Коронавирус: Америкада вирусга қарши илк вакцина синовдан ўтказилмоқда

Америка Қўшма Штатларида коронавирусга қарши биринчи вакцинани клиника шароитларида синовдан ўтказиш бошланди.

AP ахборот агентлигининг хабар қилишича, Сиэтлдаги Kaiser Permanente тадқиқот маркази мутахассислари тўрт нафар кўнгиллига тажриба дозасидаги вакциналарни қилишган.

Вакцина таркибида коронавирусдан олинган хавфсиз генетик код мавжуд бўлиб, у инсонга Covid-19 ни юқтирмайди.

Экспертларнинг айтишларича, бу ва ҳозирда ишлаб чиқилаётган бошқа вакциналарнинг қанчалик самарали эканини аниқлашга бир неча ой кетади.

Вакцинани олган биринчи одам Женнифер Холлер исмли 43 яшар аёл бўлган.

"Ҳамма учун аҳамиятли бир нарсани қилиш ажойиб имконият", дея унинг сўзларидан иқтибос келтирмоқда Ассошиэйтед пресс агентлиги.

Ўзбекистон: Коронавирусга чалинганлар сони 11 кишига етди

Ўзбекистон, коронавирус: Бозорларда озиқ-овқат етарлими?

Коронавирус: Руҳий саломатлик, асабларни қандай асраймиз? Дунё ва Ўзбекистон

Дунёдаги барча олимлар ушбу тадқиқотни яқиндан кузатишмоқда.

АҚШнинг Миллий соғлиқни сақлаш институти томонидан молияланаётган клиник синовлар ҳайвонларда синаш босқичини ташлаб, бирдан инсонларда синалмоқда.

Одатда вакцина иммунитет тизимини қанчалик ишга туширишини аниқлаш мақсадида шундай қилинади.

Вакцинани ишлаб чиқарган Moderna Therapeutics ширкатига кўра, вакцина синалган ва ўзини оқлаган жараёнда яратилган.

Лондон Империя коллежидан инфекцион касалликлар бўйича эксперт Жон Трегонинг вакцинада амалдаги технологиялар қўлланганини тасдиқлайди.

"Вакцина одамлар учун хавфсиз технологияларни қўллаган ҳолда юқори андозаларда яратилган. Барча кўнгиллиларнинг ҳолати синчковлик билан кузатилади. Бу ҳаммаси жуда катта тезликда амалга ошириляпти. Чунки бу ҳамкасб олимлар билан эмас, балки вирус билан мусобақа. Бу ишларнинг барчаси инсоният учун қилинмоқда",- дейди лондонлик мутахассис.

Маълумки, вакциналар, масалан, қизамиққа қарши вакцина, заиф ёки ўлик вируслардан яратилади.

Аммо mRNA-1273 номи берилган вакцина коронавирус касаллигини келтириб чиқарувчи SARS-CoV-2 вирусидан яратилмаган.

Олимлар томонидан лаборатория шароитларида яратилган коронавирус вакцинаси таркибида вирусдан нусҳа кўчирилган ирсий коднинг парчаси бор.

Олимлар унинг ёрдамида инсон иммунитет тизимини вирусга қарши курашга тайёрлаш мумкин, деб умид қилишмоқда.

Кўнгиллиларга турли миқдордаги тажрибавий вакцина қилинган.

Уларнинг ҳар бирига 28 кун фарқи билан иккитадан вакцина қўлдан қилинади.

Бироқ синов муваффақиятли ўтган тақдирда ҳам, вакциналар оммалашиши учун орадан яна бир ярим йилга қадар вақт ўтиши мумкин.