Dhaddachi Mana Murtii Olaanaa UN, dhimma deeggarsi namoomaa Filisxeem akka dhaqabuuf Israa'el dirqisiisuu ilaaluu jaqlabe

Haguuggii Tamsaasa Kallattii

1. 2 Caamsaa 2025Meetaan Naayijeriyaatti Feesbuukii cufuuf dhaadate

   Lammiileen Naayijeeriyaa Feesbuukii fi Instaagiraamii fayyadamuu dhaabuu danda'u. Kunis dhaabbanni haadhoo Feesbuukiifi Instaagiraamii Meetaan qondaaloti Naayijeeriyaa qarshii adabbiifi to'annoo 'akka malee cimaa' tahe qabu jedhee himachuun wal-qabata.

   Waggaa darbe ejensiiwwan to'annoo Naayijeeriyaa sadii, Meetaan seeraafi qajeelfamoota irra daddarbeera jechuun adabbii doolaara miiliyoona 290 irra kaa'anii turan.

   Metaan murtoo adabbii irratti kaa'ame dhaddacha olaanaa federaalaa Abujaa jirutti falmus hin milkoofne.

   ''Dhaabbtichi tarkaanfii irratti fudhatamuuf jedhu hambisuuf jecha Feesbuukiifi Instaagiraamii Naayijeeriyaatti cufuuf dirqamuu mala,'' jechuun hime waraqaa mana murtiitti dhiyeesseen.

   Meetaan appii WhatsApp jedhamus kan dhuunfatu yoo tahu himata kana irratti garuu maqaa hin dhoofne.

   Dhaddachi Olaanaa Naayijeeriyaa dhaabbatichi adabbii irratti murame hanga dhuma Waxabajjii yeroo kenneeraafi.

2. 2 Caamsaa 2025Haati daa'imashee ukkaamsuufi 'gurguruun' shakkamte murtoon irratti darbe

   Haati daa'ima lammii Afrikaa Kibbaa waggaa tokko dura achi buuteenshee dhabamee, daa'ima ofii butuufi daddabarsuun itti murameera.

   Keelii Ismiiziifi jaalalleen ishee Jaakwiin Appooliis akkasumas hiriyyaan isaanii biraa daa'imni Keelii erga baddee booda to'annoo jala oolaniiru.

   Daa'imni ganna ja'aa Jooshliin naannoo mana jireenyaa ishee Saldaanaa jedhamu Keep Taawun irraa waggaa darbe ture kan badde.

   Haadhashee dabalatee jaalalleefi hiryyaanshee daa'ima kana butanii ukkaamsuufi daddabarsuun balleessaa dha jedhamaniiru. Namooti kunneen jecha mana murtiif kennaniin gochaa kana raawwachuu haalanii ture.

   Jooshliin achi buuteesnshee dhabamuun Afrikaa Kibbaatti naasuu guddaa kan uume yoo tahu, barbaachaseef beeksisi himamus ammallee hin argamiin jirti.

   Yeroo dhaddachi Bitootessa keessa taa'ame abbootiin alangee Keeliin daa'imashee, ''gurgurtee, wayiin geeddartee, booda waa'ee baduushee sobde,'' jedhan.

   Haati kuni yeroo murtoon dubbifamu akkaan bo'aa turte.

   Daa'imni uumamaan ija cuquliisa qabdu Jooshliin biftishees diimtuu waan taateef namoota hakiimota aadaa ofiin jedhanitti gurguramuu mana murtiitti ibsameera.

3. 2 Caamsaa 2025Tiraamp maallaqa raadiyoo biyyaalessaa Ameerikaa kutuuf ajaja baasan

   Pireezidantiin Ameerikaa Donaald Tiraamp maallaqa Tajaajila Biroodkaastiingii Biyyaalessaafi Raadiyoo Biyyaalessaaf ramadamu akka kutamu ajaja baasan.

   Kamisa galgala, Tiraamp buufataaleen kunneen ''oduu looguufi qoodu tamsaasu,'' jechuun himatan.

   Ajajani kuni boordiin buufataalee kanaaf maallqa ramadu ''fandii kallattiin kennamu,'' dhaabee waan ''seeraan eeyyamamu'' qofa kennuu qaba jedhan.

   Dabaluunis boordichi ''maallaqa gara fuulduraattti kennamu dhaabuu qaba,'' jedhan. Buufataalee kunneen BBC'n qunnamuuf yaalee ture.

   ''Ilaalchi Tajaajila Biroodkaastiingii Biyyaalessaafi Raadiyoo Biyyaalessaa tarkaanfachiisan maaliyyuu haa tahu irraa kutamaa,'' jedha ajajni kuni.

   ''Waan baramuu qabu dhaaboti lamaan lammiilee taaksii kaffalaniif oduu tibbanaa haqa qabeessa, sirriifi hin loogne dhiyeessaa hin jiran.

   Waayit Haawus dhaabbilee kanaaf qarshii ramaduun, ''hojimaata boodatti hafaafi hin barbaachifne gaazexessummaa waan ligideessuu dha,'' jedha.

   Haa tahu malee baajatni boordichi ramadu hamma 2027tti ragga'eera.

4. 2 Caamsaa 2025Wayita deeggartoonni Liivarpuul gammachuu ibsatan kirkirri lafaa uumamee ture jedhan saayintistoonni

   Wayita Liivarpuul goolii 5 fi 1n Tootanihaam mo'achuun waancaa Piriimer Liigii Ingilaand kan bara 2024/25 mo'achuu mirkaneeffatu, deeggartoonni Liivarpuul yeroo gammachuu ibsatan kirkira lafaa uumuu saayintistoonni yuniversitii ibsan.

   Gareen Arne Slot Ebla 27 ture dirreesaaniirratti osoo taphni afur isaan hafuuti kan waancaa injifachuu mirkaneessan.

   Sochiin lafaa sirriitti kan mudate taphi jalqabamee daqiiqaa 24ffaarratti wayita Aleksiis Mak Alister goolii lammaffaa Liivarpuuliif galchu ture.

   Sochiin battala sanatti mudate magniitiyuudii 1.74 akka ture ibsan saayintistoonni.

   Ragaa kana kan qindeessan saayintistoota qorannoo dachee Yuniversitii Liivarpuul yoo ta'an, meeshaa kirkira lafaa qoratu fayyadamuun adda baasan.

   Saayintistoonni qorannoo kana gaggeessan ''wayita gooliin galu hunda lafi socho'aa ture,'' jedhan.

   ''Akka waan kirkirri lafaa mudateeti. Gammachuu deeggartoonni Liivarpuul ibsataa turantu kana uume.''

   Gammachuun ture daangaa darbuun hanga lafa sochoosuutti ga'e jedhan.

   Akka ragaa saayintistoonni dhiheessanitti namoonni taphicha daawwachaa turan kuma 60 fi 415 ta'an wayita gooliin lakkaa'amu hunda gammachuudhaan lafa raasan.

   Raafamni lafaa olaanaan wayita Aleksiis Mak Alistar goolii galchu yoo ta'u kan lammataa wayita Mohammad saalaa galchudha. Magniitiyuudii 1.60.

   Gooliin Koodii Gaakpoo magniitiyuudii 1.03, kan taphataan Tootanhaam Destinii Udoogii ofirratti galche magniitiyuudii 1.35 fi kan Luwiis Diyaaz ammoo magniitiyuudii 0.64 ture.

5. 2 Caamsaa 2025Balaan abiddaa hamaan Israa'el mudate maalirra gahe?

   Balaan abiddaa erga Roobii darbee gidduugala Israa'el mudate irra caalaan isaa to'atamuu Abbaan Taayitaa Ittisa Balaa biyyattii hime.

   Balaa abiddaa kana to'achuuf gareen namoota 150 bobba'aniiru. Balaan kun lafa ba'ina sq km 20 tahu gubeera. Kunis naannoo Latruun jedhamee beekamutti mudate.

   Lafti kun Jeerusaalemii fi Teel Aviiv gidduutti argama.

