Янги касаллик: Қовуқда пивзавод ё алкоголь сиядиган аёл аниқланди - Дунё Ўзбекистон O`zbekiston

Алкоголь сиядиган одам ҳақида ҳеч эшитганмисиз?

АҚШ олимлари шу пайтгача номаълум касалликка дуч келишган:

Улар нима ичса ҳам алкоголб сиядиган 61 яшар аёлни аниқлашган.

Текширувлар натижасига қараганда, аёлинг қовуғи амалда жажжи пиво заводи каби ишлаган.

Алкоголь ичмаган, ишлаб чиқарган

Тиббиёт оламидаги обрўли Annals of Internal Medicine нашри чоп этган ўзига хос ҳолат тасодифан топилган.

Шифокорлар бемор аёлни жигар жарроҳлигига тайёрлашган.

Пенсильваниялик аёл циррознинг оғир шакли ва қанд касалидан азият чеккан.

Бу касалликлар ичкиликка муккасидан кетган одамларда ҳам учрайди.

Шу боис аёлнинг сийдиги таркибида ҳар сафар катта миқдорда этанол чиқишидан ҳеч ким ҳайратланмаган.

Боёқиш аёл эса ҳеч қачон алкоголь ичмаганини қайта-қайта айтса ҳам, ишонишмаган.

Шифокорлар бу аёл кўп ичишини яширмоқда, деб ўйлашган.

Қизиқувчан шифокор

Бир шифокор аёлнинг пешобида алкоголь миқдори жуда баланд бўлса-да, у ҳар доим ҳушёр қолаётганига, ичган одамга ўхшамаслигига эътибор қаратган.

Шифокор ҳайратланиб, аёлни қайтадан обдон текширган.

Натижада унинг сийдигида спирт парчаланиши оқибатида пайдо бўладиган этилглюкуронид ҳам, этилсульфат ҳам йўқлигини аниқлаган.

Лекин, пешобидаги спирт миқдори баланд қолаверган.

Қонини текшириб кўргач, аёл ҳақиқатни айтаётгани, яъни алкоголь ичмаслиги маълум бўлган.

Қовуқдаги пиво ачитқиси

Кейинги текширувлар унинг қовуғига бориб тақалган.

Аёлнинг қовуғида Candida glabrata деб аталадиган бир ҳужайрали замбуруғ гуркираб кетган экан.

Бу замбуруғ - пиво бижғитадиган ачитқининг энг яқин қариндоши.

Айни замбуруғ соғлом одамлар танасида ҳам учрайди, аммо жуда кам миқдорда.

Аёлни даволашга киришганлар.

Лекин ўтиб кетган қанд касаллиги ва кучсизланган иммун тизим сабабли уни бу инфекциядан халос этиш имкони бўлмаган.

Сийдик пуфагидаги пивзавод

Шифокорлар аёлнинг қовуғидан олинган замбуруғни синаб кўришса, у чиндан ҳам глюкоза молекулаларини парчалаб, этил спиртига айлантирган.

Ҳар қандай алкоголни олиш учун шакар, сув ва ачитқи керак ва бу ҳолатда кислородни бўғиш лозим.

Ана шундай шароитда бижғиш бошланади:

Шакар этил спиртига айланади ва CO2 гази чиқади.

Аёл қанд касалига чалингани боис унинг танаси қондаги шакар даражасини жиловлай олмаган ва катта миқдорда глюкоза сийдикка тушаверган.

Қовуқда кислород етишмагани боис ундаги замбуруғ ҳам бижғийверган.

Шу асно аёлнинг сийдик пуфаги жажжи пиво заводига айланган.

Олдин учрамаган бу касални ҳозир "Сийдик тизими автобижғиш синдроми" (urinary auto-brewery syndrome) деб аташди.

Бу айни касалликнинг илк бора учрашидир.

Аммо илгари овқат ҳазм қилиш тизимида ҳам бижғиш бошланиб кетган одамлар аниқланган.

Уларнинг танасида ишлаб чиқилган алкоголь эса қовуғига тушмасдан, балки қонига ўтган.

Яъни одамлар ўз-ўзидан маст бўлиб қолган, сархушлик ҳис қилган, боши айланган, баъзида кўнгли айниб, ҳатто ҳушидан кетган ҳолатлар ҳам учраган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek