Коронавирус: Хитойга Дельта-вариант Россиядан бордими? Xitoy koronavirus

Хитой матбуоти хабар қилишича, бошида Нанжингда топилган вирус тезда пойтахт Пекин ва беш вилоятда тарқалган.

Вирус 20 июл куни Нанжингнинг гавжум аэропортида аниқланганидан кейин қарийб 200 одамга юққан.

11 августгача Нанжинг аэропортидан барча парвозлар бекор қилинган.

Бутун шаҳар аҳолисини Ковид тест билан текшириш бошланган.

Нанжингда 9,3 миллион одам истиқомат қилади, шаҳарнинг барча аҳолиси билан бирга меҳмонлар ҳам тестдан ўтказилади.

Хитойда Уҳандаги илк коронавирус юқиш ҳолатидан кейинги оммавий вирус тарқалиши Нанжинг шаҳрида кузатилган.

Одамлар ижтимоий тармоқларда эълон қилган постларда тест учун узун навбатлар ҳосил бўлганини кўриш мумкин, расмийлар юз ниқобини тақишга, бир-биридан бир метр узоқликдаги масофани сақлаш ва навбатда турган вақти гаплашмасликка чақирган.

Расмийларга кўра, коронавируснинг ўта юқумли Дельта-варианти бўлгани ва Нанжинг аэропорти жуда гавжум бўлгани учун вирус тез тарқалган.

Нанжинг тиббиёт мулозими Динг Жиенинг журналистларга айтишича, юқиш ҳоллари Россиядан 10 июль куни борган самолётни тозалаган фаррошларда аниқланган.

Фаррошлар қаттиқ гигиена талабларига риоя қилмаганлар, дея хабар берган Давлат назоратидаги Синхуа ахборот агентлиги.

Аэропорт раҳбариятига ҳайфсан эълон қилинган, улар "назоратни бўшаштириш ва нопрофессионал бошқарув"да танқид қилинганлар.

Ўтказилган тестлар вирус камида 13 шаҳарга тарқаб улгурганини кўрсатган.

Мутахассислар вирус тарқалиши ҳали эрта босқичида экани ва уни назоратга олиш мумкинлигини айтишган.

Расмийларга кўра, Нанжингда коронавирусни юқтирган етти кишининг аҳволи оғир.

Янги юқиш ҳоллари ортидан Хитойдаги ижтимоий тармоқларда "Хитой вакциналари Дельта-варианти олдини ололмайдими" деган гап-cўзлар тарқалган.

Юқтирганлар эмланган-эмланмаганлари маълум эмас.

Жануби-Шарқий Осиё мамлакатларининг бир нечаси шу вақтгача фақат Хитой вакцинасига умид қилиб турганлари ва энди бошқа вакциналарни ҳам қўллашни бошлашлари ҳақида эълон қилганлар.

Шу вақтгача Хитой чегараларини ёпиш ва маҳаллий вирус ўчоқларини тезлик билан иҳоталаш орқали коронавирусни назорат остига олишнинг уддасидан чиқиб келмоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek