Исломий давлат яна бир ғарбликни қатл этди

Исломий Давлат жангарилари ўзлари гаровга олган яна бир тутқун - бу сафар британиялик Девид Ҳейнснинг бошидан жудо этилгани акс этган видеони тарқатишлари ортидан Британия Бош вазири Девид Камерон мазкур ҳодисани "зулм амали" дея қоралаган.

44 ёшли кўмак фаоли Ҳейнс 2013 йилда Сурияда гаровга олинган. Уни ушлаб турган ИД жангарилари аллақачон икки америкаликни шу йўлда ўлдирганлар.

Охирги видеода улар ўз қўлларида гаровда қолаётган иккинчи британияликни ҳам ўлдириш билан таҳдид қилишди.

Бош вазир қотилларни топиш учун барча имкониятларни ишга солишини айтди.

Британиянинг Ист Йоркшир графлигида туғилган жаноб Ҳейнс хорватиялик аёли ва 4 ёшли қизи билан Хорватияда яшаб келаётганди.

Жаноб Камерон мазкур ҳодисага қандай чора кўришни муҳокама қилиш учун фавқулодда Кобра мажлисини ўтказиши кутилади.

Ташқи ишлар вазирлиги шанба куни тарқатилган видеонинг ҳаққонийлигини аниқлашга уринаяпти.

Видеода жаноб Камерон акс этган клип ўйналади, сўнгра норинж устбош кийган ва тиз чўкиб ўтирган эркак киши пайдо бўлади. Унинг тепасида эса пичоқ ушлаган киши турибди.

Ҳейнс видеода шундай дейди: "Жаноб Камерон, мен сизни ўз ўлимим учун жавобгар деб биламан".

Сўнгра британ акцентига эга жангари: "Камерон, мана бу британ фуқароси Исломий Давлатга қарши Пешмергани (курд қўшинларини) қуроллаш ваъданг туфайли ўлаяпти", - дейди.

Исломий Давлат ҳозирда Ироқ ва Суриянинг кўп ҳудудларини эгаллаб олган.

АҚШ Марказий жосуслик агентлигига кўра, ИДнинг жангарилари сони 30 мингдан ошиқдир.