Mormitoonni akka hidhamtoonni siyaasaa gadhiifaman wayita gaafatanitti daandiin Venezuweelaa humnoota nageenyaan dhiphateera

Haguuggii Tamsaasa Kallattii

1. 6 Amajjii 2026Venizuweelaa booda Tiraamp eenyurra ija buufatan?

   Maxxansa YouTube irra dabri

   Qabiyyee Google YouTube hayyamtaa?

   Barreeffamni kun qabiyyee [social_media-site]n dhiyaatan qaba. Tarii 'cookies' fi teknolojiiwwan biraa fayyadamuu waan danda'aniif, osoo tokkoonsaa gadi hin buufamiin dura hayyama keessan gaafanna. Osoo hin simatin dura Google YouTubeimaammata cookies fi imaammata mateenyaa dubbisuu barbaadda ta'a. Qabiyyee kana ilaaluuf 'waliigaluun itti fufi' filadhu.

   Accept and continue

   Hubachiisa: Qabiyyee marsariitiiwwan alaatiif BBCn itti gaafatamummaa hin fudhatu. YouTube beeksisa qabaachuu danda'a.

   Xumura maxxansa YouTube

   Tiraamp haala hin eegamneen pirezidaantii Veenzuweela fi haadha warraa isaanii mana jireenyaa eegumsa guddaa qabu keessaa to’ataniiru.

   Eegasii kuni dhaga'amee biyyootni kaanillee of bir'ataa jiru.

   Guyyoota darban keessas biyyoota biroo Tiraamp ija Waashingitan keessa akka jiran akeekkachiisa kennaniif keessaa muraasni kami?

2. 6 Amajjii 2026Balaa konkolaataa Affaaritti muateen godaantonni Itoophiyaa 22 dhuman, 65 miidhaman

   

   Madda suuraa, Afar Communication Bureau/Facebook

   Balaan kun konkolaataa guddaan [kan meeshaa fe'u] isaan ittiin imalaa turan garagaluun akka mudate ibsan qondaalonni.

   Qondaalli naannoo Affaar Mohammad Alii Biyedoo konkolaataa fe'isaa magaalaa Samaraatti kufe kanaan godaantonni 85 ta'an imalaa turuu ibsan.

   Godaantonni Itoophiyaa hedduun daandii kana fayyadamuun Jibuutii erga seenanii booda gara Yaman ce'u.

   Achirraa gara Sa'uudii Arabiyaa fi biyyoota Baha Giddugaleessaa kaanitti imalu.

   Qondaalli naannoo Affaar kun balaa kanaan kanneen lubbuunsaanii darbe 22 ta'uu fi kanneen miidhaman 65 keessaa 30 kan ta'an fayyummaansaanii haala yaaddessaa keessa jiraachuu ibse.

   Mootummaan naannoo Affaar balaa suukanneessaa kana booda ''kanneen lubbuun ba'an baraaruuf waan danda'u hunda akka hojjetu,'' ibse.

   Balaa suukanneessaan kun godaansi dargaggoota Itoophiyaa waadaa sobaan raawwatamu, balaa hamaaf isaan saaxilaa jiraachuu kan mul'isuudha.

3. 6 Amajjii 2026Dhukaasni naannoo masaraa pireezidaantii Veenzuweelaatti banamuun gabaafame

   

   Madda suuraa, Getty Images

   Naannawa masaraa preezdaantii Veenzuweelaatti dhukaasni banamuu gabaasni AFP irra bahe ni mul'isa.

   Namoonni ijaan argan akka jedhanitti dhukaasni gurguddaan halkan naannoo masaraa pirezidaantii Veenzuweelaa keessaa dhukaafamaa turuu himan.

   Haa ta'uu malee haalli kun to'atamuu fi dhukaasni sun dhaabbachuu, maddeen mootummaatti dhihoo AFP tti himan.

   Dirooniin eenyummaan isaanii hin beekamne masaraa Miraafilorees giddugala magaalaa guddoo Karaakaas keessatti argamu irra marsaa kan turan yoo ta'u, humnoonni nageenyaa dhukaasa itti banuu maddeen kan himan.

   Gabaasni kun kana dhaga'ame erga itti aanaan pirezidaantii Deelsii Roodriigeez itti aanaa pirezidaantii Veenzuweelaa ta’uun kakatanii sa’aatii muraasa booda.

   Masaraan pirezidaantii Veenzuweelaa Masaraa Miraafliores jedhamuun kan beekamu yoo ta’u, waajjira guddaa pirezidaantichaa magaalaa guddoo Veenzuweelaa Karaakaas keessatti argamu ta’uun tajaajilaa jira.

