Янгиликлар: Россияни ким портлатди, НАТО Украинани олмоқчими? Rossiya Ukraina NATO Yangiliklar

Воқеаларнинг ривожи қизиқ...

Алоқадор мавзулар:

Кутилмаган портлаш

Россиянинг қирувчи учоғи хато қилди.

Билмасдан Россиянинг ўзини бомбалади.

Шов-шувли воқеа кеча, пайшанба куни кечга яқин юз берди.

Россия қирувчи учоғи Белгородни ҳужумга тутди.

Бомбалаш натижасида турар-жой бинолари вайрон бўлганига оид сурат ва видеолар чиқмоқда.

Бир суратда уйнинг томига чиқиб қолган машина акс этади.

Икки аёлнинг яралангани ҳам айтилмоқда.

Белгород 370000 аҳолили шаҳар. Украина чегарасидан 40 километр узоқликда жойлашган.

Украинанинг иккинчи йирик шаҳри бўлган Харьковнинг шундоққина биқинида.

Шу боис ҳам, Белгород ишғол билан кечаётган ўтган бир йилнинг ичида қўрқув ичида яшаб келади.

Россиянинг қирувчи учоқлари Украинага худди шу шаҳар устидан ҳам учади.

Масъуллар ҳозир юз берган ҳодиса сабабини ўрганишмоқда.

НАТО нима қилмоқчи?

Украинанинг келажаги НАТОда.

Бу ҳақда НАТО Бош котиби ўзининг Киевга илк ташрифи чоғида баён қилди.

"Украинанинг муносиб ўрни - Евро-Атлантика оиласида. НАТОда. Вақти келиб, бизнинг кўмагимиз билан бу иш амалга ошади", - дея баён қилган Йенс Столтенберг Украина президенти билан бирга пойтахт Киевда берган қўшма матбуот анжумани чоғида.

НАТО Бош котибининг маълум қилишича, Украинанинг иттифоққа аъзолик йўли июль ойида бўлиб ўтажак саммитлари чоғида ҳам муҳокама қилинади.

Бу олиймақом йиғинга Украина президенти ҳам таклиф қилинган.

Зеленский эса, ўзининг нутқида Украинани тезроқ НАТОга олишга чақирди.

"Ҳозир НАТОга аъзо давлатлар ва Украина аҳолисининг кўпчилиги мамлакатимизнинг иттифоққа киришини қўллаб-қувватлайди. Шундай экан, бу борада тегишли қарор қабул қилишнинг вақти келди", - деб айтган Украина президенти.

Унинг пайшанба тунги видеомурожаатида баён қилишича, агар Вильнюсдаги саммитда Украинанинг аъзолиги борасида сиёсий таклиф янграмаса, иттифоқ етакчиларини на-да аксарият украиналиклар, на-да европаликлар ва на-да бутун НАТО ҳудуди аҳолиси тушунишади.

19-20 апрель кунлари Киевда бўлиб ўтган Халқаро шаҳарлар ва минтақалар саммитида Йенс Столтенберг Украинанинг кучли дўстлари борлигини айтаркан, уларнинг сирасида НАТОни ҳам тилга олган.

Украина президентининг матбуот хизмати унинг, "Агар сизга бирор нарса лозим бўлса, биз ёнингиздаман", деган сўзларини ҳам келтириб ўтган.

"Энг муҳими - Россиянинг Украина билан бошқа ҳеч қачон уруша олмаслигини таъминлашга эришиш. НАТО ҳозир Украинани қўллаб-қувватлаш бўйича узоқ йиллик ташаббус устида ишламоқда. Бу бизга Совет доктринаси давридан НАТО андазалари ва сиёсатига ўтиш, Украинанинг НАТОда муносиб ўринга эга бўлишига ёрдам беради. Украинанинг келажаги НАТОда", - дея баён қилган Йенс Столтенберг.

Ким нима дейди?

Германия Мудофаа вазири эса, Украинанинг тез орада НАТОга қўшилиши ғоясини рад этиб чиққан.

Борис Писториус бундай қарорлар фақатгина бирдамлик ҳисси билан қабул қилинмаслигини билдирган.

У бу ҳақда ZDF телеканалига берган интервьюси чоғида тўхталиб ўтган, суҳбат кеча, пайшанба куни намойиш қилинган.

Германия Мудофаа вазирининг баён қилишича, Украинанинг НАТОга аъзолиги борасидаги қарор фақат "совуқ ақл ва қайноқ юрак" билан берилиши керак.

Унинг сўзларига кўра, Киевга бу масала бўйича қарор қабул қилиниши билан боғлиқ вазият маълум.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek