ОИ Украинани янги сулҳга ундаш ҳаракатида

Франция ва Олмония раҳбарлари Украина президентини мамлакат шарқидаги бўлгинчилар билан янги сулҳга рози бўлишга ундайдилар.

Президент Франсуа Олланд чоршанба куни Олмония канцлери Ангела Меркел ва Украина раҳбари Пётр Порошенко билан телефон суҳбати режалангани ҳақида эълон қилганди.

Украина бўлгинчи исёнкорлар қуролсизланмагунча улар билан мулоқот қилмаслигини айтади.

Донецкдаги бўлгинчилар вакили ҳеч қандай янги сулҳ масаласи кўриб чиқилмаслигини билдирган. Донецкда ҳозир исёнкорлар қайта тўпланишаётгани хабар қилинади.

Ҳукумат кучлари ўтган бир неча кун ичида қатор шаҳарларни исёнкорлар қўлидан тортиб олган ва Донецк ва Луганск минтақаларида “аксил-террор” амалиётларини қайта бошлаган.

Бир миллиондан ортиқ аҳолиси бўлган Донецкнинг ўзида исёнкорлар ҳукуматга қарши кураш давом этишини айтишган.

Улар ҳукуматни ноқонуний ҳисоблашади.

Норозиликлар бошланган апрел ойидан бери оддий одамлар ва жангчилар дохил мингдан ортиқ инсон нобуд бўлган.

Франция ва Олмония раҳбарлари жума куни ҳам телефон орқали майда президент этиб сайланган жаноб Порошенко билан қарама-қаршиликлар масаласини муҳокама қилишганди.

Ўшандан бери Порошенко жаноблари ва унинг ҳукумати исёнкорлар боарсидаги хитобларини қатъийлаштирган. Сешанба куни Словянскдаги қўшинларини бориб кўрган Порошенко жаноблари ҳукумат “қуролсизланишга тайёр” исёнкорлар билан мулоқот бошлашини урғулаган.

Словянск ҳукумат кучлари ва исёнкорлар ўртасидаги жангларга саҳна бўлган.

Қамалда қолган исёнкорлар ниҳоят шаҳарни ташлаб чиқишган. “Словянск аввал зўравонлик ва террор рамзи эди, бугун Словянск озод Донбасс рамзи”, деб айтган Президент Порошенко.

Инсоний талофатлар

Украиналиклар ва исёнкорлар ҳисоб-китобларига кўра, апрел ойидан бери Украина шарқида оддий аҳоли вакилларидан камида 250 нафари нобуд бўлган.

Украина Мудофаа вазирлигининг билдиришича, қарийб 200 аскар ҳалок бўлган ва 619 нафари тан жароҳати олган.

Исёнкорлар тарафга кўра, улар сафидан камида 800 киши ўлдирилган.

БМТнинг ҳисоб-китобларида қайд этилишича, жорий йил аксари шарқий ҳудудлардан бўлган камида 110 минг инсон Украинани ташлаб Россияга ўтган.

Яна БМТнинг билдиришича, 54,400га яқин одам Укриана ичкарисида бошпанасиз қолган.

Би-би-си Ўзбек хизмати билан Whatsapp орқали боғланишни истасангиз, телефонимиз: +44 78-58-86-00-02