MM duraanii Baangilaadesh Sheekinaa Hasan addabbiin du'aa irratti murtaa'e

Haguuggii Tamsaasa Kallattii

1. 17 Sadaasa 2025Naayijeeriyaatti hidhattoonni barsiisaa ajjeesanii ijoollee dubaraa 25 butan

   

   Madda suuraa, Getty Images

   Naayijeeriyaa, naannoo kaaba-lixaatti hidhattoonni mana barumsaaa sadarkaa lammaffaa irraa ijoollee dubaraa 25 butanii barsiisaa tokko ajjeesan jechuun poolisii hime.

   Wanbadooti kunneen Mana Barumsaa Waliigalaa Dubartootaa Maagaa, bulchiinsa Keebbii jiru Wiixata har'aati kan isaan weeraran.

   Hidhattoonni kunneen ''poolisiitti dhukaasa bananii wal-haleelaa turan,'' kunis bakka bultii dubartootaa seenuun otoo hin weerariin dura ture.

   Barsiisaan tokko ijoollee baraaruuf otoo yaaluu ofii ajjeefameera. Hojjetaan mana barumsichaa biraas madaa'ee yaala argachaa jira.

   Namoonni ijaan argan wanbadooti naannoo sanatti baandaa jedhaman nama room'isiisuuf jecha qawwee dhukaasaa galan.

   Kanaan booda ijoollee dubaraa kunneen fuudhanii gara bosona naannoo sana jiruutti dhaqatan.

   Poolisiin naannicha humna dabalataa bobbaasuu himeera.

2. 17 Sadaasa 2025Vaayirasii Maarbarg qorachuuf laaboraatoriin socho'aa gara naannoolee dhukkubichi mudatetti geejibamaa jira- Dr Maqdas Dhaabaa

   

   Madda suuraa, EBC

   Vaayirasii Maarbarg qorachuuf laaboraatoriin socho'aa gara naannoolee dhukkubichi mudatetti geejibamaa jiraachuu Ministirri Ministeera Fayyaa Dr Maqdas Dhaabaa himan.

   Vaayirasii Maarbarg irratti ibsa ministeerri fayyaafi institiyuutiin fayyaa hawaasaa ibsa kennaniin Dr Maqdas Dhaabaa dhukkubicha to'achuuf qophii taasifamaa jiraachuu himuu isaanii EBC'n gabaaseera.

   Ministarittiin, ''naannolee dhukkubichi mudatetti iddoowwan adda baafaman qopheessuurraa qabee, hanga meeshaalee yaalaa guutuu dhiyeessutti hojjetameera,'' jedhan.

   Namoota vaayirasichaan qabaman adda baasuuf qaamolee dhimmi ilaallatu wajjin hojjechuun tatamsa'ina dhukkubichaa to'achuuf qindoominaan hojjetaamaa jira jedhan.

   Weerarri dhukkuba Maarbarg Naannoo Kibba Itoophiyaa magalaa Jinkaatti mudachuun mirkanaa'uun booda samuudni namoota 17 qoratamee namoonni sadii dhukkubichaan qabamuu baramus ibsameera.

   Namoota kunneen dabalatee hamma yoonaa dhukkuba kanaan namoonni jaha lubbuu kan dhaban tahuu ministarittiin himaniiru.

3. 17 Sadaasa 2025Namni mana amantii keessaa mobaayilii lama hate hidhaa waggaa shaniin adabame

   

   Madda suuraa, Addis Ababa Police

   Namni mana amantii keessaa mobaayilii lama hate hidhaa waggaa shaniifi ji'a shaniin adabamuu Qajeelchi Poolisii Kutaa Magaalaa Yakkaa eeruun Poolisiin Finfinnee Sadaasa 17,2025 gabaaseera.

   Himatamaan Daani'el Dammisee jedhamu waldaa warra wangeelaa 'Ye Itoophiyaa Wangeel Birhaan Alem Aqqeef,' kutaa magaalaa Yakkaa jiru, yeroo kadhannaan taasifamutti hannaaf seenee, jedha maxxansi Feesbuukii Poolisii Finfinnee.

   Poolisiin eeruu isa qaqqabeen qorannoo taasisuun booda yakkamaan miseensa warra amantii fakkaatee seenuun bilbila moobaayilii saamsangii lama kan birrii 173 baasu hatee miliquu Poolisiin Finfinnee ibseera.

   Namni kuni hordoffii irratti taasifameen qabamee mana murtii federaalaa sadarkaa duraa, ramaddii tokkoffaa irratti dhiyaachuun yakka hannaa raawwachuun irratti mirkanaa'e hidhaa waggaa shaniifi ji'a shaniin akka adabamu murteesseera.

4. 17 Sadaasa 2025Lammiin Afrikaa Kibbaa hiriira niyoo-Naazii irratti mul'ate viizaan jalaa haqame

   

   Madda suuraa, Supplied

   Lammiin Afrikaa Kibbaa hiriira niyoo-Naazii paarlmaa Awustiraaliyaa fuulduratti adeemsifame irratti mul'ate viizaan jalaa haqame.

