Ilmi Mootii Saawudi Arabiyaa waggaa saddeetiin booda Ameerikaa daawwataa jira

Haguuggii Tamsaasa Kallattii

1. 19 Sadaasa 2025Jarmanitti harki muramaa haadha lammii Eritiraa tokko daandiirratti argame

   

   Madda suuraa, Polizei NRW Hagen

   Lammiin Ertiraa yeroof eenyummaanshee hin baramne Jarman, magaalaa Weestifaaliyaa daandii A45 irratti harkishee muramaan argame.

   Qaamni lammii Ertiraa hafe eessa akka jiru, isheen lubbuun haa jiraattuu, haa dhiistuu hamma yoonaa waan barame tokko hin jiru.

   Harkashee muramee muka tokko jalatti argamerraa ashaaraa fudhatameen lammii Eritiraa tahuun barame.

   Gabaasa miidiyaalee biyyattiirratti Wiixata darbe baheen, daa'imni baatii sadii kan dubartii ganna 32 kanaati jedhame balbala bataskaana Ortodoksii dhihoo jrutti huccuun maramee konkolaataarratti argameera.

   Dubartiin muraan harkashee qofa argame kuni koolugaltummaaf garas kan deemte yoo tahu, wiirtuu kooluugaltootaa magaalaa Boon jirutti galmooftee akka ture poolisiin beeksiseera.

   Daa'imni yeroo ammaa kana wiirtuu daa'immanii keessatti kunuunsi taasifamaafi akka jiru beekameera.

   Muraan harkashee iddoo jireenyaashee irraa fagaatee argamuunis falmisiisaa taheera.

   Dhimmi kuni kan dhagahame dubartiin tokko Dilbata halkan sa'atii 9 irratti waan hin baramne karaa irratti arguun poolisiif eeruu kennuun boodadha.

   Bara 2024 Komishiniin Olaanaa Godaantotaa Biyyoota Gamtoomanii (UNHCR) akka beeksisetti, lammiileen Eritiraa 683,00 tahan biyyoota gargaraattii koolugaltummaa gaafataniiru.

2. 19 Sadaasa 2025Poolisiin daa'ima gatamee argame harma hoosisuun lubbuu baraaran badhaafaman

   

   Madda suuraa, FB Qajeelcha Poolisii Godina Harargee Bahaa

   "Innillee na baree jira. Anillee gaafan argu garaan baay'ee na naha, Ilmoo kootiin gargar baasee ilaaluu hindanda'u" Saajinii Olaantuu Na'imaa Jamaal

   Poolisiin daa'ima gatamee argame harmasaanii hoosisuun lubbuu baraaran maatiin daa'imichaa yoo hinargamne ofitti fudhatanii guddisuuf murteessuu himan.

   Godina Harargee Bahaa Waajjira Poolisii Aanaa Qarsaatti Itti Gaafatamtuu Dhimma Dubartootaafi Daa'immanii kan ta'an Saajinii Olaantuu Na'imaa Jamaal, torbee tokko dura ture daa'ima hawaasni lafaa argee gara waajjira poolisii geesse harma hoosisuun lubbuu kan baraaran.

   "Yeroo fidanitti daa'imni kun baay'ee laaffatee ture. 'Nurratti yoo du'e seerri nundhiisu' jedhaniiti nubira kan fidan" jechuun haala yeroo daa'imichi gara waajjira poolisii geeffamu ture poolisiin tun BBC'tti himanii ture.

   Kana malees, daa'immni ji'a afur akka ta'u tilmaamame haala rakkisaa keessa akka ture eerun, "baay'ee kan beela'e, afaan isaatis baay'ee kan goge fi boo'ichallee kan dhaabe ta'uusaa argine" jedhanii ture.

   Saajinii Olaantu Na'imaa Jamaal lubbuu daa'imichaa oolchuuf balbala waajjirichaa cufatanii harmasaanii hoosisuu dubbatan.

   Maal badhaafamte?

