Жаред Кушнер: Дональд Трампнинг кўз-қулоғи бўлган куёв – Янгиликлар, Америка

Жаред Кушнер Оқ уйга жуда умумий тушунчалар билан келди, уй Ғарбий қанотидаги узоқ давом этган жанжалллардан сўнг Оқ уйни тарк этди. У ҳокимият учун курашларга бир неча марта аралашди, баъзида Трамп маъмуриятидаги ўрнини сақлаб қолиш учун қаттиқ курашишига тўғри келди.

Давлат бошқарувида тажрибаси бўлмаган жаноб Кушнер қайнотаси Президент Дональд Трампга бош маслаҳатчи бўлди.

Ёши 37да бўлган куёвнинг асосий иш тажрибаси отасининг кўчмас мулк бизнесини бошқаришда тўпланган эди.

Дипломатик салоҳияти бўлмаса ҳам, унга Исроил Фаластин зиддиятини ҳал қилиш вазифаси юклатилди ва президентнинг Хитой, Мексика ва Канада билан алоқалар бўйича етакчи маслаҳатчисига айланди.

Жаноб Трампнинг қизи Иванкага уйланган жаноб Кушнерга, шунингдек, ветеранларнинг ижтимоий ҳимоясини реформа қилишдан тортиб, Мексика билан ҳамкорлик ўрнатишгача бўлган Оқ уйдаги бюрократик тўсиқларга тўла вазифалар топширилди.

Аммо АҚШ медиаси Ҳамма нарсалар вазири деб атаган бу одамнинг иши қайнотаси президентлик муддатининг биринчи йилида ёқ орқага кета бошлади.

Феврал ойида АҚШ ўта махфий деб таснифлаган маълумотлар билан танишиш учун жаноб Кушнерга берилган вақтинчалик рухсатнома олиб қўйилди. Шунингдек, бир ой ўтиб, доимий рухсатномани олгунича Овал кабинетдаги муҳим учрашувлардан четлатилди.

Рейтингнинг пастлаши "Washington Post" Хитой, Исроил, Бирлашган Араб амирликлари ва Мексика расмийлари қандай қилиб жаноб Кушнернинг бизнес манфаатларидан унга таъсир ўтказиш учун фойдаланиш ҳақида ёпиқ музокара қилгани ҳақида хабар бергач бошланди.

Жаноб Кушнернинг Ғарбий қанотда четга суриб қўйилиши унинг Оқ уй девони раҳбари Жон Келли билан мавқе талашиб қолгани ҳақидаги хабарлар чиқиши асносида кечди. Жон Келли унга берилган рухсатнома даражасини пасайтириб қўйди.

Жаноб Келли АҚШ денгиз кучлари собиқ генерали сифатида кўплаб рақибларини енгиб чиққан, аммо Оқ уйга Стив Баннон ва Райнс Прибус билан бирга келган жаноб Кушнер тимсолида у ўзига мос рақибни учратди.

Жаноб Трамп бир гал куёвини таърифлаб, уни "сиёсатда жуда уста" деган эди.

АҚШнинг БМТдаги вакили Никки Ҳейли президентга унинг куёви "ҳеч ким тушунмайдиган яширин даҳо" деган эди.

Жаноб Кушнер ўзига берилган бу таърифларни 2016 йили Оқ уй учун кампанияда рақибларни доғда қолдириб, амалда оқлади.

Қизғин кечаётган сайлов кампанияси менежери Кори Левандовски сайловдан аввал ишидан бўшатилгач, хабарларга кўра, айнан жаноб Кушнер уни кетишга мажбур қилган.

Жаред Кушнер Ливингстонда (Нью Жерси) туғилиб, икки опаси ва акаси билан ўсган.

Анъанадор яҳудий бўлган бобо ва бувиси ҳолокостдан омон қолиб, 1949 йили АҚШга келишган. Отаси Чарльз эса Нью Жерсида кўчмас мулк бизнесида давлат орттирган.

Даниел Голденннинг "Қабул баҳоси: Американинг ҳукмрон синфи қандай қилиб элит коллежларни сотиб олмоқда" номли китобида Жаред паст баҳо олишига қарамай Ҳарвардга ўқишга кирганини ёзган.

Китобда ёзилишича, Жаред ўқишга кирган йили Чарльз Кушнер университетга 2.5 миллион доллар хайрия қилади. Бир пайтда Корнелл ва Принстон университетларига ҳам бир марталик хайрия қилган.

2006 йилда атиги 25 ёшида жаноб Кушнер "New York Observer"ни сотиб олди, аммо унинг давлат лавозимидаги иши бунчалик силлиқ кетмади.

Газетанинг 15 йиллик муҳаррири Питер Каплан жаноб Кушнер газетани сотиб олгач, уч йил ўтиб ўртадаги келишмовчиликлар боис, ишдан кетди.

Кейинги етти йил ичида - жаноб Кушнер "Observer" билан алоқани узиб, Оқ уйга келгунгача муддатда қолган саккиз муҳаррир ҳам бирин кетин ишдан кетди.

У 2008 йили отаси солиқдан қочгани, сайлов кампаниясига ноқонуний равишда пул ўтказгани ва гувоҳликларни сохталаштиргани учун қамалгач, оилавий компания бошқарувини қўлга олди

Катта Кушнер куёвини фоҳиша билан бўлганини видеога олиб, уни синглисига юборади ва шу орқали уларнинг ўзига қарши гувоҳлик бериши олдини олишга уринганини тан олди.

Унга жаноб Трамп президентлигининг охирги ҳафталарида амнистия берди.

2009 йили Жаред Иванка Трамп билан Нью Жерсидаги "Трамп гольф клуби"да никоҳдан ўтди. Уларнинг уч фарзанди бор.

Жаноб Кушнер ва жаноб Трампнинг ўзаро иттифоқи қисман уларнинг ўхшаш тажрибасига таянади.

Иккиси ҳам ёшлик чоғида отасидан катта бизнесни мерос олган сиёсий аутсайдерлардир. Кушнерлар Манҳеттанда, Трамп Тауэрдан сал нарида жойлашган осмонўпар бинога эгалик қилади.

Дональд Трампнинг отаси Фредерик Крист Трамп ҳам зиддиятли шахс бўлиб, уй ажратишда ирқий камситишларга йўл қўйгани учун судланган.

Аммо қайнотасидан фарқли ўлароқ, жаноб Кушнер камерага гапиришни хушламайдиганлардан.

Бу саҳна ортидаги қаҳрамон Трампнинг сайлов кампанияси ва Кремл ўртасидаги алоқалар борасидаги Сенатнинг текшируви доирасида сўроқ қилинган.

Жаноб Кушнер 2016 йил декабрида нафақат Москванинг элчиси билан гаплашган, балки АҚШ санкциясига тушган Россия давлат банки раҳбари билан ҳам учрашган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek