Исроиллик экстрасенс Ури Геллер 75 ёшда ҳам мухлисларини ҳайратда қолдирмоқда

Яффадаги тўлқинли денгизга қараб солинган янги Ури Геллер музейига кираверишда дунёдаги энг катта, узунлиги 16.18 метрли пўлат қошиқ ўрнатилган.

Ичкарида жойлашган аралашда коллекция юзлаб қошиқлар бор, уларнинг аксарияти букилган, бу исроиллик телекинетикнинг (руҳий қувват ёрдамида нарсаларга таъсир қила олувчи) ажойиб маҳоратидан далолат беради.

Аммо бу музей, шунингдек, эллик йиллик поп маданияти билан тўлиб-тошган фавқулодда ҳаёт ва мартаба ҳақида ҳам ҳикоя қилади.

"Камбағалликда ўсганман ва экстрасенс супер юлдуз бўлишни хоҳлардим, шунинг учун мен ўзимни омма диққат марказига олиб чиқдим", дейди Геллер.

"Менда бошқаларда бўлмаган нарса бор эди - бу Исроил такаббурлиги. Бу жасорат. Мен Элтон Жоннинг олдига бориб: "Сиз билан суратга тушсам бўладими? Олдингизга борсам бўладими?" дедим.

Машҳурлар гапира бошлашди: "Мен ҳозиргина Ури Геллер исмли йигитни учратиб қолдим, у кўз олдимда қошиқни назари билан букди". Шундай қилиб, мен муваффақият зинапоясидан кўтарила бошладим."

Шу ойда 75 ёшга тўлган харизматик шоумен мени ҳикояларга бой саёҳатга олиб чиқди.

Бу ерда Оммабоп эсдалик буюмлари билан бир қаторда, ҳар хил қизиқарли нарсалар бор: Леонардо да Винчига тегишли бўлган Салвадор Далидан олинган биллур шар; марҳум Ливия диктатори Муаммар Қаддафийнинг самолёт макети; Жон Леннон даъво қилган ўзга сайёраликлардан келган олтин тухум...

Машҳурлик

Музей деворидаги оқ-қора фотосуратда Геллернинг Тел-Авив яқинида жойлашган камтарона болалик уйи акс этган.

Геллер 1946 йилда Британия Фаластинида туғилган. У беш ёшида бир коса шўрва ичгач, биринчи марта қошиқни қандай буккани ва тез орада мактабда ўзининг ғайритабиий истеъдодини намоён этганини гапириб берди.

"Ўқитувчиларимиз қўрқиб кетишди, - дейди у жилмайиб. - Девордаги соатга қараб, ақлимнинг кучи билан уни ҳаракатга келтира олардим."

Кейинчалик Кипрда бир муддат яшаб, у ерда инглиз тилини ўргангач, Геллер Исроилга қайтиб келди. У ҳарбий хизматни ўтаётиб, десантчи бригадага қўшилган ва 1967 йилги Яқин Шарқ урушида қатнашган.

20 ёшида у аллақачон томоша кўрсатишни бошлаган эди. Унинг ҳаракатлари, телекинез ва телепатия билан боғлиқ бўлиб, қошиқ ва калитларни букиш, соатни тўхтатиш ёки тезроқ ишлатиш ва яширин чизмаларни тасвирлашдан иборат эди.

Тор доирада ўтган тадбирда у Исроилнинг ўша пайтдаги Бош вазири Голда Меирни ҳайратда қолдирди. Геллер ўзининг машҳур бўлишида ундан миннатдорлигини айтади.

Тез орада у халқаро разведка идоралари эътиборини тортди.

"Геллернинг ушбу тажриба давридаги муваффақиятларидан кўринадики, у ўзининг паранормал идрок этиш қобилиятини ишончли ва аниқ намойиш этди", дейилади АҚШ Марказий разведка бошқармасининг ўша вақтдаги ҳисоботида. Геллер бу ҳисоботни фахр билан деворга илиб қўйди.

Ортга қайтиш

Лекин ҳаммани ҳам ишонтириш осон эмас. 1973 йилда, Қўшма Штатларда иш бошлаганидан кўп ўтмай, Геллер жуда машҳур Жонни Карсоннинг "Tonight Show" шоусида жиддий камситишга учради.

Шоу эгаси кумуш идишлар столини тайёрлади. Геллер ўзининг маҳоратини ишончли тарзда намойиш эта олмади ва бу муваффақиятсизлик учун ноқулай муҳитни айблади.

"Тамом бўлдим деб ўйладим, - деб эслайди Геллер. - Мен меҳмонхонамга қайтиб, Исроилга қайтиш учун нарсаларни йиға бошладим, бошқа қилар ишим қолмаганди".

Бироқ эртаси куни эрталаб Карсоннинг рақиби қўнғироқ қилиб, телекўрсатувида қатнашишни сўради. Бу тажриба телекинетик учун сабоқ бўлди, у ўшандан бери кўпроқ синовларга учраган, бироқ у ўзига қаратилган танқидларини қабул қилишни ўрганганини айтади.

"Атрофимда жуда кўп тортишувлар бор: бу ҳақиқатми ёки йўқ? Бу ҳийлами?" деб ўйланади у.

