"Ўйнашмагин арбоб билан"ми ёки президент соғлиги билан "ўйнашса", нима бўлади? Turkiya, dunyo, siyosat, yangiliklar
Сурат манбаси, Reuters
Туркия полицияси президент Эрдоғаннинг соғлиги билан боғлиқ миш-мишларни текширишга киришди. 30 кишини терговга тортди.
Уларнинг барчаси Туркия президентининг аҳволи ҳақида нотўғри маълумот тарқатишда айбланишмоқда.
Бир кун аввал ижтимоий тармоқларнинг турк сегментида #olmus - "ўлди" ҳэштеги билан постлар тарқалган.
Туркия президентининг тарафдорлари бунга унинг соғ-саломат эканини кўрсатувчи ёзув ва видеолар билан жавоб беришган.
Энди эса, кибер фазодаги "шов-шув"нинг тагига етиш учун полиция ҳам ишга киришган.
Алоқадор мавзулар:
Режеп Таййип Эрдоған ҳозир 67 ёшда.
Соғлиги билан боғлиқ бу галги гап-сўзларга аввалига ижтимоий тармоқларда пайдо бўлган иккита видео сабаб бўлган.
Унинг Глазго сафарини бекор қилиш қарори эса, миш-мишларни янада кучайтирган.
Глазго шу кунларда глобал иқлим ўзгаришига бағишланган ва дунёнинг тақдири боғлиқ экани айтилган саммитга мезбонлик қилаётир.
Видеоларнинг бирида эса, дунёнинг етакчи 20 давлати лидерлари иштирокида шу дам олиш кунларида Римда бўлиб ўтган саммит акс этган.
Унда Туркия президентининг ёрдамчиси қўлловида кетаётгани акс этган.
Глазгога сафарини ҳам президент Эрдоған энг сўнггида бекор қилган.
Бунинг сабабини ўзининг хавфсизлиги билан боғлиқ талабларни Шотландия таъминлай олмагани билан изоҳлаган.
Аммо Туркия лидери шу ҳафта чоршанба куни жамоатчиликка кўриниш берган.
Ўзининг бошқарувдаги партияси қудратга келганининг 19 йиллигига бағишлаб пойтахт Анқарада уюштирилган тадбирларда иштирок этган.
Унинг партиядоши Аҳмет Ҳамди Чамли ҳам, "Раис Истанбулдан Анқарага келди. У соппа-соғ", - деб твит қилган.
Айни мақолада X томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз X ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири X пост
Расмий маълумотларнинг деярли имконсизлиги манзарасида президент Эрдоғаннинг соғлиги билан боғлиқ миш-мишлар илк бор тарқалаётгани йўқ.
Туркия президенти 2011 йилда йўғон ичагида жарроҳлик амалиёти ўтказган.
Жарроҳнинг сўзларига кўра, унинг полиплари олиб ташланган ва бу ҳақда расман хабар берилган.
Бунинг ортидан президент Эрдоған ўзининг саратонга чалингани ҳақидаги гап-сўзларни изчил равишда рад этиб келган.
Аммо жамоатчилик унинг соғлиги ҳақида бошқа ҳеч нарса билмайди.
Ўтган ой ҳам Туркия президентининг аҳволи ёмон эканига оид миш-мишлар тарқалган.
Ўшанда президентнинг матбуот хизмати унинг баскетбол ўйнаётгани акс этган видеони эълон қилганди.
Римдаги саммитдан ташқари, президент яқинда уч кун Африкада ҳам бўлиб қайтганди.
Режеп Таййип Эрдоған Туркияни 19 йилдан буён бошқариб келади.
У 2003-2014 йиллар оралиғида Туркия Бош вазирлик қилган, кейин президент бўлган.
Туркияда навбатдаги президент сайлови 2023 йилга режаланган.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