   Tajaajilli Anbulaansii Israa'el namoonni 12 aara abiddicha irraa bahuun ukkaamaman yaalii argataniiru. Balaan lubbuu namaarra gahe hanga ammaa akka hin jirre ibseera.

   Ha atahu malee, namoota balaa abiddaa dhaabuuf hojjetaa turan 17 irra miidhaan qaamaa gaheera.

   Abbootiin taayitichaa akka jedhanitti, goginsa, ho'aa fi bubbee tibbana jirutu abiddicha to'achuuf qormaata guddaa nutti tahe jedhan.

   Amma balaan abiddaa kun irra deebiin mudachuu akka danda'us hubachiisaniiru.

   MM biyyattii Beenjamin Neetanyahuu labsii yeroo muddamaa labsuun jiraattonni magaalota 12 naannoo Jeerusaalem jiranii akka bahaniif dhaamaniiru.

   Haa tahu malee erga abiddichi to'atamee namoonni qe'ee isaaniiti akka bahan kan labsame akka irraa ka'eera.

   Faransaay, Xaaliyaanii fi Ispeen xiyyaarota erguun balaa kana to'achuuf gargaaraniiru.

6. 2 Caamsaa 2025Waraanni Yuukireen ''yeroo dhiyootti waan dhumatu miti' jedhe JD Vaansi

   Itti aanaan pirezidaantii US, JD Vaansi, waraanni Yuukireen keessaa yeroo dhiyootti waan xumuramu miti'' jedhe.

   Fox News waliin turtii taasise irratti Vaansi, bulchiinsi US amma waraana Yuukireen- Raashiyaa waggaa sadii guutuuf biyya diige kanatti xumura gochuuf waan Raashiyaa fi Yuukireen walitti dhiyeessu barbaadaa jira jedhan.

   Garuu ''kun dhimma Raashiyaa fi Yuukreenisha waliigalteerra gahuun waraana lubbuu galaafatee fi balaafamaa kanatti xumura gochuun'' jedhe.

   Kun erga Yuukireen albuudota ishee gatii jabeeyyii irraa Ameerikaan akka bu'aa qooddattuuf waliigaltee mallatteesitee dhagahame.

   Bakka bu'aa albuudaa kana ammoo Ameerikaan gama tikaa fi waraanaan Yuukireen cina dhaabbachuuf waliigaltee ture.

7. 1 Caamsaa 2025Isra'eel ibidda daggalaa dhaamsuuf xiyyaaraafi gargaarsa biroo hawaasa addunyaa gaafatte

   Isra'eel ibidda daggalaa seenaa keessatti isa hamaadha jedhame dhaamsuuf gareewwan 150 duulchiftus to'achuu dadhabde.

   Ministirri Muummee Beenjamin Netaaniyaahuu magaalaa Iyyeriusaalemitti marsee ibiddaa Roobii qabate kana sababeeffachuun labsii yeroo ariifachiisaa labsaaniiru.

   Bubbee jabaa fi goginsi jiru ibiddicha hammeesseera jedhaniiru.

   Magaalota hedduu keessaa namootni akka bahan godhameera. Daandiiwwan gurguddoon cufamanii turan garuu deebi'anii banamaniiru.

   Isra'eel xiyyaarota ittisa ibiddaaf oolaan dabalatee gama adda addaan hawaasni idila addunyaa deeggarsa gaafatteetti.

   Guyyaa bilisummaa sababa godhachuun sagantaaleen qophaa'nii turan haqamaniiru.

8. 1 Caamsaa 2025USf Yukireen qabeenya uumamaa qooddachuuf waliigalan

   Yukireeniif Ameerikaan qabeenya uumamaa Yukireen qabdu qooddachuuf akkasumas US tasgabbii Yukireen mirkaneessurratti xiyyeefaturratti waliigalan.

   Waliigaltee kana ilaalchisee Waayit Haawus Yunaayitiid Isteets qabeenyaa Yukireen irraa fayidaa dinagdee argattii jedheera. Dabaluun ammoo US ''Yukireen bilisa, nagaa qqabeettiifi birmadummaa kan qabdu akka taatu gahee baati' jedheera.

   Qaama waliigaltee kanaa keessa tokko gurgurtaa miniraalotaafi annisaa Yukireen irraa US galii argachuusheeti.

9. 1 Caamsaa 2025Gorsaan nageenya biyyaalessaa US aangoo gadhiisuuf

   Gorsaan Nageenya Biyyaalessaa US Maayik Waaliz aangoo gadhiisuu miidiyaan US kan BBC waliin hojjetu CBS gabase.

   Aangaa'aan kun bulchiinsa Tiraamp marsaa lmmataa keessatti nama aangoosaanii gadhiisan kan jalqabaa ta'aniiru.

   Waaliz torbanoota dura miidiyaa hawaasaa Signal jedhamu irratti garee haasaa barbaachisaa tokkof ijaaran keessa dogoggoraa gaazexessaa makuun dubii ijoo ta'anii tura.

   Marii dhimma haaleellaa Yaman keessatti gaggeefamuurratti mariyatu ilaalchisee godhameefi wanta jedhame gaazexessaan dogoggoraan makame saaxileera.

   Gareen Tiraamp odeeffannoon marii sana irratti qoodame icciitii guddoo balaa qabu hin turre jedheera.

   Aanga'aan kun garuu dogoggora mudateef gaafatamummaa guutuu akka fudhatan himanii ture.

10. 1 Caamsaa 2025Hirmaannaa Shaampiyoonsi Liigii bara dhuftuu dhabuun nu hin dhiphisu- Amoriim

    Leenjisaan Maanchister Yunaayitiid Ruuben Amoriim, morkii Awurooppaa Liigii galgalaa kanaa dura ibsa kenneen hirmaannaa Shamapiyoonsi Liigii bara dhuftuu dhabuun akka isa hin dhiphisne dubbate.

    Ammoo Awurooppaa Liigii injifachuun hirmaanaa Shaampiyoonsi Liigii bara dhufuu argachuun kaayyoo isaa ta'uu ibse.

    Amoriim wanti fedheyyuu yoo ta'e, barri dorgommii kun isaaniif badaa ta'uu wanti jijjiiru akka hin jirre amaneera. Ammoo Awurooppaa Liig injifachuun guddaa ta'uu hime.

    Taphattootnisaa dhiibbaa waancicha akka injiftan irra jiru ilaalchisee kan dubbate Amoriim, taphattootni qophii guutuu qabu...inni waan rakkoo qabu miti'' jedhe.

    Waancaa kana injifachuun ''ganna keenya jijiira, bara dhufu nuu jijjiira. Inni guddaan kilabicha fooyyessuu barbaanna. Wanta baayyee sirreessuu qabna. Shampiyoonsi Liigii argannes argachuu baannes homaa hin taanu'' jedhe.

    Amoriim miidhamarra kan ture Amaad Diyaaloo deebi'uu mirkaneesseera.

    Yunaayitid galgala kana Atileetik Bilbaawoo waliin morkata.

11. 1 Caamsaa 2025Manni Maree Ministirootaa lammiileen alaa qabeenya hin sochoone akka dhuunfatan murteesse

    Manni Maree Ministiroota aItoophiya ooltiisa aguyyaa har'aan dhimmoota irratti mariyatee murteesse keessaa tokko mirga qabeenya horochuu lammiilee biyya alaa dhorkamee ture wajjin walqabata.

    Kaabineen Ministira Muummee Abiy lammiileen biyya alaa qabeenya hin sochoone akka horatan hayyamuuf wixinee seeraa qophaaye irratti mariyachuun raggaasaniiru.

    Waajirri Ministira Muummee gabaasa baaseen wixinneen ragga'e kun lammiileen alaa lafaa argachuun misoomsuun isaanii investimeentii jajjabeessaa jedheera. Misoomaa damee manneen jireenyaas ni dabala jedhe.

