Baqattoonni UK seenan dhaabbiidhaan eeyyama jireenyaa argachuuf waggaa 20 eeguufi

Haguuggii Tamsaasa Kallattii

1. 16 Sadaasa 2025Bakka bu’aan Paartii Dimokiraatotaa ganna 71 Biraad Shermaan dhuguma xiyyaara keessatti poornoogiraafii ilaalaa turanii?

   

   Madda suuraa, Getty Images

   Bakka bu’aan Paartii Dimokiraatotaa ganna 71 tahan Biraad Sheermaan xiyyaara keessaa taa’uun poornoogiraafii ilaalaa ture jedhamuun suuraan qoodamaa ture.

   Suuraan X irratti maxxabfame namoota miliyoona 12 oliin ilaalameera.

   Suuraan qullaa dubartii agarsiisuu fi xiyyaara keessa taa’ee yeroo inni ilaalu agarsiisu baay’inaan qoodamee ture.

   Sheermaan yeroo xiyyaara irra ture fuula Tiwiiteriikoo baneen daddabarsa ture.

   ‘’Akka carraa tahe Elon Maask, Algoorizimiin Tiwiterii [X] akka hin taane waan godheef qabiyyee namoonni hin gaafanne ykn qabiyyicha argachuuf ‘subscribe’ hin goone namatti fida,’’ jechuu isaanii Fox News dubbii himaa isaa wabeeffachuun gabaase.

   Sheermaan Kaalifoorniyaa bakka bu’uun miseensa Kongireensii buyyattiiti.

2. 16 Sadaasa 2025Iraan ulaa murteessaa ittiin boba'aan darbu ulaa Hormuzitti doonii fe'umsa to’atte

   

   Madda suuraa, Reuters

   Koreen Eegdota Warraaqsaa Islaamaa Iraan (IRGC) Jimaata ganama ulaa Hormuzitti doonii boba'aa to’achuu mirkaneesse.

   Dooniin alaabaa Odoola Maarshaal qabdu kun Yunaayitid Arab Emireet (UAE) irraa gara Singaapoor deemaa ture.

   Doonichi ''fe'umsa hayyama hin qabne baachuudhaan seera cabse'' jedha IRGC'n. Ta’us seera kami akka cabse bal'inaan hin himne.

   Doonii kun boba’aa fe’atee akka ture gabaasni ni argisiisa.

   Iraan yeroo garaagara taankerootaafi dooniiwwan fe’umsaa Galoo Galaana Pershiyaa keessa fi naannoo ishee imalan to’achaa turte.

   Ulaan kun daandii doonii addunyaa ijoo kan boba’aa fi gaazii uumamaa

   ittiin darbu.

   Iraan waggootaaf qoqqobbii warra lixaa fi tarkaanfiiwwan biroo isaan irra ka’aniif haaloo ba’uuf Ulaa Hormuz (Strait of Homuz) cufuuf doorsisaa turte.

   Wal haleellaan misaa'elaa Israa'eliifi Iraan jidduutti gaggeeffame hordofee Iraan ni cufti jedhamee yaaddoon ture.

   Jikinni boba'aa addunyaa kanaa harka shan keessaa tokko kan ta'u karaa ulaa qarqara galaanaa dhiphoo bal'ina kilomeetira 40 qabuu kana keessaan darba.

   Iraan ulaa kana cufuuf yaaduu dandeessi jedhan ajajaan humna galaanaa biyyatti.

3. 16 Sadaasa 2025UK'n karoora koolugaltoonni eeyyama jireenyaa dhaabbii argachuuf waggaa 20 eegu qabu jette hojiirra oolchuuf

   

   Madda suuraa, PA Media

   Namoonni UKtti kooluugaltummaa gaafatan eeyyama jireenyaa dhaabbataan argachuuf waggoota 20 akka eegan seerri godhu hojiirra ooluufi jedhan Ministirri Dhimma Biyya Keessaa Shabana Mahaammud.

   Mootummaan tarkaanfii jabaa kana koolugaltoota irratti fudhachuu kan barbaadeef lakkoofsa namoota bidiruu xixiqqaan UK kaluun kooligaltummaa gaafatan xiqqeessuufi.