4. 6 Amajjii 2026Namni kufaatii Maaduroo tilmaamuun qabsiise doolaara 436,000 mo'ate

   

   Madda suuraa, LightRocket via Getty Images

   Pireezidantiin Veenzuweelaa aangoorraa akka ka'u tilmaame otoo kaafamuun isaanii ifatti hin ibsamiin dura maallaqa walakkaa miiliyoonaa tahu mo'ate.

   Nama oppireeshinii Ameerikaa keessa beeku tahuu danda'a qeeqni jedhu garuu irratti ka'eera.

   Fayyadamaan gabaa onlaayinii kiriiptoo Polymarket irratti qotinyaa qabatu Nikoolaas Maduroo dhuma baatii Amajjii irratti aangoorraa bu'a jedhu keessa seenuun sa'atii muraasa booda Tiraamp hogganaan Veenzuweelaa qabamuu himan.

   Akkaawuntiin tokko ji'a darbe gabaa qotinyaa abbaa doolaara 32,537 keessa seene kuni doolaara 436,000 mo'ate.

   Qotinyaa kana eenyu akka jalqabsiise kan hin beekamne yoo tahu namoonni dorgomanis qubeefi lakkoofsaan adda baafamu.

   Odeeffannoon Polymarket akka agarsiisutti Maduroon Jimaata Amajji 2, waaree booda aangoorra bu'a tilmaamni jedhu dhibbeentaa 6.5 ture.

   Tahus tilmaamni kuni halkan walakkaa boodaafi sa'atii muraasa Amajjii 3tti bari'u dhibbeentaa 11 dabale, jijjiramni kunis Tiraamp oduu to'atamuu pireezidantichaa labsuun dura ture.

5. 6 Amajjii 2026Dhaabbati konkolaataa Hiweendeey warshaa keessatti roobootiiwwan 'akka namaa' fayyadamuuf

   

   Madda suuraa, Boston Dynamics

   Dhaabbati konkolaataa Hiweendeey [Itoophiyaa keessa gara caalu Hayundaayi jedhuun] roobootiiwwan akka namaa warshaa keessatti hojjetan bara 2028 jalqabuun dorgommii teeknolojii haaraa fayyadamuu keessa galeera.

   Dhaabbanni konkolaataa Kooriyaa Kibbaa roobootii Atlaas jedhamu kan dhaabbata Boostan Daayinaamiiks jedhamuun oomishame Wiixata kaleessaa Laas Veegaasitti agarsiisaaf dhiyeesseera.

   Dhaabbati namni baay'een Itoophiyaatti Hiweendeey jedhee waamu ''fayyadama roobootii Atlaas jedhamu kanaa gabaa akka addunyaatti qaburratti babal'isuuf karoora qaba,'' jedheera.

   Amaazooniifi Teslaa dabalatee oomiishaa tajaajila isaaniif roobootiiwwan fayyadamuuf karoora akka qaban himaniiru.

   Roobootiiwwan kunneen dalagaa garaagaraa hojjetu kan jedhe Hiweendeey dhaabbati roobootiiwwan kunneen oomishu roobootii saree oomishuunis beekamu keessaa qooda akka qabu himeera.

6. 6 Amajjii 2026Roodrigeez pirezidantii ta'uun kakuu raawwatte, Maaduroon mana murtiitti qulqulluu ta'uu hime

   

   Madda suuraa, Reuters/Getty Images

   Deelsii Roodrigeez pirezidantiin ce'umsaa Veenzuweelaa ta'uun Paarlaamaa duratti kakuu raawwatte.

   Paarlaamaan biyyattii muudama Roodroogeez jalqabuu dura maaduuroon hidhaa US irraa akka gadhiifamu gaafateera.

   Dubartiin ganna 56 kun bara 2018 irraa eegalee itti aantuu pirezidant Maaduuroo turte.

   Humnoota USn fudhatamuu Maaduuroo fi haadha warraasaa Siliyaa Filoorees ''butamuu'' jechuun ibsiteetti.

   Gama kaaniin Maaduroon Niiw Yoorkitti sa'aatii lama dursee mana murtii dhiyaateera.

   Dhaddacharattis himannaawwan afur qoricha sammuu hadoochuufi shororkeessummaa wajjin walqabaturraa bilisa ta'uu ibse.

   Ammallee pirezidantii Veenzuweelaa ta'uus hime.

   Kun kanaan osoo jiruu yaa'ii ariifachiisaa Dhaabbata Biyyoota Gamtoomaniirratti US irratti qeeqni jabaan ka'eera.

   US karaa Ambaasaaddarashee tarkaanfiisheef sababa yoo kennitu kuufamni boba'aa addunyaarraa guddicha ta'e hoggansa fudhatama hin qabneefi seera jalaa miliquuf yaalurraa baraaruufi jetteetti.

7. 6 Amajjii 2026Ashamaa!

   Tamsaasni kallattii BBC Afaan Oromoo eegale.

   Oduufi odeeffannoo keenya aargachuuf karaa miidiyaa hawaasummaa nu hordofaa.

   Lafa nagaa oolaa!

8. 5 Amajjii 2026'Mana kootiin qabame, hidhamaa waraanaati' - Maduroon waan dhaddachatti dubbatan

   

   Madda suuraa, Kyle Mazza-CNP/Shutterstock

   Himannaa yakkaa daqiiqaa 40f dubbifameen Maduroon shamiizii cuqliisaafi burtukaanaa uffatee balleessaa akka hin qabne hime.

   Daanyaan jalqabarra dhuguma Nikoolaas Maduuroo tahuu akka mirkaneessu gaafataniin.

   Yeroo kaan himatamtoonni eenyummaasaanii gabaabsanii himatu, Maduuroon garuu carraa kanatti fayyadamuun pireezidantii Veenzuweelaa tahuu hime.

   ''Mana koo magaalaa Kaaraakaas jiru irraan qabame,'' jedhe afaan Ispaanish tasgabbaa'aa taheen.

   Daanyaan gidduugaluun ''yeroofi iddoon'' fooyya'aa dhimma kana itti ibsan akka jiru itti himan.

   Himannaan Maduuroo fi haadha warraasaa har'aa haala diraamaan guutame jalqabee, gaoolabame.

   Dhaddachatti uummata keessaa namni tokko Maduroon waan raawwateef ''kaffaluu'' qaba yeroo jedhu muddamni uumamee ture.

   Maduuroon itti garagalee afaan Ispaanishiin ''pireezidantii butame dha ani'' jechuun booda ''hidhamaa waraanaatis,'' jedhe.

9. 5 Amajjii 2026Pireezidantiin Kolombiyaa biyyasaa tiksuuf 'qawwee kaasuuf' qophii tahuu hime

   

   Madda suuraa, EPA

   Pireezidantiin Kolombiyaa Gustaavoo Peetroo biyyasaa eeguuf ''qawwee kaasuuf'' qophii tahuu hime.

   Pireezidantichi yaada kana kan kennan Tiraamp tarkaanfii waraanaa mootummaa Kolombiyaa irratti fudhachuuf doorsisuun booda dha jedhan Rooyitars dabalatee miidiyaaleen garagaraa.

   Tiraamp pireezidantiin Kolombiyaa qoricha sammuu hadoochuu gara Ameerikaatti galcheera jechuun himatu.

   Ergaa miidiyaa hawaasaa irratti maxxansaniin Peetroon hamma ergaasaa hubatanitti Tiraampiif kallattiin deebii akka kennu hime.

   Aangoon isaa seera qabeessa miti jedhamuufi qoricha sammuu hadoochuu daddabarsuun himatamuu waakkateera.

   Ergaa kanaan Peetroon meeshaa waraanaa ''lammata akka hin tuqne'' kakatus biyyasaaf garuu qawwee akka kaasu hime.

   Gama biraan Pireezidantiin Meeksikoo Kilaawudiyaa Sheenbaam Ameerikaan tarkaanfii wal-fakkaataa biyyashee irratti fudhatti jettee akka hin yaadne himuun, to'atamuu Maduuroo akka mormitus irra deddeebiin ibsitee jirti.

10. 5 Amajjii 2026Hogganaan olaanaa UN 'seerri idil-addunyaa kabajamu dhabuun yaaddessaa dha' jedhan

    

    Madda suuraa, AP

    Manni Maree Nageenyaa UN kora ariifachiisaa waameen hogganaa olaanaa dhaabichaa Antooniyoo Guteerees bakka bu'uun Roozmeerii Dikaarloo ibsa dhaabichaa dubbisaniiru.

    Guteerees, tarkaanfii Ameerikaan Veenzuweelaa irratti fudhatteen ''seerri idl-addunyaa kabajamuu hafuun akkaan nama yaaddessa,'' jedhan.

    Ibsichi: ''biyyattii(Veenzuweelaa) keessa tasgabbii dhabuun hammaachuu danda'a, biyyoota naannichaa irratti dhiibbaa gochuu danda'uu dabalataan hariiroo biyyooti walii qabaatan irratti fakkeenya kaa'u malas,'' jedhan.

    Gama biraan gorsaan nageenyaa UK kan tahan Sar Maark Laayil Giraant biyya isaanii dabalatee biyyooti Awurooppaa biroo ''ejjennoo rakkisaa'' keessa jiru jedhan.

11. 5 Amajjii 2026Tiraamp Maduuroo to'achuu Koongireesii otoo hin beeksisiin raawwachuun sirriidha - Miseensa Rippaabliikaana

    

    Madda suuraa, Inc via Getty Images

    Miseensi paartii Rippaabliikaanaa Raandii Faayiin pireezidantichi ''si'a nama seeraan ala qoricha sammuu hadoochu gurguru to'annoo jala oolchu nu mariisisuun irraa hin eegamu,'' jedhan dhimma Maduuroo irratti yeroo gaafataman.

    ''Otoo kongireesii mariisisee kanneen qoricha sammuu hadoochuu seeraan ala gurguran kunneen hundi hin qabaman ture,'' jedhe.

    Tiraamp murtoo isaa kongireesiitti beeksisuu dhiisuu sirriidhuma jedhe CNN waliin af-gaaffii taasiseen. ''Namni wayii akka afaan banuu danda'u waan beekuufi,'' jedhe.

    Miseensi paartii Demookiraatii gama biraan kongireesii otoo hin mariisisiiniifi eeyyama otoo hin argatiin Maduuroo to'achuun ''balaa dhufu otoo hin shallagiin, jarjaraafi akka feeteen'' raawwate jedhan.

12. 5 Amajjii 2026Siwiizarlaand qabeenya Maduuroo jalaa uggurte

    Mootummaan Siwiizarlaand qabeenya Pirezidantiin Venzuweelaa Nikolaas Maduuroo fi michuuwwan isaa biyyattii keessaa qaban akka hin sochoone dhorkeera.

    Tarkaanfiin kunis yeroo murteen kun darberraa eegalee akka hojiirra oolu ibse. Kaayyoon murtee kanaa inni ijoon qabeenyi biyyattii akka garmalee hin saamamne gochuudha jedha mootummaan Siwiizarlaand.

    Adeemsi seeraa Maduuroo irratti eegalame qabeenyi kun seeraan ala kuufamuu yoo mirkaneesse, akka lammiilee Venezuweelaaf deebi'uuf akka hojjetu ibseera.

    Siwiizarlaand bara 2018 irraa eegaltee Venezuweelaa irra qoqqobbii keessee jirti. Qoqqobbiin kun qabeenya ugguruu fi namoota 54 irra uggura imalaa kaa'uu dabalata.

    Qabeenyi Maduuroon Siwiizalaand keessaa qabu maal akka ta'e bal'inaan hin ibsamne. Garuu bara 2021 gaazexaan Siwiizarlaand akka gabaasetti, abbootiin alangaa biyyattii maallaqi doolaara Ameerikaa biiliyoona 10 ta'u Venezuweelaa keessaa saamamuu ibsanii turan.

    Dhorkaan qabeenya Maduuroo irra kaa'ame kun hatattamaan kan hojiirra ooluu fi waggoota afuriif kan turu ta'uu mootummaan Siwiizarlaand ibseera.

13. 5 Amajjii 2026Maaduroofi haati warraa isaa kaateenaan harki hidhamee mana murtiitti dhiyaatan

    

    Madda suuraa, Kyle Mazza-CNP/Shutterstock

    Maaduroo fi haati warraa isaa mana hidhaa Biruukiliin Niiw Yoork keessa jiru irraa gara mana murtii Maanhaatan jirutti geeffamaniiru

    Achittis himannaawwan irratti banaman ni dubbifamu.

    Ameerikaan Sambata darbe ture pireezidantii Veenzuweelaa kana to'annoo jala oolchuun biyyaa baasuu kan dubbatte.

    Ergasii gochaa Ameerikaa kana biyyooti danuu balaallefataniiru.

14. 5 Amajjii 2026Ameerikaan pirezidantii Veenzuweelaa to'achuun booda gatiin warqee dabale

    

    Madda suuraa, Getty Images

    Ameerikaan pireezidantii Veenzuweelaa Nikoolaas Maaduroo to'annoo jala oolchuun booda gatiifi qoodni albuudota gatii-jabeessaa, invastaroonni yaaddoo waan qabaataniif akkaan dabaleera.

