Россия, мигрантлар: Ҳомиладор Ойгулнинг оғзидан ким кислота қуйди?

Хоразмлик 30 яшар Ойгул Тожибоева 1 ойдан буён Москвадаги шифохоналарнинг биридаги "Куйиш маркази"да даволанмоқда.

У ўз эри юз бўйнини пичоқ билан тилиб, оғзидан кислота қуйганини айтмоқда.

Шифокорлар ташхисига кўра, аёл танасининг бир неча жойларида куйиш оқибатидаги жароҳатлар бор.

У қайнонасининг қистови билан Россияга ишга келганини айтади.

"Кредитларимиз бор, тўлашимиз керак. Эринг пул юбормаяпти. Ўзинг бориб ишламасанг бўлмайди, дедилар".

Ойгул ярим йилча Москвага келганини, аллақачон у ерда ишлаётгшан эри уни бошида яхши кутиб олганини билдиради.

Видеолавҳамизни кўриш учун "Қабул қилинг ва давом этинг" ёзувини босинг.

Алоқадор мавзулар:

Ўзбек аёллари нега фарзандлари ва ўзларини ўлдиряпти?

Мени исталган вақтда ўлдиришларидан қўрқиб яшайман

Ўзбекистон: Аёл ўғил туғмагани учун ўз жонига қасд қилдими?

Ўзбекистон: Аёллар мавзулари трендда, зўравонлик ва мажбурий меҳнат давом этаяптими? Янгиликлар

Ойгулнинг ҳикояси:

"Бу Россияга иккинчи келишим эди. 2022 йилда ҳам келиб ишлаб кетганман. Кейин уйда 4 ой юриб, яна қайтиб келгандим. Хўжайиним келганига 4 йил бўлганди, бу вақтда уйга ҳам ҳеч бормади, пул ҳам жуда кам жўнатди. Ойига 100-200 доллар юбориб қўярди. Уйда эса банкдан олган қарзларимиз бор эди. Озиқ-овқат магазини очгандик, ёпдик. Шунга мен яна келишга мажбур бўлдим.

Келганимдан кейин Тропарева метросига яқин жойда ижарада яшадик.

Мен патент, хужжатларни қилдим, ишга чиқдим. Кунлик ишда - мева тахлашда ишлаётгандим, кунига 1800 рубл тўлашарди. Эрим эса электрик бўлиб ишларди. Биримизни ойлигимизни хужжатлар, уй ижараси, бу ердаги ҳаражатларимизга, иккинчимизнинг ойлигимизни уйга юбораётгандик.

Эрим билан 11 йиллик турмушимиз, 2 нафар болаларимиз бор. Ҳозир учинчисига 4 ойлик ҳомиладорман. Орамизда майда жанжаллар бўлиб турган, аммо қўл кўтармаганди.

Охирги пайтлар тинмай ичарди.

Квартирамизнинг ижараси қиммат эди, ойига 26 минг рублдан тўлардик. Пул тежалиши учун арзон уй излаб, 18 минг рублга бир хонани ижарага оладиган бўлдик. Нарсаларимизни йиғиб, кўчишга тайёрланиб бораётгандим.

Ўша куни уйга у-бу нарсалар юборгандик, кейин ош қилиб ҳар кунгидек тинч ухлашга ётдик. Бу кун ичмаган эди.

Эрталаб 4 ларда уйғониб ҳожатга чиқдим. Келсам, эрим уйғоқ эди. Қўлларимни қисиб юқорига қайирди. Нима қилаяпсиз, дедим.

Елимқоғоз қирқадиган пичоқ, яна нималарнидир ёстиғимнинг остига бекитиб, олдиндан тайёрлаб қўйган экан. Шартта олди-да, юз-бўйнимни пичоқ билан кесиб ташлай бошлади. Ҳаммаёқ қон бўлиб кетди. Оғриқдан додладим. Оғзимдан ўткир бир суюқлик қуйди. Ҳиди йўқ эди. Таъми роса аччиқ эди, оғзимда борган жойини ёқиб юборди. Эрим уни қуяётганида бошимни олиб қочганим учун елкаларим, қўлларимга тўкилиб куйиб ачиша бошлади.

Қандай қочиб чиққанимни, пастга тушганимни билмайман. Ортимдан тушиб устимдан совуқ сув қуйди. Бақирдим, оғзимга сочиқ чиқди. Охири, ҳушимни йўқотдим".

Жиноий иш очилмаган

Ойгулнинг айтишича, у қонга беланиб ётганида эри танишларига қўнғироқ қилиб, ўлиб қолмасин, қаранглар, деган. Шундан сўнг аёлни уйда ташлаб чиқиб кетган.

Оиланинг танишлари "Тез ёрдам" чақиришган ва аёл касалхонага олиб кетилган. Полицияга ҳам шифохонада хабар берилган.

"Бир полициячи касалхонага келиб, нима бўлганини сўраб ёзиб олди. Мен русча билмайман, дугонам таржима қилиб турди. Менинг номимдан шикоят ёзди, аммо эрим қочиб кетди" - дейди у.

Ҳуқуқшунослар Миршарофнинг Ўзбекистонга қочгани ва у билан алоқа узилганини маълум қилишди.

Ойгулнинг бошига тушган ҳолат бўйича эса ҳамон жиноий иш очилмаган.

Ҳуқуқшунослар бу ишда Ўзбекистоннинг Москвадаги элчихонасининг ёрдами керак бўлаётгани, аммо мурожаат қилинишига қарамай, консуллик керакли ёрдамни кўрсатмаётганини билдиришди.

"Консуллик ёзма равишда хат юборса, бу ҳодиса бўйича жиноят ишининг очилиши балки тезлашарди" - дейди "Тонг жаҳони" халқаро нодавлат нотижорат ташкилоти мутахассиси Жалолиддин Рустамов.

Россияда мигрантлар ҳуқуқини ҳимоя қилувчи юристлар Ойгул воқеаси бўйича Ўзбекистоннинг Москвадаги элчихонасига мурожаат қилишгач, улар бу ишни Ташқи меҳнат миграцияси агентлигига топширганини айтишди.

Биз бу борада бир неча саволлар билан Ўзбекистоннинг Москвадаги элчихонаси ва консуллигига мурожаат қилдик, аммо ҳозиргача бирон жавоб ололганимиз йўқ.

Ойгул Тожибоева эса бу воқеалардан кейин болаларини ҳам кўра олмаётганини билдирди.

"Уйга телефон қилсам, қайнонам менга болаларимни кўрсатмаяпти. Илтимос, менга ёрдам беринглар", - дейди ўзбекистонлик муҳожир аёл.

Telegram каналимиз: https://t.me/bbcuzbek

BBC.COM/UZBEK билан Telegram орқали +44 7858860002 номери билан боғланинг.