   Akka karoora ammaatti namoonni UKtti koolugaltummaa gaafatan yeroodhaaf qofa akka jiraatan eeyyamama.

   Haalli iyyata isaaniis yeroodhaa gara yerootti ilaalamaa deema. Biyyi irraa baqatan nagaa yoo tahe gara dhufanitti akka deebi’an taasifama.

   Amma namni koolugaltummaa gaafate waggaa shaniif erga tureen booda eeyyama jireenyaa dhaabbii argachuuf iyyachuu danda’a. Karoorri amma jiru garuu waggaa 20 booda akka gaafatan kan taasisudha.

4. 16 Sadaasa 2025Teerii Heenerii barana Arsenaal waancaa ni injifata jedhe

   

   Madda suuraa, Getty Images

   Taphataa cimaa seenaa Arsenaal keessatti yoomiyyuu yaadatamu waggaa 22 booda barri kun bara Arsenaal waancaa itti mo’atudha jedhe.

   Arsenaal yaada Heenerii kana fuula Feesbuukii isaa irratti maxxanseera.

   Yeroo isaan waancaa injifatan achitti argameen waliin gammada jedheera Heeneriin.

   Arteettaan garee cimaa waancaa injifachuu danda’uu fi sadarkaa Awurooppaatti waancaa Shaampiyoonsi Liigii mo’achuu danda’u ijaareera.

   Taphoota 11 booda Maanchister Siitiidhaan qabxii afuriin caaluun tokkoffaa irra kan jiru Arsenaal humni ittisa isaa baay’ee cimeera.

   Sarara gidduurra taphattoota sadarkaa addunyaatti jajjaboo tahan akka Deklaan Raayis, Zuubimandii fi Odeegaardiin kan ijaarame Arsenaal filannoo biroos ni qaba.

   Sarara duraa irra miidhamni jiraatus Giyookeres cinatti filannoo gahaa qaba. maanchister Siitiin jabaachaa jira. Arsenaal tibbana taphoota jajjaboo qabu qabxii akkamii akka argatus ni ilaalla.

5. 16 Sadaasa 2025Meksikootti poolisiin 100 ta’an hiriira mormii keessatti miidhamaniiru

   

   Madda suuraa, EPA

   Meksikootti namoonni kumaatamaan lakkaa'aman mootummaan Pirezidaantii Kilaawudiyaa Sheenbaam mormuun hiriira bahan.

   Walitti bu’iinsa hiriira kana keessatti uumameen poolisii 100 dabalatee namoonni 120 miidhamaniiru.

   Akka Sheenbaam jettutti hiriirri magaalota biroo keessattis gaggeeffame kana namoota siyaasaa mootummaa ishee mormaniitti maallaqaan deeggaran.

   Hiriirri dargaggoota Gen Z qophaa’e kun, deeggarsa lammiilee biyyattii argateera, keessattuu kanneen ajjeechaa namoota aangoo irra jiranii morman.

   Torbe darbe kantiibaan magaalaa Urupaan Kaarlos Manzoo kan kaarteelii qoricha sammuu namaa hadoochu daldalan irratti tarkaanfiin cimaan akka fudhatamu waamicha dhiyeessuun beekamu ajjeefame ture.

6. 16 Sadaasa 2025Taphataan Arsenaal Gabri'el Magalesh miidhame

   

   Madda suuraa, Getty Images

   Leenjisaan Biraazil Kaarloo Anchelootii Gabr'eel tapha michummaa Senegaal waliin godhan irratti miidhamuu himan.

   Haalli miidhama isaa Dilbata kana kan qoratamu tahuu himaniiru.

   Gara sa'a tokkoo taphachuun dhukkubbiin itti dhagahamee yaala argachuun dirree keessaa kan bahe Gabri'eel miidhamni isaa hagam sodaachisaa akka tahe hin baramne.

   Arsenaal bara kana taphoota Piriimer Liigii 11 irratti galchii shan qofa akka irratti lakkaa'amu gochuun shoorri ittisaa inni bahate guddaadha.

   Arsenaal Darbii landaniin Tootenhaamiin kan morkatan yoo tahu, Shaampiyoonsi Liigiidhaan ammoo Baayern Muunik morkatu.

   Oduu biraan Rikaardoo Kalafiyooriin miidhamee garee biyyaalessaa Xaaliyaanii keessaa baheera.

   Arsenaal bakka taphattoota kanneenii filannoo taphattootaa gahaa akka Hiinkaappee, Mooskuweeraa, Been Waayit fa'aa qaba.

7. 16 Sadaasa 2025Lammiileen Keeniyaa 200 ta’an waraana Yukireen keessatti Raashiyaadhaaf lolaa jiru

   

   Madda suuraa, Anadolu Agency via Getty Images

   Lammiileen Keeniyaa 200 ta’an waraana Yukireen keessatti Raashiyaadhaaf lolaa jiran jedha mootummaan biyyattii.

   Kana qofa osoo hin taanee namoonni dabalataan Raashiyaan qacaramanii waldhabdee kana keessatti bobbaafamuu akka danda’an aanga’oonni himan.

   Miseensonni humnoota nageenyaa Keeniyaa duraanii namoota kana keessa akka jiran Ministirri Dhimma Alaa Keeniyaa Musaaliya Mudaavadii himaniiru.

   Kanneen baraaraman leenjii sirrii ykn meeshaa ittisaa malee diroonii walitti qabuu fi keemikaala hojjechuuf akka dirqaman dubbataniiru jedhan ministirri kun.

   Torbe darbe Prezidaantiin Keeniyaa Wiliyaam Ruutoo mootummaan Yukireen lammiilee Keeniyaa yeroo ammaa naannoo waldhabdee keessatti qabaman akka gadhiifaman gaafataniiru.

   Afrikaa irraa namoonni gara 1,400 ta’an humnoota Raashiyaa waliin Yukireen keessatti lolaa akka jiran, mootummaan Yukireen torban darbe ibseera.

8. 16 Sadaasa 2025Himannaa Itoophiyaan tokkummaa daangaa Eertiraan 'cabsite' fi ejjennoo Asab irratti ibsiteef Eertiraan deebii kennite

   Itoophiyaan yaada ulaa galaanaa argachuu jedhuun Eertiraa irratti ''waraana labsaa jirti'' jechuun Ministirri Odeeffannoo biyyattii Yemaanee G/Masqal ibsan.

   Paartiin Badhaadhinaa waraana Eertiraa irratti labsuu barbaaduuf sababa gahaa qabaachuu isaa ibsaa jira jechuun Ministirri Odeeffannoo Eertiraa Yemaanee G/Masqal fuula X irratti maxxanse.

   ''Osoo adda hin kutiin ''humnaan ulaa galaanaa walaba tahe argachuu fi 'humna waraanaa Galaana Diimaa irratti ijaaruu qabna' jedhanii dubbii summaa'aa labsuun walabummaa Eertiraaf arrabsoodha'' jechuun Yemaanee G/Masqal fuula X irratti maxxansan.

   Odeessa guutuuf: Himannaa Itoophiyaan tokkummaa daangaa Eertiraan 'cabsite' fi ejjennoo Asab irratti ibsiteef Eertiraan deebii kennite

9. 16 Sadaasa 2025Kooriyaan Kibbaa doonii waraanaa nuukileeraa galaana jala deemuun 'haleelu' akka ijaartu US deeggaruufi

   Mootummaan Kooriyaa Kibbaa doonii waraanaa galaana jala deemuun ''haleeluuf' gargaaruufi humna nuukileraan socho'u hojjechuuf mootummaa Ameerikaa wlaiin waliigaltee xumuruu ibsite.

   Ameerikaan ''doonii galaana jala deemuun haleellaaf oolu'' [Submarines] jedhamu Kooriyaa Kibbaa gargaartee hojjechuu fi boba'aa barbaachisuun akka dhiyeesituuf ibsite.

   Kun hariiroo guddaa biyyoonni lamaan irra gahan kana agarsiisu tahus dachee Kooriyaa lamaanii irratti garuu muddama jabaa uumuu hin hafu jedhamee sodaatameera.

   Kooriyaa Kaabaa fi Kooriyaa Kibbaa gidduutti waraanni ka'aa?

   Asiin dubbisaa: Kooriyaan Kibbaa doonii waraanaa nuukileeraa galaana jala deemuun 'haleelu' akka ijaartu US deeggaruufi