    Warqeen gatiinsaa %2.4 ol kan ka'e yoo tahu kaaraatiidhaan doolaara 4,433 gurguramaa jira. Meeetiin ammoo %4.9 dabaleera. Kunis invastaroonni maallaqa isaanii qabachaa waan jiraniifi jedhameera.

    Awurooppaa keessattillee taatee Sambattanirra Ameerikaan raawwatteen qoodni gabaa akkaan dabaleera.

    Albuudoti gatii jabeessa kan akka meetiifi warqee akka qabeenya yeroo rakkootti waan ilaalamaniif yeroo akkasii mirkanni hin jireetti gatiin isaanii akkaan dabala.

    Warqeen bara 1979 as yeroo jalqabaaf gatii guddaa kan baase bara darbe yoo tahu dhibbeenta 60 ol dabaluun doolaara 4,549'n gaafa Mudde 26 gurguramee ture.

15. 5 Amajjii 2026Gosti qurxummii tuunaa jedhamu doolaara miiliyoona 3.2 gurguramee rekardii cabse

    

    Madda suuraa, Getty Images

    Gosti qurxummii tuunaa biluufiin jedhamu gabaa Tookiyoo, Tooyoosuu jedhamuttii Wiixata ganama caal-baasitti dhiyaatee, doolaara 3.2'n gurgurame.

    Caal-baasii kanarratti dhaabbata daldalaa Kiyoomuraa Koor jedhamuufi nyaata Jaappaan Suushii jedhamu biyya keessaafi biyya alaatti gurgurutu tuunaa kg243 ulfaatu kan bite.

    ''Tuunaan jalqabaa bara haaraa carraa gaarii fida,'' jedhe pireezidantiin dhaabbatichaa Kiyooshii Kimuuraa.

    Kimuuraan Mootii Tuunaa jedhamuun kan beekamu yoo tahu gosa qurxummii kanaa qarshii guddaa baasee bituun beekama.

    Abbaan qabeenyaa kuni gatiin caal-baasii ''na ajaa'ibeera,'' jechuun AFP'tti hime.

    ''Bara kana gatii cabseen bita jedheen ture garuu isan yaadeen ol qaala'eera,'' jedhe.

    Bara 2012 yeenii miiliyoona 56.5, bara 2013 ammoo miiliyoona 155 bitee rekordii qabatee ture.

    Bara 2019 biluufiin tuunaa kana yeenii miiliyoona 333.6(doolaara miiliyoona 2.1) bituun rekardii seen-qabeesssa qabateera.

    Yeroo sana ''qarshii baayyeen baase,'' jedhu ammas rekardii haaraa ofii cabseera.

16. 5 Amajjii 2026Bakka Maaduuroo bu'uun kakuu galuuf kan jirtu Deelsii Roodriigeez eenyu?

    

    Madda suuraa, Reuters

    Deelsii Roodriigeez ammaan tana pirezidantii kan yeroo Veenzuweelaati. Maduuroofis amanamtuudha jedhamti.

    Wal tajJiiwwan Maaduuroofi haati warraasaanii argaman irratti isaan cinaatii hin dhabamtu.

    Ogeettii seeraafi dippiloomaatiidha. Bulchiinsa Maaduuroo keessatti hooggansa adda addaarratti hojjetteetti.

    Pireezidantii Itti aantuu Maaduuroo kan taate dubartiin ganna 56, Maaduuroof nama dhiyoo ta'uusheerraa kan ka'e ''Pireezidantii tokkicha qabnu gadhiisaa'' jetteetti.

    Dilbata darbe ammoo Ministirri Haajaa Alaa US Maarkoo Ruubiyoo ishee waliin mariyatee wanta US barbaaddu ''hunda gochuuf tole'' jetteetti jechuu isa Tiraamp dubbateera.

    Yaadni kun ejjennoo Rodriigeez ifatti baate Veenzuweelaan ''kolonii impaayera'' kamuu hin taatu jechuun dubbatte waliin wal dhiita.

    Marii kaabineeshee isa jalqabaa irratti ammoo US irratti ejjennoo laafaa kan waliin hojjechuurratti xiyyeeffate calaqqifteetti.

    US waliin nagaa akka barbaadduufi hariiroonsaanii madaala kan eegeefi walkabajuurratti kan hundaa'e akka ta'u fedhii qabdus ibsiteetti.