"Мен Оскар Уайлднинг айтганларига қўшиламан: Ҳаётда улар ҳақида гапирадиган нарсадан ҳам ёмонроқ нарса бор ва улар бу ҳақда гапиришмайди."

Бироқ Геллер шоу-бизнесдаги йўқотишлари ҳақида очиқ гапиради.

"Мен булимия ва анорекцияга дучор бўлдим, - дейди Геллер Нью-Йоркдаги ўн йиллигини эслаб. - Ҳамманинг эътибори, босим ва скептикларга чидай олмасдим."

Унинг фикрича, оиласи билан Японияда ўтган йил унинг ҳаётини ўзгартирган. Кейинчалик улар Буюк Британияга кўчиб ўтишди ва у ерда тахминан 35 йил давомида Беркширдаги сокин қишлоқда яшадилар.

Юлдузлар инъоми

Бизнинг музей бўйлаб ошиғич экскурсиямизда ақлга сиғмас номлар ҳам тилга олинди. Геллер онаси томондан психоанализ асосчиси Зигмунд Фрейднинг узоқ қариндоши эканлигини тушунтиради.

Кадиллакка ёпиштирилган 2600 та ялтироқ қошиқнинг кўпчилиги бир вақтлар Уинстон Черчиллдан тортиб Жон Кеннеди ва Жеймс Дингача бўлган тарихий ёки машҳур шахсларга тегишли эди.

Муҳаммад Алининг бокс қўлқоплари бор; Диего Марадонага тегишли футбол тўпи; Геллерга устозлик қилган ва уни ижодий изланишларига ундаган сюрреалист рассом Дали томонидан кўплаб совғалар.

Қаддофийнинг Нью-Йоркдаги учрашувларидан кейин Геллерга юборган модель самолёти даҳшатли маълумот бўлди. Бу 1973 йилда Исроил ҳарбий-ҳаво кучлари томонидан уриб туширилган Ливия Араб ҳаво йўллари самолётининг модели эди. Геллернинг фикрича, Қаддофий у орқали ғазабини Исроилга гўё кўрсатмоқчи бўлган.

Ва кейин сирли зарҳал тухумсимон нарса бор эди.

"Жон Леннон менга ўзга сайёраликлардан олганман деб шу тухумни берди, - дейди Геллер. - Мен унга чекиб олганмисиз дедим. У эса йўқ, бу ҳақиқий деб жавоб берди".

80-90 йилларга оид бир қанча буюмлар ўша пайтда Геллернинг яқин дўсти бўлган Майкл Жексонга тегишли эди.

Бу ерга келувчи айрим меҳмонлар менга поп юлдузининг ўлимидан сўнг унга қўйилган жинсий зўравонлик айбловларини ҳисобга олган ҳолда, бу буюмларнинг намойишга қўйилиши тўғримас дейишди. Бироқ Геллер хонанданинг айбсизлигини таъкидлайди.

"Ҳеч ким мени ёқтирмайди"

Олти йил олдин Геллер рафиқаси Ханна билан Исроилга қайтиб келди. Уларнинг вояга етган фарзандлари ҳозир Лондон ва Лос-Анжелесда яшайди.

"Ҳар бир исроилликнинг қалбида ўз ватанига қайтишга бўлган қандайдир руҳий, қизғин истак яшайди, - дейди у. - Бу мен учун жуда муҳим эди."

Унинг шахсий бойлигининг катта қисми нефть ва минерал компаниялардаги пул маблағлари, шунингдек, ўйин-кулгидан келади, лекин у нафақага чиқиш ҳақида ўйламайди.

У Британия матбуотининг эътиборидаги одамлигича қолмоқда. Охирги сарлавҳаларни ўқиб, у футбол натижаларини башорат қилади; Брекситни тўхтатиш таҳдиди; ва Сувайш каналида ботиб қолган юк кемасини телепатия орқали ҳаракатлантиргани учун олқиш.

Усмонли империяси даврида совун заводи бўлган ерда музей очиш ғояси унга Эски Яффадаги бўш бинони кўрсатган кўчмас мулк агенти билан тасодифий учрашувдан кейин пайдо бўлди.

"Мен Британиядаги уйимдан бор нарсамни шу ерга олиб келишимни дарҳол англадим, - дейди Геллер. - Менимча, буюм тўпловчиман. Менда бунча кўп нарса борлигини ҳам билмасдим. Улар бутун уйни эгаллади. Улар чортоқда ва чамадонларда сақланган".

Деворлар плакатлар, саёҳатлардан эсдаликлар билан қопланган - қошиқ букиш намойишлари ва Геллернинг ўзи ижросидаги "My Way" қўшиғи ёзуви - музей ўзига хос характернинг унутилмас кўргазмасига айланди.

"Меҳмонлар келса хурсанд бўламан, кетишларида улардан шунчаки сўрайман: "Сизга маъқул келдими? Ҳамма "Жуда ажойиб бўлди" деб жавоб беради", дейди Геллер юқумли табассум билан.

"Бу ғайриодатий музей, - деб хитоб қилади у. - Дунёнинг ҳеч қаерида бунақасини топа олмайсиз, мендек гидни ҳам топа олмайсиз!"

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek