Hamaas loltuu ajjeesuun erga himatame booda 'Israa'el namoota 104 ajjeeste'

Haguuggii Tamsaasa Kallattii

1. 29 Onkololeessa 2025Bukaayoo Saakaan Arsenaal Waancaa injifachuu ilaalchisee maal jedhe?

   

   Madda suuraa, Getty Images

   Jifataan Arsenaal Bukaayoo Saakaan waa'ee dorgommii bara kanaa fi waancaa injifachuu Arsenaal yeroo dubbatu,''ammallee waa'ee kanaa afaan guutanii dubachuuf yeroon isaa ganaadha'' jedhe.

   Haa ta'uu malee "waggoota darban taphoota akka Niwukaastil dirree alaatti taphatame bu'aa gaarii nuuf hin argamsiisne ture. Bara kana garuu kana gochuu dandeenyeerra."

   Amma ganaa reefu Onkoloolessa keessa jirra kan jedhe Saakaan ammarra dhaabbatanii dhimma waancaa injifachuu irratti mari'achuun ammallee yeroon isaa jalqaba irra akka jiru dubbate.

   Saakaan "waggoota sadan darbaniif qaama dorgommii waancaa ta'een ture. Muuxannoo sana irraa wanti ani baradhe amma caalaa baatii Ebla keessati sadarkaa tokkoffaa ta'uuf yaaluun si barbaachisa. Dursaa deemuu caalaa yeroo barbachisutti dursanii argamuun akkas murteessaa ta'e baradheera.

   ''Yeroo ammaa kana xiyyeeffannaan dorgommii keessa turuu fi hunma horachuudha. Waggaa kana garee baayyee cimaa ta'uu keenya fi ga'uumsa guddaa akka qabnu natti dhaga'ama. Dhugumaan akkan gochuu dandeenyu akkan amanu na taasisaa jira," jechuun dubbate.

2. 29 Onkololeessa 2025Taphataan duraanii Arsenaal Aaron Raamsee nama saree isa badde argeef doolaara kuma 20 akka kennu ibse

   

   Madda suuraa, Aaron Ramsey

   Taphataan kubbaa miilaa Weelsi kan kanaan dura Arsenaal fi Kaardiif taphachaa ture Aroon Raamsee, yeroo ammaa garee Pumaas Meksiikoof taphataa jira.

   Sareen isa Halo jedhamtu tasa manaa badde yeroo dhumaaf naannoo Guwanajuhato Meksikoo keessatti argamuu ishee eeruun, nama bakka sareen kun jirtu odeeffannoo kenneef gatii dadhabbii doolaara kuma 20 akka kanfalu hime.

   Sareen kun Onkoloolessa 9 kan badde yoo ta'u, cancalli morma ishee irra akka ture eereera.

   Raamseen "Namni waa’ee Halo (saree) keenyaa odeeffannoo qabu yoo jiraate maaloo nu beeksisaa. Yoo kana gootaan nuti gatii dadhabbii keessanii kanfaluuf qophiidha'' jedhe.

   ''Sareen keenya akka nagaa taatu fi yeroo dhiyootti nutti deebi’uu dandeessu abdii qabna," jechuun Raamsey Inistaagiraamii irratti barreessera.

   Taphataan kubbaa miilaa kun jalqaba torban lama dura dhabamuu Halo kan ibse yoo ta'u, ergasii suuraawwan sarittii Inistaagiraamii irratti qoodeera.

   Jalqaba irratti badhaasa doolaara 10,000 akka kennu kan ibse yoo ta'u, torban tokkoof bakka Haloon jirtu irratti odeeffannoo haaraa tokkollee waan hin argatiniif badhaasa kana dachaa lama guddisuuf murteesse.

3. 29 Onkololeessa 2025Misaa'elli balaafamaan niwukilara qabachuu shakkamu Raashiyaan tibbana yaalte maali?

   

   Madda suuraa, Russian Defense Ministry

   Puutiin Raashiyaan misaa'ela niwukilaraa qabachuu danda'u 'Posidon super torpedo' jedhamu yaaluun milkaa’ina guddaa akka ta’e beeksisaniiru.

   Waa'ee maalummaa Posidon baay'een hin beekamu, garuu misaa'ela balaafamaa ofumaan hojjetuu fi galaana keessatti dambalii raadiyoo'aktiivii uumuu danda'udha.

   Puutiin loltoota Raashiyaa waraana Yukireenin madaa’an wayita hospitaala Moskoo keessatti daawwatan yaaliin kun Kibxata darbe akka raawwatame eeraniiru.

   "Yeroo jalqabaaf misaa'ela doonii bishaan jalaa irraa fayyadamuun furguggisuu qofa osoo hin taane, yuunitii humna niwukilaraa meeshaan kun yeroo murtaa'eef itti fayyadamu hojiirra oolchineerra," jechuun Puutiin ibsaniiru.

   Itti dabaluudhaanis, "Wanti akkanaa kana dura hin jiru, kun milkaa'ina guddaadha,'' jechuun Posidon misaa'ela ardiilee qaxxamuruun beekaman caalaa humna guddaa akka qabu hubachiisaniiru.

   ''Ciminni Posidon misaa'ela keenya isa sadarkaa olaanaa qabu Sarmat intercontinental missile illee baayyee caala'' jechuun Puutiin ibsaniiru.

4. 29 Onkololeessa 2025Hamaas loltuu ajjeesuun erga himatame booda 'Israa'el namoota 104 ajjeeste'

   

   Madda suuraa, Reuters

   Haleellaa Israa'el Kibxata galgala raawwatteen yoo xiqqaate Filisxeemonni 104 Gaazaa keessa ajjeefamuu Ministeerri fayyaa Gaazaa Hamaasiin hoogganamu beeksise.

   Waraanni Israa'el ''qiyyaafannoo shororkeessitootaa'' haleeluu beeksise. Kunis, waliigaltee dhukaasa dhaabuu jaarsummaa Ameerikaan raawwatame erga Hamaas cabse booda mudate.

   Ministeerri Ittisaa Israa'el haleellaa Hamaas Gaazaa keessatti raawwateen waraanni Israa'el aajjeefamuu himatani.

   Akkasumas Hamaas reeffa namoota butamanii deebisuuf waadaa Hamaas seene cabse jedhan.

   Hamaas deebii kenneen haleellaa raawwate waliin ''hidhata homaatuu'' akka hin qabneefi waliigalteetti cichuu himan.

   Donaald Tiraamp waliigalteen akka hin cabne himuun yeroo loltoonni ishee rukutaman Israa'el ''deebistee rukuchuu'' qabdi jedhan.

5. 29 Onkololeessa 2025Itoophiyaan baqataa UKtti miidhaa saalaan adabame gadhiifte

   

   Madda suuraa, Essex Police

   Aangawoonni Itoophiyaa baqataa UK'tti haleellaa saalaan himatameefi gara Itoophiyaatti deebifame gadhiisan.

   ''Biyya keenya keessatti himati irratti baname waan hin jirreef, battaluma gadhiifne.

   ''Himati yakkaa isarra baname hin jiru, nama tokko bu'uura seeraa malee hidhuu hin dandeenyu,'' jechuun dubbii himaan Poolisii Federaalaa Itoophiyaa Jeeyilaan Abdii BBC'tti himaniiru.

   Dabalata: Baqataan kuni akkamiin biyyatti deebifame?

6. 29 Onkololeessa 2025'Warri seexana waaqessan mucaa koo miidiyaa hawaasaarratti argatan, ishee baraaruuf humna dhabe'

   

   Madda suuraa, Getty Images

   Akeekkachiisa: Odeessi kuni miira isin jeequu mala

   Ol-adeemtuun ganna 14 miidiyaa hawaasaarratti yeroo haasa'aa ooltu haatishee badaa hin yaaddofne ture. Torbanoota booda garuu amallishee geeddaramuu jalqabe.

   Odeessa kanaaf jecha maqaashee Kiristinaa haati jennee waamnuun dhiphuu keessa galte.

   Mucaan koo garee warra siyaasa gara mirgaa ykn aadaa duraanii leellisan '764' jedhamanitti makamte jetti.

   Gareen kuni dhiirota ga'eessaafi dargaggeeyyii dubartoota miidhuu barbaadan qabateera.

   Sochiin seexanaa shamarran ol adeemanirratti xiyyeeffate kanaa maali?

7. 29 Onkololeessa 2025Obomboleettiin Jamaayikaatti yeroo muddamaa 'labsisiise', darbee Kuubaa rukkute

   

   Obomboleettiin (bubbee rooba makate) [hurricane] Meelisaa jedhamu kan saffisa cimaa qabu Kuubaa rukute. Bubbeen kun Jaamaayikaas miidhee darbe kun seenaa ammayyaa keessatti obomboleettii cimaa biyyattii rukute ta'eera.

   Jaamaayikaatti Ministirri Muummee Andiriiwu Hoolnes ''naannoo balaa'' labsuun ''miidhaan cimaa'' mudachuu akka malu akeekkachiise.

   Miidhaan Jaamaayikaa mudate hangam akka ta’e hanga lafti bari'utti hin baramiin jira garuu Hoolnes miidhaan manaa fi hospitaalotarra gahuu akka danda’u akeekkachiiseera.

   Kantiibaan magaalaa Montegoo Bay wanti isaan jalqaba hojjeta “namni hundi ooluu isaa mrianeeffachuudha," jechuun BBCtti hime.

   Obomboleettiin kun Kuubaa erga rukutee booda Kaaba bahaan gara Bahamaas fi Bermudaatti darba.

8. 29 Onkololeessa 2025Maanguddoon waggaa 92 yeroo 8ffaaf filannoo mo'achuun Kaameeruun jeequmsatti galche

   

   Madda suuraa, AFP via Getty Images

   Ministirri dhimma biyya keessaa Kaameeruun Pool Ataangaa Nijii filannoon walqabatee jeequmsa biyyattii keessatti deemaa jiruuf kan itti gaafatamu dursaa mormitootaa isaa Shiroomaa Bakarii ta'uu himan.

   Erga filannoon Onkoloolessa 12 eegalee Kaameeruun keessatti mormii mudateen yoo xiqqaate namoonni afur ajjeefamaniiru.

   Erga managuddoon waggaa 92 Pool Biyaa yeroo saddeettaffaaf walitti aansuun aangoo qabachuusaanii labsatanii ammoo biyyattii keessatti hookkarri hammaateera.

   Dursaan paartii mormituu Shiroomaa Bakarii ammallee filannoo kana injifachuusaanii falmachaa jiru. Paartiin Pool Biyaa, Sochii Dimokiraatawaa Uummata Kaameeruun (CPDM) jedhamu garuu kana kuffiseera.

   Poolisii fi aanga'oonni nageenyaa biyyattii mormitoota humnaan cabsuun isaanii addunyaarratti ijoo dubbii ta'eera.

   Hawaasi idiladdunyaa, UN, Gamtaan Afrikaa fi Gamtaan Awurooppaa hookkarri kun hatattamaan akka dhaabbatu waamicha dhiheessaniiru.

   Bara 1982 erga aangoo qabatani hanga ammaa Kaameeruun bulchaa kan jiran Pool Biyaa umriidhaanis, yeroo aangoorra turaniinis addunyaarratti qondaala umrii dheeraati.

   Filannoo Onkoloolessa 12 gaggeeffameen sagalee kenname keessaa dhibbeentaa 53.7 argachuun injifatan. Morkataan isaanii Shiroomaa Bakarii ammoo dhibbeentaa 35.2 fiduun injifataman.

9. 29 Onkololeessa 2025US 'Chaayinaa waliin waliigaltee gaarii qabaachuuf jirti' - Tiraamp

   

   Madda suuraa, Getty Images

   Doonaald Tiraamp yaa’ii Tumsa Diinagdee Eeshiyaa Paasifik (Apec) irratti waltajjii hoji-gaggeessitoota olaanootiin guutame tokkorratti, Ameerikaan Chaayinaa waliin “waliigaltee” akka qabaattu fi “lamaan isaaniif waliigaltee gaarii” ta’a jedhee akka amanu dubbate.

