Энди ота ҳам декрет отпускаси олади
Сурат манбаси, Reuters
Узоқ баҳслардан кейин Нигерия ҳукумати давлат ишларида ишлайдиган оталарга янги чақалоғи туғилганида икки ҳафталик "декрет таътили"га чиқишига рухсат берувчи ҳужжатни имзолади.
Мухбирларга кўра, ушбу масалала жамиятда бир неча йил муҳокама қилинган.
Бу янгиликни кузатувчилар Нигерияда давлат ишларида банд бўлганлар иш шароитини яхшилаш йўлидаги муҳим қадам деб ҳисоблашмоқда.
Нигерия Фуқаролик Хизмати раҳбари Фоласаде Еми-Эсандан иқтибос келтиришларича, 14 кунлик отаслик таътили "янги чақалоқ билан отасининг бир-бирига яхши боғланишига ёрдам беради".
Еми-Эсан хоним айтишича, икки ҳафталик таътилни чақалоғи энди туғилган оталар ва тўрт ойликдан кичик чақалоқни оталикка олган эркаклар ололадилар.
Бунгача Нигерия қонунчилигида фақат аёлларга туғруқдан кейинги таътил кўзда тутилган эди.
Оталарга ҳам таътил талаб қилиб чиққан кампания ташкилотчилари бу нарса эркакларнинг ҳам бола парваришига кўпроқ аралашиши ва оналарни кўпроқ қўллаб-қувватлаш учун муҳим эканини таъкидлаб келганлар.
Ушбу қадам Нигериядек бола парвариши фақат оналар зиммасига юклатилган анъанадорлар жамиятида масъулиятни эркакка ҳам бериш ҳаракати сифатида талқин қилинмоқда.
Халқаро ташкилотларга кўра, дунёдаги 187 мамлакатнинг 90 таси чақалоғи туғилган оталарга таътил бериш амалиётини қўллайди.
Декрет отпускасини эса аёлларга жаҳондаги 120 дан ортиқ мамлакат беради.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