    Ibsa baasteenis uummatni Veenzuweelaafi naannichi nageenyaa fi marii malee waraana hin barbaadu jechuun Tiraampitti dhaamteetti.

    Dhumarrattis ''Veenzuweelaan mirga nagaa qabaachuu, misoomuu, walabummaafi hegeree ifaa qabaachuu qabdi'' jetteetti.

17. 5 Amajjii 2026Dhalataan Itoophiyaa Sudaan Kibbaa fi Filisxeemotaaf qabsaa'e maal hima?

    

    Madda suuraa, Dr Seeyifee Taaddalaa

    Dhalataan Itoophiyaa kun qabsoo farra cunqursaa Itoophiyaatti jalqabuun mana hidhaas galuun dararaa hundas arganiiru.

    Erga bahanii saba cunqurfame hundaaf dhaabbachuun qaba jechuun uummata Sudaan Kibbaa fi Filisxeem waliin qabsaa'aa turan.

    Garuu akkamiin? Asii dubbisaa. Dhalataan Itoophiyaa Sudaan Kibbaa fi Filisxeemotaaf qabsaa'e maal hima?

18. 5 Amajjii 2026Loltoonni Kuubaa Maaduuroo eegaa turan hedduu ajjeefamaniiru

    Oppireeshinii Ameerikaan Venezuweelaa keessatti gaggeesiteen loltoonni Kuubaa hedduu ajjeefamuu min. Ittisaa Venezuweelaa himan.

    Kuubaa keessatti guyyaan gaddaa lama labsameera. Mootummaan biyyattiis loltoonni isaanii 32 Venezuweelaa keessatti ajjeefamuu himaniiru.

    Tiraamp ibsa kenneen lammiilee Kuubaa kan ajjeefaman sababa oppireeshinii gaggeeffameen tahuu himan.

    Isaan Maduuroo tiksaa turan. Waan gaarii hin turre'' jedhe Tiraamp.

19. 5 Amajjii 2026Venezuweelaan jeeqamuushee kan yaaddofte Kolombiyaan waraana bobbaaste

    

    Madda suuraa, Reuters

    Bulchiinsi Venezuweelaa jeeqamuutti kan yaaddofte Kolombiyaan naannoo daangaatti loltootashee bobbaafte.

    Biyyi ollaa Venezuweelaa jirtu Kolmbiyaan haala ollaasheetti uumameen bakkeewan muraasa miidhamaniiru.

    Bakka biyyoonni lameen wal daangessan yaaddoo nageenyaa jira jechuun Kolmbiyaan loltoota ishee bobbaafteetti.

    Naannicha sochiin hidhattootaa mootummaa biyyichaa lolaniis dabaleera.

    Gareen finciltootaa ELN jedhaman naannoo daangaa biyyoota lameenii socho'an bulchiinsa Nikoolas Maduuroo waliin hidhata gaarii waan qabaniif loltoota Ameerikaa waliin waranattis eenuu malu sodaan jehdu jira.

    Dabalataan waraanni Ameerikaa Venezuweelaa keessatti oopireeshinii cimsuun lakkoofsi baqattoota gara Kolombiyaa galanii achumaan US galuu barbaadanii haalaan dabala sodaa jedhu qabu pirezidaantiin Kolmbiyaa Gustaavoo Petroo.

20. 5 Amajjii 2026'Irra caalaan eegdota Nikoolas Maduuroo ajjeefamaniiru'

    'Irra caalaan humni nageenyaa Nikoolaas Maduuroo ajjeefamuu ministirri ittisaa biyyattii hime.

    Oppireeshinii Ameerikaan Karakas keessatti gaggeessiteen ''irra caalaan humna eegumsaa maduuroo fi namoonni nagaan ajjeefamaniiru' jedhe ministirichi.

    Ministirri Ittisaa Venezuweelaa Vilaadmiir Paadiriinoo, ''Maduuroo fi haati warraa isaa gara jabina dhiiga lolaase akkasiin butamuu ni balaaleffanna'' jedhe.

    ''Gareen nageenyaa pirezidaantichaa, loltoonnii fi namoonni nagaa irra caalaan isaanii ajjeefamaniiru'' jedhe.

    New York Times akka gabaasetti appaartimantiin tokko haleelamuun yoo xiqqaate namoonni 40 ol tahan madaa'aniiru.

    Garuu isaan kunneen namoota nagaa tahuu fi loltoota tahuu ifa miti. BBC'n maddeen walabaa irraa adda baafachuu hin dandeenye.