   Preezdaantiin Ameerikaa gitasaa Chaayinaa Shii Jiinping waliin wal arguun morkii daldalaa biyyootasaanii ilallatturratti akka dubbatan eegama.

   Akkasumas, pirezidaantii Kooriyaa Kibbaa Lii Jee Miyaang kan waliigaltee daldalaa xumuruuf dhiibbaan irra jiru waliinis wal arguuf jira.

   Tiraamp osoo gara Kooriyaa Kibbaa hin dhufiin dura Kooriyaan Kaabaa misaa'ela lafarraa gara qilleensaatti balali'u yaaluun ishee ni yaadatama.

   Yaaliin nukilara kun sochii xiqqaa Kooriyaan Kaabaa meeshaa waraanaa nukilaraa seera-qabeessa gochuuf taasifamuu ta’uu hin oolu jedha rippoortarri keenya Si’on Jaakee Kiwoon.

   Tiraamp hogganaa Kooriyaa Kaabaa Kiim Joong Un waliin wal arguuf fedhii qabaachuu ibsuunis hanga ammaatti wanti kun akka ta'u wanti agarsiisu hin jiru.

10. 29 Onkololeessa 2025'Na maleen kaansarii siyaasa Oromooti'- Seenaa Jimjimoo

    

    Mirga dhala namaaf quuqamuun kan beekamtu Seenaa Jimjimoo kitaaba mata dureensaa ''Na Malee'' jedhu eebbisiisuun dubbistoota biraan geesseetti.

    Sirni eebba kitaaba Seenaa kun Irreecha waggaa dheeraaf erga adda cite booda deebi'ee Naayiroobiitti kabajame faana gaggeeffame.

    Ameerikaa kan jiraattu Seenaa Jimjimoo gara Keeniyaa, Naayiroobii imaluun sirna eebba kitaabaa asitti qopheessuu isheetiin uummanni Oromoo kutaa adda addaa walarguu danda'eera.

    Qophiin eebba kitaabaa fi ayyaana Irreechaa Sambata darbe (Onkoloolessa 25, 2025) Naayiroobiitti gaggeeffame uummanni Oromoo Keeniyaa jiraatuu fi kanneen biyyarraa dhufan akka walarguun tokkummaasaanii jabeeffataniif carraa uumeera.

    ''Gosoonni Oromoo adda addaa- Boorana, Orma, Saakuyyee, Garbaa fi gosoonni Oromoo baqatanii biyya kana jiraatan walitti dhufaniiru. Kun hawwii kiyya guddaa ture. Milkaa'eera,'' jechuun qophii ture ibsite.

    Turii BBC waliin taasifteen dhimma keessoo siyaasa Oromoo, Itoophiyaa kasteeti. Dhiyaadhaa!

11. 29 Onkololeessa 2025US haleellaa bidiruu qoricha sammuu adoochu feete irratti banteen namoota 14 ajjeeste

    

    Madda suuraa, US Department of Defense

    Waraanni US haleellaa qilleensarraa bidiruuwwan qoricha sammuu adoochu feetee turte irratti gaggeesseen namoonni 14 du'uu Ministiirri Waraanaa US ibse.

    Piit Heegs akka ibsetti haleellan kan gaggeeffame bidiruuwwan afur qoricha sammuu adoochu fe'anii Galaana Paasifikii irra imalanii turan irratti.

    US yeroo dhiyoo as namoota bidiruudhan qoricha sammuu adoochu Paasifikiifi Kariibbiyaan irraa gara US fe'an irratti haleellaa qilleensarraa walitti fufiinsaan gaggeessaa jirti.

    Ministiirri Waraanaa US Piit Heegs akka jedhetti, US halellaa qilleensarraa bidiruuwwan qoricha sammuu adoochu fe'an irratti kan gaggeessa kaleessa yoo ta'u, ajaja Pirezidaant Tiraamp kenneeni.

    Pirezidaantiin Meeksikoo Kilaawudiyaa sheeyinbaawun haleellaa US kana mormuun qondaalonni biyyattii ambasaaddara US achi jiru waamanii akka dubbisan ajajje.

    Dabaluunis, "Waliigalteen idiladdunyaa akka kabajamu barbaanna" jette.

