Ўлими Эрон бўйлаб норозиликларга сабаб бўлган қизнинг отаси расмийларни нимада айблади? Дунё, янгиликлар

Ўлими бутун Эрон бўйлаб норозиликларга сабаб бўлган 22 ёшли Маҳса Аминийнинг отаси расмийларни ёлғончиликда айблади.

Амжад Аминий Би-би-си Форс хизматига берган интервьюсида қизи жасади экспертизаси хулосасини кўришга рухсат берилмаганини айтди ва қизининг соғлиғи ўзи яхши бўлмагани ҳақидаги даъвони рад этди.

Унинг сўзларига кўра, гувоҳлар қизининг полиция ҳибсхонасида калтакланганини айтишган. Эрон расмийлари буни рад этмоқда.

Маҳса Аминий ҳижоб кийиш қоидаларини бузгани учун ҳибсга олинган.

Шимоли-ғарбий Сақез шаҳрида яшовчи курд қиз жума куни Теҳрондаги шифохонада уч кун комада ётганидан сўнг вафот этганди.

Ҳибсга олиш

Эрон расмийларига кўра, Маҳса Аминийга ёмон муносабатда бўлинмаган, аммо мамлакат ахлоқ полицияси томонидан Теҳронда ҳибсга олинганидан кейин "тўсатдан юрак хуружи" тутиб вафот этган.

Аммо жаноб Аминийнинг айтишича, қизи ҳибсга олинганида у ерда бўлган 17 ёшли укаси Киарашга опаси калтакланганини айтишган.

"Ўғлим у билан бирга эди. Айрим гувоҳлар ўғлимга опаси микроавтобусда ва милиция бўлимида калтаклаганини айтишган", дейди у.

"Ўғлим олиб кетмасликларини илтимос қилган, лекин уни ҳам калтаклашган, кийимларини йиртиб ташлашган.

Мен улардан хавфсизлик ходимларининг боди камераларида олинган тасвирларни кўрсатишни сўрадим, улар менга ўша вақтда камераларда батареялар ўчиб қолганлигини айтишди."

Эрон расмийларига кўра, Аминий хоним ҳибсга олинган пайтда беадаб кийимда бўлган.

Жаноб Аминий эса қизи доим узун либос кийиб юрганини айтди.

Шифокорлар қаршилиги

Жаноб Аминий, шунингдек, тиббиёт ходимлари қизининг ўлимидан кейин унинг жасадини кўришга бир неча бор тўсқинлик қилганини айтди.

"Мен қизимни кўрмоқчи эдим, лекин улар мени ичкарига киритишмади", дейди у.

Унинг сўзларига кўра, экспертиза хулосасини кўришни сўраганида, шифокор: "Мен нима хоҳласам, шуни ёзаман, бунинг сизга алоқаси йўқ", деб айтган.

Унинг сўзларига кўра, оилага экспертиза ҳақида маълумот берилмаган.

Жаноб Аминий қизининг жасадини дафн қилиш учун ўралганидан кейингина, фақат оёқлари ва юзларини кўра олган.

"Унинг оёқларида кўкаришлар бор эди, - деди у. - Мен шифокорлардан унинг оёқларини текширишни сўрадим."

Жаноб Аминийнинг айтишича, расмийлар жароҳатлар сабабларини текширишга ваъда берган, аммо кейин ҳеч қандай жавоб олмаган.

"Улар менга эътибор бермадилар. Энди улар ёлғон гапиришяпти.»

Теҳрон вилояти суд-тиббиёт экспертизаси бош директори Меҳди Фарузеш аввалроқ берган баёнотида: "Ҳеч қандай бош ва юз жароҳати, кўз атрофида кўкаришлар ёки Маҳса Аминининг бош суягида синиш излари йўқ", деди.

Расмийлар, шунингдек, ички жароҳат белгилари йўқлигини айтишган.

Қизнинг соғлиғи борасидаги иддаолар

Жаноб Аминий, шунингдек, қизининг ўлимига сабаб бўлиши мумкин бўлган соғлиғи билан боғлиқ муаммолар борлиги ҳақидаги иддаоларни ҳам рад қилди.

Теҳрон вилояти суд тиббиёт экспертиза бош директорининг айтишича, Маҳса Аминий саккиз ёшида мияси операция қилинган.

"Улар ёлғон гапиришяпти", дейди отаси.

"Охирги 22 йил давомида у бир неча шамоллашдан бошқа ҳеч қандай шифохонага ётмаган.

"У ҳеч қачон касал бўлмаган, ҳеч қачон операция қилинмаган."

Би-би-си Аминий хонимнинг икки синфдоши билан суҳбатлашди, улар унинг бирор марта касалхонага ётганини эслолмасликларини айтишди.

Жаноб Аминий, шунингдек, қизининг соғлиғига оид яна бир даъвони - у дўконда ишлаётганида қайта-қайта ҳушидан кетгани ҳақидаги гапларни ҳам «ёлғон» деб атади.

Университет амбициялари

Оиласига кўра, Маҳса Аминий келаси ҳафта университетда ўқишни бошлаши керак эди.

Уларнинг Теҳронга сафари курс бошланишидан олдин унинг охирги таътили бўлиши керак эди.

"У микробиологияни ўрганмоқчи эди", дейди отаси.

"У шифокор бўлишни хоҳларди - армон бўлиб қолди.

Онасининг соғлиғи яхшимас, биз ҳаммамиз уни соғинамиз.»

Кеча Маҳса 23 ёшга тўлган бўларди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek