israa'el

    Ministirri Dhimma Alaa Israa'el, Israa'el Kaatiz haleellaan halkan edaa Libaanos irratti raawwatame ''haleellaa bal'aa Israa'el'' kan ittiin ''caasaalee maallaqaa Hezbollaa irratti xiyyeeffate'' ta'uu dubbatan.

    Aanga'aan kun ibsa toora X isaanii irratti kenneen, akkas jedha: "Beeruti ibiddaan gubataa jirti. Akeekkachiisa jiraattonni akka bahaniif kenname hordofuun haleellaa qilleensaa gamoowwan 15 ol sababii rukutamaniif ibiddi guddaan Beerut gubbaatti mul'ateera."

    ''Hezboollaan gatii baaseera ammas haleellaa kaaba israa'el irratti raawwateefi rookkeettiiwwan dhukaaseef ganaa gatii cimaa baasa.

    "Ergamtoonni Iraan hanga kufaniitti haleeluu keenya ittuma fufan'' jedhan.

19. 21 Onkololeessa 2024Libaanoositti osoo haleellaan hin jalqabiin dura 'sodaa guutee ture' - ergamaa UN

    Haleellaan Israa’el dameewwan baankii AQAH irratti xiyyeeffachuun Beerut keessatti raawwattee “sodaa guddaa” uumeera jedhu Dhaabbata Biyyoota Gamtooman (UN)tti Qindeessaan Addaa Libaanos.

    Jenin Hennis ergaa karaa barreeffama toora X, kan duraan tiwiitara ture irratti baasaniitti, Israa'el akeekkachiisa kenniteen booda ''baqachuudhaaf yeroo baayyee gabaabduun'' akka ture kan himan yoo ta'u, ''dhohinsi cimaan halkan samii keessaa ni dhaga'ama ture'' jetteetti.

    "Guyyaa guyyaadhaan Libaanos baayyee rakkataa jirti. Garuu osoo carraawwan jiraniitti fayyadamama ta'e, jeequmsa hammaataa dhufe gidduuttillee furmaanni ni jira" jechuun barreeffama ishee kanaan xumurte ergamtuun adda tun.

    Waraabbiin viidiyoo akka agarsiisaniitti, namoonni miilaan ykn konkolaataatiin giddu galeessa Beerut keessaa baqachaa akka turan agarsiisu.

    Maatiin tokko tokkos halkan manaa bahuun erga dabarsanii booda guyyaa immoo gara manaatti deebi'uuf karoorfachuu isaanii himan.

20. 21 Onkololeessa 2024Baankiin Al-Qard al-Haasan kan Israa'el haleelte maaliidha?

    Waraanni Israa'el gamoowwan damee baankii Al-Qard al-Hassan (AQAH) kan Hezboolaan itti fayyadama jedhan "hedduu" haleeluu beeksiise.

    Bara 1982tti akka dhaabbata tola ooltummaatti kan hundeeffame dhaabbanni liqaa kun bara 1987tti ifatti seeraan galmaa'uun, moggaasaa isaa "The Good Loan" ykn "The Benevolent Loan" jedhu kennameef.

    Sababii Hezbollaa waliin hidhata qaba jedhameef dhaabbanni AQAH kun bara 2007tti Ministeera Maallaqaa Ameerikaatiin qoqqobbii irra kaa'ame ture.

    Ameerikaan dhabbanni kun garee kanaaf akka toora faayinaansii murteessaa ta'ee tajaajilti jetti.

    Sirna aadaa warra dhihaatiin alatti kan hojjetu yoo ta'u, ummanni Libaanos uggura baankota biyya keessaatiin kaa'amen akka hin bitamne taasisa.

    Guutummaa Libaanos keessatti baankiin kunis dameewwan AQAH 34tu jiru.

    Akkuma gabaasa miidiyaalee Libaanoonitti gamoowwan damee AQAH irratti argaman irratti xiyyeeffachuun haleellaan 16 raawwatamaniiru. Kanneen keessaayis irra caalaan isaanii kan kibba Libaanos keessatti rawwatame ta'u himan.