   Maatiiw Gartar bara 2022 irraa qabee Awustiraaliyaa kan ture yoo tahu mormii farra Yihuudotaa irratti baatii darbe Kibba Weelsitti adeemsifame irratti hirmaateera.

   Hiriira yoo xiqqaate namoota 60 hirmaachise irratti sarara fuulduraa irratti dhaabbatee ''dhiibbaa warra Yihudoota hambisaa'' dhaaddannoo jedhu qabatee ture.

   Awustiraaliyaa keessatti mankaraaressummaa siyaasa gara bitaa mul'achaa kan jiru yoo tahu. Mootummaan salaamtaa Naazii agarsiisuu seeraan akka adabsiisu taaiseera.

5. 17 Sadaasa 2025Waa'ee Amantii erga hundaa'ee yeroo gabaabaa garuu addunyaa wal-gahe kana beektuu?

   

   Madda suuraa, Getty Images

   Amantiin Bahaayii Itoophiyaa dabalatee biyyoota addunyaa heddu keessaa hordoftoota qaba. Ragaan Bahai World News Service akka agarsiisutti, amantiin Bahaayii amantoota miliyeena shanii ol qaba.

   Amantii erga hundaa'ee yeroo gabaabaa, garuu addunyaa wal-gahe jedhamuunis beekama.

   Walakkeessa jaarraa 19ffaa keessa dargaggeessi Muhaammad Alii Shiraazii jedhamu Iraan keessaa ka'uun mul'ata haaraa Waaqa irraa akka arge labsuu eegale- ergaan isaas yeroo dhiyootti Nabiyyiin haaraan amantii addunyaa haaressu akka dhufuufi karoora uumaan dhala namaaf qabu ittiin ibsu akka mul'atuudha.

   Muhaammad Alii Shiraaz ergaansaa lammiilee Iraan biratti adaduma fudhatama argatee deeme, maqaa "Baab" jedhamu argate. Baab dhalli namaa karaa qaxxaamuraarra akka jiruufi kana karaatti deebisuun Waaqni 'Nabiyyii' haaraa erguun "karaa qajeelatti" akka nama deebisuufi mul'ata haaraa ittiin ibsu "yeroo dhiyootti ni erga" jechuun lallabaa ture.

   Baab umurii dheeraa hin jiraanne. Ergaan barsiisa isaatii kan amantaa Islaaamaa wajjin waan wal-dhiiteef Iraan keessatti to'annaa jala oolfamuun duuti itti murame.

   Barsiisa ijoo amantaa Bahaayii keessaa Waaqayyo yeroo garaa garaatti mul'ata ykn kaayyoo haaraa dhala namaatiif kenna kan (Progressive Revelation) kan jedhu tokkoodha. Kuni ammoo hordoftoota amantaa Islaamaa- Nabbiyyuu Mohammaaf nabiyyii dhumaa Waaqayyo [Allaan] ittiin ilmaan namaatti of mul'iseedha jedhu wajjin wal-faallessuun Baab fi hordoftootasaa hari'atamaaf saaxile.

   Muhaammad Alii Shiraaz ykn Baab waggaa shan qofaaf barsiise. Baab hidhamee duuti erga itti murtaa'ee booda bara 1850tti magaalaa Iraan Tabriz jedhamtu keessatti ajjeefame.

   Baab ajjeefamuu booda sochiin amantii Bahaayii Iraan keessatti ugguramnaan bartoonni Baab gara Iraaqitti baqatan.

   Guutuu isaa asii hordofaa

6. 17 Sadaasa 2025DRC keessatti walitti bu'iinsa bakka albuudni koobaaltii qotamutti muudateen lubbuu namoota 32 darbe

   

   Madda suuraa, Getty Images

   Rippabiliika Dimookiraatawaa Koongoo naannoo Kaalandoo jedhamutti bakki albuudni gati jabeessaa koobaaltii qotamutti walitti bu'iinsa uumameen namootni hedduun boolla keessatti kufuun lubbuu namoota 32 darbeera.

   Maddeen naannoo sanaa akka jedhanitti balaan kun kan uumame loltoota bakka albuudaa kana eegaa jiranii fi namoota naannoo albuuda kana baasan gidduutti uumameen ta’uu mala.

   Taatee kana ilaalchisee Ministirri Dhimma Biyya Keessaa Rooy Kawumba Mayonde, yaada kennaniin, "sababii rooba cimaa fi balaa sigiga lafaatiin naannoo sanatti akka hin seenne uggura akka biyyatti kaa'amus, albuuda baastonni seeraan alaa humnaan gara bakka albuudni ba'uu kana seenan" jedhan.

   Itti dabaluudhaanis, albuuda baastonni kun wal dhiibuu fi riqicha bool'a bishaaniin guutame qaxxaamuruudhaaf wayita yaalanitti jiguun namootni boolla keessatti kukufanii jedhan.

   Hojiin sakatta’iinsaa fi baraarsaa itti fufee waan jiruuf hanga ammaatti reeffi namoota 32 argamuu aanga’oonni kan himan.

