Трамп - расман Республикачилар президент сайлови номзоди AQSh
Сурат манбаси, Getty Images
АҚШ Республикачилар Партиясининг қурултойида жорий Президент Доналд Трамп 2020 йилдаги президентлик сайловига номзод сифатида илгари сурилди.
24 август тунида Шимолий Каролина штатининг Шарлотта шаҳрида АҚШ Республикачилар Партиясининг миллий съезди иш бошлади.
Одатда қурултой бир неча кун давом этади, бу гал Covid-19 туфайли штатлардан борган делегатлар сони кескин кам бўлган.
Конференция қатнашчилари Доналд Трамп номзодини илгари сурар эканлар, "Яна тўрт йил!" деб қичқирганлар.
Қурултойда Доналд Трампнинг президент сифатида қилган ишлари видеоси намойиш этилган.
Фирқадошларига мурожаат қилар экан, Президент Трамп Демократлар "сайловни ўғирлашлари мумкинлигидан" огоҳлантирган.
Доналд Трамп почта орқали овоз бериш тизими "овозлар ўғирланиши"га сабаб бўлишидан огоҳлантирган.
АҚШда сайловчи ўз бюллетенини почта орқали юбориш йўли билан овоз бериши мумкин.
Бу йилги коронавирус вазияти Америка почта тизимини издан чиқарган, шунинг учун ҳам бюллетенлар 3 ноябр - сайлов кунигача етиб бормаслиги мумкинлиги ҳақидаги хавотирлар билдирилмоқда.
74 яшар Президент Доналд Трампга қарши 77 яшар Жо Байден қарши чиққан.
Бир неча кун олдин Демократлар қурултойида жаноб Байден расман президентликка номзод сифатида илгари сурилди.
У 2009 йилдан 2017 йилгача президент Барак Обама маъмуриятида вице-президент лавозимини эгаллаган.
Демократлар конференцияси якунида нутқ сўзлаган Жо Байден Доналд Трамп ҳукмронлиги "ҳаддан зиёд ғазаб, ҳаддан зиёд кўп қўрқув ва ҳаддан зиёд кўп қарама-қаршилик" келтириб чиқарганини айтди, Трампнинг "зулматли даври"га чек қўйишга чақирди.
Жо Байденнинг кексалигини урғулашни хоҳлайдиган Доналд Трамп рақибини "уйқусираган Жо" деб атайди, аммо йил бошидан буён АҚШда ўтказиб келинаётган омма фикрини ўрганиш сўровларида Жо Байден Трампдан олдинда келмоқда.
Аммо кузатувчилар сайловгача икки ойдан кўп вақт борлигини, амалдаги президент сайловчилар кўнглини олишга муваффақ бўлиши эҳтимолини ҳам рад этмайдилар.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