3. 19 Sadaasa 2025Iswaatiniin namoota Ameerikaarraa ari'aman fudhachuuf Waashingiten irraa dolaara miliyoona 5.1 fudhachuu mirkaneessite

   

   Madda suuraa, AFP via Getty Image

   Biyyi Afrikaa Kibbaa keessatti argamtu Isiwaatiniin namoota Ameerikaarraa arii'an fudhachuudhaaf Waashingiten irraa dolaara miliyoona 5.1 fudhachuu mirkaneessiteetti.

   Iswaatiniin tarkaanfii cimaa Pirezidant Tiraamp baqattoota irratti fudhataa jiruun namoota Ameerikaarraa ari'aman fudhachuuf waliigaluun jaarmiyaalee mirgoota namaaf falmaniin qeeqamaa jira.

   Ministirri Maallaqaa Niil Riikenbarg, wixata kaleessaa paarlaamaa keessatti waa’ee maallaqa kanaa kan gaafataman yoo ta’u, mootummaan maallaqa kana US irraa akka argate mirkaneessaniiru.

   ''Erga gaafannee booda [namoota] US keessaa ari'amaniif akka ta'e nutti himame,'' jechuun ministeerichi adeemsa kana ilaalchisee odeeffannoo akka hin qabne ibseera jedha dhaabbati oduu Faransaay AFP.

   Ji'a Fulbaanaa keessa Human Rights Watch waraabbii waliigaltee kanaa akka arge ibseera. Waliigaltichi Iswatiniin namoota biyyaa aria'man 160 kan fudhattu yoo ta'u, bakka isaa ammoo “dandeettii bulchiinsa daangaa fi godaansaa” cimsuuf mootummaa Ameerikaarraa doolaara miiliyoona 5.1 n akka fudhatu tumameera.

   Isiwaatinii hanga ammaatti baqattoota marsaa lama, ji’a Waxabajjii fi Onkoloolessa keessa fudhatteetti. Namoota gara biyyatii dhufan keessaa tokko gara biyya dura irraa dhufee Jaamaayikaatti deebi'e.

   Dubbi-himaan mootummaa Isiwatinii Tabiilee Midiluulii BBC'tti akka himetti, namoota biroo gara biyyoota dhaloota isaaniitti deebisuuf ''qunnamtiin'' hojjetamaa jira.

   "Adeemsa keessa namni hundi gara biyyoota irra dhufaniitti ni deebi'u," jedhan.

4. 19 Sadaasa 2025ABO fi KFO'n pireezidantii Naannoo Oromiyaa wajjin maal marii'achuu barbaadu?

   

   Madda suuraa, Getty Images

   Hayyuu Dureen ABO Obbo Daawud Ibsaa fi Dura Taa'aan Kongireesii Federaalaawaa Oromo (KFO) Proofeesar Mararaa Guddinaa xalayaa ifaa pireezidantii Naannoo Oromiyaa, Obbo Shimallis Abdiisaaf barreessaniin marii taasisuuf beellamni akka isaaniif qabamu gaafataniiru.

   Xalayaan ifatti barreefame kuni chaappaa dhaabota lamaanii kan qabu yoo tahu Sadaasa 18, 2025 barreefamuunis irraa mul'ata.

   Waajirri Mootummaa Naannoo Oromiyaa xalayichi isa qaqqabuus tahe, gaaffii dhiyaateef deebii kennuu hin beeksisne.

   Dura Taa'aa Kongireesii Federaalistii Oromoo Piroofeesar Mararaa Guddinaa dhimma maali irratti mariyachuuf xalayaa akka barreesan gaafanneerra.

   Piroof Mararaaan dhimma nageenyaa Naannoo Oromiyaa irratti pireezidanticha dubbisuu barbaadanii dhaabni isaan xalayaa kana ABO waliin akka ifatti barreessan himaniiru.

   ''Uummanni keenya rakkoo keessa jira. Iddoo baayyee dhumaatiin jiraa, Arsii, Harargee, Shawaa fi Wallagaa, namni ni hidhamaa, ni dararamaa rakkoodhuma kanarrtti, yoo nu dhagahaniif dubbisuu barbaanne,'' jedhan.