   Angawoonni ibsa isaanii keessatti albuuda baastonni xixiqqaa yeroo hojii albuudaa seeraan alaa irratti bobba’an balaan walfakkaataan akka irra deebiin hin muudanneef ajaja qondaaltotaa eeguu akka qaban dhaaman.

   Balaan albuudaa DRC keessatti muudachuun kun haaraa miti. Namoonni tilmaamaan miliyoona 1.5 hanga 2 ta’an albuudota barbaadamoo akka sibiila diimaa, koobaaltii fi albuuda biroo baasutti du'aniiru

7. 17 Sadaasa 2025MM duraanii Baanglaadish murtiin du'aa itti murtaa'e

   

   Ministirri Muummee duraanii Baanglaadish Sheekinaa Hasinaa yakka dhala namaa irratti banameen yakkamaa ta'uun murtiin du'aa itti murtaa'e.

   Manni murtii dhimma bara darbe mormii barattootaan durfamu irratti jeequmsa uumameen,tarkaanfiin akka irratti fudhatamu ajajauun dubartiin kuni fi ajajaan poolisii duraanii yakkamaa ta'uu manni murtichaa kan murteesse.

   Yeroo sanatti UN akka tilmaametti namoonni hanga 1,400 ta'an kan ajjeefaman yoo ta'u MM duraanii kunis aangorraa kaafamuun gara Hinditti baqatte.

   Manni murtichaas bakka isheen hin jirretti murtii kana kan dabarse yoo ta'u murtiin kun akkamitti raawwatama kan jedhu itrratti ammatti wanti ibsame hin jiru.

   Ammallee guutummaa Baanglaadeesh keessatti sodaa nageenyaa fi mormiin tokko tokko taasifamaa jira. Ajjeechaa bara darbe daa'imman dabalatee namoota heddu irratti raawwatameef ammallee lammiilee Baanglaadeesh akkuma dallansiisetti jira.

   Bakka heddutti loltoonni bobbaafamanitti mormii deemaa jiru dhaabsisuuf yaalaa jiru. Mormitootni qabeenyaa maatii Sheekina Hasaan waliin walqabatu irratti miidhaa akka hin geessifneefis eegaa jiran.

8. 17 Sadaasa 2025Sa'udiin mindaa hojjettoota biyya alaatif sirreeffamni taasifte maali?

   

   Madda suuraa, Reuters

   Dhaabbileen Sa'uud Arabiyaa mindaa hawwataa kanaan dura hojjettoota biyya alaa ogummaa adda addaa akka dameewwan turizimii, ijaarsa, albuudaa fi tajaajila adda addaa biroo keessatti hirmataniif kanfaltu irra deebiin sirreessaa akka jirtu qacartootni Rooyitersitti himaniiru

   Akka addunyaatti boba'aa erguudhaan adda duree kan taate Sa'uud Arabiyaan karoora haaromsa dinagdee 'Vision 2030' jedhamu kan baasii fi hirkatummaa boba'aa hir'isuu karoorsuun hojjattooata biyya alaa hawwataa turte.

   Kanaanis carraa hojii uumuu fi indaastiriiwwan akka turizimii, riil isteetii, albuudaa fi tajaajila faayinaansii babal'isuu irratti xiyyeeffachuun hojjataa jirti.

   Akka qaama tarsiimoo yeroo dheeraa kanattis, biyyattiin pirojektoota gurguddoo doolaara biliyoona hedduutti tilmaamaman irratti invastimantii guddaa kan taasise yoo ta'u, kunis barbaachisummaan hojjettoota biyya alaa ogummaa olaanaa qabanii haalaan akka dabalu taasiseera.

   Haa ta'uu malee akka yaadametti hojiirra oolmaa isaa irratti harkifannaa guddaa muudachuun qormaata itti ta'eera.

   Guutuu gabaasichaa asii dubbisaa

   Sa'udiin mindaa hojjettoota biyya alaatif sirreeffamni taasifte maali?

9. 17 Sadaasa 2025Biyyoota Afrikaa 10 bara 2025 humna waraanaan jajjaboo tahan; Loltuu fi baajata isaaniin yoo ilaalamu

   

   Madda suuraa, Getty Images

   Gabaasa 'Global Firepower' humna waraanaa biyyoota Afrikaa gurguddoo 10 ilaalchisee kan bara 2025 baaseen Masiriin sadarkaa tokkoffaan dursaa jirti.

   Kunis humna lafoo guddaa qabaachuu, hidhannoo meeshaa waraanaa ammayyaa, qaxanaa isaanii keessatti humna galaanarraa fi qilleensarraa jabaa qabaachuun kan madaalamaniidha.

   Masiriin humna waraanaa jabaa, taankii fi konkolaattota yeroo waraanaaf oolan fi heelikooptera waraanaa hedduu qabaachuun dursiti jedha gabaasni baase.

   Masiriin loltoota idilee 440,000 fi humna eeggataa baayee fi humnoota leenjii loltummaa gahaa qaban biroos qabdi.

   Gabaasni kun baajata humna waraanaa Masirii waggaa tokkotti doolaara biliyoona 5.88 akka tah eibse.

   Guutuun isaa kunooti