    ''Maadala fedhii fi dhiyeessi manneen jireenyaa eegsisuu fi lammiileef carraa hojii uumuuf faayidaan qabu guddaa ta'uu'' isaarraa ka'uun wixineen kun raggaasifamuu ibseera.

    Gama kaaniin wixinee hamma qaraxaa omishaalee miseensota Zoonii Daldala Bilisaa Afrikaa irra kaahamu murteessuuf bahes raggaasiseera.

12. 1 Caamsaa 2025Somaaliyaan bulchiinsa Somaaliland waliin hariiroo kan qabdu Taayiwaan irra uggura balalii kaa'uu Taayiwaan balaaleffatte

    Ministeerri Dhimma Alaa Taayiwaan akka ibsetti namoonni paaspoortii Taayiwaan qaban gara Somaaliyaatti imaluus ta'ee karaa Somaaliyaa darbuu kan dhorkaman Roobii ture.

    Kunis torbee darbe Abbaan Taayitaa Aviyeeshinii Somaaliyaa erga ajaja dabarseeti.

    Somaaliyaan hanga yoonaa waa'ee uggura balalii kanarratti yaada hin kennine. Somaalilaandis akkasuma.

    Chaayinaarraa adda baatee kan of bulchitu Taayiwaan, Somaaliyaarraa adda baatee kan of bulchaa jirtu Somaalilaand waliin hariiroo cimaa qabdi.

    Kun tarkaanfii Somaaliyaan namoota paaspoortii Taayiwaan qabanirratti fudhatte kanaaf sababa ta'eera.

    Taayiwaan fi Somaalilaand bara 2020 bulchiinsa isaanii keessatti imbasii waliif bananiiru, kun ammoo Chaayinaa fi Somaaliyaa baayyee mufachiise.

    Abbaan Taayitaa Aviyeeshinii Somaaliyaa dhorkaan kun Ebla 30 irraa akka hojiitti hiikamu ibsee ture.

    Ministeerri Dhimma Alaa Taayiwaan hanga Somaaliyaan tarkaanfiishee kana kaastutti namoonni paaspoortii Taayiwaan qaban gara Somaaliyaa imaluurraa akka of qusatan akeekkachiiseera.

    Chaayinaan ammoo tarkaanfii Somaaliyaa kana akka simatte ibsiteetti.

    Dubbi himaan ministeera dhimma alaa Chaayinaa Guwoo Jiyaakun uggurri Somaaliyaan keesse kun ''tarkaanfii sirriidha,'' jechuun jajan.

    ''Somaaliyaan qajeeltoo 'Chaayinaan tokko' jedhu faana ejjennoo walfakkaataa qabaachuushee mul'isa.''

    Taayiwaan heera mataashee qabdi, filannoo idilee gaggeessuun bulchaa ishee filatti.

    Chaayinaan ammoo Taayiwaan qaama ishee ta'uu cichitee falmiti.

    Yoo barbaachisaa ta'e humna fayyadamuun odoolattii kana of jalatti deebisuu akka dandeessu doorsisti.

    Bulchiinsi Ziyaad Baarree erga kufee booda bara 1991 adda ba'uun of bulchu kan eegalte Somaalilaand akkuma Taayiwaan filannoo mataashee gaggeessuun bulchaa ishee filatti.

    Somaaliyaanis ammallee bulchiinsa Somaalilaand akka qaamasheetti ilaalti. Dhihoo kana bulchiinsi kun Itoophiyaa waliin waliigaltee ulaa galaanaa mallatteessuu ishee Somaaliyaan balaaleffatteetti.

13. 1 Caamsaa 2025Jaappaanitti bofti sarara ibsaatti marame imala baaburaa addaan kute

    Bofti sarara ibsaatti maramuun imala baaburaa Jaappaan addaan kute. Bofti sararichatti maramuun humna ibsaa balleessera.

    Sararri baaburaa kun biyyattiitti isa geejibni itti heddumatudha. Baaburri Shinkansen jedhamu Tookiyoo fi Osaakaa kan imalu yoo tahu, ganamarra imalli isaa adda cite.

    Torban kun Jaappaaniif torban addaati. Torban warqeeti jedhamee beekama.

    Guyyoota torba gidduutti ayyaana afur kabajji. Turistoonni kumaatamni gara biyattiitti imalu.

    Osakan Agarsiisa Addunyaa guddicha kan keessummeesitu yoo tahu, lammiileen biyya alaa miliyoonaan lakkaa'aman irratti argamuuf Jaappanitti imalu.

    Kun hanga ji'a Onkoloolessaatti kan itti fufu yoo tahu daandii baaburaa kana irratti ammoo imaltoonni heddumatu.

    Bofti rakkoo akkasii sarara kana irratti yoo uumu kun kan jalqabaa miti jechuun imaltoonni BBCtti himaniiru.

14. 1 Caamsaa 2025Biyyoonni Lixa Afrikaa juuntaan bulan sadii hulaa galaanaa argachuu qabna jedhan

    Ministiroonni Dhimma Alaa biyyoota Saahel juuntaan bulanii hulaa galaanaa karaa Morookoo argachuun daldala addunyaa irratti hirmaachuu qabna jedhan.

    Burkina Faasoo, Maalii fi Niijer akkuma Itoophiyaa biyyoota hulaa galaanaa hin qabnedha.

    Ministiroonni biyyoota sadeenii Mootii Morookoo Mohaammad VI waliin yeroo wal argan yaada kana dhiyeessaniif.

    Biyyoonni sadeen juuntaadhaan bulaa kan jiran yoo tahu dhiyeenya fonqolcha mootummaa gaggeessuun aangoo qabatan.

    Dabalataan ECOWAS keessaa erga bahanii tokkummaa biyyoota sadeenii Konfedereshini Biyyoota Saahel jedhu hundeessaniiru.

    Morookoon biyyoota sadeen keessaa damee faayinaansii fi qonna irratti invastimantii guddaa gaggeessiti.

    Biyyoonni miseensa ECOWAS tahan ammoo fonqolcha mootummaa biyyoota sadanitti gaggeeffame hordofuun qoqoobbii irratti dabarsaniiru.

15. 1 Caamsaa 2025Miseensi paarlaamaa Keeniyaa magaalaa Naayiroobiitti rasaasaan ajjeefaman

    Miseensi paarlaamaa Chaarles Ongondoo Weeree jedhaman kun hidhattoota doqdoqqeen deemaa turaniin daandii irratti haleellaa irratti raawwatameen ajjeefaman.

    Poolisiin akka jedhutti namoonni hidhatan kunneen konkolaataa miseensa paaraamaa kanaa hordofaa turan.

    Isa booda namoota lama doqdoqqeerra turan keessaa tokko irraa bu'uun fageenyarraa itti dhukaase.

    Dubbi himaan Poolisii Muchiirii Niyaagaa ''halli haleellaan kun itti raawwate dursee kan irratti karoorfamee fi miseensa kanarratti kan xiyyeeffate ta'uu mul'isa,'' jedhan.

    Akka miidiyaan biyyattii gabaasetti mormituun mootummaa Keeniyaa miseensa paarlaamaa ta'an kun ji'a lama dura jireenyisaanii rakkoo keessa akka jiru, namootni isaan hordofaa turan jireenyasaaniif yaaddoo itti ta'uu ibsanii turan.

    Dhukaasa Roobii waaree booda konkolaataasaaniirratti raawwateen eegduu fi konkolaachisaan isaanii hin miidhamin hafaniiru.

    Miseensa paarlaamaa rasaasaan isaan argateen madaa'an kanas isaantu gara Hospitaala Naayiroobii geessan.

    Miseensi paarlmaa kun akkuma hospitaala ga'aniin lubbuunsaanii darbe.

    Haleellaan rasaasaa kun daandii Ngong jedhamu irratti adda babayii yeroo hunda poolisii tiraafikaan eegamuu fi kaameeraa hedduu qabu irratti raawwate.

    Haleellaa kana booda Pirezidantiin Keeniyaa Wiiliyaam Ruutoo poolisiin qorannoo bal'aa akka gaggeessu ajajaniiru.