    US haleellaa bidiruuwwan qoricha sammuu adoochu fe'u jettu irratti gaggeessaa jirtuun hanga ammaa namoonni 57 du'an.

    Gama biraan ammoo biyyoota Laatiin Ameerikaa kanneen akka Venezuweelaafi Koloombiyaa wajjin muddama keessa ishee galcheera.

12. 29 Onkololeessa 2025Itoophiyaan beekamtii walabummaa waggoota 30 dura Ertiraaf kennite haquu dandeessii?

    

    Madda suuraa, Getty Images

    Itiyoophiyaan dhimma itti fayyadamaa ulaa galaanaa ilaalchistee gaaffiin kaaftee beekamtiin walabummaa biyyumma isheen Ertiraaf kennite irratti shakkiin tokko tokko akka ka'u ta'eera.

    Ibsi hoggantoota mootummaa Itoophiyaa irraa yeroo adda addaa kennamu Eertiraa biratti dallansuu cimaa uumeera.

    Deebiin aanga'oota Eertiraa irraa kenname akka agarsiisutti ibsi Itoophiyaan kennitu walabummaa Eertiraa irratti aggammii raawwatamuudha kan jedhu.

    MM Itoophiyaa Abiy Ahimad dabalatee, hoggantoonni olaanoon mootummaa waggoota lamaan darban, akkataan murtee buufata galaanaa malee hmbisee ifa akka hin taane kaasu,

    Murteen yeroo sanatti 'motummaa ce'umsaatiin murtaa'e waan ta'eef, 'sirraa'uu' akka qabullee yaada dhiyeessu.

    Adeemsi Itoophiyaan beekamtii biyyumaa Ertiraaf kennite maal fakkaata, deebistee kaasuu dandeessii?

13. 29 Onkololeessa 2025Israa’el Hamaas waliigaltee dhukaasa dhaabuu cabsuun himachuun Gaazaatti namoota 90 caalan ajjeeste

    Play video, "Explosions seen in Gaza after Netanyahu orders strikes", Turtii 0,07

    00:07

    

    Humni Ittisa Siivilii Hamaasiin hoogganamu fi qondaalonni hospitaalaa haleellaa Israa’el Gaazaa keessatti raawwatteen yoo xiqqaate namoonni 90 ol ajjeefamuu kan ibsan wayita Pirezidant Tiraamp waliigalteen dhukaasa dhaabuu itti fufee jira jedhanii abdataa jiranitti.

    Israa’el haleellaa kana kan raawwatteef Hamaas waliigaltee dhukaasa dhaabuu jaarsummaa Ameerikaan irra ga’ame cabsuu isaaf deebii kennuuf ta’uu ibsite.

    Ministira Ittisaa Israa’el kan ta’an Israa’el Katzi Hamaas Gaazaa keessatti loltoota Israa’el haleeluu fi waliigaltee reenfa namoota butamanii deebisuu irratti jiru cabsuudhaan himatan.

    Hamaas gamasaan haleellaa kamuu akka hin raawwannee fi waliigaltee dhukaasa dhaabuu kutannoon hojiirra oolchaa akka jiru hime.

    Pirezidantiin US Doonaald Tiraamp wanti waliigaltee dhukaasa dhaabuu gufachiisu jiraachuu hin danda’u jedhan.

    Garuu Israa’el yoo loltoonni ishee jalaa tuqaman deebitee ofirraa qolachuu qabdi jedhan Tiraamp.

    Haleellaan Israa’el kun manneen jireenyaa, manneen barnootaa fi gamoowwan Gaazaa Siitii, Beeyit Lahiyaa, al-Bureeyij, Nuseeyiraat fi Kaan Yuunis daran miidheera.

14. 29 Onkololeessa 2025ASHAMAA! Tamsaasa kallattiin deebineerra.

    Akkam jirtu hordofoota keenyaa.

    Toora kallattiin odeeffanooo biyya keessaa, ollaa, Baha Giddu-galeessaafi guutummaa addunyaarraa qixeessinee isin biraan geenyu jalqabneerra.

    Whatsapp , marsariitiin , YouTube akkasumas Facebook irratti nu hordofaa.