“Титаник” тақдирини такрорлаган “Титан”: Мутахассислар нимадан огоҳлантиришганди? - Видео Янгиликлар, Дунё

"Титаник" кемаси қолдиқларини томоша қилиш учун океан тубига тушган "Титан" сув ости аппаратидаги 5 кишининг барчаси ҳалок бўлгани айтилди. Мутахассислар ушбу саёҳатни ташкил қилган OceanGate бир неча маротаба огоҳлантирилганини айтмоқда. Голливуд режиссёри Жеймс Кэмерон "Титаник" ва "Титан"нинг тақдири шу жиҳатдан бир бирига ўхшаш эканлигини айтмоқда.

Машҳур "Титаник" филмини суратга олган ва океан тубига кўп маротаба тушган Ҳолливуд режиссёри Жеймс Кэмероннинг Би-би-сига айтишича, "Титан" батискафи йўқолиши билан хаёлига энг ёмон нарса келган.

Режиссёрнинг айтишича, сув остига тушишни ташкиллаштирган OceanGate компаниясини чўккан "Титаник" кемасига саёҳат уюштириш хавфлари борасида бир неча маротаба огоҳлантиришган.

Ичида 5 киши бўлган "Титан" батискафи ўтган якшанба сафарни бошлаганидан 1 соату 45 дақиқа ўтганидан кейин алоқага чиқишни тўхтатган.

Излаш ишлари "Титаник" ҳалокатга учраган жойдан унча узоқ бўлмаган ерда сув ости аппарати қолдиқларини топишгунча, 22 июнгача давом этди.

Экспертларга кўра, аппарат сув босимига дош беролмасдан ёрилган ва экипажнинг барча аъзолари ҳалок бўлган.

"Титаник" қолдиқларини кўриш учун 33 марта сув остига тушган Кэмероннинг айтишича, вазият нима билан тугаши унга энг бошидан маълум бўлган.

"Нима бўлганини эрталаб сезгандим. Сув ости қайиғининг электронникаси ишдан чиққан бўлса, унинг алоқа тизими билан бирга бир вақтда кузатув жиҳози ҳам ишдан чиққан бўлса - сув ости қайиғи йўқ бўлган", дейди Кэмерон.

Режиссер ўзининг денгизчи танишларига қўнғироқ қилган ва бир соатдан сўнг нима бўлгани ҳақида тасаввурга эга бўлган.

"Улар сув остига тушган ва мақсади 3800 метр чуқурликка етиш бўлган. 3500 метрга етганида улар билан алоқа узилган ва кузатув тизими ишдан чиққан. Мен икки тизимнинг ишдан чиқиши қандайдир йирик фалокат натижасида бўлган бўлса керак дедим".

Унинг айтишича,хаёлига келган илк фараз капсулани сувнинг ортиқча босими ёриб ташлаган.

Айни дамда бу "Титан"нинг алокатига олиб келган ягона фараз бўлиб турибди. Экспертлар ушбу ҳолатни тасвирлаш учун имплозия атамасини қўллайди.

Ушбу маълумот АҚШ қирғоқ қўриқчилари гуруҳига берилган ва унинг ёрдамида излаш радиусини қисқартиришган.

Кэмероннинг Би-би-сига айтишича, ўтган ҳафта унга "тақиллаган овозлар, кислород ва бошқа нарсалар ҳақидаги туганмас гаплар, чўзилган қўрқинчли спектаклни эслатган".

"Батискаф у ҳақида энг сўнгги маълумотлар келган чуқурлик ва жойда турганини сезгандим. Уни айнан ўша ердан топишди", дейди у.

"OceanGate огоҳлантиришларни рад қилган"

Кэмероннинг айтишича, "Титаник" фожеасини кўриш учун тушган "Титан"нинг ҳалокатида "даҳшатли ҳазил" бор.

Режиссер бундан олдинги берган интервюларида "Титаник"нинг капитанини бир неча маротаба айсберглар хавфидан огоҳлантиришган, бироқ у уларни эътиборга олмаганини айтганди.

Режиссёрнинг таъкидлашича, тарих такрорланди. Чунки "Титан"нинг эгаси бўлган OceanGateни бир жамоавий баёнотда "ҳалокат сари кетмоқда" деб огоҳлантиришган.

OceanGateнинг сув остига ташкил қиладиган саёҳатлари қанчалик хавфсиз ташкил қилингани бундан олдин ҳам бир неча маротаба савол остига олинган.

Жеймс Кэмероннинг айтишича, охирги вақтларда компаниядан бир неча ходим ишдан бўшаган.

Бошқа бир ишга боғлиқ суд ҳужжатларидан OceanGate собиқ ходими батискафдаги муаммолар юзасидан 2018 йилдаёқ огоҳлантиргани маълум бўлган.

Сув ости қайиғи қурбонлари 58 ёшли Ҳамиш Ҳардинг, 48 яшар асли покистонлик Шаҳзода Довуд ва унинг 19 яшар ўғли Сулаймон Довуд, 77 ёшли Пол-Ҳенри Наргелот ва 61 яшар Стоктон Рашлар бўлган.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002