Israa'el gartuuwwan gargaarsaa 37 Gaazaa keessaa dhorkuuf

Haguuggii Tamsaasa Kallattii

1. 31 Muddee 2025Jibuutiin Qonsilaa Somaaliland biyya ishee keessa jiru cufte

   

   Madda suuraa, Miidiyaa Hawaasa

   Somaalilandi waajjira qonsilaa Jibuutii Hargeessaa jiru cufuuf murteessuu hordofee, Jibuutiinis tarkaaanfii walfakaataa fudhachuu qondaaltonni mirkaneessan

   Akkasumas hojiin dippilomaasii waajjirichaan walqabatu hundi akka addaan cite himaniiru.

   Dippilomaatonni qonsilaa sana keessa hojjataa turanis ergasii gara Jibuutiitti deebi'aniiru.

   Tarkaanfiin kun kan fudhatame yeroo waldhabdeen dippilomaasii Jibuutii fi Somaaleelaand gidduutti dabalaa dhufeetti.

   Waldhabdeen gama lameenii kan uumame erga pirezidaantonni Jibuutii fi Somaaliyaa guyyoota muraasa dura Jibuutiitti wal arganii mari'atanii booda Israa’el Somaalilaandiif beekamtii kennuu ishee mormuun ejjennoo cimaa qabatanii booda.

   Halli kun dhimma Somaaliyaa fi Somaalilaandii akkasumas Gaanfa Afrikaa caalatti kan hammeessu ta'uun ibsamaa jira

2. 31 Muddee 2025Hogganaan juntaa Giinii filannoo pirezidnatummaa injifate

   

   Madda suuraa, Reuters

   Giiniitti hogganaan juntaa aangoo humnaan qabatee ture, Jeneraala Mamaadiiy Dumbooyaa filannoo pireezidantummaa gaggeeffame sagalee olaanaa argachuun injifate jedhe Komishiniin Filannoo biyyattii.

   Dumbooyaan warra sagalee kenne keessaa dhibbeentaa 86.7n filatame.

   Dhaabbileen siiviilii biyyattiin gara bulchiinsa siiviilii akka deebitu gaafachaa turan, morkataan Dumbooyaa filannoorratti akka hin hirmaanne dhorkameera jechuun bu'aa filannoo busheessaniiru.

   Mormitootni ammoo bacancarsuun raawwatameera jechuun adeemsa filannichaa qeeqaniiru.

   Filannoo kanaan kaadhamimaan sadarkaa lammataan xumure sagalee dhibbeentaa 6.6 argate.

3. 31 Muddee 2025Netaaniyaahuun maaliif Somaalilandif beekamtii kennuu akka filate ibse

   

   Madda suuraa, Reuters

   MM Israa’el Beeniyaamin Netaaniyaahuu kaleessa miidiyaa Ameerikaa 'Newsmax' jedhamurratti gaaffiifi deebii taasisaniin dhimma nagaa Gaazaa fi hidhannoo hiikkachuu Hamaas, akkasumsa Israa’el dhiheenya kana Somaalilaandiif beekamtii kennuu dabalatee ibsa kennaniiru.

   Israa’el Somaalilaandiif beekamtii kennuun, tarkaanfii “biyya Musliimaa giddu galeessa fi dimokiraatawaa” taate waliin waligatee uumachuu barbaaduu ta'uu ibsan

   Netaaniyaahuun ''biyyi lammiilee miliyoona 6 qabdu Somaalilaand Muslimoota ammayyaati. Waliigaltee Abrahaam keessatti makamuu barbaadu, kunis waan gaarii natti fakkaata. Isaan dimokiraatota, filannoo gaggeessaniiru." jedhan

   Kanaaf biyya dimokiraatawaa Israa’el waliin hariiroo uumuuf qophoofte deeggaruu fi biyyootni biroollee faana isaanii hordofuu akka qaban dubbatan.

   Waliigalteewwan Abrahaam jedhamu hariiroo Israa’elii fi biyyoota Arabaa jalqabarraa kaasee walxaxaa ture idileessuuf kan yaadamedha.

4. 31 Muddee 2025Maaliifi Burkinaafaasoo haaloo bahuuf lammiilee US irra uggura imalaa kaahan

   

   Madda suuraa, Tribune News Service via Getty Images

   Maaliifi Burkinaafaasoon lammiileen US gara biyyasaanii akka hin galle dhorkaa kaahan. Tarkaanfiin biyyoota lamaan kanaa kan dhagaahame bulchiinsi Tiraamp lammiilee biyyoota kanaarratti uggura kaahuu hordofeeti.