    Hanga kanneen yakka kana raawwatan seeraan gaafatamanitti hordoffiin akka itti fufus ibsan.

    Miseensi paarlaamaa ajjeefaman kun lixa Keeniyaatti kan argamtu kaawuntii Kasipul bakka bu'an. Miseensa paartii Orange Democratic Movement jedhamuuti.

    Paartii kana gameessa siyaasaa biyyattii yeroo baayyee mormiidhaan beekaman Rayilaa Odingaatu dursu.

    Raayilaa Odingaa taatee kana ilaalchisuun ibsa kennaniin haleellaa ''haala suukanneessaa fi gara jabinaan raawwatame,'' jedhan kana balaaleffataniiru.

    Filannoo 2022 morkataasaanii Wiiliyaam Ruutoon kan injifataman Rayilaa Odingaa, filannochi haqa qabeessa miti jechuun sagalee ibsame mormanii turan.

    Ministirri Muummee duraanii kun ergasii Ruutoo waliin waliigaltee siyaasaa uumuun mormitoonni gariin akka kaabinee mootummaatti makaman taasisaniiru.

16. 30 Ebla 2025Imaammatni alaa US addunyaaf wanta gaarii ta'erratti xiyyeeffachuunsaa hafeera - Ruubiyoo

    Marii kaabinee Tiraamp gaggeeffamaa jiru irratti warra dhumarra dubbatan keessaa tokko Ministira Haajaa Alaa, Maarkoo Ruubiyoodha.

    Ruubiyoon Tiraamp garee gaarii ijaaran achiis tarkaanfiiwwan gaggaarii saffisaan hojjirra oolchan jechuun jajaniiru.

    Ruubiyoon imaammatni alaa biyya isaanii ammaan booda gaarummaa addunyaarratti hin xiyyeeffatu jedhan. Wanta Ameerikaaf gaarii ta'u irratti xiyyeefata jedhan.

    Qejeeltoon imaammata alaa biyyattii Ameerikaa jabeessamoo hin jabeessu, nagaa kennaaf moo hin kennuuf, badhaatuu godhamoo hin godhu kan jedhu akka ta'es dubbatan.

17. 30 Ebla 2025Guddinni diinagdee biyyattii gadi bu'uusaaf Tiraamp bulchiinsa Baayidan komatan

    Pirezidantiin US Doonaald Tiraamp hojiilee guyyoota 100 bulchiinsisaanii hojjete kaabineesaanii waliin wayita dubbatan guddinni diingdee biyyattii gadi bu'uusaaf pirezidantii duraanii komataniiru.

    Gabaasni guddina diinagdee US guyyaa har'aa ifa godhame diingdeen biyyattii dhibbeentaa 0.3 gadi bu'eera jedha.

    ''Badii Tiraamp miti, sababnisaas Amajjii dhufne...diinagdeen walqabatee wanta Baayidan hojjechaa bahe hunda nan morma'' jedhan Tiraamp.

    Erga aangootti dhufanii investimentii gosa adda addaarraa doolaara tiriiliyoon saddeet harkisuu dubbatan. Dubbii himtuun Waayit Haawus ammoo kaleessa iba kennaniin US gama kanaan tiriiliyoona shan argachuu dubbatan.

    Tiraamp gibirri omishaalee biyyoota adda addaarra kaahan guddina diinagdee isa erga bara 2022 aero duraaf gadi bu'e jedhameef sababa akka hin tane dubbatan.

    Inumaa gibirri biyyootarra kaahan omidha biyya keessaafi daldala jajjabeessaa jiraachuu himan.

18. 30 Ebla 2025Diinagdeen Ameerikaa dhibbeentaa 0.3n gad bu'e

    Wayita Pirezidaantiin Ameerikaa Doonaldi Tiraamp dinagdee biyyatti guddisuuf qaraxa biyyootatti dabalaa jiran kanatti dinagdeen Ameerikaa kan duraa irraa gadi bu'uu ragaan jalqabaa Biiroo Xiinxala Diinagdee Ameerikaa irraa argame mul'iseera.

    Oomishni waliigalaa biyya keessaa Ameerikaa (GDP) kurmaana jalqabaa bara 2025 keessa waggaatti dhibbeentaa 0.3'n hir’achuu agarsiisa.

    Akka ogeeyyiin dinagdee jedhanitti lakkoofsi kun guddaa ta'uu baatus, dinagdee biyyattii kurmaana darbe keessa saffisan dabalaa ture (2.4 %) booda kufaatii guddaa agarsiisedha.

    Gabaasni kun yeroo Pirezidaantii Ameerikaa Doonaald Tiraamp qaraxa guddaa labsan dura ture irratti kan xiyyeeffate yoo ta’u, garuu sababoota jiran keessaa tokkpo ta'uu akka hin oolle himama

    Ogeeyyiin dinagdee akka jedhanitti haala kanaan dinagdeen Ameerikaa bara kana gara kufaatii ]%50tti dhihaachuu muudachuu akka malu akeekkachiisaniiru.

19. 30 Ebla 2025Morkii Barseloonaa fi Inter Miilaan har'aa dura wantoota beekuu qabdan

    Shaampiyoonsi Liigiin Awurooppaa morkii walakkaa xumuraa har'a galgala gaggeessuun shaampiyoonaa Awurooppaa yeroo shanii Baarseloonaafi isa yeroo sadii mo'ate Inter Miilana walitti fida.

    Kilabootni lamaan dorgommii Awurooppaa irratti yeroo 12 walfalmaniiru.

    Baarseloonaatu olaantummaa guddaa qaba. Yeroo jaha injifateera. Inter ammoo yeroo lama mo'ate. Taphoota hafan afur irratti qixxee bahaniiru.

    Barseloonaan yeroo dhumaaf Shaampiyoonsi Liigii kan injifate bara 2014/15 ture. Inter ammoo bara 2009/10.

    Miilaan dorgommii kana irratti Baayer Muuniikiifi Arsenaaliin mo'atee, Maanchister Siitii waliin qixxee bahee, Luverkusaniiin ammoo injifatamee as gahe. Hedduu qorameera jedhamuu baatus gahumsa gaariirra jira.

    Baarseloonana gama isaan Doortimundiin dhaqaa galaan Beenfiukaas dhaqaa galaan injifatee gahumsa olaanaan walakkaa xumuraa gahe.

20. 30 Ebla 2025Guuterees Israa'elii fi Filisxeem gidduutti furmaatni 'waaraan' akka taasifamu waamicha dhiyeessan

    Barreessaa Olaanaan Dhaabbata Biyyotaa Gamtoomanii Antooniyoo Gutereez biyyoonni konfiraansii idil-addunyaa baatii Waxabajjii keessa gaggeeffamu dura Israa’elii fi Filisxeem gidduutti “furmaata waaraa biyyoota lamaa akka mirkaneessan” gaafataniiru.

    Guterees walgahii Mana Maree Nageenyaa Baha Giddu Galeessaa gaggeeffame irratti, “Biyyoonni miseensa ta’an tarkaanfiiwwan furmaata biyyoota lamaan waraana irraa duubatti deebisu akka hojiirraa ooluuf ga'ee isaanii akka ba'an nan gaafadha,” jedhan.

    Faransaayii fi Sa’uudii Arabiyaan walga'ii Dhaabbata Biyyoota Gamtoomanii baatii Waqabajjii keessa gaggeeffamu irratti ni hirmaatu.

    Ministirri Dhimma Alaa Faransaay Jeyan Nohel Barrot shimma akan irratti ijjannoo ifaa qabaachuu qabana, inni Falasxeemif beekamtii kennuu fi tarkaanfii biyyotni lamaan nagaan waliin jiraatan uumuu danda'u fudhachuudha” jedhan.

    Dhaabbanni Biyyotaa Gamtoomanii yeroo dheeraaf furmaata mootummoota lamaa daangaa nageenya qabuu fi beekamtii qabu keessatti wal cinaa jiraachuu isaan dandeessius akka jiraatu gaaftaa ture.