Imo ESN-Soldiers Crisis: Gómìnà Uzodinma kéde kónílé ó gbélé ní Orlu

Awọn ọmọ ikọ alaabo Eastern Security Network, ESN atawọn ọmọogun Naijiria gbe ina woju ara wọn nilu Orlu ni ipinlẹ Imo, nigba ti eruku rẹ yoo si fi rolẹ, ẹmi eeyan ti bọ, ọpọlọpọ lo si tun fara ṣese.

Eyi lo mu ki gomina ipinlẹ naa, Hope Uzodinma gbe aṣẹ konile o gbele kalẹ laarin agogo mẹfa owurọ si mẹfa irọlẹ, kaakiri gbogbo ijọba ibilẹ to wa lagbegbe Orlu.

Awọn agbegbe ti ọrọ naa kan ni Orlu, Orsu, Oru East, Oru West, Ideato North, Ideato South, Njaba, Isu, Nwangele ati Nkwerre.

Eyi n waye lẹyin ti fidio wahala to ṣẹlẹ laarin awọn ọmọ ẹgbẹ agbebọn ESN naa atawọn agbofinro lu igboro.

Gomina Uzodinma ṣalaye ninu atẹjade kan pe, alaafia ti pada jọba lagbegbe Orlu bayii lẹyin ti wọn ko awọn agbofinro lọ sibẹ.

Oniruru iroyin lo n tẹ ileeṣẹ BBC lọwọ lori ohun gan to fa wahala naa; bi awọn kan ṣe n sọ pe laarin awọn ọmọ ẹgbẹ IPOB atawọn ologun ni laasigbo naa ti waye.

Amọ awọn eeyan miran n sọ pe awọn ole lo n ṣọṣẹ.

Gomina ipinlẹ naa ti ke sawọn agbofinro lati ṣawari awọn to wa nidi rukerudo naa.

Bi wahala naa ṣe bẹrẹ:

Awọn ileeṣẹ iroyin abẹle kan ṣalaye pe, lọjọ Ẹti ni itaporogan ibọn yinyin ti kọkọ bẹrẹ laarin awọn ologun atawọn ọmọ ikọ Eastern Security Network [ESN] ti Nnamdi Kanu gbe kalẹ laipẹ yii.

Iroyin tun sọ pe ilu Okporo lagbegbe Orlu ni wahala naa ti bẹ silẹ, ko si din ni ile marun un, to fi mọ awọn ṣọ̀ọṣi

Blessed Holy Trinity Sabbath Mission, ni ijọba ibilẹ Orlu, ti wọn dana sun.

Bakan naa, ni iro ibon tun dun lakọlakọ lagbegbe Bank Road, Orlu lọjọ Aje,

ti ipaya si n jọba lagbegbe naa bayii.