   Kanaan dura dhimma nageenyaa Oromiyaa irratti dhaaboti kunneen lamaan yeroo garagaraatti ibsa baasaa turan.

   ''Rakkoon bal'ataa malee gabaabbachaa waan hin deemneef teenyee ilaalluurra gahee keenya bahachuuf gaafanne,'' jedhan.

   Bu'aan marii kanarraa abdatamu maali?

5. 19 Sadaasa 2025Kongirasiin Ameerikaa sanadoonni yakkamaa daldalaa saal-qunnamtii Eppistiin akka gadhiifamu murteesse

   

   Madda suuraa, Getty Images

   Qaama Kongiasii Ameerikaa kan ta'an manni-maree bakka bu'ootaafi Seenetiin kaleessa walga'ii gaggeesseen, waajirri haqaa biyyattii nama ijoollee ol adeemtuu ta'an daldala saal-qunnamtiif dhiyeessun yakkamaa jedhame Jefirii Eppistiin waliin walqabatee sanadoonni jiran akka ifa taasifaman murteessaniiru.

   Manni-maree bakka bu'oota ummataa mrutee akka sanadiin kun ifa bu'u kan dabarse sagalee deeggarsaa 427 fi mormii tokkoonidha.

   Wixineen kun murtee dabalataaf kan dhiyaatee ture yoo tahu Seneetiin ammoo mormiin waan hin ka'iiniif sagalee kennuu duraan beekamuun ala saffisaan raggaasiseera.

   Murteen kun kan darbe Pirezidant Tiraamp ejjennoo kanaan dura qabu jijjiiruun, miseensonni Kongirasii sanadoota kanneen akka gadhiisaniif gaafachuusaatiin guyyoota muraasa boodadha.

   Ejjennoo pirezidaantichaa duraan ture deeggartoonni isaa baayyeen qeeqaa kan turan yoo ta'u, sanadoonni ifatti akka gadhifamaniif dhiibbaa taasisaa turan.

   Abbaan qabeenyaa Jeefirii Eppistiin bara 2019 mana hidhaa Niwu Yoork keessattti ture lubbuun isaa kan darbe. Namni kun kutaa mana hidhaa keessatti kan du'e ofiin of ajjeesee akka ta'e ibsamee ture.

   Eppistiin kan hidhame yakka dubartoota daldala saal-qunnamtiitiif daddabarsuutiin himatamee ture. Bara 2008 keessa ammoo ijoollee durbaa ol adeemoo ta'an gocha daldala saal-qunnamtiitiif fayyadamuun yakkamaa ta'ee ture.

   Himannaawwan lamaan qorannoo abbaa qabeenyaa kanarratti taasifameen sanadoonni kumaan lakkaa'aman walitti qabamaniiru.

   Sanadoota kanneen keessa gaaffiifi deebii miidhamtootaafi namoota ragaa ta'an waliin taasifameefi gaaffiifi deebii barreeffamaan qophaa'an keessattti argamu.

   Hariiroon hawaasummaa Tiraamp fi Eppistiin cimaa kan ture yoo ta'u, Tiraamp osoo Eppistiin bara 2008 yakkamaa hin jedhamiin dura hariiroo duraan bara dheeraaf waliin qaban addaan kutuu dubbata.

   Torban darbe sanadiin Eppistiin fuula 20,000 qabuufi Tiraamp keessatti eerame ifa taasifamuu hordofee Pirezidanntichi maqaan isaa nama kana waliin walqabate ka'aa tureera.

   Waayit Hawus garuu pirezidaantichi yakka kamiyyu hin raawwanne jechuun mormeeraaf.

6. 19 Sadaasa 2025Haleellaa Raashiyaan lixa Yukireenitti raawwatteen namoonni 20 ajjeefaman

   

   Madda suuraa, @zinkevich_igor

   Haleellaa dirooniifi misaayelaa Raashiyaan lixa Yukireen magaalaa Teenoopilitti raawwatteen daa'imman lama dabalatee namoonni 20 lubbuu dhaban.