   Uggura imala gara US godhamu irrattii tarkaanfii Pirezidant Doonaald Tiraam fudhateen lammiilen biyyoota lamaanii guutummaatti gara US akka hin seenne dhorkaan kaahameera.

   Ministirri Haajaa Alaa Burkinaafaasoo bu'uura fudhatan deebisanii kennuutiin hojjenna jedhan.

   Ministirri Haajaa Alaa Maalii ammoo wal-kabajuufi walqixxummaan walabaa akka jiraatu waamicha godhan.

   Nijeer guyyoota dura tarkaanfii walfakkaatu fudhatteetti.

   Biyyootni sadan kun erga waraanni bulchiinsa siiviilii diigee humnaan qabatee booda waraanaan bulaa jiru.

5. 31 Muddee 2025US lammiilee hidda dhalattoota Somaalee ta'an lammummaa Ameerikaa irraa mulquuf 'odiitii' gochaa jirti

   

   Madda suuraa, Reuters

   Bulchiinsi Preezdaant Traamp kibxata akka jedhetti, US dhimma baqattummaa lammiilee Ameerikaa hidda dhaloota Somaalee ta'anii oodit gochaa turte.

   Sakatta'iinsa (oodiitii ragaa baqattummaa) lammiilee kanneenii keessatti yoo waliin dhahuun qorannoodhaan irra gahame lammummaan ni mulqama (haqama).

   "Akkaataa seera Ameerikaatti namni tokko waliin dhahuun lammummaa yoo argate lammummaan sun irraa mulqama," jedhan Hoggantuu itti aantuun dhimma nageenya biyya keessaa Tiriishiyaa MacLaafiin.

   Lammummaa mulquun kun darbee darbee tarkaanfii fudhatamuu fi waggoota waan fudhatu dha. Waggoota 1990 fi 2017 gidduutti dhimmoonni akkanaa 11 qofti akka raawwataman agarsiisa ragaan Wiirtuu Odeeffannoo Seeraa Baqattootaa.

   Tiraamp erga jalqaba bara faranjootaa 2025 aangotti dhufee as imaammata baqataa hamoo garaagaraa kanneen akka dirqiin biyyarraa ari'uu, viisaa fi heyyama jireenyaa mulquu, seen-duubee miidiyaa hawaasaa baqatttootaa qorachuu fa'i fudhataa jira.

   Gareeleen mirga namoomaa imaammata Tiraamp kana bal'inaan balaaleffaachaa turani.

   Tiraamp fi michuuwwan isaa imaammata kanneen nageenya biyya keessaa fooyyessuuf akka hojiirra oolchan himu.

6. 31 Muddee 2025Yunaayitid Arab Emireetis loltootashee Yaman keessaa akka baastu ibsite

   

   Madda suuraa, EPA

   Yunaayitid Arab Emireetis (UAE) fi Sa'uudii Arabiyaan Yaman keessatti wal dhabuuf deemu.

   Mootummaan Yamanii loltoonni UAE sa'atii 24 keessatti akka ba'an fedhii agarsiiseera, fedhii kanas Sa'uudiin tumsiteetti. Taatee kana booda UAEn loltootashee Yaman keessatti hafan akka baastu ibsite.

   Murteen UAE kun erga Sa'uudiin iddoo gareen Kibba Yaman walaboomsuuf socho'u- Kaawunsilii Ce'umsaa Kibbaa (STC) jedhamu haleelteeti.

   Sa'uudiin buufata handaara galaanaa kibba Yamanitti argamu Mukalla jedhamu irratti haleellaa raawwachuu isheef akka sababaatti kan dhiheessitu, buufati kun karaa meeshaaleen waraanaa garee adda baatotaa deeggarsa UAE qabaniif ittiin galan ta'uu ibsiti.

   UAEn karaa buufata kanaa meeshaaleen waraanaa geejjibsiifamuu himannaa jedhu haaluun, haleellaa Sa'uudiitti akkaan gadduu ibsiteetti.

   UAE fi Sa'uudiin waraana Yaman keessatti garee hidhattootaa deeggarsa Iraan qaban- Huutii irratti gaggeeffamu keessatti waltumsuun hidhattoota kunneen haleelaa turan.

   Garuu garee isaan deeggaran gidduutti walqoodiinsa mudachuun biyyoota lameen walitti buuseera.

   Sa'uudii Arabiyaan gamasheen UAEn gareen fedhii adda ba'uu qaban akka mootummaa deeggarsa Sa'uudii qabu irratti haleellaa raawwatan ''dhiibbaa uumteetti'' jechuun himatteetti.

