Èèmọ̀ wọ̀lú! Àwọn jàndùkú agbébọn pa kọmíṣọ́nnà àti ọlọ́pàá, wọ́n dáná sun àgọ́ ọlọ́pàá

Ọrọ eto abo to mẹhẹ ni orilẹede Naijiria ti wa di ojukeji bayii.

Awọn agbebọn lo maa tun ti ṣekupa kọmiṣọnna to n ri si owo awọn oṣiṣẹ fẹyinti nipinlẹ Kogi, Adebayo Solomon.

Lọjọ Abamẹta lawọn kọlọnbiti ẹda ọhun yinbọn fun Solomon ninu ọkọ rẹ nigba to n rinrin ajo lati ilu Ilorin si Kabba.

Wọn ti gbe oku kọmiṣọnna naa lọ si ile igbokusi ijọ ECWA to wa niluu Egbe.

Bakan naa ni a gbọ pe wọn tun ti ji alaga ijọba ilẹ ila oorun Yagba nipinlẹ naa, Pius Kolawole gbe lọ.

Ọga ọlọpaa ipinlẹ Kogi, Ayuba Ede ti sọ pe ileeṣẹ ọlọpaa ti bẹrẹ iwadii lori iṣẹlẹ ọhun.

Wọn ko tii ri alaga kansu ila ooru Yagba ti wọn jigbe lọ di akoko ti a kọ iroyin yii.

Awọn agbebọn pa ọlọpaa lẹyin ikọlu si agọ ọlọpaa ni Ebonyi

Ẹwẹ, iroyin to tẹ wa lọwọ lati ipinlẹ Ebonyi sọ pe awọn janduku agbebọn kọlu agọ ọlọpaa Abaomege to wa ni ijọba ibilẹ Onicha nipinlẹ naa.

Gẹgẹ bi iroyin ti a gbọ ṣe sọ, alẹ ọjọ Abamẹta lawọn kọlọnbiti ẹda naa ṣe ikọlu si agọ ọlọpaa ọhun nibi ti wọn dabọn bolẹ.

Koda, ọlọpaa kan ba iṣẹlẹ naa lọ ti omiran si farapa gẹgẹ bi ohun ti a gbọ.

Kọmiṣọnaa fun eto abo, Stanley Emegha lo fidi iṣẹlẹ yii mulẹ fun BBC.