   Namoonni 66 biroon kan madaa'an yoo tahu, haleellaan kuni gamoowwan namoonni keessa jiraatan lama irratti raawwate kun erga Raashiyaan bara 2022 irraa qabee Yukireen haleeluu eegaltee haleellaa namoonni baayyeen itti du'an keessaa isa tokko.

   Naannoleen lixa biyyattii biroonis kan haleelaman yoo tahu, haleellaan diroonii magaalaa kaaba Yukireen Kaarkiiv irratti qiyyaafates namoota 30 caalan madeesseera. Suuraaleen miidiyaa hawaasaarra qoodaman gamoowwaniifi konkolaataawwan gubatan agarsiisu.

   Ibsaan baduunis naannolee Yukireen baayyeerra dhiibbaa geessiseera jedhe ministirri annisaa Yukireen.

   Play video, "Watch: Aftermath of Russian drone attack on Ukraine", Turtii 0,42

   00:42

   

7. 19 Sadaasa 2025Arsenaal michummaa Viziit Ruwaandaa waliin qabu xumuruuf

   

   Madda suuraa, Getty Images

   Arsenaal michummaa Viziit Ruwaandaa waliin waggaa saddetiif ture Waxabajji 2026 xumuruuf akka jiru beeksise.

   Arsenaal fi Boordiin Misoomaa Ruwaandaa michummaa ispoonsarii waggaa saddeetii, beeksisa harka uffata Arsenaal irratti barreeffamee ture dhuma bara kanaarra akka xumuran waliigalaniiru.

   Arsenaal fi Boordiin Misoomaa Ruwandaa waliin ta’uun galma duraan kaa’ame caalaa dheeressuun michummaa isaanii kan dheereffatanii turan yoo ta’u, kun ammoo kunuunsiifi turiizimiin walitti fufinsa qabaatu akka jajjabaatu taasiseera; deeggartoonni kilabichaa miliyoonaan lakkaa’amanis akka biyyattii [Ruwaandaa] daawwatan kakaasuun guddina turiizimiif bu’uura guddaa kaa’eera.

   Michummaan Arsenaal waliin ture kun miidhaginni uumamaa Ruwaandaa akka mul’atu, akkasumas guddinni turiizimii biyyattii akka saffisu taasseera.

   Namoonni Ruwaandaa daawwatan bara 2024 keessa miliyoona 1.3 kan qaqqabe yoo ta’u, galiin byyattiin argattus erga michummaa Arsenaal waliin tolfattee dolaara miliyoona 650 qaqqabuun guddina %47 agarsiiseera.

8. 19 Sadaasa 2025Daandiin Xiyyaaaraa Itoophiyaa balalii gara Humaraa waggootaaf addaan kutee ture deebisee jalqabe

   

   Madda suuraa, EBC

   Daandiin Xiyyaaaraa Itoophiyaa balalii kanaan dura gara Humaraattitaasisaa ture waggootaaf addaan kutee deebisee jalqabuumiidiyaaleen biyya keessaa gabaasan.

   Daandiin Qilleensaa Itoophiyaa balalii gara Buufata Xiyyaaraa Humaraatti tsaaisu har’a Sadaasa 19, 2025 kan deebisee jalqabuu ibse.

   Balaliin kun jalqabuun sochii invastimantiitiin ga’ee guddaa qaba jedhamee jira. Dabalatas, balalliin kun gama hawaasummaafi diinagdeen bu’aa dabalataa qabas jedhameera.

9. 19 Sadaasa 2025‘Balaan inuma uumama’- Tiraamp ajjeechaa Khaashoogii irratti ilmi mootii Sa’uudii harka keessaa hin qabu jedha

   

   Madda suuraa, Getty Images

   Pirezidaantii Ameerikaa Doonaald Tiraamp ajjeechaa gaazexeessaa Jamaal Khaashoogii ilaalchisee ilmi mootii Sa’uudii Mohaammad Bin Saalmaan (MBS) ''waan beeku hin qabu'' jedhan.