   Walhimannaa biyyoota lameenii irratti odeessa dabalataa

7. 31 Muddee 2025Turkiin handaara galaaaa Somaaliyaatii hojii boba'aa baasuu eegaluuf

   

   Madda suuraa, Villa Somalia

   Turkiin bara haaraa kanatti daangaa galaana Somaaliyaa keessatti boba’aa baasuu akka jalqabdu pirezdantiin biyyattii Rasiib Xayyib Erdogaan ibsan.

   Erdogaan kana kan dubbatan wayita Pirezidantiin Somaaliyaa Hasan Sheek Mohmuud daawwannaaf biyyattii jiranitti ibsa gaazexeessitootaaf kennaniin.

   Israa’el Somaalilaandiif beekamtii kennuu hordofee Pirezidanti Hasan Sheek Mahmuud deeggarsa walitti qabachuuf biyyootarra imalaa jiru.

   Turkiin waggaa tokko dura erga waliigaltee tumsa kallattii hedduu Somaaliyaa waliin mallatteessitee as dooniiwwan gurguddoo galaana Somaaliyaa keessatti bobbaasuun boba'aa barbaadaa turteetti.

   Pirezidantiin Turkiii magaalaa Istaanbulitti ibsa gaazexeessitootaaf kennaniin duulli qorannoo fi sakatta'iinsa boba’aa ji’oota sagaliif gaggeeffamaa ture hanga bara haaraatti xumurama jedhan.

   Erdogaan dooniiwwan sakatta'iinsa boba’aa Turkii qarqara galaanaa Somaaliyaa irraa hanga galaana Hindiitti qorannoo bal’aa gaggeessaa akka turan ibsuun, “hojii gosa kanaa Turkiif haaraadha” jedhan.

   Pirezidantiin Somaaliyaa qotiinsi boba'aa ''yeroo dhiyootti'' akka eegalu dubbatan, Erdogaan ammoo ''bara haaraa'' akka jalqabu akeekan.

   Pireezidantiin Turkii dooniiwwan Turkii boba’aa qotan dabalataan gara naannoo sanaatti akka bobbaafaman himaniiru.

8. 31 Muddee 2025Israa'el heyyama gareewwan gargaarsaa 37 Gaazaa keessaa mulquufi

   

   Madda suuraa, Reuters

   Israa'el heyyama hojii gareewwan gargaarsaa 37 Gaazaa fi Westbaank keessa socho'anii mulquufi. Gareewwan kunneen akkaataa seerawwan haaraatti waan isaan irraa hin barbaachifne hin guunne jechuun akka sababaatti dhiyeessiti Israa'el.

   Dhaabbileen gargaarsaa idil-addunyaa kanneen akka ActionAid, the International Rescue Committee fi Norwegian Refugee Council jedhaman kanneen heyyamni hojiisaanii Amajjii 01 irraa kaasee mulqamuu fi guyyoota 60 keessatti hojii dhaabuu qabani.

   Israa'el wanti dhaabbilee kanneen himattuun keessaa, gareewwan kunneen ragaalee "guutuu" eenyummaa hojjettoota isaanii naa kennuu didaniiru kan jedhu tokko dha.Tarkaanfiin ishee kun kan "tajaajila daangessuu" fi "fudhatama" hin qabne jedhamuun UK dabalatee ministiroota dhimma alaa biyyoota 10tiin akka malee qeeqameera.

   Ministiroonni dhimma alaa UK, Firaans, Kanaadaa, Denmaark, Fiinlaand, Aayilaand, Jaappaan, Norweey, Siwiidinii fi Siwiizarlaand ibsa waloo baasaniin tajaajila dhaabbilee gargaarsaa idil-addunyaa humnaan dhaabsisuun " kan fayyaa dabalatee tajaajiloota murteessoowwanirratti dhiibbaa hamaa qabaata.

   Rakkoon gargaarsa namoomaa Gaazaa keessaa ammallee "hamaa" ta'uu ibsanii mootummaan Israa'el dhaabbileen kunneen karaa "waaraa fi eegamuun" akka tajaajilan gochuu akka qabdu waamicha godhaniiru.

   Dhaabbilee kan galmeessu,Ministeerri Dhimma Diyaaspotaa Israa'el, tarkaanfiin kun yaa'insa gargaarsa namoomaa gara Gaazaa godhamurratti dhiibbaa hin qabaatu jedhe.

   Gargaarsi karaa dhaabbilee UN, michuuwwanii fi dhaabbilee gargaarsa namoomaa "mirkanaayee fi calalamuun" dhaqqabuu itti fufa jedhe.

9. 31 Muddee 2025Akkam jirtu

   Tamsaasa kallattii eegalleerra. Odeessaalee dhimma Gaazaa, Yaman, Somaalilaand fi kaan karaa kanaan argattu.

   Tamsaasa kallattii kanaan duraa asii dubbisaa!