Ангела Меркел гапларини эшитишда АҚШга Дания ёрдам берган
Сурат манбаси, Reuters
Даниянинг махсус хизматини Европанинг қатор етакчи сиёсатчилари, хусусан, Германия Канцлери Ангела Меркел суҳбатларини яширинча тинглашда АҚШ махсус хизматига ёрдам беришда айбламоқдалар.
Бу ҳақдаги хабар Дания жамоатчилик телерадио компанияси Danmarks Radio да эълон қилинган, Германиядаги Suddeutsche Zeitung газетаси мақола эълон қилган.
Danmarks Radio журналистик суриштирув ўтказган, Дания Мудофаа истиҳборот хизмати - FE да вазиятни яқиндан билган тўққиз манба билан суҳбатлашган.
Хабарда айтилишича, FE АҚШнинг Миллий Хавфсизлик Агентлиги NSAга пойтахт Копенгаген яқинидаги махфий станцияга киришга изн берган.
Бу станциядан эса Интернет-провайдерларнинг сувости кабелларини кузатиш имкони бўлган.
Натижада 2012 йилдан 2014 йилгача Германия, Франция, Швеция ва Норвегиядаги етакчи сиёсатчиларнинг телефон сўзлашувлари тингланган, электрон почталари ўқиб борилган.
Худди шундай айблов 2013 йили илгари сурилган, АҚШдан Россияга қочган кўплаб махфий маълумотлар ҳақида билган Эдвард Сноуден АҚШ махсус хизматлари Ангела Меркел телефон сўзлашувларини яширинча тинглаб бораётгани ҳақида хабар берган эди.
Ўшанда Оқ Уй Ангела Меркел телефони тингланмаган ва келажакда ҳам тингланмайди, дея рад этганди.
Германия АҚШнинг яқин иттифоқчиси ҳисобланади.
Германия Президенти Франк-Валтер Штайнмайер ва Ангела Меркел сўзчиси телефон сўзлашувларини яширинча тинглашга Даниянинг алоқаси борлигидан бехабар бўлганларини айтганлар.
Қатор мамлакатлар Дания раҳбариятидан норози бўлдилар, изоҳ талаб қилмоқдалар.
Даниянинг FE хизмати ҳам АҚШнинг NSA агентлиги ҳам бу борада шарҳ бермади.
Ушбу хабардан кейин Эдвард Сноуден АҚШ Президенти Жо Байденни ушбу ишга аралашганликда айблади.
2012-2014 йиллари Жо Байден АҚШ Вице-Президенти лавозимини эгаллаган.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