   Yaadni Tiraamp qorannoo gabaasa basaasaa Ameerikaa faallessa. Bara 2021 CIA’n ilmi mootii MBS Qoonsilaa Sa’uudii Istaanbul keessatti Khaashoogiin bara 2018 akka ajjeefamu raggaasisuu ibse.

   Waayit Hawusitti kan simatame MBS badii tokkollee hin raawwanne jechuun waakkate. Mootummaan Sa'udii du'a Khashoogii kan “baay’ee isaan dhukkubse” qorachuuf "waan barbaachisu hunda" godheera jedha.

   Erga ajjeechaan hariiroo Ameerikaa fi Sa’uudii gidduuti rakkoo uumte kun raawwatamee booda daawwannaa Ameerikaa isa jalqabaa ture.

   Baayidan bara bulchiinsasaa ilma mootii kanaa hin keessummeessine. Inumaayyuu sababa sarbama mirga namoomaa isheen raawwatuuf Sa’uudii Arabiyaa ofirra akka dhiibu dhaadate.

   Haata’u malee bara 2022 Baayidan dhimmoota biroo irratti waliigaltee irra ga’uuf Sa’uudii daawwate.

   Tiraamp ammoo michuu isaanii cimaa. Yeroo MBS waa'ee ajjeechaa kanaa waajjira oovaalii keessatti gaafatame Tiraamp aaridhaan rippoortaraaf deebii kenne.

   "Waa’ee nama garmalee falmisiisaa ture kaastee jirta," jedha Tiraamp

   “Namoonni baay'een nama ati waa’ee isaa gaafatu kana hin jaalatan turan. Yoo isa jaallattanis hin jaalanne balaan inuma uumama”

   “Garuu inni [ilmi mootii] waa’ee kanaa homaa hin beeku ture, kanaaf keessummoota keenya qaanfachiisuu hin qabdu." Jedha Tiraamp.

   Bara bulchiinsa Pirezidaant Joo Baayidan ilmi mootii MBS, Khaashoogiin Istaanbul keessatti akka “qabamu ykn ajjeefamu” murteessuusaa gabaasni basaasa Ameerikaa ifoomse.

   Yeroo bulchiinsa Tiraamp isa jalqabaa qondaaltonni Waayit Haawus gabaasa kana gadhiisuu didan.

   Ajjeechaa kana hordofee qondaaltonni Sa’udii hedduu irratti qoqqobbii kaa’ame ture, garuu kallattiin ilma mootii irratti kan xiyyeeffate hin turre.

   Yaada Tiraamp kanaaf BBC Newsnight irratti deebii kan kennite, haati warraa Khaashooggii Hanaan, , ajjeechaa abbaa warraa isheetiif Bin Salmaan ofii isaatii itti gaafatamummaa fudhachuu himti. Kanaaf Tiraamp isaaf mormuun waan inni duraan jedheen wal hin simu jetti.

   "Ilmi mootiitu bara 2019 af-gaaffii daqiiqaa 60 keessatti waa'ee yakka suukaneessaa kanaa itti gaafatamummaa fudhateera," jetti.

   Barreeffama X irratti barreessiteen, MBS waliin wal arguu fi ajjeechaa abbaa warraa isheetiin beenyaa akka kaffalamuuf waamicha dhiyeesse.

   Hanaan US keessatti koolu galtummaa siyaasaa kan argatte yoo ta'u, naannoo Waashingitan DC jiraatti.

10. 19 Sadaasa 2025Tamsaasi keenya kallattii eegaleera!

    Odeeffannoowwan waktawaaa biyya keessafi idiladdunyaa jala jalaan isin biraan geenya.

    Fula Facebook, Marsariitii, Youtube fi WhatsApp keenya mil'achuu hin dagatinaa!

    Dhiyaadhaa!